កម្មករ​រោង​ចក្រ​ស៊ូភើថិច​ធ្វើ​កូដកម្ម​ទាមទារ​បើក​ប្រាក់​ខែ

កម្មករ-កម្មការិនី បម្រើ​ការ​នៅ​រោង​ចក្រ​ស៊ូភើថិច (Super Text) មាន​ទីតាំង​នៅ​សង្កាត់​ចាក់​អង្រែ​ក្រោម ស្ថិត​ក្នុង​ខណ្ឌ​មាន​ជ័យ ក្រុង​ភ្នំពេញ បាន​បន្ត​ប្រមូល​ផ្ដុំ​គ្នា​ធ្វើ​កូដកម្ម​អស់​រយៈ​ពេល​ជិត​ពីរ​សប្ដាហ៍ ដើម្បី​ទាមទារ​បើក​បៀវត្ស។
ដោយ ដែន អយុធ្យា
2011.06.23
Share on WhatsApp
Share on WhatsApp

កម្មករ-កម្មការិនី ប្រមាណ ២០០​នាក់ ក្នុង​ចំណោម​កម្មករ​សរុប​ជាង ១៣០០​នាក់ ធ្វើ​ការ​នៅ​រោង​ចក្រ​ស៊ុបភើធិច (Super Text) នៅ​ថ្ងៃ​ទី​២៣ ខែ​មិថុនា នៅ​បន្ត​ប្រមូល​ផ្ដុំ​គ្នា​ធ្វើ​ការ​តវ៉ា ដើម្បី​ស្នើ​កិច្ច​អន្តរាគមន៍​ទៅ​ប្រមុខ​ដឹក​នាំ និង​ថ្នាក់​ដឹក​នាំ​ស្ថាប័ន​ពាក់​ព័ន្ធ​ឲ្យ​ជួយ​ជំរុញ​ទៅ​ថៅកែ​រោង​ចក្រ ឲ្យ​បើក​ប្រាក់​បៀវត្ស​សម្រាប់​ខែ​ឧសភា​ដល់​កម្មករ។

ក្រុម​កម្មករ​រោង​ចក្រ​ស៊ុបភើធិច ដែល​បាន​ឈរ​តវ៉ា​ក្រោម​កម្ដៅ​ថ្ងៃ​នៅ​ពី​មុខ​រោង​ចក្រ ជាប់​តាម​បណ្ដោយ​ផ្លូវ​ជាតិ​លេខ​២ បាន​សំណូមពរ​ទៅ​លោក​នាយក​រដ្ឋ​មន្ត្រី ហ៊ុន សែន ជួយ​ដល់​ពួក​គេ ដើម្បី​ឲ្យ​ថៅកែ​បើក​ប្រាក់​ខែៗ​ឧសភា និង​ប្រាក់​បំណាច​ផ្សេងៗ ជូន​ពួក​គេ ព្រោះ​ក្រុម​កម្មករ​កំពុង​ជួប​ប្រទះ​ការ​ខ្វះ​ខាត និង​មិន​មាន​ថវិកា​សម្រាប់​ចំណាយ​ថ្លៃ​ជួល​ផ្ទះ និង​អាហារ​ទទួល​ទាន ៖ «ប្រាក់​ខែ​ៗ​ឧសភា​ត្រូវ​បើក​ថ្ងៃ​ទី​១០ តែ​ឥឡូវ​លើស ១៣​ថ្ងៃ​ហើយ។ ខ្ញុំ​ស្នើ​ទៅ​នាយក​រដ្ឋ​មន្ត្រី ហ៊ុន សែន ហើយ​ក៏​ប៉ុន្តែ​គ្មាន​នរណា​គេ​ជួយ​ដោះ​ស្រាយ​ឲ្យ​ទេ។ ចង់​ឲ្យ​សម្ដេច ហ៊ុន សែន គាត់​មក​ជួយ​ដោះ​ស្រាយ​ប្រាក់​ខែ គឺ​អត់​មាន​លុយ​ថ្លៃ​ផ្ទះ ថ្លៃ​បាយ គឺ​អត់​មាន។ ពួក​ខ្ញុំ​ឈរ​នៅ​ពី​មុខ​រោង​ចក្រ គឺ​ដើម្បី​ទាម​ទារ​ប្រាក់​ខែ​ៗ​ឧសភា​របស់​ខ្ញុំ ដែល​ថៅកែ​មិន​ទាន់​បាន​បើក​ឲ្យ។ ពួក​ខ្ញុំ​ធ្វើ​ការ​ពេញ ១​ខែ និង​ថែម​ម៉ោង​ដល់ ៨​យប់។ ជួយ​ដោះ​ស្រាយ​ក្រុម​កម្មករ​ផង ពួក​ខ្ញុំ​វេទនា​ណាស់ ឥឡូវ​ហ្នឹង​អត់​មាន​លុយ​ទិញ​បាយ​ហូប​ទេ»

ក្រុម​កម្មករ​រោង​ចក្រ​ស៊ុបភើធិច បាន​ឲ្យ​ដឹង​ថា ពួក​គេ​បាន​មក​ប្រមូល​ផ្ដុំ​គ្នា​តវ៉ា​នៅ​ពី​មុខ​រោង​ចក្រ​អស់​រយៈ​ពេល​ជិត ២​សប្ដាហ៍ មក​ហើយ ប៉ុន្តែ​នៅ​មិន​ទាន់​មាន​ដំណោះ​ស្រាយ​នៅ​ឡើយ បើ​ទោះ​មាន​មន្ត្រី​មក​ពី​ក្រសួង​ការ​ងារ​បាន​បង្ហាញ​វត្ត​មាន​ម្ដង​ម្កាល​ក្ដី។

អ្នក​ស្រី សែន គឹម​ស៊ាង ប្រធាន​សហ​ជីព​ខ្មែរ​ប្រចាំ​រោង​ចក្រ​ស៊ុបភើធិច ក៏​បាន​ឲ្យ​ដឹង​ដែរ​ថា ប្រសិន​បើ​វិវាទ​នៅ​រោង​ចក្រ​នេះ អាជ្ញាធរ​ពាក់ព័ន្ធ​មិន​ជួយ​រក​ដំណោះ​ស្រាយ​ជូន​កម្មករ​ឲ្យ​បាន​ឆាប់​ទេ កម្មករ​មាន​គម្រោង​ឈរ​បិទ​ផ្លូវ​ជាតិ​លេខ​២ នៅ​ពេល​ដ៏​ឆាប់​ខាង​មុខ ដើម្បី​បង្ហាញ​ពី​ភាព​អយុត្តិធម៌ និង​ស្នើ​ឲ្យ​មាន​ការ​ជួយ​អន្តរាគមន៍​ពី​ស្ថាប័ន​ពាក់ព័ន្ធ​ដល់​ពួក​គេ។ អ្នក​ស្រី គឹម ស៊ាង បន្ត​ថា វិវាទ​នៅ​ក្រុមហ៊ុន​ស៊ុបភើធិច​នេះ តំណាង​កម្មករ​បាន​ដាក់​សំណើ​ជួយ​អន្តរាគមន៍​ទៅ​ស្ថាប័ន​ទីស្ដីការ​គណៈ​រដ្ឋ​មន្ត្រី ក្រសួង​ការងារ រដ្ឋ​សភា ក្រសួង​មហា​ផ្ទៃ និង​ខុទ្ទកាល័យ​លោក​នាយក​រដ្ឋ​មន្ត្រី ហ៊ុន សែន ជា​ដើម ដើម្បី​ឲ្យ​ថ្នាក់​ដឹក​នាំ​ស្ថាប័ន​ទាំង​នេះ​ជួយ​ជំរុញ​ទៅ​ថៅកែ​ក្រុម​ហ៊ុន​ស៊ុបភើតិច ឲ្យ​បើក​ប្រាក់​ខែ​សម្រាប់​ខែ​ឧសភា ជូន​ពួក​គេ​ឲ្យ​បាន​ឆាប់ ៖ «ជំហាន​ទី​១ ខាង​ខ្ញុំ​ចង់​បាន​ប្រាក់​ខែ​សិន ព្រោះ​អី​ពួក​ខ្ញុំ​ជួល​ផ្ទះ​គេ ថ្លៃ​ផ្ទះ ថ្លៃ​ម្ហូប​អាហារ​ជីវភាព​ផ្គត់ផ្គង់​សព្វ​គ្រប់»

លោក សុខ សម្បត្តិ បុគ្គលិក​រដ្ឋបាល​ប្រចាំ​រោង​ចក្រ​ស៊ុបភើតិច ធ្លាប់​បាន​ឲ្យ​ដឹង​ថា កម្មករ​ទាំង​អស់​បម្រើ​ការ​នៅ​រោង​ចក្រ​កាត់​ដេរ​សំលៀក​បំពាក់​ស៊ុបភើតិច មាន​កម្មករ​សរុប​ចំនួន ១៨០០​នាក់ ក្នុង​ចំណោម​នេះ​មាន​តែ​កម្មករ​ចំនួន ៤៥០​នាក់​ទេ ដែល​ថៅកែ​បាន​បើក​ប្រាក់​ខែ​ៗ​ឧសភា​ជូន ក្រៅពី​នោះ មិន​ថា​តែ​កម្មករ​ទេ សូម្បី​បុគ្គលិក​រដ្ឋបាល​ក៏​មិន​ទទួល​បាន​ប្រាក់​ខែ​ដូច​កម្មករ​ដែរ ៖ «អត់​ទាំង​អស់​ថៅកែ​ផលិត​បាន​ហើយ​សន្យា​បើក​លុយ​ឲ្យ​កម្មករ​ថ្ងៃ​ទី​​១០ ជា​ទម្លាប់ ប៉ុន្តែ​ឥឡូវ​អត់​បើក​ឲ្យ​ទេ មិន​ថា​កម្មករ​ទេ រដ្ឋបាល គណនេយ្យ​ទាំង​អស់​គ្នា​ហ្នឹង​អត់​ទាន់​បើក​លុយ»

ទោះ​យ៉ាង​ណា លោក ស៊ុំ ផារ៉ែន មន្ត្រី​ដោះ​ស្រាយ​វិវាទ​ការ​ងារ​នៃ​ក្រសួង​ការងារ បាន​មាន​ប្រសាសន៍​ថា ជម្លោះ​រវាង​ថៅកែ​រោង​ចក្រ​ស៊ុបភើតិច និង​កម្មករ ក្រសួង​កំពុង​រៀបចំ​ឯកសារ​ដាក់​ជូន​ទៅ​មន្ត្រី​ក្រុម​ប្រឹក្សា​អាជ្ញា​កណ្ដាល នៃ​ក្រសួង​ការងារ​ឲ្យ​ជួយ​រក​ដំណោះ​ស្រាយ ដើម្បី​បញ្ចប់​វិវាទ​ឲ្យ​បាន​ឆាប់ ៖ «រោង​ចក្រ​ស៊ុបភើធិច​អត់​ទាន់​មាន​ដំណោះ​ស្រាយ​អី​ទេ។ ខាង​ខ្ញុំ​កំពុង​រៀបចំ​បញ្ជូន​សំណុំ​រឿង​ទៅ​ក្រុម​ប្រឹក្សា​អាជ្ញា​កណ្ដាល ដើម្បី​ឲ្យ​គេ​កោះ​ប្រជុំ​ដោះ​ស្រាយ​ទំនាស់​នេះ»

ក្រុម​កម្មករ​រោង​ចក្រ​ស៊ុបភើតិច បាន​ប្រមូល​ផ្ដុំ​គ្នា​ធ្វើ​កូដកម្ម​នៅ​ពី​មុខ​រោង​ចក្រ ចាប់​ពី​ថ្ងៃ​ទី​១១ ខែ​មិថុនា មក​ម្ល៉េះ ដោយ​បាន​អះ​អាង​ដូច​ៗ​គ្នា​ថា នឹង​បន្ត​ធ្វើ​កូដកម្ម​នៅ​ពី​មុខ​រោង​ចក្រ ឬ​ឈាន​ដល់​បិទ​ផ្លូវ​ជាតិ​លេខ​២ ក្នុង​ពេល​ឆាប់​ៗ​នេះ  បើ​សិន​ថៅកែ​ក្រុម​ហ៊ុន​នេះ នៅ​បន្ត​គេចវេះ​មិន​ទទួល​ខុស​ត្រូវ ក្នុង​ការ​បើក​ប្រាក់​ខែ និង​ប្រាក់​បំណាច​ផ្សេង​ៗ ជូន​ពួក​គេ​ឲ្យ​បាន​ឆាប់​ទេ​នោះ៕

រឿង​ដែល​គេ​អាន​​ច្រើន​បំផុត
ព័ត៌មាន​ថ្មីៗ
​ប្រតិភូ​ខ្មែរ​ក្រោម​​ប្រាប់​សន្និសិទ​អន្តរ​សាសនា​ស្តី​ពី​ការ​រំលោភ​សិទ្ធិ​សាសនា​ខ្មែរ​ក្រោម​
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។