ពលរដ្ឋនៅជាប់ព្រែកជីកហ្វូណនបារម្ភមិនទទួលបានសំណងសមរម្យទោះរដ្ឋាភិបាលធានាផ្ដល់ឱ្យ
2024.08.06
ទិដ្ឋភាពថ្ងៃសម្ពោធគម្រោងព្រែកជីកហ្វូណន ស្រុកកោះធំ ខេត្តកណ្ដាល កាលពីថ្ងៃទី៥ សីហា ២០២៤។
រូប៖ ហ្វេសប៊ុកលោក ហ៊ុន ម៉ាណែត
ប្រជាពលរដ្ឋរស់នៅជាប់គម្រោងព្រែកជីកហ្វូណន កំពុងព្រួយបារម្ភពីជីវភាព និងផ្ទះសម្បែង ខ្លាចមិនទទួលបានសំណងសមរម្យ បើទោះបី រដ្ឋាភិបាលធានាថា នឹងផ្ដល់សំណងឱ្យក្ដី។ ទោះជាយ៉ាងណា មកដល់ពេលនេះ ពួកគាត់ពុំឃើញមានអាជ្ញាធរពាក់ព័ន្ធ មកដោះស្រាយនោះឡើយ ខណៈដែលរដ្ឋាភិបាល បើកការសាងគម្រោងព្រែកជីកហ្វូណន ជាផ្លូវការ រួចមកហើយ នៅថ្ងៃទី៥ ខែសីហា ម្សិលមិញ។
ស្របពេលដែលរដ្ឋាភិបាល និងពលរដ្ឋ រាប់ពាន់នាក់ចូលរួមអបអរសាទរបើកការសាងសង់ព្រែកជីកហ្វូណនទ្រង់ទ្រាយធំ ប៉ុន្តែពលរដ្ឋមួយចំនួនដែលរងផលប៉ះពាល់ ពីគ្រោងអភិវឌ្ឍន៍មួយនេះ កំពុងព្រួយបារម្ភខ្លាច ពុំទទួលបានសំណងសមរម្យពីរដ្ឋាភិបាល ដែលធ្វើឱ្យពួកគាត់ប្រឈមបញ្ហាជីវភាពខ្វះខាត និងជំពាក់បំណុលកើនឡើងនៅពេលខាងមុខ។
ពលរដ្ឋរស់នៅភូមិព្រែកតាហ៊ីង ឃុំព្រែកថ្មី ស្រុកកោះធំលោកស្រី ស៊្រន បញ្ញា ប្រាប់វិទ្យុអាស៊ីសេរី នៅថ្ងៃទី៥ ខែសីហា ចាប់តាំងពីរដ្ឋាភិបាលប្រកាសគម្រោងព្រែកជីកហ្វូណនមក លោកស្រី ដេកពុំសូវលក់នោះទេ ព្រោះបារម្ភខ្លាចរដ្ឋាភិបាល ពុំផ្ដល់សំណងសមរម្យ ដើម្បីដូរទៅនៅកន្លែងថ្មី។
លោកស្រីបន្ថែមថា ពលរដ្ឋរស់នៅភូមិព្រែកតាហ៊ីង មានប្រមាណ១០០គ្រួសារ ដែលប៉ះពាល់ ពីគម្រោងអភិវឌ្ឍន៍មួយនេះ។ លោកស្រីថា ចាប់តាំងពីរដ្ឋាភិបាលផ្សព្វផ្សាយថា នឹងមានគម្រោង ព្រែកជីកហ្វូណនមក ពុំដែលឃើញអាជ្ញាធរ មកសួរនាំពួក គាត់ពីសំណងនោះឡើយ។ ការណ៍នេះ ធ្វើឱ្យលោកស្រី និងពលរដ្ឋផ្សេងៗទៀត មិនសូវស្រណុកចិត្ត និងដេកភ័យរាល់ថ្ងៃ។
លោកស្រី ស៊្រន បញ្ញា៖ «មិនទាមទារឱ្យលើសសមត្ថភាពខ្ញុំទេ គ្រាន់តែឱ្យបានដីធ្វើផ្ទះវិញសមរម្យ ព្រោះអី យើងធ្វើផ្ទះនេះក៏វាអស់ច្រើន។ ណាមួយវាជាដីកេរ្តិ៍មករហូត ហើយមិនដឹងទៅរកទិញដីនៅណា។ បើសំណងតិចពេក ក៏មិនដឹងទិញនៅឯណា ដូចដឹងស្រាបហើយ ដីសម័យនេះ»។
រដ្ឋាភិបាលកម្ពុជាគ្រោងចាយដើមទុនប្រមាណ ១ពាន់ ៧រយលានដុល្លារលើគម្រោងព្រែកជីកហ្វូណន និងគ្រោងបញ្ចប់គម្រោងនេះនៅឆ្នាំ២០២៨។ រដ្ឋាភិបាលអះអាងថា ចំណែកចំណាយ៥១ភាគរយលើគម្រោងមួយនេះ រដ្ឋាភិបាលបានមកពីការកៀរគរពីសំណាក់ក្រុមឧកញ៉ា និងអ្នកជំនួញឱ្យដាក់ទុនវិនិយោគ។ រីឯ ចំណាយ ៤៩ភាគរយៈទៀត គឺជាការវិនិយោគរួមគ្នា រវាងសហគ្រាសសាធារណៈរបស់រដ្ឋគឺ សហគ្រាស កំពង់ផែស្វយ័តព្រះសីហនុ និងកំពង់ផែស្វយ័តភ្នំពេញ ក្រុមហ៊ុនក្នុងស្រុក និងក្រុមហ៊ុន គ្រប់គ្រងដោយរដ្ឋអំណាចចិនឈ្មោះ China Road and Bridge Corporation (CRBC) ក្រោមកិច្ចព្រមព្រៀងសាងសង់ ប្រតិបត្តិ និងផ្ទេរ ឬBOT។
បើទោះបីជារដ្ឋាភិបាលបង្ហាញ ពីថវិកាដែលនឹងចំណាយលើគម្រោងព្រែកជីកហ្វូណននេះ រាប់រយលានដុល្លារក្ដី ក៏មកដល់ពេលនេះ រដ្ឋាភិបាល មិនដែលបង្ហាញថាតើ រដ្ឋនឹងមានលុយប្រមាណភាគរយ ចំណាយលើការផ្ដល់សំណងជូនពលរដ្ឋ ដែលត្រូវប៉ះពាល់នោះឡើយ។ ការណ៍នេះ ដែលធ្វើឱ្យ ពលរដ្ឋភាគច្រើន ពុំសូវសប្បាយចិត្ត ព្រោះពុំដឹងពីផែនការ ជាក់លាក់របស់រដ្ឋាភិបាល។
ចំណែក ពលរដ្ឋម្នាក់ទៀត រស់នៅភូមិជ័យឧត្ដមឃុំសំរោងធំ ស្រុកកៀនស្វាយ លោក ហេង ចុងយ៊ាន លើកឡើងថា ប្រជាពលរដ្ឋនៅភូមិ ជ័យឧត្ដម ប្រមាណ១០០នាក់ ដែលប៉ះពាល់ជាមួយនឹង គម្រោងព្រែកជីកហ្វូណន ហើយ ក៏ពុំទាន់ ទទួលបានសំណងនោះដែរ។ លោកបារម្ភថា ប្រសិនបើរដ្ឋាភិបាល ពុំបានផ្ដល់សំណងសមរម្យ ដូចទៅនឹង តំបន់អភិវឌ្ឍន៍ផ្សេងៗ ដែលធ្វើឱ្យពលរដ្ឋតវ៉ាជាហូរហែកន្លងទៅនោះ គឺជារឿងព្រួយបារម្ភ។ លោកស្នើឱ្យរដ្ឋាភិបាល គួរតែគិតគូរ ផ្ដល់សំណងជូនពលរដ្ឋឱ្យបានសមរម្យ នោះជាការប្រសើរ។
