ពលរដ្ឋ​រង​ផល​ប៉ះពាល់​ពី​ទំនប់​វារីអគ្គិសនី​សេសាន​ក្រោម​ពីរ​ប្ដឹង​អ្នក​មាន​អំណាច​រឿង​បាញ់​គោ​ពួកគាត់​យក​សាច់​លក់

ដោយ ម៉ៅ សុធានី
2020-04-19
Share
ពលរដ្ឋ​ សេសាន ៩២២ ក្រុម​ពលរដ្ឋ​រស់នៅ​ភូមិ​ស្រែស្រណុក ឃុំ​ក្បាលរមាស ស្រុក​សេសាន ខេត្ត​ស្ទឹងត្រែង តវ៉ា​នៅ​សាលា​ឃុំ​ក្បាលរមាស កាល​ពី​ខែ​មេសា ឆ្នាំ​២០២០។
Photo Adhoc

ពលរដ្ឋ​ដែល​រងគ្រោះ​ដោយសារ​ទំនប់​វារីអគ្គិសនី​សេសាន​ក្រោម​ពីរ​នៅ​ខេត្ត​ស្ទឹងត្រែង កំពុង​ស្វែងរក​កិច្ច​អន្តរាគមន៍ ផ្នែក​ច្បាប់​ទាក់ទិន​ករណី អ្នក​មាន​អំណាច​ម្នាក់ ដែល​ជា​សមាជិក​ក្រុមប្រឹក្សា​ស្រុក​សេសាន ឈ្មោះ សា សុគ្រី បាន​បញ្ជា​ឱ្យ​កម្លាំង​កម្មករ​បាញ់​គោ​ពួកគាត់ ងាប់​អស់ ៧​ក្បាល ដើម្បី​វះ​យក​សាច់​លក់​។ អ្នកភូមិ​ថា អាជ្ញាធរ​ពាក់ព័ន្ធ​មិនបាន​យកចិត្តទុកដាក់ ដោះស្រាយ​ក្តី​កង្វល់​របស់​ពួកគេ​នោះ​ទេ។

ពលរដ្ឋ ៤ គ្រួសារ ក្នុងចំណោម​ពលរដ្ឋ​ជាង ៣០០​គ្រួសារ រស់នៅ​ភូមិ​ស្រែ​ស្រណុក ឃុំ​ក្បាល​រមាស ស្រុក​សេសាន ដែល​ទទួល​សំណង​ពី​ក្រុមហ៊ុន​ទំនប់​វារីអគ្គិសនី​សេ​សាន​ក្រោម​ពីរ បាន​ធ្វើ​ដំណើរ​ដល់ ការិយាល័យ​សមាគម​អាដហុក (Adhoc) ខេត្ត​ស្ទឹងត្រែង កាលពី​សប្ដាហ៍​មុន ដើម្បី​ពឹង​ឱ្យ​មន្ត្រី​សង្គម​ស៊ីវិល អន្តរាគមន៍​ទាក់ទិន​ករណី អ្នក​មាន​អំណាច​ម្នាក់ បាញ់​គោ​អ្នកភូមិ​ក្នុង​ព្រៃ ងាប់​អស់​ជិត ១០​ក្បាល ដើម្បី​វះ​យក​សាច់​លក់ និង​ធ្វើជា​អាហារ។

ពលរដ្ឋ លោក លន់ ឡៅ ឱ្យ​ដឹង​ថា គ្រួសារ​របស់​លោក​បាត់​គោ ៣​ក្បាល សង្ស័យ​ថា កម្មករ​របស់​លោក សា សុគ្រី បាញ់សម្លាប់​ក្នុង​ព្រៃ រួច​វះ​យក​សាច់​លក់។ លោក​ថា ក្រុម​ពលរដ្ឋ បាន​ប្តឹង​ឱ្យ​អាជ្ញាធរ​មូលដ្ឋាន និង​នគរបាល ជួយ​ដោះស្រាយ​រឿង​នេះ​ហើយ ក៏ប៉ុន្តែ​អាជ្ញាធរ​ពាក់ព័ន្ធ មិនបាន​យកចិត្តទុកដាក់​នោះ​ទេ​។ លោក​ថា អ្នកភូមិ​បាន​រក​ឃើញ ភស្តុតាង​ជាក់ស្ដែង បង្ហាញ​ថា កម្មករ​របស់ លោក សា ស​គ្រី បាញ់​គោ​របស់​អ្នកភូមិ ក៏ប៉ុន្តែ​សមត្ថកិច្ច​នៅតែ​រារែក មិន​ហ៊ាន​អនុវត្ត​ច្បាប់ ព្រោះ​ខ្លាច​អ្នក​មាន​អំណាច​នៅ​ពី​ក្រោយខ្នង​៖ «ថ្នាក់​ស្រុក​បើ​ឮ​កូនចៅ គេ​ស្រែក​ថា បាញ់​គោ មេ​ថា មេ​គេ​ផ្កាយ ៣​។ ខ្ញុំ​មិន​ដឹង​ថា លោក​មួយ​ណា​ទេ​? ប៉ុន្តែ​ឮ​កូនចៅ​គេ​ស្រែ​អ៊ីចឹង​។ ខ្ញុំ​ថា ផ្កាយ ៣ ផ្កាយ ៤​តើ ពលរដ្ឋ​អត់​មាន​ផ្កាយ​ទេ​។ ខ្ញុំ​រាស្ត្រ​សាមញ្ញ​ចិញ្ចឹម​គោ ដូរ​អង្ករ​ហូប​ទេ»

