ប្រទេសកម្ពុជា និងប្រទេសថៃ ស្នើអោយពលករខ្មែរទៅធ្វើការនៅប្រទេសថៃ ដោយស្របច្បាប់ដើម្បីជៀសវាងការរំលោភបំពានរបស់ថៅកែថៃ ជាពិសេសថៅកែទូកនេសាទ។ សំណូមពរនេះ ធ្វើឡើងក្នុងដំណើរទស្សនកិច្ចផ្លូវការ ៣ថ្ងៃ របស់រដ្ឋមន្ត្រីក្រសួងការបរទេសកម្ពុជា នៅក្នុងប្រទេសថៃ ចាប់ពីថ្ងៃទី១០ ដល់ថ្ងៃទី១២ ខែកក្កដា។
បញ្ហាពលករខ្មែរធ្វើការលើទូកនេសាទថៃ ហើយត្រូវបានថៅកែថៃ ធ្វើបាប ក៏ជាប្រធានបទដ៏សំខាន់នៅក្នុងដំណើរទស្សនកិច្ចផ្លូវការ ៣ថ្ងៃ នាទីក្រុងបាងកក ប្រទេសថៃ នោះដែរ។
រដ្ឋមន្ត្រីការបរទេស និងសហប្រតិបត្តិការអន្តរជាតិកម្ពុជា លោក ហោ ណាំហុង ស្នើនាយករដ្ឋមន្ត្រីថៃ លោក ប្រាយុទ្ធ ចាន់អូចា (Prayuth Chan Ocha) និងរដ្ឋមន្ត្រីការបរទេសថៃ លោក ថាណាសក្តិ ប៉ាទិម៉ាប្រាកន (Thanasak Patimaprakorn) ធ្វើយ៉ាងណា កុំឲ្យថៅកែទូកនេសាទថៃ ទទួលពលករខ្មែរមិនស្របច្បាប់ទៀត។
ឆ្លើយតបនឹងសំណើរបស់កម្ពុជា ទាំងនាយករដ្ឋមន្ត្រី និងរដ្ឋមន្ត្រីការបទេសថៃ ពុំបានផ្តល់ចម្លើយណាមួយជាក់លាក់នោះទេ តែផ្ទុយទៅវិញ ភាគីថៃ បានសំណូមពរមកកម្ពុជាវិញ ធ្វើយ៉ាងណាឲ្យពលករខ្មែរ ចូលមកធ្វើការតាមទូកនេសាទជាពលករស្របច្បាប់ ដើម្បីជៀសវាងការរំលោភបំពាន់របស់ថៅកែទូកនេសាទថៃ បន្តទៀត។
បញ្ហានេះ ក្រសួងការទេសកម្ពុជា នឹងធ្វើការជាមួយក្រសួងការងារកម្ពុជា ខណៈសព្វថ្ងៃនេះ មានពលករខ្មែរបានសុំទិដ្ឋាការទៅធ្វើការនៅប្រទេសថៃ ជាពលករស្របច្បាប់ជិត ២ម៉ឺននាក់។
សេចក្ដីប្រកាសព័ត៌មានរបស់ក្រសួងការបរទេសកម្ពុជា ផ្សព្វផ្សាយនៅថ្ងៃទី១៣ ខែកក្កដា ក៏បានបង្ហាញលទ្ធផលសំខាន់ៗ និងវិជ្ជមានជាច្រើនទៀត នៅក្នុងជំនួបសន្ទនារវាងលោក ហោ ណាំហុង ជាមួយនាយករដ្ឋមន្ត្រីថៃ កាលពីថ្ងៃទី១០ ខែកក្កដា និងរដ្ឋមន្ត្រីការបរទេសថៃ នៅថ្ងៃទី១១ កក្កដា ដោយបានចុះហត្ថលេខាលើកិច្ចព្រមព្រៀងដែលអនុញ្ញាតឲ្យប្រជាពលរដ្ឋរស់នៅតាមតំបន់ព្រំដែនអាចទៅធ្វើការនៅប្រទេសថៃ វិលល្ងាច ឬក៏ស្នាក់នៅក្នុងរយៈពេល ១៥ ទៅ ៣០ថ្ងៃ។
កិច្ចព្រមព្រៀងនេះ ក៏បានអនុញ្ញាតអោយពលករខ្មែរប្រហែល ៥០.០០០នាក់ (ប្រាំម៉ឺន) ទៀត ដែលមិនទាន់បានពន្យារពេលប័ណ្ណស្នាក់នៅបណ្ដោះអាសន្ន មុនថ្ងៃផុតកំណត់ថ្ងៃទី៣០ ខែមិថុនា ឆ្នាំ២០១៥ បន្តស្នាក់នៅប្រទេសថៃ រហូតដល់ខែមីនា ឆ្នាំ២០១៦ ដើម្បីបំពេញបែបបទក្លាយជាពលករស្របច្បាប់។
ទាក់ទិនបញ្ហានេះ អ្នកនាំពាក្យក្រសួងការបរទេសកម្ពុជា លោក ជុំ សន្ទរី មានប្រសាសន៍ថា ការប្រែក្លាយពលករខ្មែរនៅបរទេសអោយទៅជាពលករស្របច្បាប់នេះ គឺជាឆន្ទៈរបស់រដ្ឋាភិបាលក្នុងការលុបបំបាត់ការជួញដូរកម្លាំងពលកម្ម៖ «ការដោះស្រាយបញ្ហារំលោភពលកម្មនេះ គឺមិនអាចធ្វើទៅបានក្នុងរយៈពេលខ្លីនោះ ពោលគឺមួយជំហានមួយជំហាន ហើយត្រួតពិនិត្យ»។
