តំណាង​ក្រុមប្រឹក្សា​សហជីព​ជាតិ​ចំនួន១៥ ស្នើសុំ​ទៅ​ក្រសួង​ការងារ​ដោះស្រាយ​បញ្ហា​ប្រឈម​របស់​ក្រុម​កម្មករ​ដោយសារ​កូវីដ១៩ និង​បញ្ហា EBA

ដោយ ហេង រស្មី
2020-08-07
អ៊ីម៉ែល
មតិ
Share
បោះពុម្ព
តំណាង​សហជីព​កម្ពុជា និង​ជា​ប្រធាន​សម្ព័ន្ធ​សហជីព​ស៊ីខៅដូ (C.CAWDU) លោក អាត់ ធន់ ផ្ដល់​បទសម្ភាសន៍​បន្ទាប់​ពី​កិច្ច​ប្រជុំ​ចរចា​ប្រាក់​ឈ្នួល​អប្បបរមា​ជូន​កម្មករ​សម្រាប់​ឆ្នាំ​២០១៦ នៅ​ថ្ងៃ​ទី​៦ ខែ​តុលា ឆ្នាំ​២០១៥។
តំណាង​សហជីព​កម្ពុជា និង​ជា​ប្រធាន​សម្ព័ន្ធ​សហជីព​ស៊ីខៅដូ (C.CAWDU) លោក អាត់ ធន់ ផ្ដល់​បទសម្ភាសន៍​បន្ទាប់​ពី​កិច្ច​ប្រជុំ​ចរចា​ប្រាក់​ឈ្នួល​អប្បបរមា​ជូន​កម្មករ​សម្រាប់​ឆ្នាំ​២០១៦ នៅ​ថ្ងៃ​ទី​៦ ខែ​តុលា ឆ្នាំ​២០១៥។
RFA/Um Rainsey

តំណាង​ក្រុមប្រឹក្សា​សហជីព​ជាតិ ដែល​មាន​សមាជិក​ស្ថាបនិក​ចំនួន១៥ បាន​ដាក់​លិខិត​ទៅ​ក្រសួង​ការងារ ដើម្បី​ស្នើសុំ​ឲ្យ​ជួយ​អន្តរាគមន៍​​ដោះ​ស្រាយ​បញ្ហា​ប្រឈម​មួយ​ចំនួន នៅ​ក្នុង​វិស័យ​ការងារ​របស់​ក្រុម​កម្មករ កាត់ដេរ​សំលៀកបំពាក់ ក្រោយ​ពេល​ដែល​សហគមន៍​អឺរ៉ុប នឹង​ផ្ដាច់​ប្រព័ន្ធ​អនុគ្រោះ​ពន្ធ EBA ពី​កម្ពុជា នៅ​ថ្ងៃ​ទី១២ សីហា​ខាង​មុខ។ បន្ថែម​ពី​បញ្ហាEBA នេះ ក្រុម​សហជីព ក៏​ព្រួយបារម្ភ​ផង​ដែរ ពី​បញ្ហា​ផល​ប៉ះពាល់​នានា ដោយសារ​ជំងឺ​កូវីដ១៩។

តំណាង​ក្រុមប្រឹក្សា​សហជីព​ជាតិ ដែល​ធ្វើការ​លើ​វិស័យ​ការងារ យល់​ឃើញ​ថា ចាប់​តាំង​ពី​មាន​ការ​រីក​រាលដាល​នៃ​ជំងឺ​កូវីដ១៩ រហូត​មក​ដល់​បច្ចុប្បន្ន​ទាំង​នៅ​ក្នុង​ប្រទេស​កម្ពុជា និង​នៅ​ទូទាំង​ពិភពលោក​មក។ បញ្ហា​ប្រឈម​ខ្លាំង​ក្នុង​វិស័យ​ការងារ​ជា​ច្រើន​មិន​ទាន់​បាន​ដោះ​ស្រាយ ហើយ​បញ្ហា​ខ្លះ​នាំ​ឲ្យ​មាន​ផល​លំបាក​យ៉ាង​ខ្លាំង​ដល់​កម្មករ​និយោជិត ដែល​រង​ផល​ប៉ះពាល់​ផល​ដែរ។

