កម្មករនៅក្រុងតាខ្មៅ ជាង ១ពាន់នាក់ សុំអាជ្ញាធរឱ្យពន្លឿននីតិវិធីដាក់លក់ដេញថ្លៃឥវ៉ាន់ក្នុងរោងចក្រពីរកន្លែងជាប់គ្នា
2020.11.12
កម្មករ Dignity Knitter យាមខាងមុខរោងចក្ររង់ចាំដំណោះស្រាយពីថៅកែ ថ្ងៃទី១៥ ខែមិថុនា ឆ្នាំ២០២០។
រូប៖ ហ្វេសប៊ុក
កម្មករកាត់ដេរជាង ១ពាន់នាក់ ស្ថិតនៅក្រុងតាខ្មៅ ខេត្តកណ្ដាល ស្នើសុំដល់អាជ្ញាធរពន្លឿននីតិវិធីដាក់លក់ឥវ៉ាន់ក្នុងរោងចក្រឌីកនើធី នីតធើរ (Dignity Knitter Limited) និងរោងចក្ររោងចក្រ អេខូបេស (Eco Base) ដែលមានម្ចាស់តែមួយជាជនជាតិចិនហុងកុង ដើម្បីពួកគាត់ឆាប់ទទួលបានប្រាក់ដោះស្រាយជីវភាពរស់នៅ។ អាជ្ញាធរ អះអាងថា តុលាការកំពុងប្រកាសដាក់លក់ដេញថ្លៃឥវ៉ាន់ ក្នុងរោងចក្រទាំងពីរនោះហើយ។
តំណាងកម្មករ លោក ភិន សុភា ឲ្យដឹងថា មានក្រុមហ៊ុនអចលនទ្រព្យអន្តរជាតិមួយឈ្មោះ ស៊ីជេ (CJ) បានចុះពិនិត្យវាយតម្លៃសម្ភារៈកាត់ដេរនៅក្នុងរោងចក្រទាំងពីររួចរាល់ហើយ នៅរសៀលថ្ងៃទី១១ វិច្ឆិកា ប៉ុន្តែចំនួនទឹកប្រាក់សរុប នៅមិនទាន់ដឹងប្រាកដនៅឡើយទេ។
លោកបន្តថា អាជ្ញាធរគួរបើកឲ្យមានក្រុមហ៊ុនជាច្រើន ចូលរួមប្រកួតដេញថ្លៃគ្នា ទិញយកឥវ៉ាន់ក្នុងរោងចក្រទាំងពីរ ដើម្បីកុំឲ្យមានក្រុមហ៊ុនតែមួយទិញក្នុងតម្លៃទាបណាមួយ ដែលធ្វើឲ្យខូចប្រយោជន៍ដល់កម្មករជាង ១ពាន់នាក់។ តំណាងកម្មកររូបនេះ ស្នើសុំដល់អាជ្ញាធរ ជួយពន្លឿននីតិវិធី និងប្រកាសពេលបើកលក់ដេញថ្លៃរបស់របរក្នុងរោងចក្រទាំងពីរ ដើម្បីឲ្យពួកគាត់ទទួលបានសំណងសមរម្យ ស្របទៅនឹងរយៈពេលរោងចក្របិទជាង ១ឆ្នាំមកនេះ៖ «សូមកុំឲ្យមាន ១ក្រុមហ៊ុន យ៉ាងហោចណាស់មាន ២ ទៅ។ បើសិនជាមានតែ ១ អ៊ីចឹង ពួកខ្ញុំបារម្ភថា បើក្រុមហ៊ុនហ្នឹង ឯករាជមិនពាក់ព័ន្ធប្រយោជន៍ភាគីណាមួយអ៊ីចឹង របស់ពួកខ្ញុំអាចលក់បានថ្លៃ។ តែបើសិនជាក្រុមហ៊ុនហ្នឹងនៅក្នុងឥទ្ធិពលរបស់អ្នកណាម្នាក់ ឬទទួលបានប្រយោជន៍ខាងណាមួយ អ៊ីចឹងគេចង់ឲ្យថ្លៃថោក ស្រេចតែទៅគេជាអ្នកថាហ្នឹង។ បើសិនជាមាន ២ ទៅ ៣ គេអាចប្រកួតប្រជែងគ្នាអ៊ីចឹង»។
ឆ្លើយតបរឿងនេះ អភិបាលខេត្តកណ្ដាល លោក គង់ សោភ័ណ្ឌ មានប្រសាសន៍ថា រឿងដាក់លក់ដេញថ្លៃឥវ៉ាន់នៅក្នុងរោងចក្រទាំងពីរនេះ គឺស្ថិតក្នុងនីតិវិធីរបស់តុលាការ ដោយមានកិច្ចសហការជាមួយអាជ្ញាធរ ដើម្បីធ្វើយ៉ាងណាពន្លឿនដំណោះស្រាយជូនកម្មករឲ្យឆាប់តាមតែអាចធ្វើទៅបាន។
