មហាសន្និបាតពីដំណើរការអភិរក្សឃ្មុំព្រៃនិងអាជីវកម្មទឹកឃ្មុំលើទីផ្សារ
2014.02.28
ប្រធានគណៈកម្មការប្រតិបត្តិនៃសហព័ន្ធសហគ្រាសប្រមូល និងអភិរក្សឃ្មុំព្រៃកម្ពុជា និងជាប្រធានគណៈកម្មការសហគមន៍ទឹកឃ្មុំក្រង់តេះ ខេត្តមណ្ឌលគីរី អ្នកស្រី ម៉ម ចាន់ធី ផ្ដល់បទសម្ភាសន៍កាលពីថ្ងៃទី២៧ ខែកុម្ភៈ ឆ្នាំ២០១៤។
តំណាងសហគមន៍ទឹកឃ្មុំជិត ១០០នាក់ មកពីបណ្ដាខេត្តនានា និងសហព័ន្ធសហគ្រាសប្រមូល និងអភិរក្សឃ្មុំព្រៃកម្ពុជា ជួបជុំគ្នាបើកមហាសន្និបាតប្រចាំឆ្នាំនៅទីក្រុងភ្នំពេញ នៅថ្ងៃព្រហស្បតិ៍ ទី២៧ កុម្ភៈ។ មហាសន្និបាតនេះបានពិភាក្សាពិស្ដារពីដំណើរការអភិរក្សឃ្មុំព្រៃ បច្ចេកទេសប្រមូលទឹកឃ្មុំប្រកបដោយនិរន្តរភាព និងចរាចរអាជីវកម្មទឹកឃ្មុំនៅលើផ្សារ ព្រមទាំងពិភាក្សារកដំណោះស្រាយលើបញ្ហាប្រឈមមួយចំនួន។
ឆ្នាំ២០១៤ នេះជាឆ្នាំទី៤ហើយដែលសហព័ន្ធសហគ្រាសប្រមូល និងអភិរក្សឃ្មុំព្រៃកម្ពុជា បានប្រារព្ធមហាសន្និបាតរបស់ខ្លួន ដើម្បីត្រួតពិនិត្យឡើងវិញនូវសកម្មភាពការងាររបស់ស្ថាប័ននេះ ជាមួយអ្នកពាក់ព័ន្ធដទៃទៀត។
ប្រធានគណៈកម្មការប្រតិបត្តិនៃសហព័ន្ធសហគ្រាសប្រមូល និងអភិរក្សឃ្មុំព្រៃកម្ពុជា និងជាប្រធានគណៈកម្មការសហគមន៍ទឹកឃ្មុំក្រង់តេះ ខេត្តមណ្ឌលគីរី អ្នកស្រី ម៉ម ចាន់ធី។ អ្នកស្រីបានថ្លែងចំពោះមុខសមាជិក និងដៃគូពាក់ព័ន្ធថា ការបើកសន្និបាតប្រចាំឆ្នាំនាពេលនេះ គឺជាពេលសមស្របមួយសម្រាប់សមាជិកជួបជុំចែករំលែកបទពិសោធន៍ ចំណេះដឹងដល់គ្នាទៅវិញទៅមក រាយការណ៍ពីការរីកចម្រើននៃផ្នែកទាំង៤ រួមមានរដ្ឋបាល ហិរញ្ញវត្ថុ ទីផ្សារ ផ្នែកត្រួតពិនិត្យគុណភាពផលិតកម្ម ជាដើម៖ «ព្រោះសមាជិកទាំងអស់ទំនេរពីរដូវប្រមូលផលរបស់គាត់ និងជាពេលវេលាល្អសម្រាប់ក្រុមប្រមូលឃ្មុំ និងគណៈកម្មការជួបជុំពិភាក្សាចែករំលែកព័ត៌មានក្នុងចំណោមសមាជិក (ស.ប.អ.ឃ)»។
អ្នកស្រីបន្តថា ជាងនេះទៅទៀត មហាសន្និបាតសាមញ្ញអាចចែករំលែកបញ្ហាសំខាន់ៗដូចជា ការចូលរួមសកម្មភាពជាមួយរដ្ឋាភិបាល វិស័យឯកជន អង្គការមិនមែនរដ្ឋាភិបាល ដើម្បីពង្រឹងភាពជាដៃគូ និងរិះរកយុទ្ធសាស្ត្រនានា សម្រាប់អភិវឌ្ឍន៍សហព័ន្ធតទៅអនាគត។
សហព័ន្ធសហគ្រាសប្រមូល និងអភិរក្សឃ្មុំព្រៃកម្ពុជា បានបង្កើតឡើងក្នុងឆ្នាំ២០១០។
