អតិថិជនកាន់តែច្រើនទាមទារឱ្យលោក ឡេង ណាវ៉ាត្រា ដោះស្រាយបញ្ហាបង់លុយហើយមិនបានផ្ទះ
2023.07.27
ម្ចាស់បុរីឡេងណាវ៉ាត្រា លោកឧកញ៉ា ឡេង ណាវ៉ាត្រា។
រូប៖ ហ្វេសប៊ុក Leng Navatra
ប្រជាពលរដ្ឋកាន់តែច្រើនទាមទារឱ្យអ្នកឧកញ៉ា ឡេង ណាវ៉ាត្រា ផ្តល់ដំណោះស្រាយករណីបង់ លុយ ៣ឆ្នាំហើយតែមិនទាន់ទទួលបានផ្ទះតាមការសន្យា ខណៈកម្លាំងសាងសង់ផ្ទះក្នុងបុរីឧកញ៉ា រូបនេះថយចុះប្រមាណ ៨០ភាគរយ។ បញ្ហានេះមន្ត្រីសង្គមស៊ីវិលជំរុញឱ្យស្ថាប័នពាក់ព័ន្ធពន្លឿន រកដំណោះស្រាយ កុំឱ្យប៉ះពាល់កាន់តែធ្ងន់ធ្ងរដល់ប្រជាពលរដ្ឋ និងបាត់បង់ទំនុកចិត្តលើវិស័យ អចលនទ្រព្យ។
អតិថិជនទិញផ្ទះពីក្រុមហ៊ុនលោក ឡេង ណាវ៉ាត្រា កាន់តែច្រើនឡើងទាមទារឱ្យ ពន្លឿនរកដំណោះស្រាយដោយអះអាងថា បន្ទាប់ពីបង់លុយហើយមិនបានផ្ទះនោះពួកគាត់កំពុង ជួបការលំបាកខ្លាំងក្នុងការបង់សងបំណុលស្របពេលដែលចំណូលក៏ធ្លាក់ចុះ។
រយៈពេលប៉ុន្មានថ្ងៃក្រោយការបោះឆ្នោតនេះអ្នកទិញផ្ទះពីលោក ឡេង ណាវ៉ាត្រា កាន់តែច្រើន បានផ្សព្វផ្សាយសារលើបណ្ដាញទំនាក់ទំនងសង្គម ដើម្បីទាមទាររកដំណោះស្រាយ ដោយអ្នក ខ្លះផ្សព្វផ្សាយជារូបភាព ខ្លះជាអត្ថបទ និងខ្លះជាវីដេអូ នៅលើហ្វេសប៊ុកផ្ទាល់ខ្លួន និងខ្លះទៀត សរសេរក្នុងខ្ទង់ខមិន (comment) ឆ្លើយឆ្លងលើហ្វេសប៊ុកលោក ឡេង ណាវ៉ាត្រា។
លោកស្រី លឹម ធីតា រស់នៅរាជធានីភ្នំពេញជាអ្នកទិញផ្ទះពីក្រុមហ៊ុនលោក ឡេង ណាវ៉ាត្រា នៅគម្រោង៦អា ក្នុងស្រុកមុខកំពូលខេត្តកណ្តាល កាលពីឆ្នាំ២០២០។ លោកស្រី កំពុងផ្សាយសារលើហ្វេសប៊ុកផ្ទាល់ខ្លួន និងដាក់ក្នុងខ្ទង់ខមិនលោក ឡេង ណាវ៉ាត្រា ទាមទាររកដំណោះស្រាយ ប៉ុន្តែមិនមានការឆ្លើយតបទេ។
លោកស្រីឱ្យដឹងថា ដើម្បីបានលុយគ្រប់សម្រាប់ទិញផ្ទះនៅឆ្នាំ២០២០នោះ លោកស្រីបាន ដេញតុងទីន និងខ្ចីធនាគារថែមមួយចំនួន។ លោកស្រីថា ពេលនេះ កំពុងជួបការលំបាក ក្នុងការសងបំណុលទាំងនោះ។
លោកស្រី លឹម ធីតា៖ «ពិបាកមែនទែនបានន័យថា ចំណូលរបស់យើងអត់គ្រប់ចំណាយ។ ហើយខ្ញុំជំពាក់លុយចងការធនាគារហើយនាំគ្នាដេញតុងទីនយកទៅដើម្បីផ្សំគ្នាហើយរាល់ថ្ងៃនេះបង់ធនាគារនៅឡើយទាំងចំណូលរបស់យើងអត់គ្រប់ការចំណាយប្រចាំថ្ងៃផង»។
អ្នកទិញផ្ទះពីគម្រោងលោក ឡេង ណាវ៉ាត្រា ម្នាក់ទៀតរស់នៅខេត្តកំពង់ស្ពឺ លោកស្រី ចាន់ ទី ថា រយៈពេល៣ឆ្នាំហើយដែលលោកស្រីបង់លុយទៅ ហើយមិនដែលទទួល បានការបកស្រាយអ្វីពីក្រុមហ៊ុនទេ។ លោកស្រី ឱ្យដឹងថា លោកស្រី លក់សម្លៀកបំពាក់មិនដាច់ហើយ ត្រូវបង់សងបំណុលធនាគារប្រចាំខែ ដូច្នេះលោកស្រីចង់ឱ្យលោក ឡេង ណាវ៉ាត្រា សងលុយត្រឡប់មកលោកស្រីវិញ បើមិនបានផ្ទះ។
លោកស្រី ចាន់ ទី៖ «ខ្ញុំចងការពីគេ១ម៉ឺន ត្រូវ៥រយការ៥ភាគរយហើយលុយត្រូវហានិភ័យខ្លាំងមែនទែនតែម្តង។ សម្រាប់ខ្ញុំបញ្ហាឥឡូវនេះខ្ញុំចង់បានលុយមកវិញ ព្រោះដោយសារយើងត្រូវការយកមកសងគេវិញ»។
ទាំងអតិថិជនដែលអាស៊ីសេរីបានសម្ភាសន៍ និង អ្នកដែលផ្សព្វផ្សាយសារលើហ្វេសប៊ុក លើកឡើងថា ក្រុមហ៊ុនតម្រូវឱ្យពួកគាត់ទិញដោយបង់ថ្លៃពេញ នឹងទទួលបានការបញ្ចុះតម្លៃ ១ម៉ឺនដុល្លារ គឺបញ្ចុះពីការលក់២ម៉ឺន៨ពាន់ដុល្លារក្នុងផ្ទះ១ល្វែងមកត្រឹម១ម៉ឺន៨ពាន់ដុល្លារ ហើយសន្យា រយៈពេល១ឆ្នាំ កន្លះទទួលបានផ្ទះ ប៉ុន្តែជាក់ស្តែងមិនបាន។
វិទ្យុអាស៊ីសេរីមិនអាចសុំការបកស្រាយពីលោក ឡេង ណាវ៉ាត្រា បានទេនៅថ្ងៃទី២៦ ខែកក្កដា ដោយហៅទូរស័ព្ទចូលច្រើនដងតែមិនមានអ្នកទទួល។
នៅថ្ងៃទី២៤ ខែកក្កដា ក្រុមហ៊ុនលោក ឡេង ណាវ៉ាត្រា បានចេញលិខិតបដិសេធសារ លើម្ចាស់ហ្វេសប៊ុកមួយឈ្មោះ Ratyna Cool ជុំវិញការចោទថា បង់លុយទិញផ្ទះ ២៥ខែហើយ តែសសរធ្វើផ្ទះ១ដើមក៏មិនឃើញមាន។ ក្រុមហ៊ុនលោក ឡេង ណាវ៉ាត្រា បញ្ជាក់ថា សារនេះខុសការពិតនាំឱ្យមហាជនយល់ច្រឡំលើក្រុមហ៊ុន។
ទោះយ៉ាងណាក្រុមហ៊ុន លោក ឡេង ណាវ៉ាត្រា បានអញ្ជើញម្ចាស់ហ្វេសប៊ុករូបនេះ ទៅសម្របសម្រួល នៅថ្ងៃទី៣០ ខែកក្កដា។ ម្ចាស់ហ្វេសប៊ុកRatyna Cool បញ្ជាក់ថា មិនទាន់ ផ្តល់សម្ភាសន៍ឱ្យអាស៊ីសេរី ទេរង់ចាំជួបភាគីក្រុមហ៊ុនសិន។
