សមត្ថកិច្ចក្រសួងមហាផ្ទៃចាប់ជនជាតិវៀតណាម២៥៧នាក់ ក្នុងនោះមានស្រី៥៦នាក់ រួចបណ្តេញទៅប្រទេសវៀតណាមវិញ នៅថ្ងៃទី៧ ធ្នូ ក្រោយរកឃើញថា អ្នកទាំងនោះចូលមកកម្ពុជា និងធ្វើសកម្មភាពខុសច្បាប់។
អគ្គនាយកដ្ឋានអន្តោប្រវេសន៍ សហការជាមួយអគ្គស្នងការដ្ឋាននគរបាលជាតិ នៃក្រសួងមហាផ្ទៃ រកឃើញថា ពួកគេទាំងនេះ មានជាប់ពាក់ព័ន្ធនឹងបទល្មើសបទល្មើសឆបោកតាមប្រព័ន្ធអនឡាញ ព្រមទាំងប្រព្រឹត្តបទល្មើសអន្តោប្រវេសន៍ ដូចជាធ្វើការងារខុសច្បាប់ដោយគ្មានប័ណ្ណការងារ ប្រើប្រាស់ទិដ្ឋាការខុសគោលបំណង និងឆ្លងដែនខុសច្បាប់។
អ្នកនាំពាក្យរងនៃក្រសួងមហាផ្ទៃ លោក ទូច សុឃៈ បានប្រាប់កាសែតក្នុងស្រុកថា សមត្ថកិច្ចកម្ពុជា បើកប្រតិបត្តិការឃាត់ខ្លួនជនជាតិវៀតណាមទាំងនេះនៅក្រុងអរិយក្សត្រ ខេត្តកណ្ដាល កាលពីថ្ងៃទី១ ខែធ្នូ។
អ្នកនាំពាក្យរូបនេះបញ្ជាក់ទៀតថា ការបណ្ដេញជនជាតិវៀតណាមទាំងនោះស្របតាមច្បាប់ស្ដីពីអន្តោប្រវេសន៍កម្ពុជា និងប្រកាសរបស់ក្រសួងមហាផ្ទៃ ព្រមទាំងគោរពតាមគោលការណ៍ទូទៅ នៃសិទ្ធិមនុស្សជាសកល ដោយមានការសម្របសម្រួលជាមួយប៉ុស្តិ៍ច្រកទ្វារអន្តរជាតិបាវិត ប៉ុស្តិ៍កងទ័ពការពារព្រំដែនអន្តរជាតិម៉ុកបាយ ព្រមទាំងមានការចូលរួមពីតំណាងស្ថានទូតវៀតណាមប្រចាំនៅកម្ពុជាផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។