តុលាការសម្រេចឃុំខ្លួន លោក លី សាម៉េត ទីប្រឹក្សាផ្ទាល់ប្រធានព្រឹទ្ធសភា លោក ហ៊ុន សែន នៅពន្ធនាគារព្រៃសពីបទឆបោក
2024.11.05
លោក លី សាម៉េត ពេលធ្វើវីឌីអូសារភាព នៅលើហ្វេសប៊ុក កាលពីយប់ថ្ងៃទី៤ ខែវិច្ឆិកា ឆ្នាំ២០២៤។
រូប៖ ហ្វេសប៊ុក
សាលាដំបូងរាជធានីភ្នំពេញសម្រេចបញ្ជូនខ្លួន ឧកញ៉ា លី សាម៉េត ទីប្រឹក្សាផ្ទាល់ប្រធានព្រឹទ្ធសភា លោក ហ៊ុន សែន ទៅឃុំខ្លួនបណ្ដោះអាសន្ន នៅមណ្ឌលអប់រំកែប្រែទី១ ឬពន្ធនាគារព្រៃស កាលពីល្ងាចថ្ងៃទី៥ ខែវិច្ឆិកា។
ចៅក្រមស៊ើបសួរ នៃសាលាដំបូងរាជធានីភ្នំពេញ ថោង ផល្លារង្សី បានបង្គាប់ឱ្យអាជ្ញាធរមានសមត្ថកិច្ចឃុំខ្លួន លោក លី សាម៉េត បន្ទាប់ពីដាក់ក្រោមការពិនិត្យពីបទ «ឆបោក» ប្រព្រឹត្តនៅរាជធានីភ្នំពេញ កាលពីខែកញ្ញា ឆ្នាំ២០២២ និងខែតុលា ឆ្នាំ២០២២ តាមបញ្ញត្តិមាត្រា ៣៧៧ និងមាត្រា ៣៧៨ នៃក្រមព្រហ្មទណ្ឌ។
ដីកាបង្គាប់ឱ្យឃុំខ្លួនដដែលនេះបញ្ជាក់ថា លោក លី សាម៉េត ហៅគ្រូមា មានមុខរបរជាអ្នករកស៊ី កម្រិតវប្បធម៌គ្មាន ឬមិនចេះអក្សរ។
ការសម្រេចរបស់តុលាការនេះធ្វើឡើង នៅក្រោយពេលដែលលោក លី សាម៉េត បានចូលសារភាព នៅចំពោះមុខសមត្ថកិច្ចនៅក្រុងកំពង់សោម កាលពីយប់ថ្ងៃទី៤ ខែវិច្ឆិកា និងត្រូវសមត្ថកិច្ចបញ្ជូនទៅសាលាដំបូងរាជធានីភ្នំពេញ កាលពីព្រឹកថ្ងៃទី៥ ខែវិច្ឆិកា។ ចំណាត់ការរបស់អាជ្ញាធរ និងតុលាការនេះទៀតសោត ធ្វើឡើងនៅក្រោយពេលលោក ហ៊ុន សែន ចេញសារលើហ្វេសប៊ុកបើកផ្លូវឱ្យសមត្ថកិច្ចនាំខ្លួនលោក លី សាម៉េត បញ្ជូនទៅតុលាការ។ លោក ហ៊ុន សែន ចេញសារបែបនេះ ឆ្លើយតបនឹងវីដេអូរយៈពេល ៥នាទីរបស់លោក លី សាម៉េត ដែលចេញមុខសារភាពកំហុស និងស្នើសុំសម្រាកព្យាបាលជំងឺនៅផ្ទះ។ បើទោះជាយ៉ាងណាក្ដី សារសំខាន់នៅក្នុងវីដេអូសារភាពកំហុសនោះ គឺលោក លី សាម៉េត ប្រឹងនិយាយដដែល ដើម្បីលាងជម្រះថា លោក ហ៊ុន សែន មិនពាក់ព័ន្ធនឹងអំពើបោកប្រាស់របស់ខ្លួន។
ទោះជាយ៉ាងណាក្ដី អ្នកតាមដានបញ្ហាសង្គម និងនយោបាយកម្ពុជាស្នើឱ្យតុលាការស៊ើបអង្កេតរឿងនេះឱ្យស៊ីជម្រៅ ដើម្បីនាំអ្នកពាក់ព័ន្ធមកផ្ដន្ទាទោស ដោយសារករណីចាប់ខ្លួនលោក លី សាម៉េត នេះ មានភាពមិនប្រក្រតីជាច្រើន និងម្យ៉ាងទៀត គឺឧកញ៉ា លី សាម៉េត ធ្លាប់និយាយថា លោកយកលុយ ដែលបានមកពីការបោកប្រាស់ប្រគល់ឱ្យទៅលោក ហ៊ុន សែន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សាលាដំបូងរាជធានីភ្នំពេញ តម្កល់សាលក្រមកំបាំងមុខទៅលើប្រធានសហជីព លោក ម៉ម រិទ្ធី ឱ្យជាប់ពន្ធនាគារ ១៨ខែ
- ពលរដ្ឋ និងអ្នកការពារសិទ្ធិមនុស្សធ្វើធម្មយាត្រាពីក្រុងកំពតមកភ្នំពេញ ដើម្បីលើកកម្ពស់ការគោរពសិទ្ធិមនុស្ស
- លោក ហ៊ុន សែន តែងតាំងលោក ហៃ វណ្ណា និងសកម្មជន ១៨នាក់ទៀតជាទីប្រឹក្សា និងជំនួយការ
- យុវជនរិះគន់ការផ្ដល់គ្រឿងឥស្សរិយយសឱ្យចៅប្រុសលោក ហ៊ុន សែន ដែលធ្លាប់ប្រកាសលក់កាំភ្លើងលើបណ្ដាញសង្គម
- លោក ហ៊ុន សែន ទៅមជ្ឈិមបូព៌ា «ទំនងចង់ទៅដើរទាក់ទាញវិនិយោគទុន ខណៈរដ្ឋាភិបាលកូន កំពុងជួបបញ្ហាសេដ្ឋកិច្ច»