នៅ​ក្នុង​លិខិត​របស់​តំណាង​ក្រុមប្រឹក្សា​សហជីព​ជាតិ ដែល​មាន​សមាជិក​ស្ថាបនិក​ចំនួន១៥ ដាក់​ជូន​ទៅ​ក្រសួង​ការងារ​កាលពី​ថ្ងៃ​ទី៧ សីហា បាន​ទាមទារ​ឱ្យ​រដ្ឋាភិបាល​ដោះ​ស្រាយ​ចំនួន ៩ចំណុច ដែល​រួមមាន​ស្នើ​ឲ្យ​រដ្ឋាភិបាល បន្ត​ចរចា និង​ដំឡើង​ប្រាក់​ឈ្នួល​អប្បបរមា​នៅ​វិស័យ​វាយនភណ្ឌ​កាត់ដេរ និង​ផលិត​ស្បែកជើង តាម​កម្មវិធី​ដូច​បាន​កំណត់ ដើម្បីឲ្យ​កម្មករ​និយោជិក ទទួល​បាន​ប្រាក់​ឈ្នួល​សមរម្យ និង​ថ្លៃថ្នូរ​នៅ​ឆ្នាំ​បន្ទាប់ និង​ស្នើ​ឲ្យ​រដ្ឋាភិបាល​ផ្អាក​ការងារ​វិសោធនកម្ម​ច្បាប់​ស្តី​ពី​ការងារ​មាត្រា ១៤៤ ច្បាប់​ស្ដីពី​ការ​កាត់​បន្ថយ​ប្រយោជន៍​ការងារ​វេន​យប់​ពី ១៣០% មក​ត្រឹម ១០០​% និង​មាត្រា១៦២ ស្ដីពី​ការ​លុប​ចោល​ថ្ងៃបុណ្យ​ចំ​ថ្ងៃឈប់​សម្រាក​ប្រចាំ​ឆ្នាំ​ជា​ដើម។

ប្រធាន​ក្រុមប្រឹក្សា​ជាតិ​សហជីព លោក អាត់ ធន់ បញ្ជាក់​ថា មូលហេតុ​នៃ​ការ​ដាក់​លិខិត​នេះ​ឡើង គឺ​ដោយសារតែ រាល់​បញ្ហា​ដែល​កើតមានឡើង​ក្រោយពី​វិបត្តិ​កូវីដ១៩ នេះ​បាន​ប៉ះពាល់​ដល់​កម្មករ និង​បញ្ហា​ប្រឈម​ផ្សេងៗ។

លោក​បញ្ជាក់​ថា រដ្ឋាភិបាល​ត្រូវតែ​លុបចោល​លិខិត​ពីរ​ចុះ​នៅ​ថ្ងៃ​ទី២៩ មិថុនា ឆ្នាំ២០២០ របស់​នាយកដ្ឋាន​វិវាទ​ការងារ ដែល​អនុញ្ញាត​ឲ្យ និយោជក​បិទ​សហគ្រាស​ក្រោយពី​បាន​ព្យួរ​ការងារ​ចំនួន ២ខែ ដោយ​មិនបាច់​បង់​សោហ៊ុយ​សំណង​ជំងឺចិត្ត និង​ប្រាក់បំណាច់​ទូទាត់​ដល់​កម្មករ។ លោក​ក៏​ស្នើ​ឲ្យ​ចោល​សេចក្ដី​ជូន​ដំណឹង​របស់ក្រ​សួង​ការងារ​ចុះ​ថ្ងៃ​ទី២ មិថុនា ឆ្នាំ២០២០ ស្ដីពី​ការ​ពន្យារ​ពេល​បើក​ប្រាក់​អតីតភាព​ការងារ ដែល​មាន​មុន​ឆ្នាំ២០១៩ និង​ប្រាក់​បំណាច់​អតីតភាព​ការងារ​ថ្មី​ឆ្នាំ២០២០។

លោក​បន្ថែម​ថា លិខិត​ទាំងពីរ​នេះ​បាន​ប៉ះពាល់​យ៉ាង​ខ្លាំង​ទៅលើ​ក្រុម​កម្មករ​[] ដោយសារតែ​និយោជក​ទាំងអស់​ព្យាយាម​បិទ​ក្រុមហ៊ុន​[] ដោយ​មិនបាន​ទូទាត់​ត្រឹមត្រូវ ដោយ​យោង​លិខិត​របស់ក្រ​សួង។ ប៉ុន្តែ​តាម​ធាតុ​ពិត​ក្រុមហ៊ុន​មិនបាន​បិទ​ទេ ក្រុមហ៊ុន​អាច​បើក​ឡើងវិញ​នៅ​ពេល​ណាមួយ​ក៏បាន៖ «និយោជក​មួយ​ចំនួន​គាត់​អត់​ចង់​បិទ​តាម​ច្បាប់​ក្ស័យធន​ទេ ពី​ព្រោះ​គាត់​គេ​មិន​អាច​ឱ្យ​រកស៊ី​ទៀត​ឈ្មោះ​គាត់​ក៏​ខូច​កេរ្តិ៍ឈ្មោះ​ដែរ។ ប៉ុន្តែ​ផ្ទុយ​ទៅ​វិញ​ គាត់​លើក​លេស​នៃ​ការដែល​ក្រសួង​ចេញ​លិខិត​ហ្នឹង​គាត់​បើក​លុយឲ្យ​កម្មករ​តិចតួច គាត់​បញ្ឈប់​កម្មករ​គាត់​ដូច​បិទ​អ៊ីចឹង។បន្ទាប់​មក​គាត់​បើក​ឡើង​វិញ។ អ៊ីចឹង​គាត់​មាន​ខាត​អី ។ សហជីព​ក៏​បញ្ឈប់​ចោល អតីតភាព​កម្មករ ១០ដុល្លា សម្រាប់ ១០ឆ្នាំ​ហ្នឹង​ក៏​លុប​ចោល កម្មករ​ថ្មី​គ្មាន​អ្នក​ណា​តវ៉ា ប្រាក់​ឈ្នួល​ទាប ហើយ​លក្ខខណ្ឌ​ក៏​ពិបាក។ អ៊ីចឹង​គាត់​ជា​អ្នក​ជោគជ័យ​ហើយ​គាត់​មិន​ជាប់​លក្ខខណ្ឌ​អ្វី​ទាំងអស់ បើ​តាមច្បាប់​គាត់​មិន​អាច​ទៅ​រកស៊ី​អ្វី​បានទេ ដល់​គាត់​មិនបាន​អនុវត្ត​បិទ​តាម​ច្បាប់​ផង អ៊ីចឹង​គាត់​រកស៊ី​ធម្មតា​ទៅ»

អាស៊ី​សេរី​បាន​ទាក់ទង​លោក ហេង សួរ អ្នកនាំពាក្យ​ក្រសួង​ការងារ តែ​ទូរស័ព្ទ​របស់​លោក​គ្មាន​អ្នកទទួល។នាយក​ប្រតិបត្តិ មជ្ឈមណ្ឌល​សម្ព័ន្ធភាព​ការងារ និង​សិទ្ធិមនុស្ស​ដែល​ហៅ​កាត់​ថា សង់ត្រាល់ លោក មឿន តុលា ថ្លែង​នៅ​ក្នុង​វេទិកា​អ្នក​ស្ដាប់​អាស៊ី​សេរី នៅ​យប់​ថ្ងៃ​ទី៧ ខែសីហា​ថា ចាប់​តាំង​ពី​មាន​ជំងឺ​កូវីដ១៩ ដែល​បាន​ផ្ទុះឡើង​ចុង​ឆ្នាំ២០១៩ មាន​រោងចក្រ​ចំនួន៧៥ បាន​បិទទ្វារ ហើយ​នៅ​ក្នុង​រយៈ​ពេល ៧ខែ ឆ្នាំ២០២០ នេះ មាន​រោងចក្រ​ចំនួន៨៣ បាន​ប្រកាស​បិទទ្វារ​ជា​ផ្លូវការ និង មាន​រោងចក្រ​ចំនួន៤៥០ ទៀត បាន​ដាក់ពាក្យ​ដើម្បី​ព្យួរ​ការងារ ដែល​ធ្វើឲ្យ​ប៉ះពាល់​ដល់​កម្មករ​ជាង ១៥ម៉ឺន​នាក់។

