ច្បាប់​ថ្មី​របស់​អូស្ត្រាលី នឹង​បញ្ឈប់​រំហូរ​ចូល​លុយ​កខ្វក់​ពី​ប្រទេស​កម្ពុជា

ដោយ ថា ថៃ
2024.05.07
ច្បាប់​ថ្មី​របស់​អូស្ត្រាលី នឹង​បញ្ឈប់​រំហូរ​ចូល​លុយ​កខ្វក់​ពី​ប្រទេស​កម្ពុជា លោក តាក់ ម៉េងហ៊ាង សមាជិក​សភា​រដ្ឋវ៉ិកតូរីយ៉ា (Victoraia) អូស្ត្រាលី ដើម​កំណើត​ខ្មែរ។
RFA 2023-07-21

រដ្ឋាភិបាល​អូស្ត្រាលី​កំពុង​ពិនិត្យ​កែប្រែ​ច្បាប់​ប្រឆាំង​ការ​លាង​លុយ​កខ្វក់ ក្នុង​បំណង​ទប់ស្កាត់​មន្ត្រី​ពុករលួយ និង​ឧក្រិដ្ឋជន​ពី​ប្រទេស​ផ្សេងៗ រួម​ទាំង​កម្ពុជា​ផង ដែល​ប្រើប្រាស់​លុយ​កខ្វក់​មក​លាក់​ទុក​នៅ​ប្រទេស​អូស្ត្រាលី​តាម​វិធី​ផ្សេងៗ ដូចជា ការ​ទិញ​អចលនទ្រព្យ​ជា​ដើម។ អ្នក​ឃ្លាំមើល​យល់​ថា គម្រោង​ធ្វើ​វិសោធនកម្ម​ច្បាប់​នេះ នឹង​ធ្វើ​ឲ្យ​មន្ត្រី​ពុករលួយ និង​ពួក​ឧក្រិដ្ឋជន​មក​ពី​កម្ពុជា លែង​មាន​ចន្លោះ​ប្រហោង​ក្នុង​ការ​លាង​លុយ​កខ្វក់​នៅ​ក្នុង​ប្រទេស​អូស្ត្រាលី។

រដ្ឋាភិបាល​អូស្ត្រាលី កំពុង​បោះ​ជំហាន​ទៅ​មុខ​ក្នុង​ការ​កែប្រែ​ច្បាប់​ថ្មី ដើម្បី​ទប់ស្កាត់​ការ​លាង​លុយ​កខ្វក់​នៅ​ក្នុង​ប្រទេស​អូស្ត្រាលី​ក្រោម​រូបភាព​ជា​ការ​វិនិយោគ និង​ការ​ទិញ​អចលនទ្រព្យ​ដោយ​ពួក​អ្នក​មាន​លុយ​មាន​អំណាច​ខ្មែរ​នៅ​កម្ពុជា និង​ពួក​ឧក្រិដ្ឋជន​មក​ប្រទេស​ផ្សេង​ទៀត។ ច្បាប់​ថ្មី ដែល​បង្ក្រាប​ទៅ​លើ​ការ​លាង​លុយ​កខ្វក់​នេះ នឹង​ជំរុញ​ឲ្យ​ក្រុម​ភ្នាក់ងារ​អចលនទ្រព្យ មេធាវី ធនាគារ និង​ក្រុម​គណនេយ្យករ រួម​ទាំង​ក្រុមហ៊ុន​ចែកចាយ​វត្ថុ​មាន​តម្លៃ​ផ្សេងៗ នៅ​ប្រទេស​អូស្ត្រាលី ត្រូវ​រឹត​បន្តឹង​ការ​សួរ​នាំ​ប្រភព​ចំណូល​របស់​អតិថិជន និង​ត្រូវ​រាយការណ៍​អំពី​ប្រតិបត្តិការ​ផ្ទេរ​សាច់ប្រាក់​ពី​ក្រៅ​ប្រទេស ដែល​គួរ​ឲ្យ​សង្ស័យ។

