ប៉ូលិសថៃនៅតែមិនទាន់ចាប់បានជនបរទេសពីរនាក់ ដែលបានធ្វើទារុណកម្ម និងជះទឹកអាស៊ីតលើស្ត្រីវិចិត្រករខ្មែរ កាលពីដើមខែវិច្ឆិកា កន្លងទៅ នៅខេត្តឈុនបុរី (Chhun Buri)នៅឡើយទេ។ មន្ត្រីសង្គមស៊ីវិលថា ស្ថានទូតខ្មែរនៅប្រទេសថៃ ត្រូវប្រឹងប្រែងសហការជាមួយប៉ូលិសថៃ ដើម្បីចាប់ជនដៃដល់រកយុត្តិធម៌ឲ្យស្ត្រីខ្មែររងគ្រោះនោះ។
គិតមកទល់ពេលនេះ គឺសែសិបថ្ងៃហើយ ដែលប៉ូលិសថៃចេញលិខិតស្នើទៅប៉ូលិសអន្តរជាតិអាំងទែប៉ូល(Interpol) ដើម្បីតាមចាប់បុរសប៉ូឡូញ (Polish) ពីរនាក់ ដែលបានវាយធ្វើបាបស្ត្រីជាង គំនូរខ្មែរ នៅប្រទេសថៃ។ ប៉ុន្តែនៅមិនទាន់ចាប់បានជនល្មើសនៅឡើយទេ។
ស្ត្រីវិចិត្រករខ្មែរ មានស្រុកកំណើតនៅភ្នំពេញ ដែលធ្វើការជាជាងគំនូរនៅថៃ ប្រមាណពីរឆ្នាំ គឺ កញ្ញា នី ស្រីរ័ត្ន ប្រាប់វិទ្យុអាស៊ីសេរី នៅថ្ងៃទី២៩ ខែធ្នូ ថា កញ្ញាបានទាក់ទងទៅប៉ូលិសថៃ ដែលតាមដានករណីរបស់កញ្ញា តែអាជ្ញាធរថៃមិនទាន់ឆ្លើយតបនោះទេ ប៉ុន្តែមេធាវីជនជាតិថៃរបស់កញ្ញាប្រាប់កញ្ញាថា សមត្ថកិច្ចកំពុងស៊ើបអង្កេតលើករណីនេះ។ យ៉ាងណាកញ្ញាស្នើដល់ស្ថានទូតខ្មែរ និងរដ្ឋាភិបាលខ្មែរខិតខំសហការជាមួយសមត្ថកិច្ចថៃបន្ថែមទៀត រកអ្នកនៅពីក្រោយរឿងនេះ ព្រោះកញ្ញាជឿថា បុរសប៉ូឡូញទាំងពីរ ពិតជាត្រូវគេជួលឲ្យមកធ្វើបាបកញ្ញា៖
កញ្ញា នី ស្រីរ័ត្ន៖«សុំជួយឲ្យខាងប៉ូលិសអីហ្នឹង បើអាចចង់និយាយថាបើអាចចាប់ រកឃើញ!រកឃើញកាន់តែលឿន វាកាន់តែល្អអីចេះណាបង។ អ៊ីចឹងខ្ញុំមានអារម្មណ៍ថាសេរីភាពច្រើនជាងណា ដល់ឥឡូវហ្នឹងយើងនៅតែ ប្រភេទលក្ខណៈថារបៀបរស់នៅមើលលើមើលក្រោម ឆ្វេងស្ដាំ ទៅមុខទៅក្រោយមុននឹងយើងឈានមួយជំហានៗណាបង យើងមិនដឹងថា គេគម្រោងធ្វើអីទៀតនោះ»។ស្ត្រីវិចិត្រកររូបនេះឲ្យដឹងថា មុខរបួសរបស់កញ្ញាបានជាសះស្បើយកៅសិបភាគរយ៩០%ហើយ ប៉ុន្តែនៅបន្តលេបថ្នាំរាល់ថ្ងៃ ហើយកញ្ញានៅតែមិនអស់ចិត្តនៃការប្រើហិង្សាមកលើរាងកាយកញ្ញា ព្រោះកញ្ញាមិនដែលមានគំនុំជាមួយអ្នកណាទេ។ ទោះជាយ៉ាងណា កញ្ញាសង្ស័យថា ករណីនេះអាចជាការប្រច័ណ្ឌរបស់ស្ត្រីបរទេសម្នាក់ ដែលមិនបានរួមរស់នឹងសង្សាររបស់គេ ហើយចោទកញ្ញាជាអ្នកបំបែកបំបាក់ពួកគេ។ កញ្ញាបញ្ជាក់ថា ថ្ងៃកើតហេតុ គឺនៅថ្ងៃទី១ ខែវិច្ឆិកា មានស្ត្រីជនជាតិបរទេសម្នាក់ទូរស័ព្ទហៅកញ្ញាឲ្យទៅគូរគំនូរនៅលើជញ្ជាំងក្នុងហាង ដែលគេទើបបើកថ្មី នៅខេត្តឈុនបុរី ។ តែលុះទៅដល់កន្លែងកើតហេតុ ស្ត្រីបរទេសនោះឲ្យបុរសជនជាតិប៉ូឡូញពីរនាក់មកទទួលកញ្ញា ហើយបុរសទាំងពីរក៏បានធ្វើសកម្មភាពចាប់កញ្ញាធ្វើបាបតែម្តង។ ជនដៃដល់ បានយកកាំបិតចាក់លើដងខ្លួនរបួសជាងពីររយហុកសិប(២៦០)ថ្នេរ និងជះទឹកអាស៊ីត ។
រដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍គណៈកម្មាធិការជាតិប្រយុទ្ធប្រឆាំងការជួញដូរមនុស្ស អ្នកស្រី ជូ ប៊ុនអេង ប្រាប់អាស៊ីសេរីថា អ្នកស្រីមិនទាន់ទទួលបានដំណឹងបន្ថែមពីស្ថានទូតខ្មែរនៅថៃ ពាក់ព័ន្ធនឹងរឿងនេះទេ។ អ្នកស្រីបន្តថា សមត្ថកិច្ចកម្ពុជាបានសហការជាមួយសមត្ថកិច្ចថៃ ដើម្បីចាប់ជនល្មើសមកសាកសួរ។
អ្នកស្រី ជូ ប៊ុនអេង៖«ថ្ងៃមុន ដែលគេអាដែលខាងភាគីថៃហ្នឹងគេសហការជាមួយយើងឲ្យមានកិច្ចការពារទៅដល់ជនរងគ្រោះ ទៅដល់គ្រួសារជនរងគ្រោះអីហ្នឹង ហើយខាងគេនោះគេការពារខាងផ្លូវតុលាការ ពីព្រោះអារឿងហ្នឹងវាកើតនៅថៃ អ៊ីចឹងវាត្រូវខាងអាដែងតុលាការថៃហ្នឹងគេចាត់វិធានការ»។
ជុំវិញរឿងនេះដែរ ប្រធានអង្គការសង់ត្រាល់ (Central) លោក មឿន តុលា លើកឡើងថា អាជ្ញាធរកម្ពុជាមិនគួរនៅស្ងៀមរង់ចាំសមត្ថកិច្ចថៃទេ ត្រូវប្រឹងប្រែងជំរុញប្រទេសថៃ ដើម្បីតាមចាប់ជនល្មើសមកផ្ដន្ទាទោសតាមច្បាប់ថៃ។ លោកបញ្ជាក់ថា កម្ពុជាក៏អាចស្នើទៅប្រទេសប៉ូឡូញ(Poland) ឬក៏ប៉ូលិសអន្តរជាតិជួយស៊ើបអង្កេតលើករណីនេះ ដើម្បីឲ្យជនរងគ្រោះទទួលបានយុត្តិធម៌៖
លោក មឿន តុលា៖«ចំណុចទី២ អាចដាក់ទៅដល់ប៉ូលិសអាំងទែប៉ូល បើសិនជាជនហ្នឹងគាត់ធ្វើដំណើរទៅកន្លែងណាមួយអ៊ីចឹងទៅ អាចប៉ូលិសអាំងទែប៉ូលតាមចាប់ជនហ្នឹងអ៊ីចឹងណាបាទ។ ទាល់តែ ធម្មតាទេអាហ្នឹងយើង ទាល់តែយើងខ្នះខ្នែងមិនអ៊ីចឹងទេ យើងចាប់ជនល្មើសហ្នឹងអត់បានទេ»។
ស្ត្រីវិចិត្រករខ្មែររងគ្រោះ កំពុងទន្ទឹងចាំយុត្តិធម៌ និងសង្ឃឹមថា ប៉ូលិសថៃ និងខ្មែរ និងប៉ូលិសអន្តរជាតិ តាមចាប់ជនដៃដល់ទាំងពីរនាក់ ដែលបានបង្ករបួសស្នាមមកលើកញ្ញា មកដាក់ទោសតាមច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។