លោកនាយករដ្ឋមន្ត្រី ហ៊ុន ម៉ាណែត បានបញ្ជាឱ្យមន្ត្រីសាងសង់វិទ្យាល័យមួយលើភ្នំគូលែនក្នុងខេត្តសៀមរាប បន្ទាប់ពីពលរដ្ឋត្អូញត្អែរថា កូនៗរបស់ពួកគាត់បោះបង់ការសិក្សាទាំងវ័យក្មេង ដោយសារសាលារៀននៅឆ្ងាយពីផ្ទះ។
មន្ត្រីសង្គមស៊ីវិលគិតថា លោក ហ៊ុន ម៉ាណែត អាចនឹងមិនទុកចិត្តមន្ត្រីក្រោមឱវាទរបស់ខ្លួន ទើបចុះដល់មូលដ្ឋានស្វែងយល់ពីតម្រូវការរបស់ពលរដ្ឋដោយខ្លួនឯង។
លោកនាយករដ្ឋមន្ត្រី ហ៊ុន ម៉ាណែត បានទទួលយកសំណូមពររបស់ពលរដ្ឋ ហើយសន្យាថា លោកនឹងពិនិត្យលទ្ធភាពសង់វិទ្យាល័យមួយព្រមទាំងពង្រីកអគារអនុវិទ្យាល័យសម្តេចឪ សម្តេចម៉ែ អន្លង់ធំ ឋិតនៅលើខ្នងភ្នំគូលែន នៃឃុំខ្នងភ្នំ ស្រុកស្វាយលើ ខេត្តសៀមរាប ដែលជាតំបន់ទេសចរប្រវត្តិសាស្ត្រ អតីតរាជធានីបុរាណ។
នាយករដ្ឋមន្ត្រីចុះជួបពលរដ្ឋផ្ទាល់ស្ងាត់ៗ
ការសម្រេចនេះធ្វើឡើង ក្រោយលោកនាយករដ្ឋមន្ត្រីរូបនេះ និងអភិបាលខេត្តសៀមរាប លោក ប្រាក់ សោភ័ណ បានចុះចួបពលរដ្ឋដោយស្ងាត់ៗ កាលពីថ្ងៃទី២៥ កុម្ភៈ ។
លោក ហ៊ុន ម៉ាណែត បានជជែកជាមួយអ្នកភូមិពីបញ្ហាប្រឈមនៅមូលដ្ឋានរួមមាន ផ្លូវពិបាកធ្វើដំណើរ សហគមន៍ទេសចរណ៍ តំបន់អភិរក្សធម្មជាតិ និងវិស័យអប់រំជាដើម។
លោក ហ៊ុន ម៉ាណែត៖«ឥឡូវខ្ញុំប្រគល់ភារកិច្ចឲ្យអភិបាលខេត្តចុះទៅសិក្សាមើល ហើយរាយការណ៍ឲ្យខ្ញុំ ហើយកៀរគរគ្រូឱ្យខ្ញុំ ខ្ញុំឲ្យក្រសួងអប់រំរៀបចំដើម្បីបញ្ជាក់ទម្លាក់មកឲ្យ។ ឥឡូវអនុវិទ្យាល័យមានប៉ុន្មានមួយអាគារ?»។
ក្នុងពេលសំណេះសំណាលជាមួយនាយករដ្ឋមន្ត្រីដោយផ្ទាល់ ប្រជាសហគមន៍រស់នៅលើខ្នងភ្នំគូលែនត្អូញត្អែរថា ផ្លូវលំបាកធ្វើដំណើរ និងវិទ្យាល័យនៅឆ្ងាយពីផ្ទះជិត ២០ គីឡូម៉ែត្រ ជាកត្តារួមផ្សំនាំឱ្យកូនៗរបស់ពួកគាត់ឈប់រៀនទាំងវ័យក្មេង។ ពលរដ្ឋក៏ស្នើឱ្យលោកនាយករដ្ឋមន្ត្រី ហ៊ុន ម៉ាណែត ពន្លឿនសាងសង់ផ្លូវឱ្យបានសមរម្យ ដើម្បីទាក់ទាញអ្នកទេសចរ បង្កើនប្រាក់ចំណូលសហគមន៍ផង។
ពលរដ្ឋរស់នៅខេត្តសៀមរាប សាទរចំពោះការសាងសង់វិទ្យាល័យនេះ ដែលជាផ្នែកមួយផ្តល់ភាពងាយស្រួល ឱ្យសិស្សានុសិស្ស ចំនួន ០៣ ស្រុកដែលកំពុងរស់នៅលើខ្នងភ្នំគូលែនរួមមាន ស្រុកស្វាយលើ ស្រុកវ៉ារិន និងស្រុកបន្ទាយស្រី អាចបន្តការសិក្សាថ្នាក់វិទ្យាល័យនៅតំបន់នោះបាន។ អាជ្ញាធរឱ្យដឹងថា បច្ចុប្បន្នអនុវិទ្យាល័យសម្តេចឪសម្តេចម៉ែ មានសិស្សរៀនចំនួន ២១៥នាក់ និងសិស្សបឋមសិក្សា ៣២៦នាក់។
