ពលករបាត់ខ្លួននៅម៉ាឡេស៊ីកើនឡើង
2013.03.19
ពលករកម្ពុជាចំនួន ៣០នាក់ ត្រូវបានសង្គ្រោះពីប្រទេសម៉ាឡេស៊ី និងវិលត្រឡប់មកដល់ប្រទេសកម្ពុជាវិញ នាអាកាសយានដ្ឋានអន្តរជាតិភ្នំពេញ កាលពីថ្ងៃទី១២ ខែធ្នូ ឆ្នាំ២០១១។
មានក្រុមគ្រួសារខ្មែរមួយចំនួននៅតាមបណ្ដាខេត្តខ្លះ កំពុងតែស្វះស្វែងតាមរកសាច់ញាតិជាពលករដែលបាត់ខ្លួននោះ។
សមាគមការពារសិទ្ធិមនុស្សអាដហុក (Adhoc) ខេត្តព្រះវិហារ បានសម្ដែងការព្រួយបារម្ភជាខ្លាំង ដោយថាចំនួនប្រជាពលរដ្ឋរបស់ខេត្តនេះ ដែលចំណាកស្រុកទៅធ្វើការក្រៅប្រទេស ហើយបាត់ខ្លួនមានកាន់តែច្រើនឡើង។
អ្នកសម្របសម្រួលសមាគមការពារសិទ្ធិមនុស្សអាដហុក ខេត្តព្រះវិហារ គឺលោក ឡោ ច័ន្ទ លោកបានមានប្រសាសន៍ដោយអារម្មណ៍ភ្ញាក់ផ្អើលថា ករណីពលករចំណាកស្រុកដែលបាត់ខ្លួននៅក្នុងរយៈពេល ៣ខែដើមឆ្នាំ២០១៣ នេះ គឺមានការកើនឡើងខ្ពស់។
មន្ត្រីដដែលបានបញ្ជាក់ថា ក្នុងរយៈពេល ៣ខែឆ្នាំ២០១៣ គឺលោកបានទទួលបណ្ដឹងពីសាច់ញាតិរបស់ពលករបាត់ខ្លួនចំនួន ៨ករណី។ ចំនួននេះ គឺកើនឡើងខ្ពស់ បើប្រៀបធៀបទៅនឹងរយៈពេល ៣ខែដើមឆ្នាំ២០១២ កន្លងទៅដែលមិនមានករណីនេះទាល់តែសោះ៖ «ករណីបាត់ខ្លួនក៏ដូចជាករណីជួញដូរមួយចំនួននោះ នៅតែជាកត្តាព្រួយបារម្ភ ពីព្រោះយើងឃើញថា រយៈពេលតែ ៣ខែសោះ ខ្ញុំទទួលបានពាក្យបណ្ដឹងរហូតដល់ ៨ករណី។ បើយើងប្រៀបធៀបទៅនឹងដើមឆ្នាំ២០១២ នោះ វាចង់ ១០០% បាត់ទៅហើយ»។
លោក ឡោ ច័ន្ទ បានបញ្ជាក់ថា ប្រជាពលរដ្ឋខ្លះរស់នៅខេត្តព្រះវិហារ ដែលជាខេត្តដាច់ស្រយាលបានចាកចេញពីភូមិ ស្រុក ទៅរកការងារធ្វើក្រៅប្រទេស ដោយសារតែពួកគេមានជីវភាពក្រីក្រ និងគ្មានការងារធ្វើនៅក្នុងមូលដ្ឋាន។
មន្ត្រីនគរបាលខេត្តព្រះវិហារ បានបង្ហាញការព្រួយបារម្ភដូចគ្នានេះថា សមត្ថកិច្ចកំពុងប្រឹងប្រែងទប់ស្កាត់ការចំណាកស្រុកតាមរយៈការចុះអប់រំ និងផ្សព្វផ្សាយដល់ប្រជាពលរដ្ឋ នៅតាមមូលដ្ឋាន។
អ្នកស្រី ប្រាង ធីតា ជាប្រធានការិយាល័យនគរបាលប្រឆាំងការជួញដូរមនុស្ស និងការពារអនីតិជននៃស្នងការនគរបាលខេត្តព្រះវិហារ បានមានប្រសាសន៍ថា បច្ចុប្បន្នមានប្រជាពលរដ្ឋខ្មែរមួយចំនួនបានចាកចេញទៅធ្វើការងារគ្រោះថ្នាក់នៅតាមព្រំដែនប្រទេសថៃ និងឡាវ៖ «ខាងសមត្ថកិច្ចរាល់ថ្ងៃ គឺចាប់អារម្មណ៍ការចេញទៅប្រទេសថៃ និងឡាវ វិញ បើប្រទេសម៉ាឡេស៊ី ដូចស្ងាត់អត់មានចាកចេញទៅទេ។ កំពុងតែធ្វើការទប់ស្កាត់ដែរ ហើយចេះតែផ្សព្វផ្សាយតាមមូលដ្ឋានពីល្បិចកលរបស់មេខ្យល់ ដែលបានដើរអូសទាញប្រជាពលរដ្ឋដល់ប្រជាពលរដ្ឋគ្រប់ទាំង ៧ក្រុង ស្រុក របស់ខ្ញុំនេះ។ ផែនការនឹងធ្វើលើកទិសដៅ ២០១៣ នេះទៀត តែមិនដឹងថ្ងៃណា?»។
កាលពីដើមឆ្នាំ២០១៣ កន្លងទៅ ក្រសួងការងារ និងបណ្ដុះបណ្ដាលវិជ្ជាជីវៈ បានរឹតបន្តឹងក្នុងការនាំពលករខ្មែរចេញទៅធ្វើការនៅប្រទេសថៃ។ ការរឹតបន្តឹងនោះ បន្ទាប់ពីមានបញ្ហាជាច្រើន ដូចជាមានការជួញដូរពលកម្ម និងធ្វើទុក្ខបុកម្នេញលើពលករនៅប្រទេសម៉ាឡេស៊ី ជាច្រើនករណីមក។
លោក សែម ចៅសុខ អ្នកឃ្លាំមើលជាន់ខ្ពស់របស់អង្គការសិទ្ធិមនុស្សលីកាដូ បានមានប្រសាសន៍ថា ចាប់តាំងពីរដ្ឋាភិបាលខ្មែរបានចេញសេចក្តីប្រកាសហាមមិនឱ្យបញ្ជូនពលករទៅធ្វើការនៅប្រទេសម៉ាឡេស៊ី តទៅទៀត មានក្រុមហ៊ុនខ្លះបានត្រូវរ៉ូវជាមួយអាជ្ញាធរម៉ាឡេស៊ី ទប់ស្កាត់ពលករខ្មែរដែលចប់កុងត្រាការងាររយៈពេល ២ឆ្នាំទៅហើយ មិនឱ្យវិលត្រឡប់មកវិញទេ។ បញ្ហានេះ បានធ្វើឱ្យបាត់ខ្លួនពលករពលការិនីខ្មែរកាន់តែច្រើនឡើងៗ។ លោក សែម ចៅសុខ បានឱ្យដឹងទៀតថា ក្នុងរយៈពេល ៣ខែឆ្នាំ២០១៣ អង្គការលីកាដូ សហការជាមួយក្រសួងការបរទេស និងអង្គការអាយ.អូ.អឹម (IOM) បានជួយសង្គ្រោះពលករនេសាទសមុទ្រពីប្រទេសឥណ្ឌូនេស៊ី និងពលករមានបញ្ហាខួរក្បាល ដោយសារតែថៅកែធ្វើបាបនៅប្រទេសម៉ាឡេស៊ី ប្រមាណ ៣០នាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សភាកម្ពុជាប្រតិកម្មទៅនឹងការសម្រេចរបស់សភាអឺរ៉ុបរឿងដកប្រព័ន្ធអនុគ្រោះពន្ធEBA បន្ថែម
- មន្ត្រីជាន់ខ្ពស់ និងឧកញ៉ា សុំលោក ហ៊ុន សែន ឱ្យជួយរកយុត្តិធម៌ដោយមិនពឹងតុលាការ
- កម្ពុជារកចំណូលបាន ១.៤ពាន់លានដុល្លារ ពីកំណើនភ្ញៀវទេសចរបរទេសក្នុងឆ្នាំ២០២២
- លោក ហ៊ុន សែន មិនគាំទ្រដីកាតុលាការ ICC ដើម្បីចាប់ខ្លួនមេដឹកនាំរុស្ស៊ី
- ពិធីមង្គលការរបស់ពលករខ្មែរនៅប្រទេសថៃ