អតីតអ្នកទីផ្សារលក់ផ្ទះឱ្យលោក ឡេង ណាវ៉ាត្រា ថ្លែងដោយសុំមិនបញ្ចេញឈ្មោះថា លោកមិនដឹងមូលហេតុជាក់លាក់នៃការធ្វើផ្ទះឱ្យអតិថិជនយឺតយ៉ាវនេះទេ ប៉ុន្តែលោកថា គ្រឿងចក្រ និងកម្លាំងសាងសង់នៅគម្រោង ៦អា កន្លែងកំពុងមានជម្លោះនេះថយចុះរហូតដល់៨០ភាគរយ។
អតីតអ្នកទីផ្សារ៖ «កម្លាំងជាងធ្វើវាស្បើយជាងចាប់ផ្តើមដំបូង ដូចជាថយច្រើនដែរ កម្លាំងជាងថយចូលពី៧០ ទៅ ៨០ភាគរយ»។
ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាពលោក យ៉ង គិមអេង ជំរុញឱ្យក្រុមហ៊ុន និងអាជ្ញាធរពាក់ព័ន្ធពន្លឿនដោះស្រាយបញ្ហានេះដោយបើកចំហ ដើម្បីកុំឱ្យប៉ះពាល់កាន់តែខ្លាំង លើពលរដ្ឋ និងការពារកុំឱ្យមហាជនបាត់បង់ទំនុកចិត្តលើវិស័យអចលនទ្រព្យ។
លោក យង់ គិមអេង៖ «វាអាចប៉ះពាល់ដល់ការវិនិយោគវិស័យអចលនទ្រព្យនៅកម្ពុជាដែរ។ អ្នកដទៃមិនដឹង ប៉ុន្តែពេលឮធ្វើឱ្យមានការរារែកដែរ ចំពោះការដែលគេទៅទិញទៅវិនិយោគទៅលើចលនទ្រព្យទៅថ្ងៃក្រោយនេះជារឿងមួយសំខាន់ដែរ»។
ក្រៅពីអ្នកឧកញ៉ា ឡេង ណាវ៉ាត្រា គឺមានឧកញ៉ា ល្បីឈ្មោះមួយចំនួនទៀតក៏កំពុងជួបបញ្ហាក្ស័យធនលើវិស័យអចលនទ្រព្យដែរ ហើយរងបណ្តឹងពីពលរដ្ឋរាប់ពាន់នាក់ដូចជា ឧកញ៉ា ជា សារ៉ន និង ឧកញ៉ា ហ៊ី គឹមហុង ខណៈឧកញ៉ាមួយចំនួនទៀត បានរត់គេចខ្លួន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សាលាដំបូងរាជធានីភ្នំពេញ តម្កល់សាលក្រមកំបាំងមុខទៅលើប្រធានសហជីព លោក ម៉ម រិទ្ធី ឱ្យជាប់ពន្ធនាគារ ១៨ខែ
- ពលរដ្ឋ និងអ្នកការពារសិទ្ធិមនុស្សធ្វើធម្មយាត្រាពីក្រុងកំពតមកភ្នំពេញ ដើម្បីលើកកម្ពស់ការគោរពសិទ្ធិមនុស្ស
- លោក ហ៊ុន សែន ស្នើមេដឹកនាំចិនឱ្យផ្ដល់ជំនួយ និងប្រាក់កម្ចីបន្ថែម ក្នុងគ្រាដែលកម្ពុជាអាចប្រឈមនឹងទណ្ឌកម្មសេដ្ឋកិច្ចពីសំណាក់សហភាពអឺរ៉ុប
- អ្នកវិភាគជំរុញឱ្យលោក ហ៊ុន ម៉ាណែត ឱ្យក្លាហានហ៊ាននិយាយជាមួយអ្នកសារព័ត៌មាន
- លោក ហ៊ុន សែន តែងតាំងលោក ហៃ វណ្ណា និងសកម្មជន ១៨នាក់ទៀតជាទីប្រឹក្សា និងជំនួយការ
