សមត្ថកិច្ចខេត្តកោះកុងបង្ក្រាបបានជនសង្ស័យជនជាតិចិន និងម៉ាឡេស៊ីចំនួន ៦នាក់ ពាក់ព័ន្ធនឹងករណីចាប់ជំរិតទារប្រាក់ពីស្ត្រីជនជាតិម៉ាឡេស៊ីម្នាក់អស់ទឹកប្រាក់ជិត ២ម៉ឺនដុល្លារ (១៥.០០០)។ មន្រ្តីសង្គមស៊ីវិល ព្រួយបារម្ភថា ភូមិសាស្ត្រខេត្តកោះកុងនឹងក្លាយជាទីកន្លែងក្រុមឧក្រិដ្ឋជនប្រតិបត្តិការចាប់ជំរិតមនុស្ស ដែលធ្វើឱ្យប៉ះពាល់ដល់សន្តិសុខសង្គម និងកេរ្តិ៍ឈ្មោះប្រទេសជាតិទាំងមូល។
អ្នកនាំពាក្យស្នងការដ្ឋាននគរបាលខេត្តកោះកុង លោក ស សារ៉ាត់ ប្រាប់វិទ្យុអាស៊ីសេរី នៅថ្ងៃទី១៤ វិច្ឆិកាថា សមត្ថកិច្ចបានបញ្ជូនជនសង្ស័យចំនួន ៦នាក់ ទៅតុលាការខេត្តកោះកុងរួចរាល់ហើយ កាលពីព្រឹកថ្ងៃទី១៤ ខែវិច្ឆិកា។ លោកអះអាងថា សមត្ថកិច្ចនឹងបន្តនីតិវិធីស៊ើបអង្កេតរកអ្នក ដែលពាក់ព័ន្ធផ្សេងទៀត ប្រសិនបើតំណាងអយ្យការបញ្ជូនដីកាបង្គាប់បញ្ជា។
«យើងយោងតាមបណ្ដឹងភ្លាម យើងធ្វើភ្លាម ហើយមិនទាន់មានរបាយការណ៍បញ្ជាក់ច្បាស់ជនសង្ស័យហ្នឹងធ្វើថ្ងៃណាទេ។ គ្រាន់ថា យើងទទួលបានថ្ងៃដែលយើងបង្ក្រាបតែម្ដង។ ពេលដែលយើងធ្វើការហើយ យើងបានបញ្ជូនព្រហ្មទណ្ឌខាងនគរបាលយុត្តិធម៌ ចំពោះករណីនេះខ្ញុំមិនទាន់បានរបាយការណ៍ពីគាត់វិញក្នុងលក្ខណៈដែលគាត់បានសាកសួរជនសង្ស័យហ្នឹង»។
កាលពីថ្ងៃទី១១ ខែវិច្ឆិកា សមត្ថកិច្ចខេត្តកោះកុងបានបង្ក្រាបជនជាតិចិន និងម៉ាឡេស៊ីចំនួន ៦នាក់ ពាក់ព័ន្ធការបង្ខាំងមនុស្សខុសច្បាប់ និងជំរិតទារប្រាក់ស្ត្រីជនជាតិម៉ាស៊ីឡេម្នាក់អស់ទឹកប្រាក់ ជិត ២ម៉ឺនដុល្លារ (១៥.០០០) នៅក្នុងអគារក្រុមហ៊ុនមួយកន្លែងស្ថិតនៅសង្កាត់ស្ទឹងវែង ក្រុងខេមរភូមិន្ទ។ ការបង្ក្រាបនេះ ធ្វើឡើងក្រោយពេលសមត្ថកិច្ចទទួលបានបណ្ដឹងពីជនជាតិម៉ាឡេស៊ីម្នាក់ឈ្មោះ អ៊ុង ទុន ឆៃអ៊ាន (Ong Tun Chyian)។ ជនសង្ស័យ ដែលសមត្ថកិច្ចឃាត់ខ្លួនមាន ជនជាតិចិន-ម៉ាឡេស៊ីចំនួន ២នាក់ មានឈ្មោះ យ៉ូ ហ្ស៊ូ ស៊ិន (Yoo Shu Xin) និងលីម ម៊ុនហុង (Lim Mun Hong) និងជនជាតិចិនចំនួន ៤នាក់មានឈ្មោះ ចាង ម៉ាននីង (Zhang Manning) លូ លាងលាង (Luo Liangliang) តេង ចិនតាវ (Deng Chentao) លីម ម៊ុនហុង (Lim Mun Hong) និង ហ័ង ហ្សីខុន (Huang Shikun)។
វិទ្យុអាស៊ីសេរីមិនអាចទាក់ទងអ្នកនាំពាក្យតំណាងអយ្យការអមសាលាដំបូងខេត្តកោះកុង លោក វ៉ៃ ភីរម្យ ដើម្បីសាកសួរបន្ថែមជុំវិញរឿងនេះបានទេ នៅថ្ងៃទី១៤ វិច្ឆិកា។
