កម្ពុជាចាប់ផ្ដើមកត់ត្រាទិន្នន័យស្លរ៉ែមាសលើកដំបូង ដែលដំណើរការដោយរោងចក្រក្រុមហ៊ុនចិន នៅក្នុងស្រុកសំបូរ ខេត្តក្រចេះ។
រដ្ឋមន្ត្រីក្រសួងរ៉ែ និងថាមពល លោក ស៊ុយ សែម បានទៅពិនិត្យដំណើរការកត់ត្រាទិន្នន័យស្លរ៉ែមាសលើកទី១ របស់ក្រុមហ៊ុន ស៊ីង យ័ន កាំង យៀក (Xing Yuan Kanng Yeak Co., Ltd) កាលពីថ្ងៃទី១០ ខែតុលា។
ក្រសួងរ៉ែ និងថាមពលបានបញ្ជាក់ថា ទិន្នន័យស្លរ៉ែមាសលើកទី១ របស់ក្រុមហ៊ុននេះ គឺថ្លឹងកំហាប់រ៉ែមាស (Gold Concentrates) មានទម្ងន់ ជាង៧ពាន់៨រយក្រាម (៧ ៨៤៩ ក្រាម) ឬជិត៨គីឡូក្រាម ដែលយកទៅស្លអាចចាក់ចេញជាដុំមាស (Gold Doré) បានចំនួន ០៧ដុំ មានទម្ងន់សរុបជាង ៨ពាន់២រយក្រាម (៨ ២១២,២៧ ក្រាម) ឬជាង៨គីឡូក្រាម ដែលមានអត្រាភាពសុទ្ធ ៩៩.៩%។
ប្រភពដដែលឱ្យដឹងទៀតថា តាមគម្រោងសាកល្បង ៣ខែ ដំបូង ក្រុមហ៊ុនគ្រោងផលិតឱ្យបាន ២០គីឡូក្រាមមាស ក្នុងមួយខែ។ ប្រសិនបើគិតត្រឹមខែធ្នូ ឆ្នាំ២០២២ ខាងមុខនេះ ក្រុមហ៊ុនគ្រោងផលិតឱ្យបាន ចំនួន ៦០គីឡូក្រាម។
ក្រុមហ៊ុនចិន ស៊ីង យ័ន កាំង យៀក (Xing Yuan Kanng Yeak Co., Ltd) ទទួលបានអាជ្ញាប័ណ្ណឧស្សាហកម្មអាជីវកម្មរ៉ែមាស ពីក្រសួងរ៉ែ និងថាមពល កាលពីខែសីហា ឆ្នាំ២០១៨ លើទំហំដីចំនួន ២៨ គីឡូម៉ែត្រក្រឡា ដើម្បីប្រតិបត្តិការអាជីវកម្មរ៉ែមាសរបស់ខ្លួននៅស្រុកសំបូរ ខេត្តក្រចេះ។ ក្រោយពីទទួលបានអាជ្ញាប័ណ្ណ ក្រុមហ៊ុនបានដំឡើងខ្សែសង្វាក់ផលិតកម្មអាជីវកម្មរបស់ខ្លួន តែដោយសារតែបញ្ហាកូវីដ-១៩ ក្រុមហ៊ុនទើបតែបានបញ្ចប់ការសាងសង់ និងរៀបចំខ្សែសង្វាក់ផលិតកម្មរបស់ខ្លួននៅក្នុងខែតុលា ឆ្នាំ២០២២នេះ។
នេះជាកំណត់ត្រាលើកទី២ អំពីរោងចក្រក្រុមហ៊ុនបរទេស ដែលចម្រាញ់រ៉ែមាសរបស់កម្ពុជា។ រោងចក្រចម្រាញ់រ៉ែមាសទី១ មានលក្ខណៈឧស្សាហកម្ម របស់ក្រុមហ៊ុនមានមូលដ្ឋាននៅប្រទេសអូស្ត្រាលី រ៉ឺណេសសង់ មីនីរ៉ាល (Renaissance Minerals (Cambodia) Limited) ត្រូវបានសម្ពោធបើកដំណើរការជាផ្លូវការកាលពីខែមិថុនា ឆ្នាំ២០២១ ស្ថិតនៅតំបន់អូរខ្វាវ ស្រុកកែវសីមា ខេត្តមណ្ឌលគិរី។
អាជីវកម្មរបស់ក្រុមហ៊ុននេះមានសមត្ថភាពជីកយករ៉ែប្រមាណជិត ២លានតោនក្នុង ១ឆ្នាំ និងចម្រាញ់ចេញជាដុំមាសកម្រិត ៩០% (Gold Dore Bars) ប្រមាណ ៣តោននៅក្នុង ១ឆ្នាំ សម្រាប់រយៈពេលប៉ាន់ស្មានដំបូងចំនួន ៨ឆ្នាំ។
មេដឹកនាំរដ្ឋាភិបាលរំពឹងថា អាជីវកម្មរបស់ក្រុមហ៊ុនអូស្ត្រាលីនឹងផ្ដល់ចំណូលថវិកាជាតិពីសួយសារ និងសារពើពន្ធផ្សេងៗ ចំនួន ៤០លានដុល្លារក្នុង ១ឆ្នាំ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។