ពលរដ្ឋបារម្ភអស់ដីអស់ផ្ទះ នៅពេលរដ្ឋាភិបាលត្រៀមបើកការដ្ឋានព្រែកជីក ហ្វូណន
2024.08.02
ទីតាំងមាត់ព្រែកជីកហ្វូណន ដែលរដ្ឋាភិបាលត្រៀមសម្រាប់ពិធីបើកការដ្ឋាន នៅព្រែកតាកែវ ក្នុងខេត្តកណ្ដាល នៅថ្ងៃទី៥ ខែសីហា ឆ្នាំ២០២៤។
រូប៖ ហ្វេសប៊ុកក្រសួងសារធារណការ និងដឹកជញ្ជូន
រដ្ឋាភិបាលកម្ពុជារបស់ត្រកូល ''ហ៊ុន'' កំពុងសម្រុកឃោសនាបង្ហាញពីមោទនភាព និងអំពីការត្រៀមពិធីបើកការដ្ឋានសាងសង់ព្រែកជីកហ្វូណនតេជោ នៅថ្ងៃទី៥ ខែសីហា ដែលចំថ្ងៃកំណើតរបស់លោក ហ៊ុន សែន។ ប៉ុន្តែអ្នកឃ្លាំមើល លើកឡើងថា ទោះរដ្ឋាភិបាលប្រឹងរៀបចំបំប៉ោងព្រឹត្តិការណ៍យ៉ាងណា ក៏មិនអាចធំគគ្រឹកគគ្រេងសមបំណងដែរ ព្រោះពលរដ្ឋតាមដងព្រែកភ័យខ្លាចត្រូវបណ្ដេញចេញដោយអយុត្តិធម៌ និងក៏ស្របពេលប្រជាពលរដ្ឋទូទៅភ័យរឿងបាត់បង់ទឹកដីពី គម្រោងតំបន់ត្រីកោណអភិវឌ្ឍន៍។
ស្របពេលថ្ងៃបើកការដ្ឋានសាងសង់ព្រែកជីកហ្វូណនតេជោ កាន់តែខិតជិតមកដល់រដ្ឋាភិបាល លោក ហ៊ុន ម៉ាណែត កំពុងបង្ហាញមោទនភាព និងបានត្រៀម រៀបចំពិធីធំៗ ជាច្រើន។
រដ្ឋាភិបាលបានអនុញ្ញាតឱ្យមន្ត្រីរាជការ បុគ្គលិក កម្មករ និយោជិត និងសិស្ស និស្សិតទូទាំងប្រទេសឈប់សម្រាកមួយថ្ងៃនៅថ្ងៃទី៥ ខែសីហា ដើម្បីចូលរួមអបអរសាទរពិធីបើកការដ្ឋានសាងសង់ព្រែកជីកហ្វូណនតេជោ។ រដ្ឋាភិបាលថែមទាំងបានធ្វើយុទ្ធនាការកៀរគរប្រជាពលរដ្ឋ និស្សិត ព្រះសង្ឃ និងមន្ត្រីរាជការគ្រប់ក្រសួង-ស្ថាប័ន ឱ្យចេញវីដេអូបង្ហាញការគាំទ្រ លើការសាងសង់ព្រែកជីកហ្វូណនតេជោ។
ក្រៅពីនេះ ចលនាលើកផ្លាករូបថតនាយករដ្ឋមន្ត្រីកូនលោក ហ៊ុន ម៉ាណែត និងអតីតនាយករដ្ឋមន្ត្រីឪលោក ហ៊ុន សែន នៅទីតាំងការដ្ឋានសាងសង់ នៅតាមដងផ្លូវ និងតាមទីវត្តអារាម ត្រូវបានធ្វើយ៉ាងផុលផុស ហាក់ស្រដៀងគ្នានឹងប្រទេសកូរ៉េខាងជើង។ បន្ថែមពីនេះ លោក ហ៊ុន សែន និងលោក ហ៊ុន ម៉ាណែត ក៏បានបង្ហោះបទចម្រៀង ពាក់ព័ន្ធនឹងព្រែកជីកនេះ មិនចាញ់ផលិតកម្មធំនោះទេ។
