សាច់ញាតិ សកម្មជន និង​អ្នក​​ប្រើប្រាស់​បណ្ដាញ​សង្គម​ធ្វើ​យុទ្ធការ​ទាមទារ​ឱ្យ​ដោះ​លែង​លោក រ៉ុង ឈុន

ដោយ ហេង រស្មី
2020-08-28
អ៊ីម៉ែល
មតិ
Share
បោះពុម្ព
សាច់ញាតិ សកម្មជន និង​គាំទ្រ​លោក រ៉ុង ឈុន តវ៉ា​ទាមទារ​ឱ្យ​ដោះ​លែង​លោក រ៉ុង ឈុន នៅ​មុខ​សាលា​ឧទ្ធរណ៍ កាល​ពី​ថ្ងៃ​ទី២៦ ខែសីហា ឆ្នាំ២០២០។
សាច់ញាតិ សកម្មជន និង​គាំទ្រ​លោក រ៉ុង ឈុន តវ៉ា​ទាមទារ​ឱ្យ​ដោះ​លែង​លោក រ៉ុង ឈុន នៅ​មុខ​សាលា​ឧទ្ធរណ៍ កាល​ពី​ថ្ងៃ​ទី២៦ ខែសីហា ឆ្នាំ២០២០។
រូប៖ សកម្មជន

សាច់ញាតិ សកម្មជន និង​អ្នក​ប្រើប្រាស់​បណ្ដាញ​សង្គម ដែល​គាំទ្រ​លោក រ៉ុង ឈុន ធ្វើ​យុទ្ធការ​លើ​ហ្វេសប៊ុក ទាមទារ​ឱ្យ​ដោះ​លែង​លោក រ៉ុង ឈុន ចាប់​ផ្ដើម​ពី​ថ្ងៃ​សុក្រ ទី២៧ ខែសីហា នេះ​ត​ទៅ។

យុទ្ធនាការ​ថ្ងៃ​សុក្រ ទាមទារ​ឱ្យ​ដោះ​លែង លោក រ៉ុង ឈុន នេះ ចាប់​ផ្ដើម​ធ្វើ​រៀងរាល់​ព្រឹក​ថ្ងៃ​សុក្រ ម៉ោង ៩កន្លះ។ អ្នក​ចូលរួម  អាច​ពាក់​អាវ​លោក រ៉ុង ឈុន សរសេរ​បដា ឬ​សរសេរ​លើ​ក្រដាស ទាមទារ​ឱ្យ​មាន​ការ​ដោះ​លែង​លោក រ៉ុង  ឈុន ដោយ​រួម​ទាំង​ថត​រូប​បង្ហោះ​តាម​បណ្ដាញ​សង្គម​ហ្វេសប៊ុក។ ក្រៅ​ពី​ទាមទារ​ឱ្យ​តុលាការ​លើកលែង​ការ​ចោទ​ប្រកាន់ និង ដោះ​លែង​លោក រ៉ុង ឈុន យុទ្ធនាការ​នេះ​ក៏​ទាមទារ​រក​យុត្តិធម៌​ជូន​យុវជន​បី​នាក់​ផ្សេង​ទៀត ដែល​ត្រូវ​បាន​ចាប់​ខ្លួន​ក្នុង​ពេល​ទាមទារ​ឱ្យ​មាន​ការ​ដោះ​លែង លោក រ៉ុង ឈុន ដែរ។

