ប្រទេសកម្ពុជា ជាកន្លែងផលិតថ្នាំប្រភេទ កេតាមីន ធំមួយ ក្នុងតំបន់អាស៊ីអាគ្នេយ៍ នៅឆ្នាំ២០២២
2022.12.13
អង្គការសហប្រជាជាតិទទួលបន្ទុកគ្រឿងញៀន និងឧក្រិដ្ឋកម្ម (#UNODC) នៅទីក្រុងវីយែន ប្រទេសអូទ្រីស ចេញផ្សាយរបាយការណ៍មួយ កាលពីខែសីហា ឆ្នាំ២០២២ ថា ការរឹបអូសថ្នាំ កេតាមីន (Ketamine) បានកើនឡើងយ៉ាងខ្លាំងនៅក្នុងប្រទេសកម្ពុជា គឺពី ១១២គីឡូក្រាមកន្លះ (១១២.៥គ.ក្រ) ក្នុងឆ្នាំ២០២០ ឡើងដល់ ២.៨តោន ក្នុងឆ្នាំ២០២១។ ចំនួននេះ គឺស្មើនឹងជាង ៥០ភាគរយនៃថ្នាំ កេតាមីន គេរឹបអូសបានសរុប ក្នុងតំបន់អាស៊ីអាគ្នេយ៍ទាំងអស់ ដែលមានចំនួន ៥.៤តោន ក្នុងឆ្នាំនោះ។ ការកើនឡើងនេះ គឺទាក់ទងគ្នានឹងការកើនឡើងភស្តុតាងជាច្រើន ដែលបញ្ជាក់អំពីការផលិតថ្នាំ កេតាមីន ខុសច្បាប់នៅក្នុងកម្ពុជា ដូចដែលការស្រាវជ្រាវថ្មីៗ រកឃើញកន្លែងលួចផលិតថ្នាំ កេតាមីន ជាច្រើនកន្លែង បានបញ្ជាក់ស្រាប់។
កាលពីខែធ្នូ ឆ្នាំ២០២១ អាជ្ញាធរកម្ពុជាបានបិទចោលរោងចក្រលួចផលិតថ្នាំទ្រង់ទ្រាយធំមួយកន្លែង។ នៅក្នុងខែមករា ឆ្នាំ២០២២ ការស៊ើបអង្កេត បន្តនាំទៅដល់ការបង្ក្រាបកន្លែងលួចផលិតទ្រង់ទ្រាយធំទីពីរ និងជាកន្លែងផ្ទុកសារធាតុគីមី ដែលគេសង្ស័យថា ត្រូវបានប្រើសម្រាប់ផលិតថ្នាំ កេតាមីន និងអាចជាថ្នាំសំយោគផ្សេងទៀត។ នៅកន្លែងលួចផលិតមួយកន្លែង ក្នុងខេត្តកំពង់ស្ពឺ អាជ្ញាធររកឃើញ មានសារធាតុផ្សេងៗ សរុបចំនួន ៦១,៧តោន ក្នុងនោះមានសារធាតុដើម កេតាមីន (Ketamine) ៧៥០គីឡូក្រាម និងជាកាកសំណល់ កេតាមីន ចំនួន ៥,២២តោន។ មានសារធាតុគីមី ១៤៩តោនទៀត ត្រូវបានរឹបអូសនៅកន្លែងស្តុកទុកសារធាតុគីមីក្នុងរាជធានីភ្នំពេញ កាលពីក្នុងខែមករា ឆ្នាំ២០២២ នេះ។
អាជ្ញាធរជាតិ នៅខែឧសភា ឆ្នាំ២០២២ បង្ក្រាបកន្លែងកែច្នៃគ្រឿងញៀនខុសច្បាប់មួយទៀត ហើយរឹបអូសបានថ្នាំ កេតាមីន ៤០,៥គីឡូក្រាម សារធាតុរំលាយចម្រុះ ដែលមានផ្ទុកគ្រឿងញៀន ១.៤២៥គីឡូក្រាម និងសារធាតុគីមីផ្សេងទៀត ១១,៥តោន។ នៅខែកក្កដា ឆ្នាំ២០២២ អាជ្ញាធរបង្ក្រាបកន្លែងកែច្នៃមួយ និងកន្លែងស្តុកទុកចំនួន៦ ហើយរឹបអូសបានថ្នាំ កេតាមីន ១,៨តោន និងសារធាតុគីមី និងសមាសធាតុគីមីផ្សេងទៀត ២២៧តោន។ នៅខែសីហា ឆ្នាំ២០២២ ថ្នាំ កេតាមីន ៨៧១គីឡូក្រាមទៀត ត្រូវបានរឹបអូស។
កេតាមីន (Ketamine) ជាថ្នាំ ដែលគេប្រើយ៉ាងទូលំទូលាយសម្រាប់មនុស្ស និងសត្វ ហើយត្រូវបានគេចុះបញ្ជីជាឱសថសំខាន់ដោយអង្គការសុខភាពពិភពលោក (WHO)។ នៅពេលដែលថ្នាំ កេតាមីន មិនស្ថិតក្រោមការគ្រប់គ្រងរបស់អន្តរជាតិ ការប្រើប្រាស់ក្រៅពីផ្លូវពេទ្យ ធ្វើឱ្យមានផលប៉ះពាល់សុខភាពធ្ងន់ធ្ងរមួយចំនួន។ ការប្រើ កេតាមីន ក្រៅពីផ្លូវពេទ្យ ក្នុងកម្រិតខ្ពស់ អាចបណ្ដាលឱ្យបេះដូងដើរញាប់ និងសម្ពាធឈាមឡើងខ្ពស់ ពុលផ្លូវដង្ហើម ហើយបង្កបញ្ហាដល់ប្លោកនោម ធ្វើឱ្យថប់អារម្មណ៍ មានអាការៈភ័យស្លន់ស្លោ ញ័រទ្រូង ឈឺទ្រូង ធ្លាក់ទឹកចិត្ត ហើយអ្នកមានបញ្ហាសុខភាពផ្លូវចិត្តស្រាប់ រឹតតែធ្ងន់ធ្ងរ និយាយមិនច្បាស់ និងនិយាយលែងចេញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។