ក្រុមមន្ត្រីសេដ្ឋីឧកញ៉ាវិញ ពួកគេ ក៏មិនភ្លេចឆក់ឱកាសមាសនេះ លើកសរសើរ បញ្ចើចបញ្ចើមេដឹកនាំឪពុកកូនទាំងពីរនាក់នេះដែរ។
អ្នកតាមដានភូមិសាស្ត្រនយោបាយក្នុងតំបន់អាស៊ីប៉ាស៊ីហ្វិកលោក សេង វណ្ណលី ប្រាប់វិទ្យុអាស៊ីសេរីនៅថ្ងៃទី២ ខែសីហាថា រដ្ឋាភិបាលអាចមានចេតនាចង់ដាក់ថ្ងៃទី៥ ខែសីហា ដែលជាថ្ងៃខួបកំណើតរបស់លោក ហ៊ុន សែន ជាថ្ងៃឈប់សម្រាក ដោយភ្ជាប់ព្រឹត្តិការណ៍បើកការដ្ឋានសាងសង់ព្រែកជីកហ្វូណនតេជា។ លោកថា រដ្ឋាភិបាលចង់បង្កើតព្រឹត្តិការណ៍ប្រវត្តិសាស្ត្រនៅថ្ងៃអនាគត។
លោក សេង វណ្ណលី៖ «កិច្ចព្រមព្រៀងទីក្រុងប៉ារីសត្រូវបានដកពីថ្ងៃឈប់សម្រាក ហើយដាក់ថ្ងៃទី៥ ខែសីហា ដែលជាព្រឹត្តិការណ៍បើកការដ្ឋានសាងសង់ព្រែកជីក ជាថ្ងៃឈប់សម្រាកវិញ វាមិនត្រឹមតែអំពីចេតនារបស់រដ្ឋាភិបាលក្នុងការយកហ្នឹងជាថ្ងៃឈប់សម្រាកជាប្រវត្តិសាស្ត្រអំពីព្រែកជីកហ្វូណនផង ហើយខួបកំណើតអតីតនាយករដ្ឋមន្ត្រី ហ៊ុន សែន ផងដែរ»។
ឆ្លើយតបនឹងរឿងនេះ អ្នកនាំពាក្យគណបក្សប្រជាជនកម្ពុជាលោក សុខ ឥសាន បានហៅព្រែកជីកហ្វូណនជាថ្ងៃប្រវត្តិសាស្ត្រ ដែលកម្ពុជាទទួលបានសមិទ្ធផលថ្មី មិនធ្លាប់មានពីមុនមក។ លោកថា ពេលណាមានការដឹកទំនិញឆ្លងកាត់ព្រែកជីក នឹងនឹកឃើញថ្ងៃកំណើត និងការផ្ដួចផ្ដើមគំនិតរបស់លោក ហ៊ុន សែន។ ដូច្នេះ លោកថា ការដាក់ថ្ងៃទី៥ ខែសីហា ជាថ្ងៃឈប់សម្រាកដូចថ្ងៃទី៧ មករា ឬយ៉ាងណានោះ ត្រូវរង់ចាំសារាចររបស់រដ្ឋាភិបាល។
លោក សុខ ឥសាន ប្រាប់វិទ្យុអាស៊ីសេរីនៅថ្ងៃទី២ ខែសីហាថា រដ្ឋាភិបាល ក៏នឹងគិតគួរដោះស្រាយបញ្ហាជូនប្រជាពលរដ្ឋ ដែលរងផលប៉ះពាល់ពីសាងសង់ព្រែកជីកហ្វូណនតេជោ។
លោក សុខ ឥសាន៖ «ផែនការរបស់ជាតិរបស់រដ្ឋ អាហ្នឹង វាប៉ះកន្លែងណា ត្រូវធ្វើសិន។ ក៏ប៉ុន្តែ មានគណៈកម្មការអន្តរក្រសួង ដើម្បីដោះស្រាយសំណងស្របតាមច្បាប់អស្សាមិករណ៍ ដែលរដ្ឋយើងមាន មិនមែនធ្វើទៅរំលោភ ហើយដណ្ដើមយកកម្មសិទ្ធិរបស់បងប្អូន ដែលមានពីមុនមកទេ តែដោយសារតែការដ្ឋានបើកវាបន្ទាន់ពេក។ អ៊ីចឹង ចាំយើងរៀបរយតាមក្រោយបណ្ដើរៗ តាមក្រោយ ក៏ប៉ុន្តែមិនឱ្យបងប្អូនខាតបង់ទេ ត្រូវតែគិតគួរ»។