ប្រធាន​សមាគម​គ្រូបង្រៀន​​ឯករាជ​កម្ពុជា អ្នក​ស្រី អ៊ុក ឆាយាវី ប្រាប់​ថា ការ​យក​ថ្ងៃ​សុក្រ​ធ្វើ​យុទ្ធនាការ​នេះ ព្រោះ​ថ្ងៃ​សុក្រ​ជា​ថ្ងៃ ដែល​សមត្ថកិច្ច​ចូល​ចាប់​ខ្លួន​លោក រ៉ុង ឈុន។ អ្នកស្រី​ឱ្យ​ដឹង​ទៀត​ថា ចំពោះ​ការ​យក​ពេល​ព្រឹក​នៃ​ការ​ចាប់​ផ្ដើម​ដោយ​អ្នកស្រី​យល់​ថា ម៉ោង ៩កន្លះ​ព្រឹក អាច​ផ្ដល់​ពេល​វេលា​ច្រើន​ដល់​អ្នក​ចូលរួម​ជាង​ពេល​យប់។ អ្នកស្រី​សង្កេត​ឃើញ​ថា ក្នុង​ថ្ងៃ​ចាប់​ផ្ដើម​នេះ គឺ​មាន​អ្នក​ប្រើប្រាស់​បណ្ដាញ​ហ្វេសប៊ុក​ច្រើន​បាន​ចូលរួម​ធ្វើ​យុទ្ធនាការ​នេះ៖ «ខ្ញុំ​ក៏​សូម​អំពាវនាវ​ដល់​បង​ប្អូន​ប្រជា​ពលរដ្ឋ កម្មករ​កម្មការិនី លោក​គ្រូ​អ្នក​គ្រូ​ទាំង​អស់ អង្គការ​នៅ​ក្រៅ​ប្រទេស​ក៏​គេ​គាំទ្រ​នូវ​យុទ្ធនាការ​នេះ​ដែរ ដើម្បី​ឱ្យ​មាន​ការ​ដោះ​លែង​លោក រ៉ុង ឈុន ក៏​ដូច​ជា​យុវជន»

ក្រោយ​មាន​ការ​ប្រកាស​ធ្វើ​យុទ្ធការ​នេះ អ្នក​ប្រើប្រាស់​បណ្ដាញ​សង្គម​មួយ​ចំនួន​នាំ​គ្នា​បង្ហោះ​រូប​ថត​លោក រ៉ុង ឈុន ដោយ​ភ្ជាប់​នឹង​ខ្លឹមសារ​ថា លោក រ៉ុង ឈុន ស្អាតស្អំ និង​ការ​ទាមទារ​ឱ្យ​ដោះ​លែង​មេ​សហជីព និង​អ្នក​ឃ្លាំមើល​ព្រំដែន​រូប​នេះ។

យុវជន ម៉ា ចិត្រា ជា​អ្នក​ចូលរួម​ក្នុង​ការងារ​សង្គម និង​សកម្ម​ក្នុង​ការ​បញ្ចេញ​មតិ​តាម​​ហ្វេសប៊ុក និង​ធ្លាប់​ធ្វើ​ការ​ទាមទារ​ឱ្យ​មាន​ការ​ដោះ​លែង​លោក​ រ៉ុង​ ឈុន នា​ពេល​កន្លង​មក ឱ្យ​ដឹង​ថា លោក​នឹង​ចូលរួម​ក្នុង​ការ​ទាមទារ​នេះ​ដោយ​លោក​នៅ​តែ​យល់​ថា លោក រ៉ុង ឈុន ជា​មនុស្ស​ស្អាតស្អំ។ លោក​បន្ត​ថា ការ​ដោះ​ស្រាយ​បញ្ហា​ព្រំដែន​របស់​រដ្ឋាភិបាល​នៅ​រយៈ​ពេល​ចុង​ក្រោយ​នេះ​ដែល​ចាត់ ឱ្យ​មន្ត្រី​ជំនាញ​ចុះ​ជួប​ពលរដ្ឋ​នៅ​តាម​ព្រំដែន គឺ​រដ្ឋាភិបាល​ហាក់​ធ្វើ​តាម​ការ​ចង់​បាន​របស់​លោក រ៉ុង ឈុន នា​ពេល​កន្លង​មក។ ដូច្នេះ លោក​យល់​ថា អ្វី​ដែល​លោក រ៉ុង បាន​ធ្វើ​កន្លង​ទៅ​គឺ​ជា​រឿង​ត្រឹមត្រូវ​មិន​មែន​ការ​ញុះញង់​នោះ​ទេ៖ «អ៊ីចឹង​ចំណុច​ហើយ​ដែល​ខ្ញុំ​លើក​ឡើង​កន្លង​មក​ថា រដ្ឋាភិបាល​មិន​គួរ​ចាប់​ខ្លួន​អ្នក​ដែល​ឈឺ​ឆ្អាល​រឿង​ព្រំដែន ត្រូវ​លើក​ទឹក​ចិត្ត​គាត់​វិញ​ល្អ​ជា​ជាង​ចាប់​ខ្លួន»

