មន្ត្រីសង្គមស៊ីវិលស្នើដល់រដ្ឋាភិបាល ឱ្យមានវិធានការច្បាប់ឱ្យបានតឹងរ៉ឹងទៅលើមន្ត្រីប៉េអិម ដែលពាក់ព័ន្ធជាមួយការទទួលផលពីការជួញដូរគ្រឿងញៀន។ អ្នកតាមដានស្ថានការណ៍សង្គមលើកឡើងថា ដើម្បីទប់ស្កាត់កុំឱ្យកម្លាំងប្រដាប់អាវុធពាក់ព័ន្ធជាមួយការជួញដូរគ្រឿងញៀន រដ្ឋាភិបាលត្រូវពិនិត្យសារធាតុញៀនលើមន្ត្រីប៉េអិមទូទាំងប្រទេស និងត្រូវលុបបំបាត់ការជ្រើសរើសមន្ត្រីកម្លាំងប្រដាប់អាវុធតាមរយៈសែស្រឡាយ។
មន្ត្រីសង្គមស៊ីវិលលើកឡើងថា ដរាបណារដ្ឋាភិបាលនៅតែមិនមានវិធានការច្បាប់ឱ្យបានតឹងរ៉ឹង ទៅលើកម្លាំងប្រដាប់អាវុធ ដែលពាក់ព័ន្ធជាមួយការជួញដូរគ្រឿងញៀននោះទេ នោះចរាចរណ៍គ្រឿងញៀននៅតែអាចបន្តចែកចាយយ៉ាងអនាធិបតេយ្យក្នុងប្រទេស។
ប្រធានសមាគមសម្ពន្ធនិស្សិតបញ្ញវន្តខ្មែរ លោក កើត សារ៉ាយ លើកឡើងថា បញ្ហាចរាចរណ៍ និងការប្រើប្រាស់គ្រឿងញៀន ដែលនៅបន្តរីកដុះដាលនៅទូទាំងប្រទេស គឺបណ្ដាលមកពីមន្ត្រីមានអំណាច និងកងកម្លាំងប្រដាប់អាវុធជាប់ពាក់ព័ន្ធសកម្មភាពជួញដូរគ្រឿងញៀន។ លោកបន្តថា ដើម្បីកាត់បន្ថយ ឬលុបបំបាត់ការប្រើប្រាស់ និងចរាចរណ៍គ្រឿងញៀនបាន រដ្ឋាភិបាលចាំបាច់ត្រូវពង្រឹងការអនុវត្តច្បាប់ទៅលើមន្ត្រីខិលខូចទាំងនោះឱ្យបានតឹងរ៉ឹង និងត្រូវបង្កើតអង្គភាពថ្មីមួយដោយឯករាជ្យ ដើម្បីស៊ើបអង្កេតមន្ត្រី ដែលពាក់ព័ន្ធការជួញដូរគ្រឿងញៀន ជាជាងទុកឱ្យអង្គភាពសាមីស្វែងរកមន្ត្រីខិលខូចក្នុងអង្គភាពផ្ទាល់ខ្លួន ដែលនឹងមិនសូវមានប្រសិទ្ធភាពនោះឡើយ។
លោក កើត សារ៉ាយ៖«ត្រូវតែមានអង្គភាពសម្ងាត់ ដើម្បីត្រួតពិនិត្យទៅលើអង្គភាពផ្សេងៗ ដែលជាអ្នកមានតួនាទីសំខាន់ក្នុងការប្រយុទ្ធប្រឆាំងរឿងទាំងអស់នេះ បើមិនដូច្នេះទេ គឺថា មនុស្សខូចនៅតែព្យាយាមប្រព្រឹត្តរឿងខូចបាន ដូច្នេះ ការដែលធ្វើឱ្យមានប្រសិទ្ធភាពក្នុងការទប់ស្កាត់គ្រឿងញៀន គឺនឹងមិនអាចទៅរួចទេ»។
ប្រតិកម្មរបស់មន្ត្រីសង្គមស៊ីវិលបែបនេះ ធ្វើឡើងបន្ទាប់ពីកងរាជអាវុធហត្ថខេត្តព្រះសីហនុ បានឃាត់ខ្លួនមន្ត្រីកងរាជអាវុធហត្ថខេត្តកំពង់ស្ពឺចំនួន ៦នាក់ កាលពីថ្ងៃទី២៦ ខែតុលា ជុំវិញការទទួលផលពីអំពើជួញដូរគ្រឿងញៀន។ ក្នុងចំណោមមន្ត្រីកងរាជអាវុធហត្ថទាំង៦នាក់នេះ ក៏មានមេបញ្ជាការរងកងរាជអាវុធហត្ថខេត្តកំពង់ស្ពឺ លោក ទិត្យ វណ្ណៈ និងមេបញ្ជាការមូលដ្ឋានកងរាជអាវុធហត្ថស្រុកភ្នំស្រួច លោក យស ឌីណា ផងដែរ។ ទោះជាយ៉ាងណាក្ដី សាធារណជនលើកឡើងថា ការឃាត់ខ្លួនមន្ត្រីជាន់ខ្ពស់កងកម្លាំងប្រដាប់អាវុធពាក់ព័ន្ធនឹងការជួញដូរគ្រឿងញៀនកន្លងមក ធ្វើឡើងក្នុងរូបភាពគ្រាន់តែឱ្យល្អមើលតែប៉ុណ្ណោះ។ ជាក់ស្ដែង មន្ត្រីនគរបាលខេត្តកែប៥នាក់ ដែលត្រូវបានឃាត់ខ្លួន កាលពីខែកញ្ញាកន្លងទៅ ត្រូវបានស្នងការនគរបាលខេត្តកែប លោក សម្បត្តិ សុធារដ្ឋ អន្តរាគមន៍ឱ្យដោះលែងវិញ ដោយលើកឡើងថា ជាការយល់ច្រឡំទៅវិញ។
ជុំវិញរឿងនេះ អ្នកនាំពាក្យកងរាជអាវុធហត្ថលើផ្ទៃប្រទេស លោក អេង ហ៊ី ប្រាប់វិទ្យុអាស៊ីសេរីថា អាជ្ញាធរបានបញ្ជូនសំណុំរឿងមន្ត្រីកងរាជអាវុធហត្ថទាំង ៦នាក់ ទៅដល់តុលាការខេត្តព្រះសីហនុរួចហើយ។
លោក អេង ហ៊ី៖«បើយើងនៅតែបន្ត កុំថាឡើយ ដែលគាត់ទទួលផលពីបទល្មើសគ្រឿងញៀន សូម្បីតែអ្នក ដែលប្រើប្រាស់ក្នុងកងរាជអាវុធហត្ថកន្លងទៅ បើសិនជារកឃើញ ក៏យើងបានបណ្ដេញចេញពីកងរាជអាវុធហត្ថផងដែរ ហើយចំពោះអ្នកប្រព្រឹត្តបទល្មើស គឺយើងត្រូវអនុវត្តតាមច្បាប់»។
ជុំវិញរឿងនេះដែរ អ្នកសិក្សាផ្នែកច្បាប់ និងជាអ្នកតាមដានស្ថានការណ៍សង្គម លោក លី ចាន់ដារ៉ាវុត គាំទ្រចំពោះចំណាត់ការច្បាប់ទៅលើមន្ត្រីកងរាជអាវុធហត្ថ ។ ទោះជាយ៉ាងណាក្ដី លោកយល់ឃើញថា ដើម្បីទប់ស្កាត់កុំឱ្យមន្ត្រីរាជការពាក់ព័ន្ធជាមួយការជួញដូរគ្រឿងញៀន លុះត្រាតែរដ្ឋាភិបាលលុបបំបាត់អំពើពុករលួយជាប្រព័ន្ធ និងបញ្ឈប់ការជ្រើសរើសមន្ត្រីរាជការតាមរយៈបក្ខពួក។
លោក លី ចាន់ដារ៉ាវុត៖«បញ្ហានៅកម្ពុជាមិនមែនគ្រាន់តែថា ឧក្រិដ្ឋជនអ្នកលក់ទេ ប៉ុន្តែគ្រឿងញៀនចូលមកមន្ត្រីក៏ពាក់ព័ន្ធនឹងការលក់ ឬក៏ជាអ្នកឈរកាងនៅពីក្រោយហ្នឹងទៀត ដែលជាមូលហេតុធ្វើឱ្យយើងមិនអាចបង្ក្រាបគ្រឿងញៀនបានទេនៅប្រទេសកម្ពុជា។ ដូច្នេះខ្ញុំយល់ថា បើសិនជាយើងមិនហ៊ានវះកាត់មន្ត្រី ដែលពាក់ព័ន្ធនឹងបញ្ហាគ្រឿងញៀននេះទេ នោះប្រទេសកម្ពុជានឹងមិនអាចគេចផុតពីគ្រោះកំណាច ឬក៏វិបត្តិគ្រឿងញៀន ដែលកំពុងធ្វើឱ្យយុវជនកម្ពុជាហ្នឹងធ្លាក់ចុះគុណភាព ហើយបង្កអសន្តិសុខច្រើននោះទេ»។
សាធារណជនលើកឡើងថា ដោយសារមេជួញដូរគ្រឿងញៀន ភាគច្រើន គឺជាបុគ្គលមានអំណាច និងមន្ត្រីដែលមានតួនាទីគ្រាក់ៗ ក្នុងជួររដ្ឋាភិបាល ដូច្នេះការបង្ក្រាបបទល្មើសគ្រឿងញៀន មិនបានធ្វើឡើងដោយមានប្រសិទ្ធភាពនោះទេ ហើយករណីឃាត់អ្នកជួញដូរគ្រឿងញៀនភាគច្រើន ធ្វើឡើងតាមបែបពាលស៊ីពាល ដែលមានន័យថា មេជួញដូរគ្រឿងញៀន ចង់កម្ចាត់មេជួញដូរគ្រឿងញៀនដូចគ្នាតែប៉ុណ្ណោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។