តាមតួលេខរបស់ក្រសួងការបរទេសកម្ពុជា បង្ហាញថា ពលករខ្មែរដែលទៅធ្វើការនៅប្រទេសថៃ មានប្រមាណ ៧០០.០០០ (ចិតសិបម៉ឺននាក់)។
ប្រធានអង្គការខារ៉ាម កម្ពុជា (CARAM Cambodia) ដែលធ្វើការងារពាក់ព័ន្ធនឹងពលករចំណាកស្រុកលោក យ៉ា ណាវុធ បានឲ្យដឹងថា ពលករខ្មែររងនូវភាពអយុត្តិធម៌ច្រើនណាស់ គឺនៅពេលពួកគេកំពុងពេញកម្លាំងនោះ ត្រូវបានរដ្ឋាភិបាលថៃ អនុញ្ញាតអោយបន្តស្នាក់នៅ ដើម្បីបម្រើផលប្រយោជន៍សេដ្ឋកិច្ចប្រទេសគេ ប៉ុន្តែនៅពេលពលករខ្មែរធ្លាក់ខ្លួនឈឺ ឬពិការ ត្រូវបានគេចាប់បញ្ជូនយកមកចាក់ចោលនៅស្រុកខ្មែរវិញ។ លោកក៏ទាមទាររដ្ឋាភិបាលកម្ពុជា គិតគួរផងដែរអំពីការខាតបង់ផ្នែកសង្គមនេះ៖ «អ្វីដែលសំខាន់នោះ គឺថា រដ្ឋាភិបាលកម្ពុជា គួរតែព្យាយាមបង្កើតការងារអោយបានច្រើនសម្រាប់ប្រជាពលរដ្ឋ»។
លោកឧបនាយករដ្ឋមន្ត្រី ហោ ណាំហុង បានដឹងនាំគណៈប្រតិភូកម្ពុជា ដែលមានលោក វ៉ា គឹមហុង ទេសរដ្ឋមន្ត្រីទទួលបន្ទុកកិច្ចការព្រំដែន និងអ្នកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ ទៅបំពេញទស្សនកិច្ចផ្លូវការនៅប្រទេសថៃ រយៈពេល ៣ថ្ងៃចាប់ពីថ្ងៃទី១០ ដល់ថ្ងៃទី១២ កក្កដា តបតាមការអញ្ជើញរបស់រដ្ឋមន្ត្រីការបរទេសថៃ លោក ថាណាសក្តិ ប៉ាទិម៉ាប្រាកន។
ក្នុងឱកាសនោះដែរ ភាគីទាំងពីរបានពិភាក្សាស្ដីពីការបើកច្រកស្ទឹងបត់-បានណងអៀន ថ្មីមួយទៀតរវាងកម្ពុជា-ថៃ នៅពេលខាងមុខនេះ ដើម្បីសម្រួលការដឹកទំនិញចេញចូល។ ទន្ទឹមនឹងនោះ ភាគីទាំងពីរក៏បានឯកភាពបើកច្រកអន្តរជាតិអានសេះ ក្នុងខេត្តព្រះវិហារ ដើម្បីសម្រួលការប្រកបរប និងជំនួញជួញដូរ សំដៅលើកកម្ពស់ជីវភាពប្រជាជននៅតំបន់នោះ។
ដោយឡែកក្នុងដំណើរទស្សនកិច្ចនោះ រដ្ឋមន្ត្រីក្រសួងវប្បធម៌ នៃប្រទេសទាំងពីរក៏បានចុះហត្ថលេខាលើកិច្ចព្រមព្រៀងស្ដីពីការប្រគល់-ទទួល វត្ថុបុរាណខ្មែរចំនួន ១៦ដុំ ដែលរាជរដ្ឋាភិបាលថៃ បានឯកភាពជូនមកកម្ពុជា វិញ ក្រោយពីការចរចាដ៏ស្វិតស្វាញរបស់ក្រសួងការបរទេស និងសហប្រតិបត្តិការអន្តរជាតិ។
សេចក្ដីប្រកាសដដែលលើកឡើងថា ក្នុងឱកាសនៃការចរចាផ្លូវការជាមួយរដ្ឋមន្ត្រីការបរទេសថៃ លោកឧបនាយករដ្ឋមន្ត្រី ក៏បានស្នើឲ្យរដ្ឋាភិបាលថៃ អនុញ្ញាតឲ្យអ្នកជំនាញកម្ពុជា ទៅពិនិត្យមើលវត្ថុបុរាណចំនួន ២០ដុំផ្សេងទៀត ដែលសព្វថ្ងៃរដ្ឋាភិបាលថៃ រក្សាទុកនៅទីក្រុងបាងកក ក្នុងគោលបំណងស្នើឲ្យភាគីថៃ ប្រគល់វត្ថុបុរាណ ដែលជារបស់ខ្មែរមកវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។