លោកបញ្ជាក់ថា នៅពេលតុលាការបញ្ចប់នីតិវិធីហើយ ប្រកាសដាក់លក់ដេញថ្លៃ នឹងមានការចូលរួមពិនិត្យតាមដានពីមន្ត្រីនៃអង្គភាពប្រឆាំងអំពើពុករលួយ ដើម្បីធ្វើឲ្យប្រាកដថា ដំណើរការរឿងនេះ គឺត្រឹមត្រូវ និងអាចទទួលយកបានពីគ្រប់ភាគីពាក់ព័ន្ធទាំងអស់។ លោករំពឹងថា នឹងមានក្រុមហ៊ុនជាច្រើនចូលរួមដេញថ្លៃទិញយកឥវ៉ាន់ក្នុងរោងចក្រទាំងពីរនេះ ក្នុងតម្លៃមួយសមរម្យ៖ «ខ្ញុំជំរុញរឿងហ្នឹងជាប់ សូមធ្វើឲ្យបានលឿនតាមនីតិវិធី។ អ៊ីចឹងហើយ! ខ្ញុំប្រើវិធីមួយ សូមឲ្យធ្វើត្រឹមត្រូវតាមច្បាប់ ហើយកម្មករទាំងអស់នៅអង្គុយមើលបងប្អូនគ្រប់គ្នា។ បងប្អូនធ្វើត្រឹមត្រូវ គាត់សាទរសប្បាយហើយ តែបើធ្វើមិនត្រឹមត្រូវ បងប្អូនជាប់ប្រឡាក់នឹងរឿងហ្នឹងហើយ។ ហើយអង្គភាពលោកអង្គុយត្រួតពិនិត្យមើល។ អ៊ីចឹង! ត្រូវលឿន បានការលក់ឡាយឡុង បានលុយបានកាក់ដល់ពួកគាត់ នូវអ្វីដែលប្រាក់ត្រូវទទួលបាន»។
ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា ហៅកាត់ ស៊ីខៅឌូ (C.CAWDU) លោក គង់ អាទិត្យ សាទរការពន្លឿននីតិវិធីរបស់អាជ្ញាធរ ក្នុងការដោះស្រាយវិវាទការងារមួយនេះ ប៉ុន្តែលោកចង់ឃើញការដាក់ដេញថ្លៃនេះ យ៉ាងយូរត្រឹមខែធ្នូខាងមុខ ដោយមិនមានការអូសបន្លាយពេលវេលាបន្តទៅទៀត៖ «មានក្រុមហ៊ុនមកវាយតម្លៃ ឥឡូវយើងឃើញហើយ។ យើងរង់ចាំមើលតទៅទៀត។ យើងគិតថាមិនគួរយូរដែរ ខែ១១ ខែ១២ ហ្នឹង ដើម្បីបញ្ចប់រឿងហ្នឹង ព្រោះយើងអត់អាចរង់ចាំបានទៀតទេ។ វាពិបាកលឿនមិច ដោយសារការងារនេះវានៅលើដៃតុលាការ តែយើងគាំទ្រចំពោះចំណាត់ការក្នុងជំរុញឲ្យអនុវត្តយ៉ាងយូរបំផុតក្នុងខែហ្នឹង ឬខែក្រោយដើម្បីបញ្ចប់ការងារហ្នឹងទាំងអស់គ្នា»។
កម្មកររោងចក្រ ឌីកនើធី នីតធើរ (Dignity Knitter Limited) និងរោងចក្រ អេខូបេស (Eco Base) បានផ្ទុះការតវ៉ា កាលពីខែធ្នូ ឆ្នាំ២០១៩ ដោយសារថៅកែរោងចក្របិទរោងចក្រភ្លាមៗ ដោយមិនទូទាត់សំណងតាមច្បាប់ការងារ ដូចជា មិនព្រមបើកប្រាក់ឈ្នួល និងប្រាក់បំណាច់ប្រចាំឆ្នាំ ជាដើម។
រោងចក្រទាំងពីរ មានថៅកែតែមួយជាជនជាតិចិនហុងកុង និងមានទីតាំងជាប់គ្នា ស្ថិតតាមបណ្ដោយផ្លូវជាតិលេខ២១ ក្នុងភូមិព្រែកតាព្រីង សង្កាត់សិត្បូ ក្រុងតាខ្មៅ។ រោងចក្រទាំងពីរនេះកាត់ដេរសំលៀកបំពាក់ និងស្រោមជើង ដូចគ្នា គឺប្រភេទចាក់ និងតម្បាញ ដែលមានកម្មករធ្វើការសរុប ១.១២៤នាក់៕
អត្ថបទពេញនិយម
RFA
- ក្រុមប្រឹក្សាអភិវឌ្ឍន៍កម្ពុជាគ្រោងធ្វើបេសកកម្មដើរគោះទ្វាររកវិនិយោគិននៅអាមេរិកជាថ្មី
- ក្រសួងមហាផ្ទៃបញ្ជាក់ថា កូនមន្ត្រីជាន់ខ្ពស់ ដែលបើកឡានបុកមនុស្សស្លាប់ពីរនាក់ នៅអូស្ត្រាលីនោះ គឺឈ្មោះ ឌឿន ឧត្ដមសេនីយ៍
- តុលាការចោទប្រកាន់ពលករខ្មែរដែលបញ្ជូនពីម៉ាឡេស៊ី ពីបទញុះញង់ និងឃុំខ្លួននៅពន្ធនាគារ
- ជនជាតិឥណ្ឌា ៦៧នាក់ទៀត ត្រូវបានសង្គ្រោះចេញពីកន្លែងឆបោកតាមអនឡាញនៅកម្ពុជា
- អ្នកឃ្លាំមើលថា រដ្ឋមន្ត្រីការបរទេសកម្ពុជា និយាយភូតកុហកពិភពលោកថាកម្ពុជាគោរពសិទ្ធិមនុស្ស និងនីតិរដ្ឋ