ទាក់ទង​ការ​យុទ្ធនាការ​នេះ អាស៊ី​សេរី​មិន​អាច​សុំ​ការ​អត្ថាធិប្បាយ​ពី​អ្នក​នាំ​ពាក្យ​ក្រសួង​យុត្តិធម៌​លោក ជិន ម៉ាលីន បានទេ។ រីឯ អ្នក​នាំ​ពាក្យ​គណបក្ស​ប្រជាជន​កម្ពុជា លោក សុខ ឥសាន នៅ​តែ​ថ្លែង​ការពារ​ចំណាត់​ការ​របស់​រដ្ឋាភិបាល​ថា ការ​ចោទ​ប្រកាន់​នេះ គឺ​ជា​ការ​អនុវត្ត​ច្បាប់។

អាជ្ញាធរ​កម្ពុជា​បាន​ចាប់ខ្លួន​លោក រ៉ុង ឈុន កាលពី​យប់ ​ថ្ងៃ​ទី​៣១ កក្កដា ​ដោយ​ចោទ​ប្រកាន់​និង​បន្ត​ឃុំខ្លួន​លោក​ពី​បទ «​ញុះញង់​បង្ក​ឲ្យ​មាន​ភាព​វឹកវរ​ធ្ងន់ធ្ងរ​ដល់​សន្តិសុខ​សង្គម​» ក្រោយ​ពេល​អ្នក​ឃ្លាំមើល​បញ្ហា​ព្រំដែន សហជីព និង​គ្រូ​បង្រៀន​រូប​នេះ​ចុះ​ឃ្លាំមើល និង​ផ្ដល់​បទសម្ភាសន៍​ជាមួយ​អាស៊ី​សេរី​ពាក់ព័ន្ធ​នឹង​ការ​ចោទ​ថា វៀតណាម​រំលោភ​យក​ដី​ពលរដ្ឋ​ខ្មែរ​នៅ​ខេត្ត​ត្បូងឃ្មុំ។

ក្រោយ​មក​សមត្ថកិច្ច​ក៏​ចាប់​ខ្លួន​មនុស្ស​ចំនួន ៦នាក់ ទៀត ដែល​ប្រមូល​ផ្ដុំ​គ្នា​ទាមទារ​ឲ្យ​ដោះ​លែង​លោក រ៉ុង ឈុន នោះ រួមមាន យុវជន​ខ្មែរ​ថាវរៈ​ពីរ​នាក់ គឺ ស្ត្រី ឈឿន ដារ៉ាវី និង​លោក ហ៊ុន វណ្ ប្រធាន​គណបក្ស​ខ្មែរ​ឈ្នះ លោក សួង សុភ័ណ្ឌ ប្រធាន​សមាគម​កម្មករ​សេដ្ឋកិច្ច​ក្រៅ​ប្រព័ន្ធ​កម្ពុជា កញ្ញា កណិកា និង​សកម្មជន​គណបក្ស​សង្គ្រោះ​ជាតិ ២នាក់​ទៀត។ តុលាការ​ចោទ​ប្រកាន់​អ្នក​ទាំង ៦នាក់ ពី​បទ «ញុះញង់​បង្ក​ឲ្យ​មាន​ភាព​វឹកវរ​ធ្ងន់ធ្ងរ​ដល់​សន្តិសុខ​សង្គម» និង​ឃុំខ្លួន​ពួក​គេ​ក្នុង​ពន្ធនាគារ​ព្រៃ​ស ដូច​លោក រ៉ុង ឈុន ដែរ។

ក្មួយ​ប្រុស​លោក រ៉ុង ឈុន គឺ​លោក រ៉ុង វិជ្ជា ឱ្យ​ដឹង​ថា យុទ្ធនាការ​ថ្ងៃ​សុក្រ​ទាមទារ​ឱ្យ​ដោះ​លែង លោក​ រ៉ុង ឈុន ជា​សារ​ប្រាប់​ទៅ​រដ្ឋាភិបាល ឬ​តុលាការ​ឱ្យ​ទម្លាក់​ចោល​ការ​ចោទ​ប្រកាន់​លើ​លោក រ៉ុង ឈុន ដែល​លោក​នៅ​តែ​អះអាង​ថា ការ​ចាប់​ខ្លួន​ពូ​របស់​លោក គឺ​ខុស​ច្បាប់ និង​ខុស​ម៉ោង​រដ្ឋបាល៖ «ចំពោះ​យុទ្ធនាការ​នេះ​យើង​ចង់​បង្ហាញ​ថា ទោះ​យើង​អត់​បាន​ធ្វើ​សកម្មភាព​អី​នៅ​ក្រៅ​ក៏​យើង​ចង់​ឱ្យ​បង​ប្អូន​ប្រជាពលរដ្ឋ​យើង​ថត​រូប​មាន​ពាក់​លោក រ៉ុង ឈុន ដើម្បី​ទាមទារ​ឱ្យ​មាន​ការ​ដោះ​លែង»