លោកបន្ថែមថា ប្រជាពលរដ្ឋភាគច្រើន ទម្រាំនឹងអាចទិញដី និងកសាងផ្ទះនៅបាន គឺត្រូវចំណាយពេល ១០ ទៅ២០ឆ្នាំ ទើបអាចសន្សំលុយគ្រប់ ហើយមកដល់ពេលនេះ ស្រាប់តែជួបហានិភ័យទៀត។ តែយ៉ាងណា លោកថា ប្រជាពលរដ្ឋ ពុំប្រឆាំងនឹងការអភិវឌ្ឍនោះឡើយ ក៏ប៉ុន្តែ អ្វីដែលពលរដ្ឋចង់បានគឺសំណង ដើម្បីដូរទៅនៅកន្លែងថ្មី ប្រកបមុខរបរចិញ្ចឹមជីវិតឡើងវិញ។ លោកថា ប្រសិនបើ គ្មានសំណងសមរម្យទេ ពលរដ្ឋកាន់លំបាក ខណៈដែលពលរដ្ឋខ្លះ នៅជំពាក់បំណុលធនាគារនៅឡើយ ដោយសារតែយកមកធ្វើផ្ទះ។
លោក ហេង ចុងយ៊ាន៖ «កង្វល់របស់ប្រជាជនវាទូទៅហើយ កង្វល់គ្រប់តែគ្នាម្នាក់ៗ ចាំតែស្ដាប់ដំណឹងផលប៉ះពាល់គ្រប់តែគ្នា។ សំណូមពរឱ្យរដ្ឋាភិបាល ជួយដោះស្រាយសំណងឱ្យបានសមរម្យដើម្បី ដោះដូរទីកន្លែងរស់នៅឱ្យបានសមរម្យ»។
ជុំវិញរឿងនេះ ឧបនាយករដ្ឋមន្ត្រី និងជាអនុប្រធានទីមួយនៃក្រុមប្រឹក្សាអភិវឌ្ឍន៍កម្ពុជា(CDC) លោក ស៊ុន ចាន់ថុល ថ្លែងនៅក្នុងពិធីបើកការដ្ឋានព្រែកជីកហ្វូណននៅថ្ងៃទី៥ ខែសីហា ថា រដ្ឋាភិបាលសន្យាផ្ដល់សំណងសមរម្យដល់ប្រជាពលរដ្ឋរងគ្រោះ ដោយសារគម្រោងព្រែកជីកហ្វូណន ហើយ លោកក៏ស្នើឱ្យប្រជាពលរដ្ឋកុំព្រួយបារម្ភ។ ប៉ុន្តែលោកពុំបញ្ជាក់នោះទេ ថាតើពលរដ្ឋនឹងទទួលសំណងប៉ុន្មាន ហើយនឹងចាប់ផ្ដើម ផ្ដល់សំណង ជូនពលរដ្ឋ នៅពេលណានៅឡើយទេ។
លោក ស៊ុន ចាន់ថុល៖ «ខ្ញុំបាទសូមធ្វើការបញ្ជាក់អះអាងជូនបងប្អូនថា រាជរដ្ឋាភិបាលកម្ពុជាដែលមានក្រសួងសេដ្ឋកិច្ច និងហិរញ្ញវត្ថុជាសេនាធិការនឹងគិតគូរ សិក្សាយ៉ាងលម្អិត និងវាស់វែងច្បាស់លាស់ដើម្បីដោះស្រាយបញ្ហាផលប៉ះពាល់នេះ សំដៅធានាក្នុងការផ្ដល់សំណងយ៉ាងសមស្របជូនដល់បងប្អូនប្រជាពលរដ្ឋ។ អាស្រ័យហេតុនេះ សូមបងប្អូនប្រជាពលរដ្ឋជឿទុកចិត្តលើរដ្ឋាភិបាល និងកុំមានការព្រួយបារម្ភលើបញ្ហាប៉ះពាល់នេះ»។