សាលាវិទ្យាល័យឆ្ងាយពីផ្ទះ
ពលរដ្ឋរស់នៅខេត្តសៀមរាប កញ្ញា យែប ស្រីម៉ៅ ប្រាប់វិទ្យុអាស៊ីសេរីថា កន្លងទៅយុវជនទើបរៀនបញ្ចប់ថ្នាក់អនុវិទ្យាល័យ នៅតំបន់នោះ ត្រូវបន្តការសិក្សាថ្នាក់វិទ្យាល័យ នៅឯទីរួមស្រុកស្វាយលើ ដែលមានចម្ងាយជិត ២០គីឡូម៉ែត្រ ពីផ្ទះរបស់ពួកគាត់ រីឯសិស្សខ្លះទៀត បន្តការសិក្សានៅក្រុងសៀមរាប។
អត្ថបទដែលទាក់ទង៖
កញ្ញាយល់ថា ការសាងសង់វិទ្យាល័យក្នុងតំបន់នោះជាកត្តារួមផ្សំសំខាន់ កាត់បន្ថយការចំណាយរបស់អាណាព្យាបាលនិងកាត់បន្ថយអត្រាបោះបង់ការសិក្សារបស់សិស្ស។
កញ្ញា យែប ស្រីម៉ៅ៖«១០០នាក់អ៊ីចឹងគាត់មានអាចលទ្ធភាពមករៀនបានត្រឹមតែ៩០នាក់ ទៅ៩៥នាក់ទេ ឯ៥ឬ១០នាក់គាត់បោះបង់ ដោយសារគិតថា សាលាឆ្ងាយគាត់អត់មក នោះអាស្រ័យលើពួកគាត់ដែរ ហើយភាគច្រើនសិស្សមករៀននៅវិទ្យាល័យមានច្រើន តែសិស្សបន្តទៅសាកលវិទ្យាល័យបានតិច»។
ជុំវិញរឿងនេះប្រធានសមាគមគ្រូបង្រៀនកម្ពុជាឯករាជ្យ អ្នកស្រី អ៊ុក ឆាយ៉ាវី សាទរចំពោះការអន្តរាគមន៍របស់លោក ហ៊ុន ម៉ាណែត ភ្លាមៗដូច្នេះ។ ក៏ប៉ុន្តែលោកស្រីស្នើឱ្យប្រមុខរដ្ឋាភិបាលរូបនេះ ត្រូវពង្រឹងសមត្ថភាព និងឆន្ទៈមន្ត្រីក្រោមឱវាទបន្ថែមទៀត ឱ្យទទួលខុសត្រូវ ក្នុងការបំពេញភារកិច្ច និងត្រូវមានភាពស្មោះត្រង់រាយការណ៍ពីបញ្ហាប្រឈមជាក់ស្តែង ចៀសវាងធ្វើរបាយការណ៍មិនពិត។
អ្នកស្រី អ៊ុក ឆាយ៉ាវី៖«កន្លែងផ្សេងៗទៀតនៅខេត្តក្រុងផ្សេងៗទៀត ខ្ញុំឃើញតែសម្រែកស្រែកយំទាមទារកន្លែងគាត់ត្រូវការ ជាពិសេសអត់គ្រូ ជាពិសេសអត់សាលា ហាក់បីដូចជាប្រព័ន្ធអប់រំរបស់យើងមិនទាន់រីកដុះដាលរហូតដល់ទីជនបទអ៊ីចឹង»។
ឃុំខ្នងភ្នំ ស្រុកស្វាយលើ មានភូមិចំនួន៥ ដែលមានពលរដ្ឋរស់នៅរាប់ពាន់គ្រួសារ ឋិតនៅលើភ្នំគូលែន រហូតដល់ជម្រាលភ្នំ និងចង្កេះភ្នំ ប៉ែកខាងកើត។ ភ្នំគូលែនលាតសន្ធឹងក្នុងស្រុកចំនួន២ ទៀត គឺស្រុកវ៉ារិន និងស្រុកបន្ទាយស្រី មានប្រជាជនរាប់រយគ្រួសារកំពុងរស់នៅទីនោះ ជាយូរយារមកហើយ។ ពលរដ្ឋភាគច្រើនប្រកបរបរកសិកម្ម វិស័យទេសចរ លក់ដូរ និងរកអនុផលព្រៃឈើ នៅលើខ្នងភ្នំគូលែន។ ពួកគាត់អះអាងថា កូនៗរបស់អ្នកភូមិភាគច្រើន មិនសូវមានលទ្ធភាពរៀនចប់ថ្នាក់បរិញ្ញាបត្រនោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ៕