តំណាង​ពលរដ្ឋ លោក ពិម ឈូក ឱ្យ​ដឹង​នៅ​ថ្ងៃ​ទី​១៨ មេសា​ថា ក្រុម​កម្មករ​របស់​លោក សា សុគ្រី បាន​យក​កាំភ្លើង​បាញ់​គោ​របស់​ពលរដ្ឋ​ងាប់​អស់ ៧​ក្បាល ហើយ​អ្នកភូមិ​បាន​ប្រទះឃើញ​គោ ១​ក្បាល ដែល​គេ​វះ​យក​សាច់ នៅ​សល់​តែ​គ្រឿងក្នុង​។ លោក​ថា ដី​ព្រៃ​រាប់​រយ​ហិកតារ នៅ​ចំណុច អូរ​ស្ទឹង​ជ្រៅ ត្រូវ​បាន​អ្នក​មាន​អំណាច ច្បាម​យក​ជា​កម្មសិទ្ធិ​បែប​អនាធិបតេយ្យ ធ្វើ​ឱ្យ​អ្នកភូមិ​បាត់បង់​កន្លែង​ឃ្វាលគោ​ក្របី​បែប ប្រពៃណី​។ លោក​បញ្ជាក់​ថា តំបន់​នោះ អាជ្ញាធរ​ខេត្ត​ស្ទឹងត្រែង​ធ្លាប់​សន្យា​ថា នឹង​រក្សាទុក ជា​ដី​បម្រុង​ទុក​សម្រាប់​ផ្តល់​ជូន​ពលរដ្ឋ​ជាង ៣០០​គ្រួសារ ដែល​រងគ្រោះ​ដោយសារ​ទំនប់​វារីអគ្គិសនី​សេសាន​ក្រោម​ពីរ ហើយ​ដែល​បាន​ផ្លាស់​ទីលំនៅ​មក​រស់នៅ​ទីតាំង​ថ្មី ក៏ប៉ុន្តែ​មក​ទល់​ពេល​នេះ ដី​នៅ​តំបន់​នោះ ត្រូវ​បាន​អ្នក​មាន​អំណាច​ឈូស​ឆាយ​ទន្ទ្រាន យក​ជា​កម្ម​សិទ្ធ​អស់​ស្ទើរ​ទាំងស្រុង​៖ «គាត់​ថា (​អាជ្ញាធរ​ខេត្ត​) មិន​ឱ្យ​អត់​ទេ ដី​សម្រាប់​បម្រុង​ទុក សម្រាប់​ក្មេងៗ​ជំនាន់​ក្រោយ ដល់​ពេល​ឥឡូវនេះ ច្បាម​យក​រាប់ពាន់​ហិកតារ​។ ច្បាម​យក​រាប់ពាន់​ហិកតារ​ហើយ ពលរដ្ឋ​មាន​អី​សង្ឃឹម​ទៀត អស់​ហើយ​។ អ៊ីចឹង​ក្មេងៗ​ជំនាន់​ក្រោយ អត់​មាន​អី​ទាំងអស់​។ ច្បាម​យក​អស់​ហើយ មាន​អី​នោះ​សល់​ផង បើ​អា​ត្រាក់​គេ​វ៉ៃ​ទៀតហើយ»

សមាជិក​ក្រុមប្រឹក្សា​ស្រុក​សេសាន លោក សា សុគ្រី បដិសេធ​មិន​បំភ្លឺ​រឿង​នេះ​ទេ ដោយ​លោក​បាន​ចុច​ផ្ដាច់​ទូរស័ព្ទ និង​ឈប់​ទទួល​ទូរស័ព្ទ​នៅ​ថ្ងៃ​ទី១៨ មេសា។

