ក្រសួងមហាផ្ទៃ អនុញ្ញាតឲ្យសមាគមគ្រូបង្រៀនកម្ពុជាឯករាជ្យហែក្បួនធម្មយាត្រា កំណត់ត្រឹម ៥០នាក់
2023.01.26
រូបឯកសារក្នុងទិវាគ្រូបង្រៀនអន្តរជាតិ កាលពីថ្ងៃទី៥ ខែតុលា ឆ្នាំ២០២០ (អាវលឿង) អ្នកស្រី អ៊ុក ឆាយ៉ាវី ប្រធានសមាគមគ្រូបង្រៀនកម្ពុជាឯករាជ្យ ដែលគ្រោងរៀបចំហែក្បួនធម្មយាត្រាពីភ្នំពេញ ទៅខេត្តពោធិ៍សាត់ ដើម្បីលើកកម្ពស់សីលធម៌សង្គម ពីថ្ងៃទី១ ដល់ថ្ងៃទី១០ ខែកុម្ភៈ។
Photo: RFA
ក្រសួងមហាផ្ទៃអនុញ្ញាតឱ្យសមាគមគ្រូបង្រៀនកម្ពុជាឯករាជ្យ ហែធម្មយាត្រាចាប់ពីថ្ងៃទី១ ខែកុម្ភៈ ប៉ុន្តែបានស្នើឱ្យគណៈកម្មការរៀបចំធម្មយាត្រាសហការជាមួយអាជ្ញាធររាជធានី ខេត្ត ដើម្បីរក្សាសណ្ដាប់ធ្នាប់សាធារណៈ។ ប្រធានសមាគមគ្រូបង្រៀនកម្ពុជាឯករាជ្យរីករាយចំពោះការអនុញ្ញាតរបស់ក្រសួងមហាផ្ទៃបែបនេះ ប៉ុន្តែសោកស្ដាយចំពោះការកំណត់របស់ក្រសួង ដែលតម្រូវឱ្យមានអ្នកចូលរួមត្រឹមតែ៥០នាក់។
ក្រសួងមហាផ្ទៃនៅថ្ងៃទី២៦ ខែមករា បានចេញលិខិតអនុញ្ញាតឱ្យសមាគមគ្រូបង្រៀនកម្ពុជាឯករាជ្យចាប់ផ្ដើមដង្ហែធម្មយាត្រានៅថ្ងៃទី១ ខែកុម្ភៈ ប៉ុន្តែក្រសួងដាក់កំហិតឱ្យមានអ្នកចូលរួមត្រឹមតែ ៥០នាក់ប៉ុណ្ណោះ។ ក្រសួងក៏បានណែនាំឱ្យសមាគមគ្រូបង្រៀនកម្ពុជាឯករាជ្យ សហការជាមួយរដ្ឋបាលរាជធានីភ្នំពេញ និងរដ្ឋបាលខេត្តដែលពាក់ព័ន្ធ ដើម្បីរក្សាសណ្ដាប់ធ្នាប់សាធារណៈ។
ការអនុញ្ញាតរបស់ក្រសួងមហាផ្ទៃបែបនេះ ធ្វើឡើងបន្ទាប់ពីសមាគមគ្រូបង្រៀនកម្ពុជាឯករាជ្យ បានដាក់លិខិតជូនដំណឹងមួយទៅរដ្ឋមន្ត្រីក្រសួងមហាផ្ទៃលោក ស ខេង អំពីការហែធម្មយាត្រាពីភ្នំពេញ ទៅខេត្តពោធិ៍សាត់កាលពីថ្ងៃទី១៦ ខែមករាកន្លងទៅ ដើម្បីលើកកម្ពស់សីលធម៌សង្គម។
