មន្ត្រី​​សហភាព​​ការងារ​​កម្ពុជា​គ្រោង​​ដាក់​​ញាតិ​​ទៅ​​រដ្ឋាភិបាល​​និង​​ក្រសួង​​ស្ថាប័ន​​ពាក់ព័ន្ធឲ្យ​​ដោះស្រាយ​​បញ្ហា​​បន្ទាន់​​ដល់​​កម្មករ​​អំឡុង​​ពេល​​បិទខ្ទប់​

ដោយ ខែ សុណង
2021-04-29
Share
មន្ត្រី​​សហភាព​​ការងារ​​កម្ពុជា​គ្រោង​​ដាក់​​ញាតិ​​ទៅ​​រដ្ឋាភិបាល​​និង​​ក្រសួង​​ស្ថាប័ន​​ពាក់ព័ន្ធឲ្យ​​ដោះស្រាយ​​បញ្ហា​​បន្ទាន់​​ដល់​​កម្មករ​​អំឡុង​​ពេល​​បិទខ្ទប់​ តំណាង​សហជីព​កម្ពុជា និង​ជា​ប្រធាន​សម្ព័ន្ធ​សហជីព​ស៊ីខៅដូ (C.CAWDU) លោក អាត់ ធន់ ផ្ដល់​បទសម្ភាសន៍​កាល​ពី​ថ្ងៃ​ទី​៤ ខែ​ធ្នូ ឆ្នាំ​២០១៥។
រូប៖ RFA

មន្ត្រី​​សហភាព​​ការងារ​​កម្ពុជា នឹង​​យក​​ថ្ងៃទី១ ខែឧសភា ចំ​ទិវា​ពលកម្ម​អន្តរជាតិ​​ដាក់​​ញត្តិ​​ទៅ​​រដ្ឋាភិបាល ឲ្យ​​ដោះ​ស្រាយ​​បញ្ហា​​អាទិភាព​​ដែល​​កម្មករ​​កំពុង​​ប្រឈម​​អំឡុង​​ពេល​​បិទ​ខ្ទប់ ដើម្បី​​ទប់​ស្កាត់​​ការ​​ឆ្លង​រាល​ដាល​​ជំងឺ​​កូវីដ-១៩។