ចំណែក មេភូមិ​ស្រែ​ស្រណុក លោក ប៉ៃ ពិន អះអាង​ថា ពលរដ្ឋ​ភាគច្រើន តែងតែ​លែង​គោ​ក្របី ពាស​វាល​ពាស​កាល​ពេញ​ព្រៃ ជាច្រើន​ខែ​មក​ហើយ អ្នក​ខ្លះ​ទៅ​ឃ្វាល​ម្ដងម្កាល ហើយ​អ្នក​ខ្លះ​ទៀត មិនដែល​ទៅ​ឃ្វាល​សោះ​។ លោក​ថា គោ​បាត់​ទាំង ៧​ក្បាល​នោះ មិន​ដឹង​ថា បាត់​ថ្ងៃ​ណា​ឱ្យ​ប្រាកដ​នោះ​ទេ​។ ចំណែក ពលរដ្ឋ​រក​ឃើញ ភស្តុតាង​តែមួយ​ក្បាល​គត់៖ «គោ​លែង​ចោល​តាំង​ពី​ប្រាំង តាំង​ពី​វស្សា​មករ​ហូត​។ អ្នកខ្លះ​មួយ​អាទិត្យ​ទៅ​មើល​ម្ដង អ្នកខ្លះ​មិន​ទៅ​មើល​ផង​។ អ៊ីចឹង​បាន​ថា បាត់​​ទៅ រឿង​ប្ដឹង​វា​ពិបាក​ណាស់ បាន​ឃើញ​តែមួយ​ជាក់ស្ដែង​វា​វះ​។ អា !​ប៉ុន្មាន​មិន​ដឹង​បាត់​ទៅ​ណា​? មិន​ដឹង​បាត់​ថ្ងៃ​ទី​ប៉ុន្មាន​? ដល់​ដាក់​ពាក្យ​បណ្តឹង​បូកសរុប»។​

មន្ត្រី​សម្របសម្រួល​សមាគម​អាដហុក ខេត្តស្ទឹងត្រែង លោក ប៊ី វ៉ាន់នី សង្កេត​ឃើញ​ថា អាជ្ញាធរ​មូលដ្ឋាន និង​សមត្ថកិច្ច មិនបាន​បំពេញ​កាតព្វកិច្ច បម្រើ​សេវា​សាធារណៈ​ជូន​ពលរដ្ឋ​ឱ្យ​បាន​ត្រឹមត្រូវ​ស្របតាម​ច្បាប់​ស្ដីពី​ការគ្រប់គ្រង​ឃុំ​/​សង្កាត់​នៅឡើយ​ទេ​។ លោក​ថា បុគ្គល​មានអំណាច​ប្រព្រឹត្ត​កំហុស អាជ្ញាធរ​ហាក់​រារែក​មិន​ហ៊ាន​អនុវត្ត​ច្បាប់ បើ​ទោះ​បី​ពលរដ្ឋ​រក​ឃើញ ភស្តុតាង​ជាច្រើន​ក្តី​៖ «ពេល​ដែល​ដឹង​ថា ជន​ម្នាក់​ហ្នឹង​ជា​អ្នក​ប្រព្រឹត្ត​ល្មើស​ហើយ បែរជា​មិនបាន​ចាត់ការ​ជន​ហ្នឹង ទៅតាម​នីតិវិធី​ច្បាប់​ទេ​។ គេ​អាច​លួច​គោ​របស់​គាត់​លក់ ឬ​បាញ់​តាម​ចិត្ត ដែល​មិន​មានការ​ការពារ​ពី​អាជ្ញាធរ​ភូមិ​/​ឃុំ​។ អាហ្នឹង​ហើយ​ដែល​គាត់​ព្រួយបារម្ភ»

មន្ត្រី​សង្គម​ស៊ីវិល​រូប​នេះ​បន្ថែម​ថា ក្រុម​ពលរដ្ឋ​ហាក់​អស់​​ជំនឿ​ចិត្ត​លើ​អាជ្ញាធរ​មូលដ្ឋាន ក្នុង​ការ​ដោះស្រាយ​បញ្ហា​ប្រឈម​ជូន​ពលរដ្ឋ និង​មាន​ពលរដ្ឋ​ខ្លះ​ចោទ​អាជ្ញាធរ រួម​ទាំង​សមត្ថកិច្ច​ថា ជា​បក្ខពួក​របស់​ជន​ប្រព្រឹត្ត​ល្មើស​ទៀត​ផង៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល