គម្រោងរោងចក្រកាន់តែប្រសើរនៅកម្ពុជា (Better Factories Cambodia) ដាក់ចេញប្រព័ន្ធទូរស័ព្ទស្តីពីសុវត្ថិភាពកម្មករ ដើម្បីផ្ដល់ព័ត៌មាន ជុំវិញវិធានការទប់ស្កាត់ និងបង្ការ ការឆ្លងជំងឺកូវីដ១៩ (Covid-19)។ ទូរស័ព្ទនោះ មានលេខ ០៩៣ ៦៤៤ ៦៤៤ ដែលកម្មករហៅចូលបានគ្រប់ពេលវេលាទាំងអស់។
មន្ត្រីផ្នែកទំនាក់ទំនងបណ្ដោះអាសន្ន នៃគម្រោងរោងចក្រកាន់តែប្រសើរនៅកម្ពុជា លោក លី សុខហេង មានប្រសាសន៍ប្រាប់អាស៊ីសេរីថា គោលបំណងសំខាន់នៃការផ្ដល់ព័ត៌មាននេះ គឺដើម្បីឱ្យកម្មករបានយល់ច្បាស់ពីវិធានការនានា ដើម្បីសុវត្ថិភាពរបស់កម្មករ ក្នុងពេលធ្វើដំណើរ និងនៅកន្លែងធ្វើការ៖ « ជាមធ្យោបាយមួយក្នុងការលើកកម្ពស់ ការយល់ដឹងពីជំងឺកូវីដ១៩។ ណាមួយងាយស្រួល និងឆាប់រហ័ស ហើយកម្មករមិនត្រូវការទូរស័ព្ទទំនើបស្មាតហ្វូនទេ គឺគាត់មានទូរស័ព្ទធម្មតា អាចតេចូលនិងអាចស្ដាប់ពីសំឡេងក្នុងប្រព័ន្ធហ្នឹងតែម្តង។ ស្តាប់ហើយគាត់អាចដឹងព័ត៌មានហ្នឹង ហើយពេលណាក៏អាចទូរស័ព្ទចូលបានដែរ »។
ប្រធានគម្រោងរោងចក្រកាន់តែប្រសើរនៅកម្ពុជា អ្នកស្រី សារ៉ា ផាក (Sara Park) មានប្រសាសន៍ក្នុងសេចក្ដីប្រកាសព័ត៌មានកាលពីថ្ងៃទី៦ ខែមិថុនា ថា ការធានាពីសុខភាព និងសុវត្ថិភាពរបស់កម្មករ នៅកន្លែងការងាររបស់ពួកគេ គឺជាអាទិភាពមួយ ក្នុងចំណោមអាទិភាពចម្បងរបស់អង្គការអន្តរជាតិផ្នែកការងារ (ILO)។ អ្នកស្រីបន្តថា ការយល់ដឹងពីរបៀបការពារខ្លួន និងបង្ការការឆ្លងជំងឺកូវិត១៩ តាមរយៈបណ្ដាញទូរស័ព្ទបន្ទាន់នេះ គឺផ្តល់ អត្ថប្រយោជន៍ សំរាប់កម្មករនិយោជិត ដែលមិនចេះអក្សរ ឬការយល់ដឹងមានកម្រិត។
សេចក្តីប្រកាសពត៌មានដដែលបន្តថា សំឡេងឆ្លើយតបជាអន្តរកម្ម ហៅកាត់ថា IVR គឺជាប្រព័ន្ធឆ្លើយតបដោយស្វ័យប្រវត្តិ នៅពេលហៅចូល ហើយព័ត៌មានទាំងនេះ គឺយកមកពីគោលការណ៍និងអនុសាសន៍របស់អង្គការសុខភាពពិភពលោក (WHO) និងក្រសួងសុខាភិបាល។ សេចក្ដីថ្លែងការណ៍បន្តថា ព័ត៌មានទាំងនេះអាចផ្លាស់ប្ដូរជាប្រចាំ ទៅនឹងបច្ចុប្បន្នភាព ដោយស្របតាមអនុសាសន៍ថ្មីៗ។
មន្ត្រីអង្គការសង្គមស៊ីវិលនិងសហជីព ក៏បានបង្ហាញក្តីបារម្ភនៃការឆ្លងរាលដាលជំងឺកូវីដ១៩ ដែលកម្មករត្រូវជិះរថយន្តកកកុញ នៅពេលធ្វើដំណើរទៅធ្វើការនិងត្រឡប់មកផ្ទះវិញ៕