ជនជាតិដើមភាគតិចខេត្តស្ទឹងត្រែងប្រតិកម្មនឹងអាជ្ញាធររឹតត្បិតសេរីភាពធ្វើបុណ្យក្នុងសហគមន៍
2016.07.18
ជនជាតិដើមភាគតិចព្នង និងព្រះសង្ឃ នៅឃុំក្បាលរមាស ស្រុកសេសាន រៀបចំពិធីបុណ្យគោរពវិញ្ញាណក្ខន្ធលោកបណ្ឌិត កែម ឡី នៅថ្ងៃទី១៤ កក្កដា ឆ្នាំ២០១៦។
ជនជាតិដើមភាគតិចនៅឃុំក្បាលរមាស និងឃុំស្រែគរ ស្រុកសេសាន ខេត្តស្ទឹងត្រែង ប្រតិកម្មនឹងអាជ្ញាធរ ថាបានរឹតត្បិតសេរីភាពធ្វើបុណ្យបែបព្រះពុទ្ធសាសនានៅវត្តអារាមក្នុងសហគមន៍។
ការលើកឡើងនេះ នៅគ្រាអាជ្ញាធរឃុំក្បាលរមាស សរសេរលិខិតចុះថ្ងៃទី១៥ កក្កដា បដិសេធព័ត៌មានវិទ្យុអាស៊ីសេរី ទាក់ទិនការរៀបចំពិធីបុណ្យគោរពវិញ្ញាណក្ខន្ធលោកបណ្ឌិត កែម ឡី។ អាជ្ញាធរចាត់ទុកការរៀបចំពិធីបុណ្យបែបព្រះពុទ្ធសាសនានោះ មិនបានជូនដំណឹងទៅអាជ្ញាធរ និងសមត្ថកិច្ចមូលដ្ឋាន ថាជាទង្វើខុសច្បាប់។
ជនជាតិដើមភាគតិចឃុំក្បាលរមាស និងឃុំស្រែគរ ចាត់ទុកលិខិតរបស់អាជ្ញាធរ ថាជាការរឹតត្បិតសេរីភាពធ្វើបុណ្យបែបព្រះពុទ្ធសាសនា និងរើសអើងនិន្នាការនយោបាយ បន្ទាប់ពីអ្នកភូមិជាច្រើននាក់ បានចូលរួមពិធីបុណ្យគោរពវិញ្ញាណក្ខន្ធលោកបណ្ឌិត កែម ឡី រយៈពេល ៣ថ្ងៃចាប់ពីថ្ងៃទី១៣ ដល់ថ្ងៃទី១៥ កក្កដា។
ពលរដ្ឋរស់នៅឃុំស្រែគរ លោក ពុធ ឃឿន កត់សម្គាល់ថា តាមការគ្រោងទុក ពលរដ្ឋនៅឃុំស្រែគរ ប្រមាណជិត ១០០នាក់ គ្រោងធ្វើដំណើរទៅឃុំក្បាលរមាស ដើម្បីគោរពវិញ្ញាណក្ខន្ធលោកបណ្ឌិត កែម ឡី ក៏ប៉ុន្តែផ្លូវធ្វើដំណើរលំបាក ហើយជារដូវវស្សាផង ទើបអ្នកភូមិខ្លះអាក់ខាន។ តែយ៉ាងណា លោកច្រានចោលការអះអាងរបស់មេឃុំក្បាលរមាស ដែលថាមានពលរដ្ឋតែ ២-៣នាក់ប៉ុណ្ណោះដែលចូលរួមពិធីបុណ្យនោះ៖ «អត់មានសុំច្បាប់ទេ គឺច្បាប់នោះ គឺច្បាប់ព្រៃ ហើយគ្រាន់តែមនុស្សងាប់អ្នកស្នេហាជាតិ ចាំបាច់សុំលិខិតអីណា? មានច្បាប់មកពីណាចែងឲ្យសុំលិខិតអីសុំធ្វើបុណ្យ អត់មានទេ»។
ជនជាតិដើមភាគតិចព្នង នៅឃុំក្បាលរមាស លោក ដាំ សំណាង អះអាងថា សហគមន៍ និងយុវជនជនជាតិដើមភាគតិច បានគោរពវិញ្ញាណក្ខន្ធលោកបណ្ឌិត កែម ឡី ជាបន្តបន្ទាប់ ទោះបីពួកគេរវល់ការងារស្រែចម្ការក្តី។ លោកបដិសេធការចោទប្រកាន់របស់មេឃុំក្បាលរមាស ដែលថារូបលោកជាសកម្មជនគណបក្សសង្គ្រោះជាតិ ដើរបំផុសពលរដ្ឋឲ្យចូលរួមពិធីបុណ្យខុសច្បាប់៖ «ខ្ញុំមិនសប្បាយចិត្តដែរក្នុងការវាយប្រហារប្រឆាំងរូបខ្ញុំ ថាខ្ញុំជាអ្នកបក្សប្រឆាំង ហើយមិនទទួលស្គាល់លើការវាយប្រហាររបស់ពួកគាត់ដែរ ព្រោះពលរដ្ឋមិនមែនចូលរួមមកទាំងដុំ ៣០០នាក់ទេ ក្នុងភូមិមួយមិនមែនមានតែមនុស្ស ៣០០នាក់ទេ»។
មេឃុំក្បាលរមាស លោក វឿន សម្បត្តិ មិនបានធ្វើអត្ថាធិប្បាយពីបញ្ហានេះទេ នៅថ្ងៃទី១៨ កក្កដា រីឯអ្នកនាំពាក្យសាលាខេត្តស្ទឹងត្រែង លោក ម៉ែន គុង វិទ្យុអាស៊ីសេរី មិនអាចទាក់ទងដើម្បីសុំការអធិប្បាយករណីនេះបានទេនៅថ្ងៃទី១៨ កក្កដា។
ចំណែកមេប៉ុស្តិ៍ស្រែគរ លោក ថាយ ស៊ុនអ៊ី និយាយយ៉ាងខ្លីថា ការលើកឡើងរបស់មេឃុំស្រែគរ ថាមានពលរដ្ឋជាង ១០០នាក់ធ្វើដំណើរចូលរួមពិធីបុណ្យនោះ គឺជារឿងបំផ្លើសការពិត៖ «ក្នុងរឿងនេះបើអត់មានជាង ១០០ ដូចគេថាចឹង យើងមិនបដិសេធ»។
ព្រះតេជព្រះគុណគង់នៅវត្តក្បាលរមាស ព្រះនាម ស្រន់ ស្រឿន មានថេរដីកាថា ពិធីបុណ្យនេះមានពលរដ្ឋរាប់រយនាក់ចូលរួមគោរពវិញ្ញាណក្ខន្ធលោកបណ្ឌិត កែម ឡី និងបានស្តាប់ធម៌ទេសនានៅពេលរាត្រី ហើយពិធីបុណ្យនេះមានព្រះសង្ឃ ៧អង្គសម្ដែងធម៌ទេសនា រាប់បាត្រ ប្រគេនចង្ហាន់ និងសម្ភារៈផ្សេងៗដល់ព្រះសង្ឃ៖ «គឺគាត់ធ្វើឲ្យដោយសុទ្ធចិត្តឲ្យបានទៅកាន់សុគតិភព អត់មានចូលនយោបាយ។ គ្រាន់តែធ្វើឧទ្ទិសកុសលផលបុណ្យដើម្បីឲ្យបណ្ឌិតបានទៅកាន់សុគតិភព»។
មន្ត្រីសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តស្ទឹងត្រែង លោក ហូ សំអុល ឲ្យដឹងថា ពលរដ្ឋប្រារព្ធពិធីបុណ្យគោរពវិញ្ញាណក្ខន្ធលោកបណ្ឌិត កែម ឡី អាជ្ញាធរបានអះអាងថា មានពលរដ្ឋតែ ២ ទៅ ៣នាក់ប៉ុណ្ណោះដែលចូលរួមពិធីបុណ្យនេះ ដោយមិនបានជូនដំណឹងទៅអាជ្ញាធរ គឺជាទង្វើខុសច្បាប់។ លោកចាត់ទុកការលើកឡើងរបស់អាជ្ញាធររដ្ឋាភិបាល គឺជារឿងបំផ្លើសការពិត និងកេងចំណេញនយោបាយ។ លោកថា អាជ្ញាធរមិនគួររឹតត្បិតសិទ្ធិសេរីភាពបែបព្រះពុទ្ធសាសនាដែលជាទំនៀមទម្លាប់ប្រពៃណីខ្មែរ និងជនជាតិដើមភាគតិចនោះទេ៖ «បើតាមគំនិតរបស់ពលរដ្ឋមិនមានចំណេញនយោបាយ បើតាមពិត ភាគីខាងមេឃុំ និងមេប៉ុស្តិ៍វិញទេ ដែលកេងចំណេញនយោបាយ។ បើខ្ញុំថាកេងដោយគាត់បំភ័ន្តថា ការចូលរួមពលរដ្ឋ គឺមានតែ ២ ទៅ ៣នាក់»។
លិខិតបដិសេធចុះថ្ងៃទី១៦ ខែកក្កដា ឆ្នាំ២០១៦ របស់មេឃុំក្បាលរមាស លោក វឿន សម្បត្តិ មេប៉ុស្តិ៍ក្បាលរមាស លោក ឡត ម៉ារ៉ន និងមេប៉ុស្តិ៍ស្រែគរ លោក ថាយ ស៊ុនអ៊ី សរសេរថា ពួកគេបដិសេធទាំងស្រុង ថាមានជនជាតិដើមភាគតិចប្រមាណ ៣០០នាក់មកពីឃុំក្បាលរមាស និងឃុំស្រែគរ ប្រារព្ធពិធីបុណ្យគោរពវិញ្ញាណក្ខន្ធលោកបណ្ឌិត កែម ឡី ដោយអះអាងថាមានតែពលរដ្ឋ ២ ទៅ ៣នាក់ប៉ុណ្ណោះ។ លើសពីនេះ ពួកគេថាការចុះផ្សាយព័ត៌មាននេះ បានប្រាសចាកការពិត ក្នុងគោលបំណងកេងចំណេញនយោបាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
រឿងដែលគេអានច្រើនបំផុត
RFA
- លោកនាយករដ្ឋមន្ត្រី ហ៊ុន សែន ប្រកាសមិនជួបអ្នកគាំទ្រ នៅបុរីញូវយ៉ក ខណៈគណបក្សប្រឆាំងគ្រោងធ្វើបាតុកម្មប្រឆាំងលោក
- និស្សិតខ្មែរម្នាក់ខិតខំរៀនរហូតបានមេដាយវិស្វករបច្ចេកវិទ្យា នៅមហាវិទ្យាល័យប្រទេសថៃ
- ចិនផ្ដល់ជំនួយរថយន្តជាង ១០០គ្រឿង និងសម្ភារយោធាឱ្យក្រសួងការពារជាតិកម្ពុជា
- តំណាងពលរដ្ឋជាង ១ពាន់នាក់ ដាក់ញត្តិស្នើសុំក្រសួងមហាផ្ទៃ ឱ្យឈប់ផ្ដល់អត្តសញ្ញាណប័ណ្ណជនអន្តោប្រវេសន៍
- យុវជន និងអ្នកវិភាគរិះគន់សៀវភៅ "កូនប្រុសច្បងនាយករដ្ឋមន្ត្រី ដំណើរឆ្ពោះទៅបន្តវេន"