ប្រធាន​​សហភាព​​ការងារ​​កម្ពុជាលោក អាត់ ធន់ ថ្លែង​ថា ញត្តិ​​ដែល​​លោក​​នឹង​​ស្នើ​ទៅ​​​រដ្ឋាភិបាល​​ដោះស្រាយ​នោះ គឺ​​ស្នើ​ឲ្យ​មាន​ការ​​ដោះស្រាយ​បញ្ហា​កា​រ​ងារ​​ឲ្យ​​មាន​​ភាព​​ប្រសើរ​​ឡើង ដូចជា បញ្ហា​ប្រាក់​ឈ្នួល បញ្ហា​សុខភាព សេវាកម្ម​ផ្សេងៗ ការ​អនុវត្ត​ច្បាប់ និង​ការ​បញ្ឈប់​កម្មករ​ជា​ដើម។ លោក​ថា ពិសេស​ជាង​​នេះ​​ទៅ​​ទៀត ស្នើ​ឲ្យ​​រដ្ឋាភិបាល​​ដោះស្រាយ​បញ្ហា​​បន្ទាន់​​ដល់​កម្មករ​និយោជិត ដែល​កំពុង​ខ្វះខាត​​ស្បៀង​អាហារ និង​​ខ្វះ​ការ​​យក​​ចិត្ត​ទុក​ដាក់​​ក្នុង​​សេវា​​សុខភាព ក្នុង​​ពេល​​ធ្វើ​​ចត្តាឡីស័ក​ និង​​បិទ​ខ្ទប់​នេះ៖ «ពាក់ព័ន្ធ​មាន​ការ​ស្នើ​ឲ្យ​ជួយ​ទៅ​ដល់​កម្មករ​និយោជិក​ហ្នឹង​​ឲ្យ​​មាន​​ការ​ផ្ដល់​នូវ​ថវិកា និង​សម្ភារៈ​អំឡុង​ពេល​បិទ​ខ្ទប់ ឬ​ក៏​ព្យួរ​ការងារ​និង​ការ​ធ្វើ​ចត្តាឡីស័ក​ហ្នឹង ក៏​ដូច​ជា​ការ​ស្នើ​ឲ្យ​មាន​ការ​ព្យាបាល​ក៏​ដូចជា​ការ​យក​ចិត្ត​ទុកដាក់​បន្ថែម​ទៀត​តាម​បច្ចេកទេស​វិទ្យាសាស្ត្រ​ព្យាបាល​ព្រោះ​កន្លង​មក​វា​ឃើញ​មាន​អ្នក​ព្យាបាល​នៅ​តាម​ផ្ទះ​នៅ​អី​គឺ​ថា ​មាន​ការ​លំបាក។ ពាក់ព័ន្ធ​នូវ​ការ​ផ្ដល់​នូវ​ថវិកា​ជួយ​ដល់​កម្មករ​អំឡុង​ពេល​ហ្នឹង ហើយ​ពាក់ព័ន្ធ​ការ​ដោះស្រាយ​បញ្ហា​ផ្សេងៗ​រួម​ទាំង ការ​ផ្ដល់​ថវិកា​អំឡុង​ពេល​កម្មករ​ព្យួរ​ហ្នឹង ក៏​មិន​តម្រូវ​សម្រាប់​តែ​កម្មករ​កាត់ដេរ ឬ​ក៏​កម្មករ​វិស័យ​ទេសចរណ៍​ទេ គួរ​តែ​រីក​ទៅ​ដល់​វិស័យ​ផ្សេង​ទៀត ដូចជា​ខាង សំណង់ ឧស្សាហកម្ម ដឹកជញ្ជូន ឬ​ខាង​កសិកម្ម​ជាដើម»

លោក​អាត់ ធន់ បន្ត​ថា កម្មករ​កម្មការិនី ក្នុង​វិស័យ​វាយនភណ្ឌ​កាត់ដេរ ដែល​ជាប់​ធ្វើ​ចត្តាឡីស័ក និង​ជាប់​បម្រាម​របស់​អាជ្ញាធរ​រដ្ឋាភិបាល​បិទ​ខ្ទប់​នេះ មិន​បាន​ទទួល​ប្រាក់​ឈ្នួល​ផ្គត់ផ្គង់​ជីវភាព​នោះ​ទេ។

Worker_In_Red_zone.jpg
កម្មករកម្មការិនីរោងចក្រកាត់ដេរនៅក្នុងទីក្រុងភ្នំពេញជាប់កុននៅក្នុងបន្ទប់ជួលក្រោយវិធានការបិទខ្ទប់របស់រដ្ឋាភិបាល។

ការ​លើក​ឡើង​របស់​មន្ត្រី​សហភាព​ការងារ​នេះ ធ្វើ​ឡើង​ក្រោយ​ពេល សហព័ន្ធ​សហជីព សមាគម សហគមន៍ អង្គការ​សង្គម​ស៊ីវិល​ធ្វើការ​លើ​វិស័យ​សិទ្ធិ​ការងារ និង​សិទ្ធិ​មនុស្ស ចំនួន​ ៣៦ ស្ថាប័ន ចេញ​សេចក្ដី​ថ្លែងការណ៍​រួម នៅ​ថ្ងៃទី២៨ ខែមេសា ជា​ទិវា​អន្តរជាតិ ដើម្បី​រំលឹក​ដល់​ការ​ចងចាំ​ដល់​កម្មករ។ ស្ថាប័ន​ទាំង​នេះ បង្ហាញ​ការ​ព្រួយបារម្ភ​ចំពោះ​ជីវភាព សុខភាព និង​សុវត្ថិភាព​ការងារ​របស់​កម្មករ​ជាច្រើន ដែល​ជា​កម្មករ​បម្រើ​ការងារ​ក្នុង​វិស័យ​កាត់ដេរ សំណង់ សេវាកម្ម សណ្ឋាគារ និង​សេដ្ឋកិច្ច​ក្រៅ​ប្រព័ន្ធ ទទួល​រង​គ្រោះថ្នាក់​ការងារ​កើត​ចេញ​ពី​វិបត្តិ​ជំងឺ​កូវីដ-១៩ រួម​ជាមួយ​និង​វិធានការ​តានតឹង​របស់​រដ្ឋាភិបាល ក្នុង​តំបន់​ក្រហម និង​តំបន់​បិទ​ខ្ទប់​ក្នុង​រាជធានីភ្នំពេញ និង​ក្រុង​តាខ្មៅ ខេត្តកណ្ដាល។