ការយឺតយ៉ាវ និងពុំទាន់ច្បាស់លាស់ពីសំណង ធ្វើឱ្យពលរដ្ឋខ្លះដែលរងផលប៉ះពាល់ នាំគ្នាបង្ហោះសារលើបណ្ដាញសង្គម ហ្វេសប៊ុក (Facebook) ជាបន្តបន្ទាប់ ដោយរៀបរាប់ អាណិតស្រណោះ ស្រុកកំណើត និងផ្ទះដែលធ្លាប់រស់នៅជាយូរមកហើយ។ ជាក់ស្ដែង ពលរដ្ឋម្នាក់ ដែលមានគណនី ហ្វេសប៊ុក (Facebook) ឈ្មោះ ម៉ូលីដិន សេង (Moliden Seng ) បានបង្ហោះសារនៅថ្ងៃទី៥ ខែសីហាថា ខណៈអ្នកដទៃ អបអរ ការបើក គម្រោងព្រែកជីកហ្វូណន លោកស្រី កំពុងស្រណោះ ដីផ្ទះ ដែលជាជម្រកដ៏កក់ក្ដៅ ធ្លាប់រស់នៅតាំងពីក្មេង លោកថា បន្តិចទៀតទីនេះ នឹងត្រូវក្លាយជាផ្លូវ ទឹកមានកប៉ាល់ ជិះកាត់។ ចំណែក លោកស្រី មិនដឹងថាជីវិតទៅមុខទៀតយ៉ាងណានោះទេ។
លោកស្រីបន្ថែមថា ប្រសិនបើ បានសំណងសមរម្យ ដែលអាចទិញដីថ្មី រស់នៅ និងសង់ផ្ទះបានវិញនោះ គឺជារឿងល្អ។ ដូច្នេះ លោកស្រី សង្ឃឹម ថារដ្ឋនឹងផ្ដល់សំណងជាទីពេញចិត្តដល់ប្រជាជនដែលប៉ះពាល់ ឱ្យសមនឹងតម្លៃ ដែលពួកគាត់ បានខំលះបង់ផ្ទះសម្បែង ដើម្បីគម្រោងព្រែកជីកមួយនេះ។
ទាក់ទិនរឿងនេះ នាយកទទួលបន្ទុកកិច្ចការទូទៅនៃអង្គការលីកាដូ (Licadho) លោក អំ សំអាត សង្កេតឃើញថា គម្រោងព្រែកជីកហ្វូណន ទទួលបានការគាំទ្រច្រើន ពីសំណាក់ប្រជាពលរដ្ឋ។ លោកបន្ថែមថា ដើម្បីឱ្យពលរដ្ឋលែងភ័យបារម្ភ និង សប្បាយចិត្តនោះ រដ្ឋាភិបាលត្រូវប្រកាសឱ្យពលរដ្ឋបានដឹងលម្អិត ពីផែនការ ផ្ដល់សំណងសមរម្យជូនគាត់។
លោក អំ សំអាត៖ «អ្វីដែលសំខាន់នោះគឺ អាជ្ញាធរក៏ដូចជាក្រសួងពាក់ព័ន្ធគួរតែមានការផ្ដល់ព័ត៌មានលម្អិតទៅដល់ប្រជាពលរដ្ឋអំពើ ការផ្ដល់សំណង និងផលប៉ះពាល់ ដើម្បីកុំឱ្យប្រជាពលរដ្ឋមានការព្រួយបារម្ភ។ ប្រសិនបើលោកពុំទទួលបានព័ត៌មាន គ្រប់គ្រាន់ទេ អ៊ីចឹងប្រជាពលរដ្ឋ លោកមានការព្រួយបារម្ភ។ អ៊ីចឹងការផ្ដល់ព័ត៌មានគ្រប់គ្រាន់ពាក់ព័ន្ធសមរម្យ ឬសមស្របរបស់អាជ្ញាធរ និងក្រសួងពាក់ព័ន្ធ គឺជារឿងល្អបំផុត»។
