សមាគមគ្រូបង្រៀនកម្ពុជាឯករាជ្យ ស្នើសុំទៅក្រសួងអប់រំ យុវជន និងកីឡា ជួយអន្តរាគមន៍ដោះស្រាយបញ្ហាមួយចំនួន នៅក្នុងអនុវិទ្យាល័យមួយក្នុងខេត្តតាកែវ ដែលកំពុងប្រឈមនឹងការគ្មានសិស្សចូលរៀន។ សំណើសុំនេះធ្វើឡើងតាមរយៈលិខិតមួយច្បាប់កាលពីថ្ងៃទី១៩ មេសាដោយរៀបរាប់ថាបញ្ហានេះកំពុងធ្វើឲ្យប៉ះពាល់ដល់ទឹកចិត្តគ្រូបង្រៀន។ សំណើសុំនោះត្រូវបានមន្ត្រីក្រសួងអប់រំទទួលយកប៉ុន្តែមិនទាន់មានការសន្យាណាមួយនៅឡើយទេ។
ប្រធានសមាគមគ្រូបង្រៀនកម្ពុជាឯករាជ្យ អ្នកស្រី អ៊ុក ឆាយ៉ាវី ថ្លែងថា បញ្ហាដែលកំពុងកើតឡើងក្នុងអនុវិទ្យាល័យខ្លាគ្រហឹម ក្នុងខេត្តតាកែវនោះ គឺថ្នាក់ទី៧មានសិស្សតែម្នាក់ប៉ុណ្ណោះកំពុងរៀននៅទីនោះ ដែលបញ្ហានេះបានជះឥទ្ធិពលយ៉ាងខ្លាំងដល់ទឹកចិត្តគ្រូបង្រៀននៅសាលានោះ។
អ្នកស្រីបន្តថា លើសពីនេះ លោកគ្រូអ្នកគ្រូត្រូវបង្រៀនច្រើនមុខវិជ្ជា និងបង្រៀនលើសម៉ោង ក៏ប៉ុន្តែមិនទទួលបានប្រាក់បន្ថែមម៉ោងនោះឡើយ ចំណែកឯមុខវិជ្ជាភាសាអង់គ្លេសវិញ គឺគ្មានគ្រូបង្រៀនតែម្តង។
អ្នកស្រីអះអាងទៀតថា បញ្ហានេះខាងក្រុមគ្រូបង្រៀនបានស្នើទៅការិយាល័យអប់រំស្រុកត្រាំកក់ និងមន្ទីរអប់រំខេត្តតាកែវជាច្រើនដងរួចហើយប៉ុន្តែមិនទាន់មានដំណោះស្រាយអ្វីនៅឡើយទេ។ អ្នកស្រីទទូចឱ្យក្រសួងអប់រំចុះពិនិត្យករណីជាបន្ទាន់ ដើម្បីរកដំណោះស្រាយ កុំឱ្យខាតបង់ធនធានគ្រូបង្រៀន និងខាតបង់ថវិកាជាតិ និងសំខាន់ជាងនេះទៀត គឺដើម្បីកុំឱ្យអនុវិទ្យាល័យនោះត្រូវបិទទ្វារ។
អាស៊ីសេរីបានទាក់ទងអ្នកនាំពាក្យក្រសួងអប់រំ លោក រស់ សាលីន ដើម្បីសាកសួរអំពីវិធានការរបស់ក្រសួងជុំវិញបញ្ហានេះដែរ ប៉ុន្តែលោកមិនលើកទូរស័ព្ទ។
គ្រូបង្រៀនម្នាក់នៃអនុវិទ្យាល័យខ្លាគ្រហឹម លោក ង៉ែត នាង អះអាងប្រាប់អាស៊ីសេរីថា សិស្សថ្នាក់ទី៧ នៃអនុវិទ្យាល័យរបស់លោក ពិតជាមានតែម្នាក់ពិតមែន។ លោកថា កាលពីដើមឆ្នាំសិក្សា សិស្សដែលបានចុះឈ្មោះចូលរៀនមានចំនួន ៦នាក់ ក៏ប៉ុន្តែពួកគេបានឈប់រៀនជាបន្តបន្ទាប់ នៅសល់តែសិស្សម្នាក់ប៉ុណ្ណោះ។ លោកថា បញ្ហានេះបានប៉ះពាល់ដល់ទឹកចិត្តរបស់ក្រុមគ្រូបង្រៀនជាខ្លាំង ដោយពួកគាត់មានអារម្មណ៍ធុញទ្រាន់ បាក់ទឹកចិត្ត និងស្រងេះស្រងោច ព្រោះមានតែពីរនាក់គ្រូ និងសិស្សក្នុងថ្នាក់រៀននោះ។
គ្រូបង្រៀនរូបនេះបន្តថា សព្វថ្ងៃមានគ្រូបង្រៀនចំនួន ៥នាក់ ដែលទទួលខុសត្រូវបង្រៀនសិស្សម្នាក់នោះគ្រប់មុខវិជ្ជា។ លោកអះអាងថា ចាប់តាំងពីបង្កើតឡើង អនុវិទ្យាល័យខ្លាគ្រហឹមនេះ មានសិស្សចូលរៀនថ្នាក់ទី៧ជិតមួយរយនាក់ក្នុងមួយឆ្នាំៗ។ ក៏ប៉ុន្តែចំនួននេះបានធ្លាក់ចុះជាបន្តបន្ទាប់ រហូតដល់ឆ្នាំនេះ បញ្ជីឈ្មោះសិស្សដែលការិយាល័យអប់រំស្រុកបញ្ជូនមកឱ្យសាលាមានសិស្សតែជាង ១០នាក់ប៉ុណ្ណោះ ហើយអ្នកដែលបានចុះឈ្មោះចូលរៀនមានចំនួន ៦នាក់ និងថយចុះសល់តែម្នាក់គត់នៅពេលនេះ។ លោកយល់ឃើញថា បញ្ហានេះអាចបណ្តាលមកពីនៅតំបន់នោះមានអនុវិទ្យាល័យច្រើន ហើយអនុវិទ្យាល័យខ្លាគ្រហឹមនៅដាច់ពីគេ និងមិនមានការរៀបចំត្រឹមត្រូវ។
អនុវិទ្យាល័យខ្លាគ្រហឹមមានទីតាំងស្ថិតក្នុងឃុំតាភេម ស្រុកត្រាំកក់ ខេត្តតាកែវ។ សាលានេះត្រូវបានបង្កើតឡើងកាលពីឆ្នាំ២០០២ ដោយផ្តាច់ចេញពីវិទ្យាល័យ សុខ អាន ១ ឧសភា។ សាលានេះមានថ្នាក់ដឹកនាំ និងបុគ្គលិកអប់រំសរុប ១០នាក់។ នៅឆ្នាំនេះសិស្សថ្នាក់ទី៩ មានចំនួនជិត ៤០នាក់ ថ្នាក់ទី៨ ជាង ៣០នាក់ និងថ្នាក់ទី៧ មានតែម្នាក់គត់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។