វិស័យ​កាត់ដេរ​កម្ពុជា​ផ្តល់​ការងារ​ដល់​កម្មករ​ជាង ៨ សែន​នាក់ ដែល​ភាគច្រើន​ជា​ស្ត្រី​វ័យ​ក្មេង​មក​ពី​ទី​ជនបទ ហើយ​បាន​គ្រប​ដណ្ដប់​លើ ៨០ភាគ​រយ​នៃ​ការ​នាំ​ចេញ​ទៅ​ក្រៅ​ប្រទេស។របាយការណ៍​របស់ក្រ​សួង​ពាណិជ្ជកម្ម​កម្ពុជា បាន​ឲ្យ​ដឹង​ថា កម្ពុជា​នាំចេញ​ផលិតផល​សំលៀកបំពាក់​ក្នុង​ទំហំ​ទឹកប្រាក់​ជាង ៦.៤០០ លាន ដុល្លារ​ទៅ​ទីផ្សារ​សហភាព​អឺរ៉ុប និង​សហរដ្ឋអាមេរិក​ក្នុងរយៈពេល ១០ ខែ​ក្នុង​ឆ្នាំ ២០១៩។

រដ្ឋមន្ត្រី​ក្រសួង​ការងារ​លោក អិត សំ​ហេង ធ្លាប់​មាន​ប្រសាសន៍​នៅ​ក្នុង​គេហទំព័រ​របស់​ក្រសួង​ការងារ​ថា ការ​លេចឡើង​នូវ​ជំងឺ​កូវីដ-១៩ នា​ពេល​ថ្មីៗ នេះ បាន​បង្ក​ជា​បញ្ហា​ប្រឈម​ដ៏​ធំ​មួយ​ទៀត បន្ថែម លើ​បញ្ហា​ដែល​មាន​ស្រាប់ ជាពិសេស គឺ​សង្គ្រាម​ពាណិជ្ជកម្ម និង​ការ​ថមថយ​កំណើន​សេដ្ឋកិច្ច សម្រាប់​សកលលោក និង​កម្ពុជា​ផង​ដែរ។

លោក​បញ្ជាក់​ថា ដើម្បី​កាត់បន្ថយ​ផល ប៉ះពាល់ រក្សា​លំនឹង​អាជីវកម្ម និង លំនឹង​ជីវភាព​ជូន កម្មករ​និយោជិត​ទាំង​អស់ រាជរដ្ឋាភិបាល​បាន​ដាក់​ចេញ វិធានការ​អន្តរាគមន៍​បន្ទាន់​ជាបន្តបន្ទាប់ ដល់​វិស័យ​ដែល​ទទួលរង​ផល​ប៉ះពាល់​ធ្ងន់ជាង​គេ គឺ​វិស័យ​អាជីវកម្ម ទេសចរណ៍ និង​វិស័យ​កាត់ដេរ​សំលៀកបំពាក់ ស្បែកជើង និង​កាបូប។

តែ​ទោះ​ជា​យ៉ាង​ណា​ក៏ដោយ​តំណាង​ក្រុមប្រឹក្សា​សហជីព​ជាតិ ទាមទារ​ឲ្យ​ក្រសួង​ការងារ បន្ត​ពង្រីក​ការ​ផ្តល់​ប្រាក់​ឧបត្ថម្ភ​ចំនួន៧០ ដុល្លារ ជូន​កម្មករ និយោជិត​នៅ​ក្នុង​វិស័យ​ផ្សេងៗ ទៀត ក្រៅពី​វិស័យ​កាត់ដេរ និង​ផលិត​ស្បែកជើង។ ព្រមទាំង​បន្ត​ការពិភាក្សា​ជាមួយ​សហគមន៍​អឺរ៉ុប ដើម្បី​ធ្វើ​យ៉ាងណា​រក្សា​ប្រព័ន្ធ​អនុគ្រោះ​ពន្ធEBA បន្ត​ទៅទៀត​ឲ្យ​កម្ពុជា ដើម្បី​ចៀស​វៀង​ផល​ប៉ះពាល់​ដល់​កម្មករ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល