ពលករខ្មែរដែលធ្វើការងារនៅប្រទេសថៃ ជាច្រើននាក់ នាំគ្នាសម្រុកវិលត្រឡប់ទៅលេងបុណ្យចូលឆ្នាំប្រពៃណីជាតិនៅឯស្រុកកំណើត ចាប់តាំងពីថ្ងៃទី១ ខែមេសា ជាបន្តបន្ទាប់។ ការធ្វើដំណើរនេះ ប្រជាពលរដ្ឋមួយចំនួនបានត្អូញត្អែរថា ពិបាករកទិញសំបុត្ររថយន្តជាងពេលណាទាំងអស់ ហើយពួកគេព្រួយបារម្ភខ្លាចខកខានដំណើរទៅចូលរួមជួបជុំបងប្អូននៅមុនថ្ងៃបុណ្យចូលឆ្នាំខ្មែរនេះ។
ក្រុមពលករខ្មែរដែលធ្វើដំណើរវិលមកពីប្រទេសថៃ តាមច្រកទ្វារអន្តរជាតិប៉ោយប៉ែត រៀបរាប់ឲ្យដឹងថា សំបុត្រឡានឈ្នួលឡើងថ្លៃខ្ពស់ខុសពីថ្ងៃធម្មតាជាបញ្ហាមួយទៅហើយ ប៉ុន្តែអ្វីដែលពិបាកជាងនោះ គឺពួកគេរកទិញសំបុត្រឡានឈ្នួលពេញក្រុងប៉ោយប៉ែត តែរកពុំមានឡើយ។ ក្រុមពលករអំពាវនាវឲ្យអាជ្ញាធរក្រុងប៉ោយប៉ែត និងមន្ត្រីពាក់ព័ន្ធជួយរៀបចំរថយន្តដឹកអ្នកដំណើរបន្ថែម ដើម្បីសម្រួលដល់ពួកគេធ្វើដំណើរទៅលេងសប្បាយជួបជុំបងប្អូននៅឯស្រុកកំណើតឲ្យបានច្រើនថ្ងៃ។
ពលករមានស្រុកកំណើតនៅស្រុកកំចាយមារ ខេត្តព្រៃវែង ម្នាក់ ឈ្មោះលោក នួន សុភាព ថ្លែងថា រូបលោករួមនឹងអ្នកស្រុកក្បែរខាងជាង ២០នាក់ជាកម្មករសំណង់ធ្វើការនៅទីក្រុងបាងកក ប្រទេសថៃ ប្រមាណជាង ៣ឆ្នាំ ហើយនាំគ្នាធ្វើដំណើរទៅលេងបុណ្យចូលឆ្នាំប្រពៃណីជាតិនៅឯស្រុកកំណើតរៀងរាល់ឆ្នាំ។ លោកបន្តថា ក្នុងឱកាសបុណ្យចូលឆ្នាំ២០១៥ នេះ ក៏មិនខុសពីឆ្នាំមុនៗដែរ គឺនាំគ្នាធ្វើដំណើរពីទីក្រុងបាងកក ប្រទេសថៃ តាមច្រកទ្វារអន្តរជាតិប៉ោយប៉ែត ខេត្តបន្ទាយមានជ័យ។
លោកបញ្ជាក់ថា នៅពេលធ្វើដំណើរត្រឡប់មកវិញម្ដងៗ តែងជួបការលំបាកខ្លាំងទៅលើមធ្យោបាយធ្វើដំណើរ ជាពិសេសគឺចាប់ពីក្រុងប៉ោយប៉ែត ទៅស្រុកកំណើត ធ្វើឲ្យខកខានដំណើររង់ចាំរថយន្តពេញមួយថ្ងៃ៖ «ខ្ញុំមកដល់ប៉ោយប៉ែត នៅម៉ោង ៧កន្លះរហូតទល់ពេលនេះ ខ្ញុំរកឡានមិនទាន់បានចេញដំណើរនៅឡើយទេ ដោយគេថា ទាល់តែថ្ងៃរសៀលបន្តិច គឺប្រហែលជាម៉ោង ៥ ទើបរថយន្តមកដល់វិញ។ បាទ! អ្នកធ្វើដំណើរមកលេងនៅក្នុងឱកាសបុណ្យចូលឆ្នាំខ្មែរនេះ ហើយខកខានដំណើរមានចំនួនច្រើននៅម្ដុំរង្វង់មូលប៉ោយប៉ែត»។
ប្រជាពលរដ្ឋជាច្រើននាក់តែងត្អូញត្អែរថា ជួបការលំបាកក្នុងការរកសំបុត្រឡានឈ្នួលត្រឡប់ទៅស្រុកកំណើតនេះមិនបានដូចៗគ្នា។
ពលរដ្ឋខ្មែរនៅខេត្តស្វាយរៀង ម្នាក់ទៀតឈ្មោះ លោក សេង ឌី ថ្លែងថា លោកជាកម្មករធ្វើការរោងចក្រនៅប្រទេសថៃ ប្រមាណជិត ២ឆ្នាំមកហើយ ដោយទទួលបានប្រាក់ឈ្នួលមួយថ្ងៃ ៣០០បាតប្រាក់ថៃ ឬប្រមាណ ៣៧.០០០រៀល។ លោកបន្តថា ការងាររោងចក្រដែលលោកធ្វើការនៅប្រទេសថៃ នោះ គេបើកប្រាក់ខែឲ្យទៀងទាត់ពុំមានបញ្ហាទេ ហើយអាចរកប្រាក់ចំណូលផ្គត់ផ្គង់គ្រួសារប្រសើរជាងធ្វើការងារនៅក្នុងស្រុក។