ពួកគេ​បាន​ដាក់​សំណើ​ចំនួន ​៧ ​ចំណុច មាន​ដូចជា ស្នើ​ឲ្យ​រដ្ឋាភិបាល​បង្កើត​យន្តការ​ធ្វើការ​ជាមួយ​តំណាង​កម្មករ​និយោជិក និង​និយោជក អង្គការ​សង្គម​ស៊ីវិល​ក្នុង​វិស័យ​ការងារ ដើម្បី​កំណត់​យន្តការ​តាមដាន​ត្រួតពិនិត្យ និង​វាយតម្លៃ​ចំពោះ​បញ្ហា​សុខភាព និង​សុវត្ថិភាព​នៅ​កន្លែង​ការងារ និង​បណ្ដា​ការដ្ឋាន​សំណង់ និង​ក្រុមហ៊ុន​សាងសង់ ក្នុង​រាជធានី​ភ្នំពេញ និង​ខេត្ត ពិសេស​ក្នុង​ពេល​រីករាលដាល​ជំងឺ​កូវី-១៩។ ស្ថាប័ន​ទាំងនេះ ជំរុញ​ឲ្យ​ក្រសួង​ពាក់ព័ន្ធ​ធ្វើ​អធិការកិច្ច​ការងារ និង​ចុះ​បញ្ជី​ក្រុមហ៊ុន​សាងសង់​ជា​បន្ទាន់​ជាមួយ​បេឡាជាតិ​របប​សន្តិសុខ​សង្គម​នៅ​ទូទាំង​ប្រទេស។

សេចក្ដី​ថ្លែងការណ៍​រួម​នេះ ក៏​បាន​ផ្ដោត​សំខាន់​លើ​បញ្ហា​ស្ថានភាព​កម្មករ​វិស័យ​កាត់ដេរ ដោយ​ស្នើ​ឲ្យ​រដ្ឋាភិបាល​ផ្ដល់​កន្លែង​ស្នាក់នៅ​ដល់​កម្មករ រួម​ទាំង​វិធានការ​អនាម័យ​នៅ​តាម​បណ្ដា​រោងចក្រ ពិនិត្យ​លើ​ប្រព័ន្ធ​ធ្វើ​ដំណើរ​របស់​កម្មករ ក្នុង​ពេល​រីករាលដាល​ជំងឺ​ឆ្លង។ ទន្ទឹម​នឹង​គ្នា​នេះ ពួកគេ​ក៏​ស្នើ​ឲ្យ​រដ្ឋាភិបាល មាន​វិធានការ​ជាក់លាក់​នៅ​កន្លែង​ការងារ​ដែល​ប្រឈម​នឹងហានិភ័យ​ខ្ពស់ និង​អនុញ្ញាត​ឲ្យ​កម្មករ​ឈប់​សម្រាក​ក្នុង​ពេល​វេលា​សមស្រប ដោយ​ផ្ដល់​ប្រាក់​ឈ្នួល​ជូន​ពួកគេ។ អង្គការ សមាគម​ដដែល ស្នើ​ឲ្យ​រដ្ឋាភិបាល​ផ្ដល់​នូវ​កម្មវិធី​ជំនួយ​សង្គម និង​សង្គ្រោះ​បន្ទាន់ រួម​មាន​ស្បៀង​អាហារ​និង​សម្ភារៈ​ចាំបាច់​ប្រចាំ​ថ្ងៃ ឲ្យ​បាន​ទាន់​ពេល​វេលា​ក្នុង​ពេល​បិទ​ខ្ទប់ ជា​ពិសេស​កម្មករ​និង​ពលរដ្ឋ​ខ្វះខាត​ក្នុង​តំបន់​ក្រហម។ ចំណុច​ចុងក្រោយ​ស្ថាប័ន​ទាំងនេះ ស្នើ​ឲ្យ​រដ្ឋាភិបាល​រៀបចំ​កន្លែង​សមរម្យ​ឲ្យ​អាជីវករ អ្នក​លក់ដូរ​តាម​ដង​ផ្លូវ តាម​ទីផ្សារ និង​នៅ​តាម​ទីសាធារណៈ​នានា ប្រកប​ដោយ​អនាម័យ និង​សុវត្ថិភាព​នៅ​នឹង​កន្លែង។