ស្របពេលលោក ហ៊ុន សែន និងលោក ហ៊ុន ម៉ាណែត កំពុងរវល់រៀបចំពិធី និងបង្ហោះសារព្រោងព្រាតលើបណ្ដាញសង្គម ដើម្បីអបអរការបើកការដ្ឋានសាងសង់ព្រែកជីកនោះ ប្រជាពលរដ្ឋដែលប្រឈមផលប៉ះពាល់ពីគម្រោងនេះ កំពុងព្រួយបារម្ភបាត់បង់ជម្រក និងដីស្រែចម្ការ។
ពលរដ្ឋរស់នៅឃុំព្រែកថ្មី ស្រុកកោះធំលោកស្រី បញ្ញា ប្រាប់វិទ្យុអាស៊ីសេរី នៅថ្ងៃទី២ ខែសីហា ថា លោកស្រីបារម្ភអស់ដីអស់ផ្ទះ។ លោកស្រីថា ឃើញបើកការដ្ឋានសាងសង់ទៅហើយ ប៉ុន្តែមកដល់ពេលនេះ មិនទាន់មានអាជ្ញាធរណាចុះទៅវាសវែងគិតគូរពីសំណងឱ្យបានសមរម្យនៅឡើយទេ។
លោកស្រី បញ្ញា៖ «និយាយទៅបើប៉ះពាល់ការរុះរើ មិនមែនមួយខែ ឬមួយសប្ដាហ៍ទេ បើសិនរុះរើអាចនឹង ៣ខែ ទៅ ៦ខែអី ល្មមនឹងរុះរើហើយ។ ដល់ពេលស្ងាត់ឈឹងអ៊ីចឹង ចេះតែព្រួយដែរ។ បើសិនចុះមកប៉ះពាល់ទៅយើងរុះរើភ្លាមៗ ក៏វាមិនទាន់អាហ្នឹង បើជាសង បើសិនមិនសងវិញ មិនថាទាំងខ្ញុំ មិនថា ក៏មានការព្រួយបារម្ភអត់កន្លែងនៅដែរ»។
ចំណែកប្រធានក្រុមប្រឹក្សាឃ្លាំមើលកម្ពុជាលោក ម៉ែន ណាត ប្រាប់វិទ្យុអាស៊ីសេរី នៅថ្ងៃទី២ ខែសីហា ថា ទោះលោក ហ៊ុន សែន និងលោក ហ៊ុន ម៉ាណែត ប្រឹងរៀបចំបំប៉ោងព្រឹត្តិការណ៍ បើកការដ្ឋានសាងសង់ព្រែកជីកហ្វូណនតេជោ ក៏មិនអាចធំគគ្រឹកគគ្រេងសមបំណងដែរ។ លោកពន្យល់ថា ប្រជាពលរដ្ឋខ្មែរទាំងក្នុង និងក្រៅប្រទេស កំពុងតែភ័យព្រួយអំពីគម្រោងតំបន់ត្រីកោណអភិវឌ្ឍន៍ CLV ដែលមានហានិភ័យបាត់បង់ទឹកដី នៅស្របពេលដែលប្រជាពលរដ្ឋនៅតាមដងព្រែក កំពុងតែខ្លាចត្រូវអាជ្ញាធរបណ្ដេញចេញដោយគ្មានសំណងសមរម្យ។
