លោកនាយករដ្ឋមន្ត្រី ហ៊ុន ម៉ាណែត បញ្ជាអភិបាលរាជធានី ខេត្តឱ្យចាត់វិធានការជាបន្ទាន់លើការលួចបើកអាជីវកម្មបនល្បែងស៊ីសងនៅទូទាំងប្រទេស។ ពលរដ្ឋ និងមន្ត្រីសង្គមស៊ីវិលរិះគន់ថា រដ្ឋាភិបាលបរាជ័យក្នុងការទប់ស្កាត់អាជីវកម្មបនល្បែងតាមអនឡាញ (Online) ដែលកំពុងរាលដាលដូចផ្សិត ដ្បិតអាជ្ញាធរតាមមូលដ្ឋានប្រព្រឹត្តអំពើពុករលួយជាប្រព័ន្ធ។
លោក ហ៊ុន ម៉ាណែត នៅថ្ងៃទី១៤ ខែកុម្ភៈ បានថ្លែងតាមរយៈសារសំឡេងបង្ហោះតាមគេហទំព័រហ្វេសប៊ុកផ្ទាល់ខ្លួន ដោយបញ្ជាឱ្យអាជ្ញាធរមានសមត្ថកិច្ចតាមមូលដ្ឋានទូទាំងប្រទេសត្រួតពិនិត្យ និងផ្អាកការផ្ដល់អាជ្ញាប័ណ្ណនៃអាជីវកម្មបនល្បែងអនឡាញគ្រប់ប្រភេទ។
លោក ហ៊ុន ម៉ាណែត៖«ក្នុងករណីមានបន្តបើកថ្មីថែមទៀត សូមចាត់វិធានការបិទជាបន្ទាន់ ហើយរាយការណ៍ត្រង់មកខ្ញុំ ដើម្បីចាត់វិធានការ ដែលអាចឈានដល់ការដកអាជ្ញាប័ណ្ណនៅក្នុងខេត្ត ឬនៅទូទាំងប្រទេសតែម្ដង»។
បទបញ្ជារបស់នាយករដ្ឋមន្ត្រីរូបនេះ ស្របពេលអាជីវកម្មបនល្បែងតាមអនឡាញ ដូចជា ឆ្នោត ឡូតូ និងល្បែងផ្សងសំណាងផ្សេងៗ ទៀត កំពុងរីករាលដាលតាមមូលដ្ឋាន និងមានការផ្សព្វផ្សាយយ៉ាងផុលផុសតាមបណ្ដាញសង្គម។
ទោះបីជាយ៉ាងណា ពលរដ្ឋ និងមន្ត្រីសង្គមស៊ីវិលរិះគន់ថា ចំណាត់ការរបស់លោកនាយករដ្ឋមន្ត្រី ហ៊ុន ម៉ាណែត ប្រៀបដូចជាភ្លើងចំបើងតែប៉ុណ្ណោះ ដោយសារតែអាជីវកម្មបនល្បែងតាមអនឡាញបានរីកដុះដាលដូចផ្សិត។ ក្រៅពីនេះពលរដ្ឋឱ្យដឹងទៀតថា អាជីវកម្មបនល្បែងនៅតាមកន្លែងខ្លះបើកដំណើរការទៅបានដោយសារតែមានការសម្របសម្រួលរបស់អាជ្ញាធរមូលដ្ឋាន។
ពលរដ្ឋម្នាក់នៅខេត្តកំពត លោក ចាន់ វាសនា ប្រាប់វិទ្យុអាស៊ីសេរីថា ការភ្នាល់ល្បែងតាមអនឡាញ និងតាមទូរទស្សន៍នៅតែបន្តកើតមានច្រើន ជាពិសេសនៅតូបកាហ្វេ និងកន្លែងលក់ដូរជាដើម។ លោកបញ្ជាក់ថា មូលហេតុសមត្ថកិច្ចគ្មានការចុះបង្ក្រាប ដោយសារតែអាជ្ញាធរខ្លះទទួលសំណូកពីក្រុមឈ្មួញបើកបនល្បែងទាំងនោះ។
លោក ចាន់ វាសនា៖«ហើយដូចបងប្អូនខ្ញុំម្នាក់រត់ម៉ូតូឌុប មកពីដឹកអីវ៉ាន់ហើយគាត់ចូលមកផឹកកាហ្វេនៅហាង ពេលប៉ូលិសមកចាប់ៗ ដោយគាត់នៅខាងមុខហាង ហើយណាមួយបើចាប់មិនចាប់ម្ចាស់ផ្ទះឆ្ងល់ដែរ?មកចាប់អ្នកផឹកកាហ្វេនៅខាងក្រៅ។ គាត់ប្រាប់ទៀតមិនបានឃើញគេទៅចាប់ម្ចាស់ផ្ទះទេ ព្រោះម្ចាស់វាស៊ិះស៊ុះជាមួយអាជ្ញាធរ ពេលបង់លុយឱ្យអាជ្ញាធរទៅគេចាប់តែអ្នកខាងក្រៅ អ្នកដែលអត់មានដឹងរឿងអី អត់មានចាក់ល្បែងគេចាប់តែអាហ្នឹង អានៅខាងក្នុងគេចាប់ហើយគេដោះវិញ ដោះដោយសារលុយៗ គេដល់»។
វិទ្យុអាស៊ីសេរីមិនអាចទាក់ទងអភិបាលខេត្តកំពត លោក ម៉ៅ ធនិន និងអគ្គលេខាធិការនៃគណៈកម្មការគ្រប់គ្រងល្បែងពាណិជ្ជកម្ម លោក រស់ ភីរុណ ដើម្បីសាកសួរជុំវិញរឿងនេះបានទេនៅថ្ងៃទី១៤ ខែកុម្ភៈ។
របាយការណ៍ក្រសួងមហាផ្ទៃ បង្ហាញថា គិតត្រឹមរយៈពេល ២៨ថ្ងៃ ក្នុងខែមករា ឆ្នាំ២០២៤ សមត្ថកិច្ចនគរបាលជាតិ នៃក្រសួងមហាផ្ទៃ បានបើកប្រតិបត្តិការបង្ក្រាបករណីល្បែងស៊ីសងចំនួន ៥៣ទីតាំង ក្នុងរាជធានី និងនៅតាមបណ្ដាខេត្តចំនួន១៥ ក្នុងនោះ អាជ្ញាធររកឃើញអាជីវកម្មល្បែងខុសច្បាប់ ចំនួន ២៩ទីតាំង និងបញ្ជូនជនសង្ស័យលេងល្បែងស៊ីសងចំនួន ៧២នាក់ទៅតុលាការ។
ជុំវិញរឿងនេះ ប្រធានអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ លើកទឹកចិត្តដល់ប្រជាពលរដ្ឋ ជៀសវាងការលេងល្បែងស៊ីសងគ្រប់ប្រភេទ ព្រោះលោកថា ការលេងល្បែងពុំបានផ្ដល់ផលចំណេញអ្វីដល់ពលរដ្ឋ និងសង្គមជាតិឡើយ។ លោកជំរុញដល់រដ្ឋាភិបាលបិទអាជ្ញាប័ណ្ណបនល្បែងទាំងចាស់ និងទាំងថ្មី ដើម្បីកុំឱ្យឈ្មួញលួចបន្លំបន្តបើកបនល្បែងពង្វក់ពលរដ្ឋបន្តបន្ថែមទៀត។
លោក សន ជ័យ៖«ល្បែងដែលមានការបើកថ្មី ល្បែងដែលអនុញ្ញាតពីមុនមក វានៅបន្លំគ្នាពេញហ្នឹង អ៊ីចឹងកុំឱ្យស្មុគស្មាញដល់ការធ្វើការងាររបស់អាជ្ញាធររដ្ឋនោះក្នុងការបង្ក្រាបនោះ គួរតែបិទចោលទាំងអស់តែម្ដង។ នេះគឺជាជម្រើសហើយ។ ទុកឱ្យពលរដ្ឋយកពេលវេលាទៅប្រកបរបររកស៊ី ក្មេងមួយចំនួនវិលមកជួយការងារ ឪពុកម្ដាយ ឬទៅរៀនជាប់លាប់។ ប្រសិនបើមានការលេងលួចលាក់តាមអនឡាញ យើងបើកចំហឱ្យមានការរាយការណ៍ពីពលរដ្ឋ រាយការណ៍បែបអនាមិក ព្រោះអីកន្លែងខ្លះសុទ្ធតែមានអ្នកកាង មានមនុស្សកាចសាហាវ ឃោរឃៅ អ៊ីចឹងវាអាចប៉ះពាល់ដល់ការរាយការណ៍»។
ពលរដ្ឋ និងសង្គមស៊ីវិលយល់ឃើញថា ការផ្សព្វផ្សាយល្បែងតាមអនឡាញច្រើនលើសលប់ ផ្គួបផ្សំការប្រព្រឹត្តអំពើពុករលួយរបស់អាជ្ញាធរជាប្រព័ន្ធអនុញ្ញាតទើបធ្វើឱ្យអាជីវកម្មល្បែងតាមអនឡាញរីកស្គុសស្គាយដូចផ្សិត។ ពួកគាត់ជំរុញដល់រដ្ឋាភិបាលឱ្យដាក់ចេញវិធានការបង្ក្រាប និងលុបបំបាត់ ល្បែងអនឡាញនេះឱ្យមានប្រសិទ្ធភាពជារៀងរហូត ព្រោះល្បែងស៊ីសងគឺជាប្រភពនៃបញ្ហាជាច្រើនរួមមាន អំពើចោរកម្ម អំពើហិង្សាក្នុងគ្រួសារ និងសហគមន៍ ព្រមទាំងធ្វើឱ្យពលរដ្ឋធ្លាក់ខ្លួនក្រីក្រ ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។