អ្នក​គ្រប់គ្រង​កម្មវិធី​សិទ្ធិការងារ​នៃ​មជ្ឈមណ្ឌល​សម្ព័ន្ធ​ភាពកា​រងារ និង​សិទ្ធិមនុស្ស ហៅកាត់ថា សង់ត្រាល់​ (CENTRAL) លោក ឃុន ថារ៉ូ សង្ឃឹម​ថា ការ​ជំរុញ​និង​សំណើ​ទៅ​រដ្ឋាភិបាល​នេះ នឹង​ត្រូវ​បាន​រដ្ឋាភិបាល​យក​ចិត្ត​ទុកដាក់ និង​ពិចារណា​ដោះស្រាយ​ដោយ​ថ្លឹងថ្លែង​រវាង​កត្តាសេដ្ឋកិច្ច និង​កត្តា​សុខភាព សុវត្ថិភាព​សម្រាប់​កម្មករ​និយោជិត៖ «រឿង​កូវីដ​ដែល​កើត​នៅ​តាម​បណ្ដា​រោងចក្រ​នេះ​មិនមែន​កើត​ក្នុង​ពេល​ថ្មីៗ​នេះ​ទេ វា​ជា​ក្ដី​កង្វល់​ហើយ​ក៏​ធ្លាប់​បាន​លើក​ឡើង​មុន ពេល​​ដែល​មាន​ការ​រីករាលដាល​ក្នុង​ទំហំ​មួយ​ដែល​គួរ​ឲ្យ​បារម្ភ​ ហើយ​ជា​ការ​គំរាមកំហែង​ដល់​វិស័យ​វាយនភ័ណ្ឌ​កាត់ដេរ និង​ដេរស្បែកជើង ផលិតផល​ធ្វើ​ដំណើរ​ដែល​ជា​វិស័យ​ទ្រទ្រង់​សេដ្ឋកិច្ច​ក្នុង​ប្រទេស​កម្ពុជា ខណៈពេល​ដែល​វិស័យ​ផ្សេងទៀត ​ដូចជា វិស័យ​ទេសចរណ៍​ត្រូវ​បាន​ដួល​រលំ​សឹង​៩០% ទៅ​ហើយ។ បើ​សិន​ជា​យើង​បណ្ដោយ​ឲ្យ​បញ្ហា​កូវីដ​នេះ​នៅ​បន្ត​ធ្ងន់ធ្ងរ​រីករាលដាល​ទៅ​មុខ​ទៀត ​វា​នឹង​អាច​ប្រឈមខ្លាំង​ទៅ​នឹង​បញ្ហា​សេដ្ឋកិច្ច»

Lockdown_pp_15_04_2021_02.jpg
ពលរដ្ឋក្នុងទីក្រុងភ្នំពេញប្រឈមការលំបាកក្នុងការធ្វើដំណើរក្រោមវិធានការបិទខ្ទប់របស់រដ្ឋាភិបាលចាប់ពីថ្ងៃទី១៧ ខែមេសា ឆ្នាំ២០២១។

