អាជ្ញាធរ​បន្ត​បង្ក្រាប​ដោយហិង្សា​លើ​ក្រុម​កូដករ​ណាហ្គាវើលដ៍​ក្នុង​ពេល​ពួកគេ​តវ៉ា​រក​ដំណោះស្រាយ

ដោយ ខែ សុណង
2022.03.30
Share on WhatsApp
Share on WhatsApp
អាជ្ញាធរ​បន្ត​បង្ក្រាប​ដោយហិង្សា​លើ​ក្រុម​កូដករ​ណាហ្គាវើលដ៍​ក្នុង​ពេល​ពួកគេ​តវ៉ា​រក​ដំណោះស្រាយ អាជ្ញាធរ​បន្តចាប់បង្ខំឱ្យ​កូដករ​ណាហ្គាវើលដ៍ (NagaWorld) ឱ្យ​ឡើង​រថយន្តក្រុង​កាល​ពី​ថ្ងៃទី២៩ ខែមីនា និងស្នាមរបួសនៅលើ ក របស់កូដករណាហ្គាវើលដ៍។
រូប៖ ពលរដ្ឋ​ផ្ដល់​ឲ្យ

អាជ្ញាធរ​ជាច្រើន​នាក់​បន្ត​បង្ក្រាប​ដោយ​ហិង្សា​ ដោយ​ហ៊ុំព័ទ្ធ និង​ចាប់​រុញ​ច្រាន​ក្រុម​កូដករ​ណាហ្គាវើលដ៍​ជាង​ ២០០​នាក់ ដែល​ពួកគេ​កំពុង​តវ៉ា​ទាមទារ​ឱ្យ​ក្រុមហ៊ុន​ដោះស្រាយ​វិវាទ​ការងារ​ នៅ​រាជធានី​ភ្នំពេញ​នៅ​រសៀល​ថ្ងៃទី៣០ ខែមីនា

តំណាង​កូដករ​ម្នាក់​កញ្ញា ពៅ រស្មី ប្រាប់ អាស៊ីសេរី​ដឹង​នៅ​ថ្ងៃទី៣០​​​ ខែមីនានេះ​ថា អាជ្ញាធរ​ជាច្រើន​បាន​ឡោមព័ទ្ធ និង​ប្រើហិង្សា​ និង​ចាប់​រុញ​ពួកកញ្ញា​រុញ​ចូល​ឡាន​ រួច​ដឹក​យក​ទៅ​ទម្លាក់​ចោល​ជាយ​ក្រុង​ភ្នំពេញ​ដូច​សព្វដង។

កញ្ញាចាត់ទុកទង្វើ​របស់​អាជ្ញាធរ​នេះ​ថា ជារឿង​អយុត្តិធម៌​មិនអាច​ទទួល​យក​បាន​ឡើយ ព្រោះ​គ្រាន់​តែ​ពួកគេ​ទាមទារ​រកដំណោះស្រាយ​ពី​ក្រុមហ៊ុន​ប៉ុណ្ណោះ៖ «វាជា​រឿង​អយុត្តិធម៌​សម្រាប់​ពួក​ខ្ញុំ​ខ្លាំង​ណាស់ពួក​ខ្ញុំ​គ្រាន់​តែ​ត្រូវ​ការ​ដំណោះស្រាយ​ពី​ក្រុមហ៊ុន។ ដូចដែល​ខ្ញុំ​និយាយ​ជា​ដដែលៗ​ អ៊ីចឹង​ វា​ជា​វិវាទ​ការងារ​ទេអ៊ីចឹង​លោក​ថៅកែ​ចូល​ចរចា​ដោះ​គន្លឹះ​ទី១ ​មិន​ចេញ ដោះ​គន្លឹះ​ផ្សេងៗ​ ម៉េច​ចេញ បើ​ជំហរ​ដ៏​ធំ​របស់​ពួកខ្ញុំ គឺ​ចំណុច​ទី​១»

វិទ្យុ​អាស៊ី​សេរី​មិន​អាច​ទាក់ទង​ អ្នក​នាំ​ពាក្យ​ស្នងការដ្ឋាន​នគរបាល​រាជធានី​ភ្នំពេញ​លោក សាន សុខសីហា ដើម្បី​បំភ្លឺ​បញ្ហា​នេះ​បាន​ទេ នៅ​ថ្ងៃ​ទី៣០​ មីនា ដោយសារ​តែលោក​មិន​លើកទូរស័ព្ទ​។

សេចក្តី​ប្រកាស​ព័ត៌មាន​របស់​អ្នកនាំពាក្យ​រដ្ឋបាល​រាជធានី​ភ្នំពេញ ចុះ​ថ្ងៃទី ​២៩ ​មីនា កាលពី​ម្សិលមិញ​ បាន​បដិសេធ​ចំពោះការ​រិះគន់​របស់​សាធារណជន​មក​លើ​សមត្ថកិច្ច ដែល​ថា បាន​ប្រើ​អំពើ​ហិង្សា​ធ្ងន់ធ្ងរ​ដល់​ក្រុម​កូដករ។

ក្នុង​រយៈពេល​ប៉ុន្មាន​ថ្ងៃចុង​ក្រោយ​ជាប់ៗ ​គ្នា​នេះ​ អាជ្ញាធរ​ក្រុងភ្នំពេញ​ប្រើ​អំពើ​ហិង្សា​កាន់​តែ​ខ្លាំង​លើ​ក្រុម​កូដករ​ ដែល​បន្តទាមទារ​ដំណោះស្រាយ​នៅក្បែរ​អគារ​ក្រុមហ៊ុន​។ អាជ្ញាធរ​ បាន​រុញច្រាន​ ចាប់​ក្រៀក​ បោក​កូដករ​ ភាគច្រើន​ជា​ស្រ្តី​ខ្ទប់នឹង​រថយន្ត​ រួចដឹក​ទៅ​ទម្លាក់​នៅ​ក្នុង​ខណ្ឌព្រែកព្នៅ​ ដោយ​គ្មាន​បន្ទប់ទឹក​ប្រើប្រាស់។ ពេលទៅ​ដល់តំបន់ជាយក្រុង​ភ្នំពេញ​ កូដករ​ថា អាជ្ញាធរ​បង្ខាំង​ពួកគាត់​នៅក្នុង​រថយន្ត​រហូតដល់​ម៉ោង ៥ល្ងាច​ ទើបដឹកកូដករទៅ​ទម្លាក់​ទៅ​ទីលាន​ប្រជាធិបតេយ្យ​ ហើយឱ្យ​​ពួកគាត់​រកមធ្យោបាយ​ធ្វើដំណើរ​ត្រឡប់​ទៅផ្ទះរៀងៗ ​ខ្លួន

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។