រដ្ឋមន្ត្រីក្រសួងអប់រំប្រកាសថា ឆ្នាំក្រោយនឹងរៀបចំប្រឡងបាក់ឌុបនៅអំឡុង ខែសីហា ដើម្បីឱ្យសិស្សមានឱកាសដាក់ពាក្យទៅរៀន ឬទទួលបានអាហារូបករណ៍រៀននៅក្រៅប្រទេស។ ការប្រកាសរបស់រដ្ឋមន្ត្រីក្រសួងអប់រំលោក ហង់ ជួនណារ៉ុន ក្នុងពេលចុះបើកវិញ្ញាសាប្រឡងបាក់ឌុបនៅព្រឹកថ្ងៃទី៨ ខែតុលា។
រដ្ឋមន្ត្រីក្រសួងអប់រំយុវជន និងកីឡា លោក ហង់ជួន ណារ៉ុន លើកឡើងថា ការប្រឡងបាក់ឌុបកន្លងទៅ គឺក្រសួងបានរៀបចំនៅខែសីហា ប៉ុន្តែដោយសារតែ បញ្ហាកូវីដ-១៩ ទើបលើកការប្រឡងនេះ ទៅខែធ្នូរហូតដល់ខែមករាវិញ។
លោកថា ការអូសបន្លាយពេលប្រឡងបាក់ឌុបនៅឆ្នាំកន្លងមក បានធ្វើឱ្យសិស្សានុសិស្សដែលត្រូវមកប្រឡងជួបនូវការលំបាកមួយចំនួន ក្នុងនោះ រួមមានបញ្ហា អាកាសធាតុ និងអាចយឺតយ៉ាវ សម្រាប់ឱកាសដាក់ពាក្យទៅរៀន ឬទទួលបានអាហារូបករណ៍នៅក្រៅប្រទេស។
ដូច្នេះ ការប្រឡងបាក់ឌុបនៅឆ្នាំក្រោយលោក ហង់ ជួនណារ៉ុន ថា ក្រសួងអប់រំនឹងរៀបចំនៅខែសីហាវិញ ពីព្រោះនៅខែសីហា ទើបចាប់ផ្ដើមមានភ្លៀងធ្លាក់ មិនធ្វើឱ្យមណ្ឌលប្រឡងមួយចំនួនលិចទឹក ហើយក៏ផ្ដល់ភាពងាយស្រួលដល់សិស្សានុសិស្សផងដែរ។
លោក ហង់ ជួនណារ៉ុន៖ «យើងចង់បង្ខិតវាឱ្យមកដល់ខែសីហា មូលហេតុអី គឺដើម្បីអ្នកដែលប្រឡងហើយ គាត់ប្រឡងចប់ហើយ គាត់មានឱកាសដើម្បីដាក់ពាក្យទៅរៀននៅបរទេស ក៏ទទួលអាហារូបករណ៍នៅបរទេស។ ប្រសិនបើប្រឡងមិនចប់ខែ ពីព្រោះប្រទេសគេ នៅបរទេសបវេសនកាលគឺចាប់ផ្ដើមគឺនៅខែកញ្ញា។ អ៊ីចឹងឆ្នាំនេះ យើងរុញមកដល់ខែតុលា នៅឆ្នាំខាងមុខយើងមកខែសីហា»។
ជុំវិញរឿងនេះ ប្រធានសមាគមគ្រូបង្រៀនកម្ពុជាឯករាជ្យអ្នកស្រី អ៊ុក ឆាយាវី គាំទ្រការប្ដូរខែប្រឡងទៅខែសីហាវិញ ដោយអ្នកស្រីថា នៅខែសីហា គឺមិនសូវ មានភ្លៀងធ្លាក់ច្រើនដូចខែនេះឡើយ។
អ្នកស្រី អ៊ុក ឆាយាវី៖ «គ្រូបង្រៀនជាច្រើនគឺគាត់ចង់បាននៅខែហ្នឹង[ខែសីហា]។ អ្វីដែលខុសប្រក្រតី គឺខែហ្នឹង[ខែតុលា]គឺជាខែទឹកឡើងខ្លាំង ភ្លៀងខ្លាំង ដូចជាព្រឹកមិញមេឃមិនទាន់បើកថ្ងៃផង ភ្លៀងធ្លាក់មកធ្វើឱ្យទាំងសិស្សទាំងគ្រូ ពិបាកទៅប្រឡង»។