ទាក់ទង​នឹង​ការ​រីករាលដាល​ជំងឺ​កូវីដ-១៩ នៅ​ក្នុង​រោងចក្រ​នេះ ក្នុង​សន្និសីទ​សារព័ត៌មាន ​ស្តីពី​ ការ​អនុវត្ត​វិធានការ​បិទ​ខ្ទប់​រាជធានីភ្នំពេញ និង​ក្រុងតាខ្មៅ ខេត្តកណ្ដាល ថ្ងៃទី២៨ ខែមេសា អ្នក​នាំពាក្យ​ក្រសួងការងារលោក ហេង សួរ ថ្លែង​ថា មាន​កម្មករ និយោជិត ២​ ពាន់​នាក់ ​មក​ពី​រោងចក្រ សហគ្រាស​ចំនួនជាង ២​រយ (​២០៦) បាន​ឆ្លង​ជំងឺ​កូវីដ-១៩ ខណៈ​ជាង​ ១ម៉ឺន​ ៧​ពាន់​នាក់ តម្រូវ​ឱ្យ​ធ្វើ​ចត្តាឡីស័ក។

ក្នុង​ចំណោម​រោងចក្រ សហគ្រាស​ចំនួន​ ២០៦ មាន​១៣៤ រោងចក្រ នៅក្នុង​រាជធានីភ្នំពេញ។ ប៉ុន្តែ​តួលេខ​នេះ ហាក់​មាន​ភាព​ខុសគ្នា​ពី​រដ្ឋបាល​រាជធានី​ភ្នំពេញ ដែល​បាន​បង្ហាញ​កាល​ពី​ថ្ងៃទី២៦ ខែមេសា ថា មាន​ចំនួន​រហូត​ដល់​ជិត ២៣០ រោងចក្រ។

ក្រសួង​សុខាភិបាល​បាន​ប្រកាស​នៅ​យប់​ថ្ងៃ​ទី​២៨ ខែមេសា ថា អ្នក​ស្លាប់​ដោយ​សារ​ជំងឺកូវីដ​១៩មាន​ចំនួន ​៦​ នាក់​បន្ថែម​ទៀត គឺ​បាន​កើន​ដល់ ៨៨នាក់ ខណៈ​អ្នក​​ឆ្លង​ថ្មី​មាន​ ៦៩៨​ នាក់។

ចំណែក​​អ្នក​ឆ្លង​​ថ្មី ​៦៩៧នាក់​ គឺ​ជា​​ករណី​​​ឆ្លង​​ក្នុង​​សហគមន៍ និង​ម្នាក់​ជា​អ្នក​ដំណើរ​ពី​បរទេស។ នៅ​ថ្ងៃ​ដដែល​​នេះ​​ ក្រសួង​ក៏​​អះអាង​​ថា​ អ្នកជំងឺ​ចំនួន ៩៩៤ នាក់​​បាន​​ជា​​សះ​ស្បើយ​។

គិត​ត្រឹម​យប់​ថ្ងៃទី​២៨​ ខែ​មេសា​ កម្ពុជា​បាន​​រក​ឃើញ​​អ្នក​ឆ្លង​​ជំងឺ​កូវីដ-១៩ សរុប​ជិត ​១​​ម៉ឺន​ ២​ពាន់ ​(១១.៧៦១)​ នាក់ ក្នុង​នោះ​​ករណី​​ឆ្លង​ក្នុង​សហគមន៍ ​​២០ ​កុម្ភៈ មាន​​​ជាង​ ១ ម៉ឺន ១ ​ពាន់​នាក់ ​(១.១២១០)​ នាក់។ អ្នក​កំពុង​​សម្រាក​​ព្យាបាល​​មាន​​ជាង​ ៧​ពាន់ (៧.៩៦៨) នាក់៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល