ក្រុមអ្នកឃ្លាំមើលថា ករណីឃាតកម្មនៃជនបរទេសនៅលើទឹកដីខ្មែរកាន់តែច្រើនធ្វើឱ្យប៉ះពាល់មុខមាត់ប្រទេសជាតិកាន់តែខ្លាំង
2022.09.08
ជនសង្ស័យជនជាតិចិន ប្រព្រឹត្តិបទល្មើសនៅកម្ពុជា។
រូប៖ អគ្គស្នងការនគរបាលជាតិ
អំពើឃាតកម្មដែលមានការបាញ់សម្លាប់មនុស្សប្រព្រឹត្តដោយក្រុមឧក្រិដ្ឋជនជនជាតិចិននៅលើទឹកដីខ្មែរនារយៈពេលចុងក្រោយនេះ ហាក់កើតមានឡើងជាបន្តបន្ទាប់ដែលជារឿងគួរឱ្យព្រួយបារម្ភសម្រាប់សន្តិសុខជាតិទាំងមូល។ ក្រុមអ្នកតាមដានស្ថានការណ៍កម្ពុជា លើកឡើងថា បើអំពើឃាតកម្ម និងការធ្វើអត្តឃាតរបស់ជនបរទេសលើទឹកដីកម្ពុជាកាន់តែច្រើន នោះវានឹងធ្វើប៉ះពាល់ដល់សេដ្ឋកិច្ចជាតិ និងកេរ្តិ៍ឈ្មោះប្រទេសជាតិធ្ងន់ធ្ងរ។
មន្ត្រីសង្គមស៊ីវិល និងអ្នកវិភាគ លើកឡើងស្របគ្នាថា កំណើនករណីធ្វើអត្តឃាត របស់ជនបរទេស និងអំពើឃាតកម្ម លើជនបរទេស រួមនឹងវត្តមានជនជាតិចិនមួយចំនួន ដែល តែងតែមានអាវុធប្រើប្រាស់ និងបាញ់សម្លាប់មនុស្សនៅលើកទឹកដីខ្មែរ ជាបន្តបន្ទាប់នេះ គឺជាការគំរាមកំហែងធ្ងន់ធ្ងរដល់សន្តិសុខ សុវត្ថិភាពរបស់ប្រជាពលរដ្ឋទូទៅ និងអ្នកវិនិយោគល្អៗ ដែលចង់មកធ្វើអាជីវកម្ម ជំនួញនៅកម្ពុជា។
នាយកទទួលបន្ទុកទូទៅនៃអង្គការសិទ្ធិមនុស្សលីកាដូ (LICADHO) លោក អំ សំអាត លើកឡើងថា បើជនបរទេសនៅកម្ពុជាមួយចំនួននៅតែអាចបន្តបង្កអសន្តិសុខសង្គមដូចជា ការបាញ់បោះគ្នាដោយសេរី ករណីឃាតកម្ម និងករណីជនបរទេសធ្វើអត្តឃាតជាដើម នោះរដ្ឋាភិបាលនឹងរងការរិះគន់អំពីការគ្រប់គ្រង និងការពារសុខសុវត្ថិភាពក្នុងប្រទេសគ្មានប្រសិទ្ធភាព៖ «បញ្ហាទាំងអស់នេះ ប្រសិនជាកើតឡើងច្រើន វាបង្កឱ្យមានបញ្ហាអសន្តិសុខ ដែលបង្កឱ្យមានការភ័យខ្លាច សម្រាប់ពលរដ្ឋទូទៅ ទោះបីជាការអត្តឃាតដោយជនបរទេសក៏ដោយ។ អ៊ីចឹងវា ប៉ះពាល់ច្រើន វាជះឥទ្ធិពលមិនល្អទេ ប្រសិនជាករណី [ជនបរទេសធ្វើអត្តឃាត ឬមានករណីឃាតកម្ម] កើតមានច្រើន។ មួយទៀតវាក៏អាច ជះឥទ្ធិពលសម្រាប់ការវិនិយោគ ភ្ញៀវទេសចរផ្សេងៗទៀតដែរ»។
ចំណែកឯ អ្នកវិភាគនយោបាយ លោក គឹម សុខ វិញមើលឃើញថា កំណើននៃអំពើឃាតកម្មដែលបង្កឡើងដោយជនបរទេស ជាពិសេសជនជាតិចិននៅតែបន្តកើតមានហូរហែ។ លោកថា ករណីជនជនជាតិចិនអាចមានកាំភ្លើងបាញ់សម្លាប់មនុស្សតាមអំពើចិត្តនៅកម្ពុជាដោយគ្មានអាជ្ញាធរណាស៊ើបអង្កេត ឆ្លុះបញ្ចាំងឱ្យឃើញថារដ្ឋាភិបាល លោក ហ៊ុន សែន កំពុងដឹកនាំប្រទេសដែលបណ្តោយឱ្យជនបរទេសប្រព្រឹត្តបទឧក្រិដ្ឋ ឬធ្វើអាជីវកម្មខុសច្បាប់ដោយចំហ។ លោកសោកស្តាយដែលកម្ពុជាជាប្រទេសមានធនធានធម្មជាតិ និងវប្បធម៌ល្អប្រពៃ ប៉ុន្តែ បច្ចុប្បន្នបែរក្លាយជាទីតាំងសម្រាប់ឧក្រិដ្ឋជនប្រព្រឹត្តនូវបទល្មើស និងធ្វើជំនួញមិនស្របច្បាប់តាមទំនើងចិត្តទៅវិញ៖ «ពីព្រោះអំពើឃាតកម្ម ប្រភេទប្រហារគ្នា លោតសម្លាប់ខ្លួនពីលើអគារមិនដឹងមូលហេតុ ហើយកាន់តែច្រើនឡើង មិនមែនមានន័យសមត្ថកិច្ច មិនដឹងការពិតនោះទេ។ ក៏ប៉ុន្តែ សមត្ថកិច្ចដឹងថា វាគឺជាអំពើរបស់ពួកម៉ាហ្វៀនិយម ហើយពួកនោះអាច មានឥទ្ធិពលធំទៅលើសមត្ថកិច្ចផង។ រឿងបែបហ្នឹង វាច្រើនតែកើតឡើងនៅក្នុងទឹកដីនៃតំបន់ម៉ាហ្វៀនិយមដូចជានៅម៉ាកាវ (Macau) ជាដើម»។
ឆ្លើយតបនឹងការលើកឡើងនេះ អ្នកនាំពាក្យគណៈកម្មាធិការសិទ្ធិមនុស្សរបស់រដ្ឋាភិបាល លោក កត្តា អ៊ន ប្រាប់វិទ្យុអាស៊ីសេរីថា រដ្ឋាភិបាលមិនចង់ឃើញរូបភាពអំពើឃាតកម្ម ឬអត្តឃាតរបស់ជនបរទេសនៅកម្ពុជាទេ។ លោកថា ការលើកឡើងនូវក្តីកង្វល់របស់មន្ត្រីសង្គមស៊ីវិល និងអ្នកវិភាគគឺជារឿងមួយ ប៉ុន្តែ ទន្ទឹមគ្នានេះលោកអំពាវនាវដល់ភាគីពាក់ព័ន្ធថា ត្រូវតែមានកិច្ចការសហការជាមួយសមត្ថកិច្ច ប្រសិនបើដឹងតម្រុយថាជនបរទេសណាដែលតែងតែបង្កអសន្តិសង្គមនៅកម្ពុជា៖ «ដូច្នេះហើយ អ្វីដែលសំខាន់គឺថា រដ្ឋាភិបាលតែងតែអំពាវនាវ បងប្អូនគ្រប់និន្នាការ គ្រប់ស្រទាប់ទាំងអស់ ឱ្យចូលរួមជាមួយសមត្ថកិច្ច ក្នុងការសហការគ្នា ជាមួយសមត្ថកិច្ច នៅក្នុងយុទ្ធនាការ ប្រយុទ្ធប្រឆាំងជនបរទេសដែលបង្កបទល្មើសនៅកម្ពុជា ក៏ដូចជាជនជាតិណាទាំងអស់ដែលបង្កបទល្មើសនៅកម្ពុជា។ នេះគឺជា បញ្ហារួមរបស់សង្គមដែលយើងទាំងអស់គ្នាត្រូវរួមគ្នាទប់ស្កាត់បទល្មើស»។
