ក្រុមកម្មករធ្វើការរោងចក្រក្នុងទីក្រុងភ្នំពេញលើកឡើងថា ពួកគេមិនមានថវិកាគ្រប់គ្រាន់ដើម្បីចំណាយក្នុងពិធីបុណ្យចូលឆ្នាំខ្មែរ ក្នុងពេលខាងមុខឡើយ ដោយសាររោងចក្រមិនមានការងារគ្រប់គ្រាន់ឱ្យកម្មករធ្វើនោះឡើយ។ តំណាងសហជីពយល់ឃើញថា ដើម្បីឱ្យរោងចក្រទទួលបានការបញ្ជាទិញពីបណ្ដាប្រទេសលោកខាងលិចច្រើនឡើងវិញ រដ្ឋាភិបាលគួរធានាឱ្យមានស្ថិរភាពនយោបាយ និងការលើកកម្ពស់សិទ្ធិមនុស្សឱ្យបាន នៅមុនការបោះឆ្នោតថ្នាក់ជាតិខាងមុខ។
ក្រុមកម្មករធ្វើការរោងចក្រ ក្នុងទីក្រុងភ្នំពេញលើកឡើងដូចៗគ្នាថា ពួកគេត្រូវចំណាយត្បិតត្បៀត ដើម្បីអាចទៅលេងស្រុកកំណើតបានក្នុងពិធីបុណ្យចូលឆ្នាំខ្មែរ ប្រពៃណីជាតិក្នុងពេលខាងមុខ ព្រោះរោងចក្រមិនមានការងារគ្រប់គ្រាន់ឱ្យពួកគាត់ធ្វើ ដើម្បីទទួលបានប្រាក់ខែសមរម្យដូចឆ្នាំមុនៗនោះឡើយ។
តំណាងកម្មកររោងចក្រ ជិន ថៃ លោក សុខ លាប ប្រាប់វិទ្យុអាស៊ីសេរីនៅថ្ងៃទី៩ មេសា ថា លោកទទួលបានប្រាក់ខែត្រឹមតែ ៩៥ដុល្លារតែប៉ុណ្ណោះ សម្រាប់ពាក់កណ្ដាលខែដំបូងនៃខែមេសា។ លោកបន្ថែមថា លោក និងគ្រួសារលោកមិនអាចទៅលេងស្រុកកំណើត នៅខេត្តកំពង់ចាម បានឡើយនៅឆ្នាំនេះព្រោះលោកត្រូវបង់ថ្លៃបន្ទប់ដែលបានជំពាក់គេ កាលពីរោងចក្រព្យួរការងារលោកកាលពីខែមុន។
លោក សុខ លាប៖ «មានលុយឯណាបងអើយ មានលុយហ្នឹងបើកពាក់កណ្ដាលខែហ្នឹង បានតែប៉ុន្មាន បានតែ ៩៥រៀល (៩៥ដុល្លារអាមេរិក) សងគេលិចកើតជើងត្បូងផងគ្មានទេ ដោយសារយើងទៅហ្នឹង វាប្រាំប្រាំមួយថ្ងៃ អ៊ីចឹងវាអត់មានលុយទេ ឧបត្ថម្ភឱ្យម៉ែឪ ឱ្យអីអ៊ីចឹង ខ្វះខាតតិចតួច»។
កម្មកររោងចក្រវាយនភណ្ឌ និងផលិតស្បែកជើង កាន់តែប្រឈមនឹងជីវភាពលំបាកនៅដើមឆ្នាំ២០២៣ ដោយសារតែការបញ្ជាទិញពីបណ្ដាប្រទេសអឺរ៉ុប (EU) និងសហរដ្ឋអាមេរិក (United States) ត្រូវបានកាត់បន្ថយ។ បើទោះបីជារដ្ឋាភិបាលកម្ពុជាធ្លាប់បានអះអាងថា ការកាត់បន្ថយការបញ្ជាទិញ គឺដោយសារតែសង្គ្រាមរវាងប្រទេស រុស្សី (Russia) និងប្រទេសអ៊ុយក្រែន (Ukrain) ក្ដី ប៉ុន្តែអ្នកវិភាគលើកឡើងថា ការថយចុះនៃការបញ្ជាទិញផលិតផលពីប្រទេសកម្ពុជា គឺបណ្ដាលមកពីការបាត់បង់ប្រព័ន្ធអនុគ្រោះពន្ធ អ៊ី.ប៊ី.អេ (EBA) របស់សភាពអឺរ៉ុប និង ជី.អេស.ភី (GSP) របស់សហរដ្ឋអាមេរិក ដែលបណ្ដាលមកពីការរំលោភសិទ្ធិមនុស្សធ្ងន់ធ្ងររបស់រដ្ឋាភិបាលកម្ពុជាទៅវិញទេ។