អ្នកឃ្លាំមើលបញ្ហាសង្គមព្រួយបារម្ភថា តំបន់អគារសហគ្រាសមួយចំនួន ដែលគ្រប់គ្រងដោយក្រុមហ៊ុនចិនក្នុងភូមិសាស្ត្រខេត្តកោះកុង កើតមានភាពមិនប្រក្រតីជាបន្តបន្ទាប់។ លើសពីនេះ អគារមួយចំនួននៅតំបន់ទីក្រុងរណប ឡុង បេ (Long Bay) ដែលស្ថិតក្នុងប្លុកដីសម្បទានសេដ្ឋកិច្ចក្រុមហ៊ុនចិន យូញៀន ឌីវេឡុបមិន គ្រុប (Union Development Group Co., Ltd.) ក៏ធ្លាប់រងការចោទប្រកាន់ថា មានការបង្ខាំងមនុស្សដោយខុសច្បាប់ដែរ។
ជុំវិញរឿងនេះ អ្នកសម្របសម្រួលសមាគមការពារសិទ្ធិអាដហុក (ADHOC) ប្រចាំខែត្រកោះកុង លោក ថោង ច័ន្ទតារា មើលឃើញថា អាជ្ញាធរហាក់គ្មានឆន្ទៈបង្ក្រាបអំពើជួញដូរមនុស្ស និងក្រុមឧក្រិដ្ឋជន ដែលតែងតែធ្វើសកម្មភាពចាប់ជំរិតនេះឱ្យមានប្រសិទ្ធិនោះទេ ដោយសារតែមានមន្ត្រីអាជ្ញាធរនៅតែប្រព្រឹត្តអំពើពុករលួយជាប្រព័ន្ធ។
«ករណីនេះវាពាក់ព័ន្ធ វាជាប្រព័ន្ធនឹងអ្នកមានអំណាច អ្នកមានលុយ និងអំពើពុករលួយ បានចំណាត់ការរបស់សមត្ថកិច្ចល្មមៗគឺគាត់អត់ហ៊ានស៊ើបអង្កេត ឬហ៊ានមានចំណាត់ការផ្លូវច្បាប់ទេ។ ព្រោះអីការជួញដូរនេះវាពាក់ព័ន្ធនឹងអ្នកមានអំណាច អ្នកមានឥទ្ធិពលរបស់រដ្ឋាភិបាលហើយបាទ»។
ទាក់ទងនឹងរឿងនេះដែរ ឯកអគ្គរដ្ឋទូតអាមេរិកប្រចាំកម្ពុជា លោក ផាទ្រិក ម័រហ្វី (Patrick Murphy) ធ្លាប់បានបញ្ជាក់ជាមួយរដ្ឋមន្ត្រីក្រសួងមហាផ្ទៃ លោក ស ខេង ថា សហរដ្ឋអាមេរិកក៏ត្រៀមផ្ដល់កិច្ចសហការក្នុងការប្រយុទ្ធប្រឆាំងនឹងឧក្រិដ្ឋកម្មជួញដូរមនុស្ស ខណៈសហរដ្ឋអាមេរិក ក៏កំពុងសហការជាមួយអន្តរក្រសួងពាក់ព័ន្ធនៅកម្ពុជា ព្រមទាំងជំរុញឱ្យកម្ពុជាខិតខំប្រឹងប្រែងក្នុងការប្រយុទ្ធប្រឆាំងនឹងការជួញដូរមនុស្ស និងដើម្បីពិភាក្សាការងារអនុវត្តច្បាប់នៃ សហរដ្ឋអាមេរិក និងកម្ពុជាដោះស្រាយបញ្ហាឧក្រិដ្ឋកម្ម និងពង្រឹងស្តង់ដារ។ ចំណែកភាគីកម្ពុជា និងចិនក៏អះអាងថា នឹងពង្រឹងកិច្ចសហប្រតិបត្តិការអនុវត្តច្បាប់បន្ថែមទៀត ដោយផ្ដោតលើការបង្ក្រាបនៃឧក្រិដ្ឋកម្មជួញដូរមនុស្ស ល្បែងអនឡាញ បទល្មើសឆបោកតាមប្រព័ន្ធអ៊ីធឹណែត និងឧក្រិដ្ឋកម្មនានា។
ទោះបីយ៉ាងណាក្ដី អ្នកឃ្លាំមើលបញ្ហាកម្ពុជាមួយចំនួនលើកឡើងថា មូលហេតុដែលបណ្ដាលឱ្យកើតមានឡើងនូវឧក្រិដ្ឋកម្មជួញដូរមនុស្ស និងបទល្មើសចាប់ជំរិតនៅកម្ពុជាឥតឈប់ឈរបែបនេះ គឺដោយសារតែអាជ្ញាធរកម្ពុជាគ្មានឆន្ទៈបង្ក្រាបមេខ្លោងធំៗ និងខ្វះកិច្ចសហប្រតិបត្តិការជាមួយប្រទេសក្នុងតំបន់ និងអន្តរជាតិ ខណៈមន្ត្រីគ្រាក់ៗ ព្រមទាំងក្រុមឧកញ៉ាមួយចំនួន ដែលស្និទ្ធនឹងត្រកូល ហ៊ុន កំពុងរងការចោទប្រកាន់ថា មានទំនាក់ទំនងជាមួយក្រុមហ៊ុនចិនប្រព្រឹត្តអំពើជួញដូរមនុស្ស និងចាប់បង្ខាំងមនុស្សដោយខុសច្បាប់នៅកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។