សមាជិក​សភា​សហព័ន្ធ​អូស្ត្រាលី និង​ជា​អគ្គនាយក​មេធាវី លោក ម៉ាឃ ដ្រេយហ្វឺស (Mark Dreyfus) លើកលែង​នៅ​ក្នុង​សេចក្ដី​ប្រកាស​ព័ត៌មាន ចុះ​ថ្ងៃ​ទី៦ ខែឧសភា​ថា រដ្ឋាភិបាល នឹង​ចំណាយ​លុយ ១៦៦.៤លាន​ដុល្លារ​អូស្ត្រាលី ឬ​ស្មើ​នឹង ប្រមាណ​ជាង ១១០លាន​ដុល្លារ​អាមេរិក ដើម្បី​ធ្វើ​កំណែទម្រង់​ច្បាប់​ប្រឆាំង​ការ​លាង​លុយ​កខ្វក់ និង​ហិរញ្ញប្បទាន​ភេរវកម្ម​របស់​ប្រទេស​អូស្ត្រាលី​ឲ្យ​កាន់​តែ​មាន​ប្រសិទ្ធភាព និង​ស្រប​តាម​ស្តង់ដារ​អន្តរជាតិ ខណៈ​អូស្ត្រាលី កំពុង​មាន​ហានិភ័យ​ខ្លាំង​ក្នុង​ការ​ក្លាយ​ជា​ឋានសួគ៌​សម្រាប់​ការ​លាង​លុយ​កខ្វក់។ លោក​បន្ត​ថា ជា​រៀងរាល់​ឆ្នាំ មូលនិធិ​ខុស​ច្បាប់​រាប់​ពាន់​លាន​ដុល្លារ ហូរ​ចូល​ប្រទេស​អូស្ត្រាលី ដែល​មាន​ប្រភព​ចេញ​ពី​សកម្មភាព​ខុស​ច្បាប់ ដូចជា ការ​ជួញដូរ​គ្រឿង​ញៀន ការ​ជួញដូរ​មនុស្ស ការ​គេច​ពន្ធ ឧក្រិដ្ឋកម្ម​តាម​អ៊ីនធឺណិត (Cybercrime) ការ​ជួញដូរ​អាវុធ និង​អំពើ​ខុស​ច្បាប់ រួម​ទាំង​អំពើ​ពុករលួយ​ផ្សេងៗ ទៀត។

ការ​ប្រកាស​ពី​គម្រោង​វិសោធនកម្ម​ច្បាប់​នេះ ស្រប​គ្នា​នឹង​របាយការណ៍​ចេញ​ថ្មី​ដោយ​អង្គការ​តម្លាភាព​អន្តរជាតិ​អូស្ត្រាលី ដែល​បង្ហាញ​ថា លុយ​កខ្វក់​រាប់​សិប​លាន​ដុល្លារ បាន​ហូរ​ចេញ​ពី​ប្រទេស​ក្រីក្រ​កម្ពុជា​ជា​រៀងរាល់​ឆ្នាំ ដែល​មាន​គម្លាត​ខុស​គ្នា ឆ្ងាយ ស្ទើរ​មិន​គួរ​ឲ្យ​ជឿ បើ​ប្រៀបធៀប​នឹង​ប្រាក់​ចំណូល​ប្រចាំ​ឆ្នាំ​របស់​ប្រជាជន​ខ្មែរ​ម្នាក់ៗ ដែល​មាន​ចំនួន​ជិត ២ពាន់​ដុល្លារ (.៦៩០)។ របាយការណ៍​នេះ​លាត​ត្រដាង​ថា រយៈ​ពេល ៥ឆ្នាំ ពី​ឆ្នាំ២០១៩ ដល់​ឆ្នាំ២០២៣ អចលនទ្រព្យ​ចំនួន ១១៨កន្លែង ដែល​មាន​តម្លៃ​សរុប​ចំនួន ១១០លាន​ដុល្លារ ត្រូវ​បាន​ទិញ​ដោយ​ជនជាតិ​ខ្មែរ។ គ្រាន់តែ​នៅ​ក្នុង​ឆ្នាំ២០២២ តែ​មួយ មាន​ទឹក​ប្រាក់​ជាង ៥១៦លាន​ដុល្លារ ត្រូវ​បាន​ផ្ទេរ​ចេញ​ពី​កម្ពុជា ចូល​អូស្ត្រាលី។ប៉ុន្តែ មាន​ទឹក​ប្រាក់​រាប់​លាន​ដុល្លារ​ទៀត ដែល​មិន​បាន​ឆ្លងកាត់​តាម​ប្រព័ន្ធ ដែល​គ្រប់គ្រង​បាន។

ទាក់ទង​រឿង​នេះ សមាជិក​សភា​រដ្ឋវ៉ិកតូរីយ៉ា (Victoraia) ដើម​កំណើត​ខ្មែរ លោក តាក់ ម៉េងហ៊ាង ថ្លែង​ថា វិសោធនកម្ម​ច្បាប់​ប្រឆាំង​ការ​លាង​លុយ​កខ្វក់​នេះ នឹង​អាច​អនុម័ត​ឆាប់ៗ ហើយ​នឹង​ក្លាយ​ជា​ឧបករណ៍​សម្រាប់​ស្ថាប័ន​ពាក់ព័ន្ធ​របស់​អូស្ត្រាលី យក​ប្រើប្រាស់ ដើម្បី​ប្រយុទ្ធ​ប្រឆាំង​អំពើ​លាង​លុយ​កខ្វក់​ឲ្យ​មាន​ប្រសិទ្ធភាព​ជាង​មុន។

លោក តាក់ ម៉េងហ៊ាង៖ «គឺ​ជា​គម្រោង​ច្បាប់​អូស្ត្រាលី​នៅ​ក្នុង​ការ​រឹត​បន្តឹង ឬ​ក៏​ដាក់​សំណាញ់​ឲ្យ​វា​ជិត​ជាង​មុន ពាក់ព័ន្ធ​នឹង​ការ​នាំ​លុយ​ពី​បរទេស​ចូល​ប្រទេស​អូស្ត្រាលី។កន្លង​មក​នេះ មាន​ស្ថាប័ន ឬ​អង្គភាព​ផ្សេងៗ ដូចជា AUSTRAC ដែល​ជា​អាជ្ញាធរ​អូស្ត្រាលី​នៅ​ក្នុង​ការ​ពិនិត្យ​មើល​ការ​វេរ​លុយ ឬ​ហិរញ្ញវត្ថុ​នេះ​មាន​ក្ដី​បារម្ភ ជាពិសេស បណ្ដា​ប្រទេស​ក្រីក្រ​មួយ​ចំនួន ដែល​បាន​បញ្ជូន ឬ​នាំ​ថវិកា​ដោយ​មិន​ដឹង​ប្រភព រួច​ហើយ តាម​រយៈ​ការ​ទិញ​អចលនទ្រព្យ​នៅ​ប្រទេស​អូស្ត្រាលី»

វិទ្យុ​អាស៊ី​សេរី មិន​អាច​សុំ​ការ​ឆ្លើយ​តប​ជុំវិញ​រឿង​នេះ​ពី​ប្រធាន​អង្គភាព​អ្នក​នាំ​ពាក្យ​រដ្ឋាភិបាល​លោក ប៉ែន បូណា បាន​ទេ ដោយ​ទូរស័ព្ទ​ចូល​ពុំ​មាន​អ្នក​ទទួល។

កន្លងមក សែស្រឡាយ​អ្នក​មាន​អំណាច​ខ្មែរ​ជា​ច្រើន​ត្រកូល បាន​ជះ​លុយ​មក​ទិញ អចលនទ្រព្យ ទិញ​សញ្ជាតិ និង​វិនិយោគ​នៅ​អូស្ត្រាលី។អ្នក​ទាំង​នោះ រួមមាន កូនៗ និង​ក្មួយៗ របស់​លោក ហ៊ុន សែន កូន​របស់​អតីត​រដ្ឋមន្ត្រី​ក្រសួង​ដែនដី លោក ជា សុផារ៉ា គ្រួសារ​រដ្ឋមន្ត្រី​ក្រសួង​សេដ្ឋកិច្ច និង​ហិរញ្ញវត្ថុ លោក អូន ព័ន្ធមុនីរ័ត្ន និង​ក្រុម គ្រួសារ​របស់​លោក ឡាវ វ៉ាន់ ដែល​ជា​មន្ត្រី​ជាន់​ខ្ពស់​ក្រសួង​សាធារណការ និង​ដឹក​ជញ្ជូន និង​ជា​គ្រួសារ​អ្នក​ជំនួញ ដែល​មាន​កេរ្តិ៍ឈ្មោះ​អាស្រូវ និង​គ្រួសារ​មេ​ពន្ធដា លោក គង់ វិបុល ព្រមទាំង​មន្ត្រី​ជាន់​ខ្ពស់​រដ្ឋាភិបាល​មួយ​ចំនួន​ទៀត។

អង្គការ​តម្លាភាព​អន្តរជាតិ​អូស្ត្រាលី រម្លឹក​ទៅ​រដ្ឋាភិបាល​អូស្ត្រាលី ថា កម្ពុជា គឺ​ជា​ប្រទេស​ក្រីក្រ​មួយ ដែល​ប្រជាពលរដ្ឋ​ខ្មែរ​ជា​ច្រើន​កំពុង​រស់នៅ​ក្នុង​ស្ថានភាព​ក្រីក្រ ដូច្នេះ រំហូរ​ទឹកប្រាក់​រាប់​សិប​លាន​ដុល្លារ​ចូល​ប្រទេស​អូស្ត្រាលី គឺ​ជា​រឿង​គួរ​ឲ្យ​ព្រួយ​បារម្ភ និង​សង្ស័យ​បំផុត ដែល​ទាមទារ​ឲ្យ​មាន​ការ​ពិនិត្យ​មើល​ឲ្យ​បាន​តឹងរ៉ឹង។ អង្គការ​តម្លាភាព​អន្តរជាតិ​អូស្ត្រាលី និង​ស្ថាប័ន​ដៃគូ ដែល​មាន​ជំនាញ​ប្រឹក្សា​ខាង​ឧក្រិដ្ឋកម្ម​ហិរញ្ញវត្ថុ សន្តិសុខ​អ៊ីនធឹណិត និង​ការ​វិនិយោគ​ឈ្មោះ ខូដាម៉ែនថា (KordaMentha) រក​ឃើញ​ថា ប្រទេស​កម្ពុជា ក្លាយ​ជា​មជ្ឈមណ្ឌល​លេចធ្លោ​ក្នុង​តំបន់​សម្រាប់​ការ​លាង​លុយ​កខ្វក់​ដោយសារ​អំពើ​ក្លែងបន្លំ អំពើ​ឆបោក អំពើពុករលួយ ការ​សូកប៉ាន់ ការ​ជួញដូរ​គ្រឿង​ញៀន ការ​ជួញដូរ​មនុស្ស ការ​កាប់​ឈើ​ខុស​ច្បាប់ និង​ការ​រត់ពន្ធ​សត្វព្រៃ​ជា​ដើម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។