ស្រដៀងគ្នានេះ តំណាងសហជីពរោងចក្រ មេន អួរ ហ្គាមែន និងជាកម្មករផ្នែកឃ្លាំងនៃរោងចក្រនេះផងនោះ លោក ពេជ្រ ពិសិទ្ធ ថ្លែងថា បើទោះបីជាលោក និងប្រពន្ធរបស់លោកទទួលបានប្រាក់ខែនៅថ្ងៃទី១០ ខែមេសា ក្ដី ប៉ុន្តែគ្រួសារលោកនៅតែមិនមានថវិកាគ្រប់គ្រាន់ដើម្បីចំណាយ ក្នុងពិធីបុណ្យចូលឆ្នាំខ្មែរដូចឆ្នាំមុនៗនោះឡើយ។ លោកបន្ថែមថា លោកគ្មានគម្រោងដើរលេងកម្សាន្តនៅតំបន់ទេសចរណ៍ណាមួយឡើយ ហើយគ្រួសារលោកក៏គ្មានថវិកាជូនឪពុកម្ដាយឱ្យបានសមរម្យដូចមុនដែរ។
លោក ពេជ្រ ពិសិទ្ធ៖ «ខ្ញុំសំណូមពរឱ្យរដ្ឋាភិបាលយើង ហ៊ានបើកលំហសិទ្ធិសេរីភាពបញ្ចេញមតិ ក៏ដូចជាសិទ្ធិនយោបាយអី ឱ្យបានទូលំទូលាយ ដើម្បីទទួលបានប្រព័ន្ធអនុគ្រោះពន្ធដែលអឺរ៉ុបផ្ដាច់២០ភាគរយ(២០%)ហ្នឹងបានមកវិញមក អ៊ីចឹងកម្មករជាទូទៅ បើយើងអត់មានសារ(ការបញ្ជាទិញ)ច្រើនទេ គាត់អត់មានការងារធ្វើទេ អ៊ីចឹងយើងសង្ឃឹមថា រដ្ឋាភិបាល នឹងមានការយោគយល់ ដើម្បីសហការជាមួយអឺរ៉ុបអីទៅ ដើម្បីឱ្យរោងចក្រនៅកម្ពុជាដំណើរការឡើងវិញ ដូចកាលពីមុន»។
វិទ្យុអាស៊ីសេរីមិនអាចទាក់ទងអ្នកនាំពាក្យក្រសួងការងារ លោក ហេង សួរ ដើម្បីបកស្រាយជុំវិញរឿងនេះបានឡើយ នៅថ្ងៃទី៩ ខែមេសា ដោយទូរស័ព្ទចូលប៉ុន្តែមិនមានអ្នកទទួល។
នៅដើមឆ្នាំ២០២៣នេះ មានរោងចក្រចំនួន១០ បានបិទទ្វារ ខណៈរោងចក្រចំនួន៧១ ព្យួរកិច្ចសន្យាការងារ និងរោងចក្រ៦០ផ្សេងទៀតបានកាត់បន្ថយបុគ្គលិក ប៉ះពាល់ដល់កម្មករជាង៣ម៉ឺន ២ពាន់នាក់ និងច្រើននាក់ទៀតបានបាត់បង់ការងារធ្វើទាំងស្រុងតែម្ដង។ អ្នកវិភាគនយោបាយលើកឡើងថា ប្រសិនបើរដ្ឋាភិបាលកម្ពុជា នៅតែមិនបើកលំហប្រជាធិបតេយ្យ និងលើកកម្ពស់ការគោរពសិទ្ធិមនុស្សឡើងវិញនោះទេ នោះនឹងមិនត្រឹមតែធ្វើឱ្យក្រុមកម្មកររាប់សែននាក់ បាត់បង់ការងារដោយសារការបាត់បង់ប្រព័ន្ធអនុគ្រោះពន្ធតែប៉ុណ្ណោះទេ ប៉ុន្តែក៏អាចបណ្ដាលឱ្យប៉ះពាល់ដល់ជីវភាពប្រជាពលរដ្ឋរាប់លាននាក់ផ្សេងទៀត ដែលទទួលបានផលប្រយោជន៍សេដ្ឋកិច្ចពីក្រុមកម្មកររោងចក្រផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។