ទោះបីយ៉ាងណាក៏ដោយ ក្រុមឧក្រិដ្ឋជនជាតិចិនមួយចំនួន នៅតែអាចដកកាំភ្លើងបាញ់សម្លាប់មនុស្សនៅទីសាធារណៈ ជាបន្តបន្ទាប់នៅលើទឹកដីខ្មែរ។ លើសពីនេះ ជនជាតិចិនទាំងនោះ គឺពួកគេមិនញញើតច្បាប់កម្ពុជាឡើយ ដ្បិតករណីខ្លះក្នុងពេលសមត្ថកិច្ចចុះបង្ក្រាប ក្រុមឧក្រិដ្ឋជនទាំងនោះថែមទាំងដកកាំភ្លើងបាញ់តដៃជាមួយសមត្ថកិច្ចទៀតផង។
កាលពីយប់ថ្ងៃទី១៥ ខែមិថុនា កន្លងទៅ នៅខេត្តព្រះសីហនុ ក្រុមឧក្រិដ្ឋជនជនជាតិចិន និងវៀតណាមមានគ្នាជាង ១០នាក់ បានទាស់ពាក្យសម្តីជាមួយអ្នករត់ម៉ូតូកង់បីខ្មែរម្នាក់ ហើយបានដកកាំភ្លើងបាញ់ភ្ជង់អ្នករត់កង់បីរូបនោះ។ ក្រុមជនបរទេសទាំងនោះបានដកកាំភ្លើងបាញ់រះមកលើក្រុមសមត្ថកិច្ចពេលចុះបង្ក្រាប ដែលបណ្តាលឱ្យសមត្ថកិច្ចម្នាក់របួសធ្ងន់។
ដោយឡែក កាលពីយប់ថ្ងៃទី៣០ ខែកក្កដា នៅខេត្តព្រះសីហនុដែរ ជនជាតិចិនម្នាក់បានបាញ់សម្លាប់ជនជាតិចិនដូចគ្នា២នាក់ ឱ្យស្លាប់នៅហ្នឹងកន្លែង ក្នុងពេល ដែលជនជាតិចិនជាង ១០នាក់បានឈ្លោះទាស់ទែងគ្នារឿងអាជីវកម្មពួកគេ។
រំលងបាន១០ថ្ងៃ ពីករណីអំពើឃាតកម្មនេះ គឺកាលពីរំលងអធ្រាត្រចូលដល់ថ្ងៃទី៩ ខែសីហា ជនជាតិចិនម្នាក់ត្រូវជនជាតិចិនដូចគ្នាបាញ់សម្លាប់ក្នុងរថយន្ត និងម្នាក់ទៀតរបួស។ ប៉ុន្តែជនប្រព្រឹត្តល្មើសបានស្លាប់ទាំង៣នាក់ ដោយបើកឡានបុកបង្គោលភ្លើង ក្រោយបានបាញ់តដៃជាមួយសមត្ថកិច្ចខេត្តព្រះសីហនុ ដែលដេញតាមពួកគេ។ ករណីមួយទៀតកើតឡើង នៅភ្នំពេញ កាលពីថ្ងៃទី២៨ ខែសីហា គឺមានជនជាតិចិន៣នាក់ដេកស្លាប់ក្នុងថ្លុកឈាម ក្រោយជនជាតិចិនមួយក្រុមដកកាំភ្លើងបាញ់ នៅពេលមានជម្លោះនឹងគ្នា។ ក្នុងពេលនោះសមត្ថកិច្ចបានរឹបអូសកាំភ្លើងខ្លីចំនួន ២ដើម និងគ្រឿងញៀនមួយចំនួនផង។
ក្រៅពីនេះ ក៏មានជនបរទេស ជាពិសេសជនជាតិចិនលោតពីលើអគារសម្លាប់ខ្លួនឯងជាញឹកញយដែរ។