ទាក់ទងការប្រឡងបាក់ឌុបនៅថ្ងៃទី៨ ខែតុលា ដែលជាថ្ងៃទី១ នៃការប្រឡងនេះវិញ ក្រសួងអប់រំបានសរសេរលើហ្វេសប៊ុកនៅថ្ងៃទី៨ ខែតុលា ថា បេក្ខជនមានបញ្ហាសុខភាព ២៧នាក់ ក្នុងនោះ មាន២នាក់ត្រូវបញ្ចប់ការប្រឡង។ បេក្ខជន ទាំង ២៧ នាក់នោះ គឺនៅតាមបណ្ដាខេត្តមួយចំនួន។
រីឯបេក្ខជនអវត្តមានសរុប ២.៣១៨នាក់ (ស្រី ៨៩៨នាក់) ក្នុងនោះ បេក្ខជនស្វៃរិន អវត្តមានចំនួន ១.៩១២នាក់ ។
ក្រៅពីបញ្ហាសុខភាពបេក្ខជនប្រឡងនោះ មានករណីសិស្សមួយរូបនៅខេត្តតាកែវ បានយកទូរស័ព្ទចូលក្នុងបន្ទប់ប្រឡង រីឯនៅខេត្តកណ្តាល មានករណីអនុរក្សប្រើប្រាស់ទូរស័ព្ទ ក្នុងអំឡុងពេលបំពេញភារកិច្ច។
ចំពោះដំណើរការសំណេរក្រសួងអប់រំថា បានប្រព្រឹត្តទៅដោយរលូន និងមិនមានបាតុភាពមិនប្រក្រតីណាមួយកើតឡើងឡើយ។
វិទ្យុអាស៊ីសេរីមិនអាចសុំការអត្ថាធិប្បាយពីអ្នកនាំពាក្យក្រសួងអប់រំ អ្នកស្រី ឃួន វិច្ឆិកា និងលោក កាន់ ពុទ្ធី ទាក់ទងនឹងការប្រឡងបានទេ នៅថ្ងៃទី៨ ខែតុលា ដោយទូរស័ព្ទចូលតែគ្មានអ្នកទទួល។
ការប្រឡងបាក់ឌុបឆ្នាំនេះ មានរយៈពេល ២ថ្ងៃចាប់ពីថ្ងៃទី៨ ដល់ទី៩ ខែតុលា ខណៈដំណើរការកំណែនឹងប្រព្រឹត្តទៅ ចាប់ពីថ្ងៃទី១១ ដល់ថ្ងៃទី១៧ ខែតុលា។ នៅឆ្នាំ២០២៤ នេះ មានបេក្ខជនចុះឈ្មោះប្រឡងសរុបចំនួនជាង ១សែន ៣ម៉ឺន នាក់(១៣៧.០៤០) ក្នុងនោះមានសិស្សស្រី ចំនួនជាង ៧ម៉ឺននាក់ (៧៤.៨៨២)។ នៅឆ្នាំនេះ មានបេក្ខជនប្រឡងថ្នាក់វិទ្យាសាស្ត្រសង្គមច្រើនជាងឆ្នាំមុនៗ ដោយមានចំនួនជាង ៩ម៉ឺន ៧ពាន់នាក់ (៩៧.៦៨២) ខណៈថ្នាក់វិទ្យាសាស្ត្រ មានចំនួនជិត ៤ម៉ឺននាក់(៣៩.៣៥៨)។
ក្រសួងអប់រំបានកំណត់យកថ្ងៃទី៣០ខែតុលាដើម្បីប្រកាសលទ្ធផលប្រឡងបាក់ឌុប នៅរាជធានីភ្នំពេញ និងខេត្តកណ្ដាលនិងនៅថ្ងៃទី៣១ខែតុលាសម្រាប់ខេត្តផ្សេងៗនៅទូទាំងប្រទេស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។