លោក ម៉ែន ណាត៖ «យើងមកដល់បច្ចុប្បន្នហ្នឹង បញ្ហារបស់ប្រជាពលរដ្ឋដែលរស់នៅតាមដងព្រែកតាមគម្រោងជីក ១៨០គីឡូម៉ែត្រ គឺគ្មានដោះស្រាយទេ ហើយប្រជាពលរដ្ឋប្រឈមនឹងការបណ្ដេញចេញពីលំនៅឋានផ្ទះសម្បែងណាដែលប៉ះទង្គិចនឹងតំបន់ជីកព្រែកហ្នឹង ហើយយើងមើលទៅគ្មានសំណងគ្មានអីត្រឹមត្រូវទេ»។
អ្នកឃ្លាំមើលលើកឡើងថា ទោះបីជារដ្ឋាភិបាលខំប្រឹងប្រែងទូងស្គរ ក្នុងគោលដៅបង្កើតប្រវត្តិសាស្ត្រឱ្យលោក ហ៊ុន សែន នៅថ្ងៃបើកការដ្ឋានសាងសង់ព្រែកជីក ហ្វូណនតេជោ ចំថ្ងៃកំណើតរបស់លោកទី៥ ខែសីហា ក៏ដោយ ក៏មិនអាចល្បីរន្ទឺ កេរ្តិ៍ឈ្មោះល្អដែរ។ ពួកគេថា ភាពល្បីល្បាញចេញពីរឿងនេះ ជាបណ្ដាសានៃអយុត្តិធម៌ និងការភ័យខ្លាច គឺអយុត្តិធម៌ ដែលប្រជាពលរដ្ឋតាមដងព្រែក ត្រូវបណ្ដេញចេញពីផ្ទះសម្បែង ដោយមិនបានសំណងសមរម្យ និងការភ័យខ្លាចរបស់ប្រជាពលរដ្ឋអំពីការបាត់បង់ទឹកដី បើរដ្ឋាភិបាលមិនដកកម្ពុជាចេញពីគម្រោងតំបន់ត្រីកោណអភិវឌ្ឍន៍កម្ពុជា-ឡាវ និងវៀតណាម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- មេធាវីគ្រោងដាក់សេចក្តីសន្និដ្ឋានទៅសាលាឧទ្ធរណ៍ភ្នំពេញបញ្ជាក់ពីភាពស្អាតស្អំលោក កឹម សុខា
- អ្នកតាមដាននយោបាយថា អាមេរិកដាក់ទណ្ឌកម្ម លោក លី យ៉ុងផាត់ ជាការកាត់ផ្ដាច់សរសៃឈាមសេដ្ឋកិច្ចរបស់បក្សកាន់អំណាច
- កម្មករវៀតណាមកំពុងសម្ងំធ្វើការក្នុងក្រុមហ៊ុនចម្ការចេកខេត្តរតនគិរី
- លោក ហ៊ុន សែន អួតនៅក្នុងវេទិកាប្រទេសកូរ៉េថា កម្ពុជាមានសន្តិភាព ខណៈអ្នកតវ៉ាទាមទារប្រជាធិបតេយ្យ
- ក្រសួងការបទេស និងគណបក្សប្រជាជនកម្ពុជាចាត់ទុកថា ជារឿងអយុត្តិធម៌ ដែលក្រសួងរតនាគារសហរដ្ឋអាមេរិកដាក់ទណ្ឌកម្មលើលោក លី យ៉ុងផាត់
អត្ថបទពេញនិយម
សង្គម
- ពលរដ្ឋរិះគន់អាជ្ញាធរអប្សរាបណ្តោយឱ្យអ្នកមានលុយមានអំណាចសង់ផ្នូរខ្មោចចិនមួយធំក្នុងតំបន់អង្គរ
- កម្ពុជា និងចិន «មិនអាចទប់ស្កាត់បញ្ហាឆបោកតាមអនឡាញ និងជួញដូរមនុស្សនៅកម្ពុជាបាន»
- អ្នកឃ្លាំមើលថា កិច្ចសហប្រតិបត្តិការ «ត្បូងពេជ្រ» រវាងកម្ពុជា-ចិនគ្មានពន្លឺសម្រាប់កម្ពុជាឡើយ