ក្រោយ​ពី​មាន​ការ​ចាប់​ខ្លួន​លោក រ៉ុង ឈុន ជិត​មួយ​ខែ​មក​នេះ សាច់ញាតិ យុវជន និង​អ្នក​គាំទ្រ​លោក រ៉ុង ឈុន តែង​ធ្វើ​ការ​ទាមទារ​ឱ្យ​មាន​ការ​ដោះ​លែង លោក រ៉ុង ឈុន រួមមាន ការ​តស៊ូ​មតិ​នៅ​មុខ​តុលាការ​ក្រុងភ្នំពេញ ការ​ដាក់​ញត្តិ​ទៅ​ស្ថានទូត​ប្រទេស​ប្រជាធិបតេយ្យ និង​ទីស្នាក់ការ​អង្គការ​សហប្រជាជាតិ​ទទួល​បន្ទុក​សិទ្ធិមនុស្ស​ប្រចាំ​កម្ពុជា។ លោក រ៉ុង វិជ្ជា ឱ្យ​ដឹង​ដែរ​ថា លោក​នឹង​គ្រោង​ដាក់​ញត្តិ​ទៅ​ស្ថានទូត​ប្រទេស​ប្រជាធិបតេយ្យ​ផ្សេង និង​អង្គការ​សិទ្ធិ​មនុស្ស​ជាតិ និង​អន្តរជាតិ ដើម្បី​ឱ្យ​ជួយ​អន្តរាគមន៍។

ចំណែក នៅ​លើ​ឆាក​អន្តរជាតិ​វិញ សហព័ន្ធ​សហជីព​ពាណិជ្ជកម្ម​អន្តរជាតិ (ITUC) ចាប់​ផ្តើម​​ធ្វើ​យុទ្ធនាការ​តាម​អនឡាញ​ ដើម្បី​ទាម​ទារ​ឱ្យ​របប​លោក ហ៊ុន សែន ដោះលែង​លោក រ៉ុង ឈុន និងកញ្ញា ស កណិកា តាំងពី​ថ្ងៃ​ទី២៤ សីហា។ បណ្ដាញ​សហជីព​អន្តរជាតិ​ដែល​តំណាង​ឱ្យ​កម្មករ​ជាង២០០ លាន​នាក់ ទូទាំង​ពិភព​លោក​នេះ អំពាវនាវ​ឲ្យ​រដ្ឋាភិបាល​កម្ពុជា ដោះលែង​លោក រ៉ុន ឈុន និង​កញ្ញា ស កណិកា ព្រោះ​ពួក​គេ​ទាំង​ពីរ​នាក់ មាន​សិទ្ធិ​សេរីភាព​ក្នុង​ការ​បញ្ចេញ​មតិ និង​ការ​ជួបជុំ​គ្នា​​ដោយ​សន្តិវិធី ដែល​ជា​គោលការណ៍​គ្រឹះ​មាន​ធានា​ក្នុង​រដ្ឋធម្មនុញ្ញ​កម្ពុជា។ ជាមួយ​គ្នា​នេះ  សហព័ន្ធ​សហជីព​ពាណិជ្ជកម្ម​អន្តរជាតិ​ស្នើ​ឲ្យ​រដ្ឋាភិបាល​កម្ពុជា បញ្ឈប់​ការ​បង្ក្រាប​តំណាង​សហជីពកម្មករ និង​ត្រូវ​គោរព​សិទ្ធិមនុស្ស និង​សេរីភាព​ជា​មូលដ្ឋាន​របស់​ពលរដ្ឋ៕

 

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល