មន្ត្រីគណបក្សសង្គ្រោះជាតិ បង្ហាញការសោកស្ដាយ បន្ទាប់ពីមន្ត្រីនៃសាលារាជធានីភ្នំពេញ ជំទាស់នឹងគម្រោងរៀបចំពិធីបង្សុកូល ដែលរៀបចំឡើងដើម្បីឧទ្ទិសបុណ្យកុសលចំពោះអ្នកបាត់បង់ជីវិត ដោយការបាញ់បង្ក្រាបបាតុកម្មនៅផ្លូវវ៉េងស្រេង កាលពីដើមខែមករា ឆ្នាំ២០១៤។
មន្ត្រីគណបក្សសង្គ្រោះជាតិ អះអាងថា នៅពេលនេះ ខ្លួនកំពុងពិចារណាពីគម្រោងការដែលត្រូវរៀបចំពិធីនៅបួនថ្ងៃខាងមុខទៀតនេះ នៅលើផ្លូវវ៉េងស្រេង ក្រោយពីសាលារាជធានីភ្នំពេញ បានចេញបម្រាមរារាំងមិនឲ្យប្រារព្ធពិធីដូចការគ្រោងទុករបស់គណបក្សសង្គ្រោះជាតិ។
អ្នកស្រី មូរ សុខហួរ អគ្គលេខាធិការរងគណបក្សសង្គ្រោះជាតិ និងជាតំណាងរាស្ត្រមណ្ឌលបាត់ដំបង ឲ្យដឹងនៅថ្ងៃទី៣១ ធ្នូ ថា មូលហេតុដែលគណបក្សសង្គ្រោះជាតិ ស្នើសុំរៀបចំពិធីបង្សុកូលនេះ គឺគ្មានអ្វីក្រៅពីប្រារព្ធពិធីតាមបែបសាសនា ដើម្បីឧទ្ទិសបុណ្យកុសលប៉ុណ្ណោះទេ។ អ្នកស្រីថ្លែងបន្តថា ប្រសិនសាលារាជធានីភ្នំពេញហាមឃាត់មិនឲ្យធ្វើពិធីនេះ បានន័យថា មន្ត្រីអាជ្ញាធរកំពុងតែបំពានទៅនឹងវប្បធម៌ និងសាសនារបស់ខ្លួន។ អ្នកស្រីបន្តថា «ការបង្សុកូល គឺជាប្រារព្ធតាមពិធីសាសនាខ្មែរ។ ដូច្នេះការបដិសេធ គឺជាការបដិសេធមិនទទួលស្គាល់អ្វីដែលជាសាសនាវប្បធម៌ខ្មែរទេ»។
ការច្រានចោលសំណើរបស់គណបក្សសង្គ្រោះជាតិ ដោយសាលារាជធានីភ្នំពេញនៅពេលនេះ គឺ ៣ថ្ងៃបន្ទាប់ពីគណបក្សជំទាស់បានដាក់លិខិតកាលពីថ្ងៃទី២៩ ខែធ្នូ ដើម្បីប្រារព្ធពិធីបង្សុកូល នៅថ្ងៃទី៤ ខែមករា នាផ្លូវវ៉េងស្រេង។
លោក ឡុង ឌីម៉ង់ មន្ត្រីនាំពាក្យសាលារាជធានីភ្នំពេញ បញ្ជាក់ថា ស្ថាប័នជំនាញរបស់រដ្ឋាភិបាលពុំបានរើសអើង ឬរឹតត្បិតការរៀបចំពិធីបុណ្យទានរបស់គណបក្សសង្គ្រោះជាតិ ទេ។ លោកបន្តថា អ្វីដែលសំខាន់នោះនៅត្រង់ថា ចំណុចដែលគណបក្សសង្គ្រោះជាតិ ស្នើសុំនោះ គឺប៉ះពាល់ដល់ការធ្វើដំណើររបស់ប្រជាពលរដ្ឋ។ លោកបន្ថែមថា គណបក្សនេះអាចធ្វើពិធីនៅក្នុងវត្ត ឬទីតាំងណាមួយដែលនៅក្បែរនោះបាន។ លោកបន្តថា «សូមឲ្យគាត់ធ្វើនៅក្នុងវត្តទៅ។ វត្តនៅជិតហ្នឹងទៅសុំគណៈកម្មការវត្តទៅ សុំព្រះចៅអធិការវត្តទៅ គេឯកភាពយើងធ្វើនៅហ្នឹងចុះ»។
ព្រឹត្តិការណ៍បាញ់បង្ក្រាបប្រឆាំងក្រុមអ្នកតវ៉ាកាលពីដើមឆ្នាំ២០១៤ កន្លងទៅ ដោយក្រុមចម្រុះរបស់រដ្ឋាភិបាល បានបណ្ដាលឲ្យមនុស្សយ៉ាងហោចណាស់ ៥នាក់បាត់បង់ជីវិត ក្នុងនោះម្នាក់បានបាត់ខ្លួនរកមិនទាន់ឃើញ។ ក្រៅពីនេះ មនុស្សជាង ៣០នាក់ផ្សេងទៀតត្រូវរងរបួសធ្ងន់ និងស្រាល រហូតអ្នកខ្លះក្នុងចំណោមនោះ ត្រូវពិការអស់មួយជីវិត។ លើសពីនេះ អង្គការសង្គមស៊ីវិល កម្មករ និងអ្នកនៅអមសងខាងផ្លូវចំនួន ២៣នាក់បន្ថែមទៀត ត្រូវចាប់ខ្លួនក្នុងព្រឹត្តិការណ៍កាលនោះ។
មន្ត្រីអង្គការមិនមែនរដ្ឋាភិបាល ចាត់ទុកថា នេះគឺជាអំពើនិទ្ទណ្ឌភាព ឬភាពគ្មានទោស ចំពោះអ្នកប្រព្រឹត្តិបទល្មើសយ៉ាងធ្ងន់ធ្ងរនៅកម្ពុជា។
លោក អំ សំអាត មន្ត្រីបច្ចេកទេសស៊ើបអង្កេតនៃអង្គការលីកាដូ (Licadho) យល់ឃើញថា នេះជាការរឹតត្បិតដោយពុំមានហេតុផលសមរម្យឡើយ។ លោកបន្តថា បម្រាមរបស់សាលារាជធានីភ្នំពេញ ដែលធ្វើឡើងនៅពេលនេះ ទំនងជាចង់បិទបាំងការពិតចំពោះការប្រព្រឹត្តបទឧក្រិដ្ឋ និងព្យាយាមលុបបំបាត់ភស្តុតាង ជាជាងហេតុផលប៉ះពាល់សេដ្ឋកិច្ចជាតិទៅវិញទេ។ លោកបន្តថា «ប៉ុន្តែអ្វីដែលសំខាន់ គេមិនចង់ការប្រារព្ធនៅកន្លែងហ្នឹង ពីព្រោះជាការមួយដែលរំឭកទៅដល់ការពិតពេកនៃការបង្ក្រាបបណ្ដាលឲ្យមនុស្សស្លាប់»។
គិតមកដល់ពេលនេះ សំណុំរឿងបាញ់សម្លាប់កម្មករ និងអ្នកខ្លះមានរបួសធ្ងន់ និងស្រាល មិនត្រូវបានរដ្ឋាភិបាលបើកការស៊ើបអង្កេតដោយម៉ត់ចត់ ព្រមទាំងយកអ្នកប្រព្រឹត្តិបទល្មើសមកផ្ដន្ទាទោសទេ។ ផ្ទុយទៅវិញ ប្រជាពលរដ្ឋ កម្មករ និងអង្គការសង្គមស៊ីវិល ត្រូវបានចាប់ខ្លួន និងចោទប្រកាន់តាមផ្លូវតុលាការទៅវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។