ទោះជាងយ៉ាងនេះក្ដីលោកថា ទៅធ្វើការងារនៅក្រៅប្រទេសនោះ លោកតែងជួបការលំបាកនៅពេលវិលត្រឡប់មកលេងស្រុកកំណើតនៅថ្ងៃបុណ្យជាតិសំខាន់ៗ ជារៀងរាល់ឆ្នាំ ជាពិសេសគឺពិបាករករថយន្តធ្វើដំណើរតែម្ដង។
លោកព្រួយបារម្ភខ្លាចរករថយន្តធ្វើដំណើរទៅលេងស្រុកកំណើតជួបជុំបងប្អូនមិនទាន់ក្នុងឱកាសបុណ្យចូលឆ្នាំប្រពៃណីជាតិខាងមុននេះ៖ «ផ្លូវស្ទះតាំងបីចេញពីបាងកក មកដល់ជាយដែនប្រមាណ ៦ម៉ោងឯណោះ ដោយសារពលករសម្រុកមកស្រុកខ្មែរច្រើន។ ម្យ៉ាងទៀតពេលមកដល់ច្រកទ្វារអន្តរជាតិទម្រាំបានចេញផុតមកខ្មែរប្រមាណ ៣ម៉ោង ក្នុងនោះមានអ្នកខ្លះរង់ចាំរហូតដល់ម៉ោង ៨យប់ក៏មាន។ ខ្ញុំសំណូមពរឲ្យអាជ្ញាធរពាក់ព័ន្ធជួយសម្រួលការធ្វើដំណើរដល់ពួកខ្ញុំឲ្យបានឆាប់រហ័សផង»។
ទាក់ទងនឹងបញ្ហានេះអភិបាលក្រុងប៉ោយប៉ែត លោក ង៉ោ ម៉េងជ្រួន មានប្រសាសន៍ទទួលស្គាល់ថា ប្រជាពលរដ្ឋពិតជាមានការកកស្ទះខកខានដំណើរត្រឡប់ទៅចូលរួមបុណ្យចូលឆ្នាំនៅឯកស្រុកកំណើតខ្លះមែន។ ប៉ុន្តែលោកថា ការខកខាននេះក្នុងរយៈពេលខ្លីប្រមាណយ៉ាងយូរមួយថ្ងៃទេ ហើយពួកគេនឹងបានចេញដំណើរទៅតាមគោលដៅរៀងៗខ្លួន។
លោកបន្តថាការស្ទះខ្លាំង គឺចាប់ពីថ្ងៃទី១១ រហូតដល់ថ្ងៃបុណ្យចូលឆ្នាំថ្ងៃទី១៤ មេសា ហើយថា បញ្ហានេះដោយសារប្រជាពលរដ្ឋនាំគ្នាសម្រុកមកលេងស្រុកកំណើតនៅក្នុងឱកាសមុនថ្ងៃបុណ្យចូលឆ្នាំប្រពៃណីជាតិច្រើនជាងថ្ងៃធម្មតា។ រីឯតម្លៃសំបុត្រឡានឈ្នួលវិញលោកថា បញ្ហានេះអាជ្ញាធរទប់ស្កាត់ដាច់ខាតមិនឲ្យក្រុមហ៊ុនដឹកអ្នកដំណើរលក់តម្លៃសំបុត្រខ្ពស់ឡើយ៖ «គាត់សម្រុកមកច្រើន លើសពីចំនួនរថយន្តដឹកអ្នកដំណើរ ហើយអ្នកក្រុមហ៊ុនគេមិនអាចរករថយន្តមកផ្គត់ផ្គង់បងប្អូនពលករទាំងនោះបានទេ ពីព្រោះពួកគេសម្រុកមករយៈពេលខ្លី ហើយម្យ៉ាងទៀតកម្មករធ្វើដំណើរទៅលេងស្រុកកំណើតនៅគ្រប់ខេត្តក្រុងទូទាំងប្រទេស ទើបធ្វើឲ្យពិបាកដល់ការដឹកជញ្ជូនប្រជាពលរដ្ឋមិនបានទាន់ពេល»។
ទោះយ៉ាងនេះក្ដី មន្ត្រីសម្របសម្រួលសមាគមការពារសិទ្ធិមនុស្សអាដហុក (Adhoc) ខេត្តបន្ទាយមានជ័យ លោក ស៊ុំ ច័ន្ទគា មានប្រសាសន៍ថា ការកកស្ទះចរាចរណ៍នៅក្រុងប៉ោយប៉ែត នេះ អាចដោះស្រាយសម្រួលឲ្យប្រជាពលរដ្ឋធ្វើដំណើរត្រឡប់ទៅស្រុកកំណើតរបស់ខ្លួនបាន ប្រសិនបើអាជ្ញាធរពាក់ព័ន្ធមានវិធានការទប់ស្កាត់ ដោយបន្ថែមរថយន្តដឹកអ្នកដំណើរនៅតំបន់ដែលមានប្រជាពលរដ្ឋសម្រុកឆ្លងកាត់ច្រើន ជាអាទិ៍នៅក្រុងប៉ោយប៉ែត ជាដើម។ លោកបន្តថា បញ្ហានេះអាជ្ញាធរមិនគួរដោះស្រាយយករួចខ្លួនដោយមិនគិតគូររិះរកវិធីជួយដល់ប្រជាពលរដ្ឋនោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។