មន្ត្រីសហគ្រាសសេដាក (CEDAC) ដែលជាដៃសំខាន់មួយក្នុងការប្រមូលទិញទឹកឃ្មុំព្រៃ លោក ឆាយ សុខលាង បានថ្លែងក្នុងឱកាសនោះដែរថា ការប្រមូលទឹកឃ្មុំ និងការងារអភិរក្សមានការរីកចម្រើនជាបន្តបន្ទាប់ ក្នុងរយៈពេលជាង ១០ឆ្នាំកន្លងមកនេះ៖ «ទាក់ទងនឹងបរិមាណគុណភាពអីប្រសើរជាងមុន ទោះបីជាវាមិនទាន់បានទៅជាស្តង់ដារអន្តរជាតិ អាចទទួលយកបាន ប៉ុន្តែស្តង់ដារក្នុងស្រុកយើងមានភាពប្រសើរជាងមុន»។
លោកបន្តថា បរិមាណទឹកឃ្មុំបានកើនឡើងទ្វេដងពី ១ពាន់លីត្រ ដល់ ៤ពាន់លីត្រ ក្នុងមួយឆ្នាំ។
អ្នកស្រី ម៉ម ចាន់ធី បង្ហាញថា ការកើនឡើងនេះ គឺស្ថិតក្នុងរយៈពេល ៣ឆ្នាំចុងក្រោយនេះ ដោយសារកត្តាអាកាសធាតុប្រែប្រួល បញ្ហាបច្ចេកទេសថែរក្សា និងប្រមូលផលទឹកឃ្មុំ៖ «កាលពីឆ្នាំ២០១០ នោះ វាអត់សូវមានភ្លៀង អ៊ីចឹងផ្កាក៏វាសូវមានច្រើន និងជម្រករបស់ឃ្មុំក្រេបទឹក ហើយផ្កាអត់សូវមានផ្កាក៏អត់សូវមានដែរ»។
ទោះយ៉ាងណា បរិមាណនេះមិនទាន់បំពេញតាមសេចក្តីប្រើប្រាស់នៅឡើយ។
ទន្ទឹមនេះ ការអភិរក្សឃ្មុំ និងនិរន្តរភាពរបស់វាក៏កំពុងប្រឈមនឹងបញ្ហាផ្សេងៗដែរ ជាពិសេសអាជីវកម្មមួយនេះកំពុងត្រូវគំរាមកំហែងពីសកម្មភាពកាប់បំផ្លាញព្រៃឈើ ការផ្តល់ដីសម្បទានសេដ្ឋកិច្ចដែលរំលោភទៅលើព្រៃអភិរក្សឃ្មុំ។
សមាជិកសហព័ន្ធសហគ្រាសប្រមូល និងអភិរក្សឃ្មុំព្រៃកម្ពុជា គិតត្រឹមឆ្នាំ២០១៣ បានកើនឡើង ១៨ក្រុម ក្នុងនោះមានអ្នកប្រមូលផលជិត ៨០០នាក់ នៅក្នុង ១៧សហគមន៍ គឺសហគមន៍ព្រៃឈើមាន ៧សហគមន៍ តំបន់ការពារមាន៥ និង ៥ ទៀតជាសហគមន៍ជនជាតិដើមភាគតិច។ សហគមន៍ទាំងនេះ មាននៅក្នុងខេត្តចំនួន៦ គឺខេត្តមណ្ឌលគិរី រតនគិរី ព្រះវិហារ ក្រចេះ ស្ទឹងត្រែង និងខេត្តកោះកុង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សាលាដំបូងរាជធានីភ្នំពេញ តម្កល់សាលក្រមកំបាំងមុខទៅលើប្រធានសហជីព លោក ម៉ម រិទ្ធី ឱ្យជាប់ពន្ធនាគារ ១៨ខែ
- សភាអឺរ៉ុប ជំរុញឱ្យសើរើប្រព័ន្ធអនុគ្រោះពន្ធ EBA នៅសល់៨០% និងដាក់ទណ្ឌកម្មជាក់លាក់លើរដ្ឋាភិបាលកម្ពុជា
- លោក ហ៊ុន សែន ស្នើមេដឹកនាំចិនឱ្យផ្ដល់ជំនួយ និងប្រាក់កម្ចីបន្ថែម ក្នុងគ្រាដែលកម្ពុជាអាចប្រឈមនឹងទណ្ឌកម្មសេដ្ឋកិច្ចពីសំណាក់សហភាពអឺរ៉ុប
- អ្នកវិភាគជំរុញឱ្យលោក ហ៊ុន ម៉ាណែត ឱ្យក្លាហានហ៊ាននិយាយជាមួយអ្នកសារព័ត៌មាន
- លោក ហ៊ុន សែន ប្ដេជ្ញាបន្តប្រកាន់ជំហរគោលនយោបាយចិនតែមួយ និងថា ប្រទេសចិនបានជួយនយោបាយកម្ពុជាឱ្យមានឯករាជ្យ