ឆ្លើយតបនឹងការអនុញ្ញាតនេះ ប្រធានសមាគមគ្រូបង្រៀនកម្ពុជាឯករាជ្យ អ្នកស្រី អ៊ុក ឆាយ៉ាវី ប្រាប់វិទ្យុអាស៊ីសេរីថា អ្នកស្រីរីករាយដែលក្រសួងមហាផ្ទៃបានអនុញ្ញាតឱ្យសមាគមដង្ហែធម្មយាត្រា។ ទោះជាយ៉ាងណា អ្នកស្រីនៅតែមានការព្រួយបារម្ភចំពោះការរំខានពីក្រុមអាជ្ញាធរ ព្រោះក្រសួងមហាផ្ទៃបានដាក់កំហិតឱ្យមានអ្នកចូលរួមត្រឹមតែ ៥០នាក់ ខណៈមកទល់នឹងពេលនេះ មានអ្នកចង់ចូលរួមធម្មយាត្រារាប់រយនាក់ឯណោះ។ អ្នកស្រី អ៊ុក ឆាយ៉ាវី បន្ថែមថាធម្មយាត្រាផ្សព្វផ្សាយអំពីការលើកកម្ពស់សីលធម៌សង្គមនេះ គ្រោងនឹងធ្វើឡើងរយៈពេល១០ថ្ងៃ ដោយចាប់ផ្ដើមចេញពីរូបសំណាក លោកយាយដូនពេញ នៅព្រឹកថ្ងៃទី១ ខែកុម្ភៈ ឆ្លងកាត់តាមខេត្តកណ្ដាល កំពង់ស្ពឺ និងខេត្តកំពង់ឆ្នាំង ហើយបញ្ចប់ទៅវិញនៅពេលក្បួនធម្មយាត្រាបានទៅដល់រូបសំណាកអ្នកតាឃ្លាំងមឿង ក្នុងខេត្តពោធិ៍សាត់ នៅថ្ងៃទី១០ ខែកុម្ភៈ។
អ្នកស្រី អ៊ុក ឆាយ៉ាវី៖ «ដោយសារតែយើងឃើញមួយរយៈនេះ សីលធម៌បានធ្លាក់ចុះខ្លាំងមែនទែន អ៊ីចឹងចង់ឱ្យអ្នកនយោបាយហ្នឹង ងាកបែរមករកសីលធម៌ ហើយចេះអត់ឱនឱ្យគ្នា។ យើងឃើញថាប្រទេសមួយដែលយើងគិតតែពីឈ្លោះគ្នា ហើយប្រើពាក្យអាម៉ឹង ធ្វើឱ្យសីលធម៌ធ្លាក់ចុះកាន់តែខ្លាំងឡើង នេះអ្វីដែលជាទិសដៅរបស់សមាគមយើង»។
ការធ្វើធម្មយាត្រានេះដោយសារពួកគាត់ មើលឃើញថា ក្រមសីលធម៌នៅក្នុងសង្គមកាន់តែធ្លាក់ចុះ ក្នុងនោះរួមទាំងសីលធម៌របស់អ្នកនយោបាយជាដើម ។ជាឧទាហរណ៍ថ្មីៗនេះ អ្នកនយោបាយដែលមានអំណាច នៅតែប្រើប្រាស់ភាសាមិនសមរម្យទៅលើដៃគូរប្រកួតប្រជែងនយោបាយ ហើយថែមទាំងបានប្រើប្រាស់ប្រព័ន្ធតុលាការដើម្បីរឹបអូសយកទ្រព្យសម្បត្តិរបស់ មន្ត្រីជាន់ខ្ពស់គណបក្សប្រឆាំងថែមទៀតផង។
ជុំវិញរឿងនេះ សមាជិកក្រុមយុវជនខ្មែរថាវរៈម្នាក់ ដែលគ្រោងនឹងចូលរួមដង្ហែធម្មយាត្រាជាមួយសមាគមគ្រូបង្រៀនកម្ពុជាឯករាជ្យ គឺអ្នកនាង ឈឿន ដារ៉ាវី យល់ឃើញថា ការអនុញ្ញាតរបស់ក្រសួងមហាផ្ទៃនេះគ្រាន់តែជាការបំពេញការងាររបស់ក្រសួងតែប៉ុណ្ណោះ ព្រោះការដង្ហែធម្មយាត្រាគឺជាសិទ្ធិរបស់ប្រជាពលរដ្ឋ ដែលអាជ្ញាធរត្រូវតែគោរព និងលើកកម្ពស់។ អ្នកនាងបន្ថែមថា មូលហេតុដែលអ្នកនាងចង់ចូលរួមធម្មយាត្រានេះ ក៏ព្រោះតែអ្នកនាងចង់ផ្សព្វផ្សាយឱ្យអ្នកនយោបាយ និងថ្នាក់ដឹកនាំប្រទេស លើកកម្ពស់ក្រមសីលធម៌របស់ខ្លួនឡើងវិញ ដើម្បីជាគំរូទៅដល់ប្រជាពលរដ្ឋ និងផ្សះផ្សាជាតិ។ ជាមួយគ្នានេះដែរ អ្នកនាង ឈឿន ដារ៉ាវី ក៏សំណូមពរដល់ប្រជាពលរដ្ឋនៅតាមដងផ្លូវ ចូលរួមគាំទ្រដល់ក្បួនធម្មយាត្រា នៅពេលក្បួនដង្ហែធ្វើដំណើរឆ្លងកាត់តាមផ្ទះពួកគេផងដែរ។
អ្នកនាង ឈឿន ដារ៉ាវី៖ «សំណូមពរដល់ប្រជាពលរដ្ឋយើងតាមដងផ្លូវ បើសិនជាឃើញក្បួនធម្មយាត្រាពួកយើងទៅទីណា សូមទទួលស្វាគមន៍ដោយស្នាមញញឹម ហើយនិងយល់នូវអ្វីដែលពួកយើងធ្វើនេះ ហើយសូមផ្ដល់ជាទឹកអីតាមផ្លូវហ្នឹង ក៏ជាទឹកចិត្តរបស់យើងដែលជាខ្មែរដូចគ្នា ហើយយើងស្រលាញ់គ្នាទៅដល់ទីណាក៏ដោយ ហើយក៏សង្ឃឹមថាអាជ្ញាធរនៅតាមមូលដ្ឋាននឹងជួយធ្វើចរាចរណ៍ជាដើមដល់ពួកយើងដើម្បីធានានូវសុវត្ថិភាព»។
បើទោះបីជាមានការដាក់កំហិតឱ្យមានអ្នកចូលរួមត្រឹមតែ ៥០នាក់ក្ដី ក៏សមាគមគ្រូបង្រៀនកម្ពុជាឯករាជ្យអះអាងថា ធម្មយាត្រាអាចនឹងលើសពីចំនួននេះ ប៉ុន្តែគណៈកម្មការរៀបចំនឹងរៀបចំឱ្យធម្មយាត្រាប្រព្រឹត្តទៅដោយរលូន និងមិនប៉ះពាល់ដល់សណ្ដាប់ធ្នាប់សាធារណៈឡើយ។ តាមរយៈការដង្ហែធម្មយាត្រានេះ សមាគមគ្រូបង្រៀនកម្ពុជាឯករាជ្យ នៅតែទទូចទាមទារឱ្យអ្នកនយោបាយលើកកម្ពស់ក្រមសីលធម៌របស់ខ្លួនឡើងវិញ ដើម្បីផ្ដល់គុណតម្លៃក្នុងការបំពេញតួនាទីរបស់ខ្លួន និងបង្កើតសាមគ្គីភាពជាតិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- អាជ្ញាធរក្រុងភ្នំពេញ ចាប់ខ្លួនមន្ត្រីគណបក្សភ្លើងទៀន៣នាក់
- តុលាការដោះលែងសកម្មជនគណបក្សប្រឆាំង និយមលោក កឹម សុខា គឺលោក យឹម ស៊ីណន ឱ្យនៅក្រៅឃុំបណ្ដោះអាសន្ន
- លោក ស ខេង ចង់ឱ្យមានការធ្វើតេស្ដរកគ្រឿងញៀនលើពលរដ្ឋចាប់ពីអាយុ១៣ឆ្នាំដល់ក្រោម៤៥ឆ្នាំ
- "លោក ហ៊ុន សែន សម្ញែងនាឡិកាដៃតម្លៃរាប់លានដុល្លារ បង្ហាញថា លោកជាមេដឹកនាំពុករលួយ"
- សង្គមស៊ីវិលប្រតិកម្មនឹងក្រសួងអប់រំដែលឱ្យសិស្សឈប់សំរាកយូរដើម្បីគាំទ្រកីឡាស៊ីហ្គេម