កាលពីថ្ងៃទី២ កញ្ញា ជនជាតិចិនម្នាក់បានលោតពីសណ្ឋាគារអន្តរជាតិជុនហាវ (Chun Hao International Hotel) បណ្តាលឱ្យរងរបួសធ្ងន់។ សមត្ថកិច្ចខេត្តព្រះសីហនុអះអាងថា នេះជាករណីបង្ខាំង។ តាមសេចក្ដីរាយការណ៍របស់សារព័ត៌មានអន្តរជាតិបានឱ្យដឹងថា មូលហេតុដែលជនជាតិចិន ឬជនបរទេសមួយចំនួន ដែលតែងលោតសម្លាប់ខ្លួនពីលើអគារជាញឹកញាប់មកនេះ ពីព្រោះពួកគេគឺជាជនរងគ្រោះត្រូវបានឧក្រិដ្ឋជនចាប់បង្ខាំងថែមទាំងមានការធ្វើទារុណកម្មលើពួកគេផង ទើបជនបរទេសទាំងនោះមិនអាចទ្រាំទ្របាន ក៏បញ្ចប់ជីវិតដោយលោតសម្លាប់ខ្លួនពីលើអគារ។
វិទ្យុអាស៊ីសេរីមិនអាចទាក់ទងអ្នកនាំពាក្យក្រសួងមហាផ្ទៃ លោក ខៀវ សុភ័គ និងស្នងការនគរបាលខេត្តព្រះសីហនុ លោក ជួន ណារិន្ទ ដើម្បីសាកសួរបន្ថែមពីបញ្ហានេះបានទេ។ ចំណែក ប្រធានអង្គភាពអ្នកនាំពាក្យរដ្ឋាភិបាល លោក ផៃ ស៊ីផាន ក៏មិនអាចទាក់ទងបានដែរ។
ទោះបីជាយ៉ាងណា អ្នកវិភាគនយោបាយ លោក គឹម សុខ ថ្លែងថា បើកម្ពុជាបន្តបណ្ដែតបណ្ដោយឱ្យមានអាជីវកម្មខុសច្បាប់កាន់កាប់ដោយជនបរទេស ហើយមានវត្តមានឧក្រិដ្ឋជនកាន់តែច្រើន នោះប្រជាពលរដ្ឋ និងសង្គមនឹងរងផលប៉ះពាល់ធ្ងន់ធ្ងរដោយចៀសមិនរួចឡើយ ដ្បិតលោកថាឧក្រិដ្ឋជនទាំងនោះអាចមានឥទ្ធិពលជាងសមត្ថកិច្ចដែលមានតួនាទីបង្ក្រាបលើពួកគេ។ ទោះបីជាយ៉ាងណា លោក អំពាវនាវដល់ប្រជាពលរដ្ឋឱ្យប្រុងប្រយ័ត្នចំពោះបទល្មើសឧក្រិដ្ឋកម្មនៅកម្ពុជា ហើយពលរដ្ឋក៏គួរតែប្រើសិទ្ធិតវ៉ាប្រឆាំងអយុត្តិធម៌គ្រប់វិស័យ និងត្រូវជំរុញឱ្យមានការផ្លាស់ប្ដូរការដឹកនាំប្រទេសបែបប្រជាធិបតេយ្យទើបកម្ពុជាអាចមាននីតិរដ្ឋពិតប្រាកដ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
រឿងដែលគេអានច្រើនបំផុត
RFA
- តុលាការសម្រេចឃុំខ្លួនមេដឹកនាំសហជីពកញ្ញា ឈឹម ស៊ីថរ ក្រោយចាប់ខ្លួនពីព្រលានយន្តហោះ
- អ្នកវិភាគនិងយុវជនយល់ថា បណ្ឌិត យ៉ង សាំងកុមារ ចុះចូលគណបក្សកាន់អំណាចទំនងរឿងនយោបាយច្រើនជាងដើម្បីជួយវិស័យកសិកម្ម
- បណ្ឌិត យ៉ង សាំងកុមារ ចុះចូលជាមួយគណបក្សកាន់អំណាចដោយអះអាងថា ដើម្បីជួយវិស័យកសិកម្ម
- លោក សុន ឆ័យ ថា តុលាការរឹបអូសទ្រព្យសម្បត្តិរបស់លោកដោយបំពាននីតិវិធី
- បក្សភ្លើងទៀនរំឭកខួប២៧ឆ្នាំ និងកំណត់ទិសដៅប្រកួតប្រជែងការបោះឆ្នោតឆ្នាំ២០២៣
រឿងដែលគេអានច្រើនបំផុត
សង្គម