គម្រោងព្រែកជីកហ្វូណន គ្រោងនឹងបញ្ចប់ត្រឹមឆ្នាំ ២០២៨ ដោយតភ្ជាប់ផ្លូវទឹករវាងទន្លេទៅកាន់សមុទ្ររបស់កម្ពុជា និងឆ្លងកាត់ ខេត្តកណ្ដាល តាកែវ កំពត និងកែប ដែលមានប្រវែងប្រមាណ ១៨០គីឡូម៉ែត្រ ផ្ដួចផ្ដើមដោយលោក ហ៊ុន សែន។
អ្នកឃ្លាំមើលបញ្ហាសង្គម និងពលរដ្ឋទាមទារឱ្យលោក ហ៊ុន ម៉ាណែត បង្ហាញពីតម្លាភាពនៃគម្រោងព្រែកជីកហ្វូណន ឱ្យបានពេញលេញ ក្នុងនោះរួមទាំងផលប៉ះពាល់បរិស្ថានផង។ បន្ថែមពីនោះ ពលរដ្ឋក៏ជំរុញឱ្យរដ្ឋាភិបាលផ្ដល់សំណងឱ្យឆាប់ បើពុំដូច្នេះទេ ពួកគាត់ពុំព្រមរុះរើផ្ទះចេញនោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- មេធាវីគ្រោងដាក់សេចក្តីសន្និដ្ឋានទៅសាលាឧទ្ធរណ៍ភ្នំពេញបញ្ជាក់ពីភាពស្អាតស្អំលោក កឹម សុខា
- អ្នកតាមដាននយោបាយថា អាមេរិកដាក់ទណ្ឌកម្ម លោក លី យ៉ុងផាត់ ជាការកាត់ផ្ដាច់សរសៃឈាមសេដ្ឋកិច្ចរបស់បក្សកាន់អំណាច
- កម្មករវៀតណាមកំពុងសម្ងំធ្វើការក្នុងក្រុមហ៊ុនចម្ការចេកខេត្តរតនគិរី
- លោក ហ៊ុន សែន អួតនៅក្នុងវេទិកាប្រទេសកូរ៉េថា កម្ពុជាមានសន្តិភាព ខណៈអ្នកតវ៉ាទាមទារប្រជាធិបតេយ្យ
- ក្រសួងការបទេស និងគណបក្សប្រជាជនកម្ពុជាចាត់ទុកថា ជារឿងអយុត្តិធម៌ ដែលក្រសួងរតនាគារសហរដ្ឋអាមេរិកដាក់ទណ្ឌកម្មលើលោក លី យ៉ុងផាត់
អត្ថបទពេញនិយម
សង្គម
- ពលរដ្ឋរិះគន់អាជ្ញាធរអប្សរាបណ្តោយឱ្យអ្នកមានលុយមានអំណាចសង់ផ្នូរខ្មោចចិនមួយធំក្នុងតំបន់អង្គរ
- កម្ពុជា និងចិន «មិនអាចទប់ស្កាត់បញ្ហាឆបោកតាមអនឡាញ និងជួញដូរមនុស្សនៅកម្ពុជាបាន»
- អ្នកឃ្លាំមើលថា កិច្ចសហប្រតិបត្តិការ «ត្បូងពេជ្រ» រវាងកម្ពុជា-ចិនគ្មានពន្លឺសម្រាប់កម្ពុជាឡើយ