សេចក្ដីប្រកាសព័ត៌មានរបស់អ្នកនាំពាក្យអគ្គបញ្ជាការដ្ឋាននៃកងយោធពលខេមរភូមិន្ទនៅថ្ងៃទី៦ឧសភាលើកឡើងថា សមយុទ្ធនេះ ធ្វើឡើងដើម្បីធ្វើឱ្យកាន់តែស៊ីជម្រៅនូវទំនាក់ទំនងដៃគូសហប្រតិបត្តិការយុទ្ធសាស្ដ្រគ្រប់ជ្រុងជ្រោយ ផ្លាស់ប្ដូរបទពិសោធន៍ និងដើម្បីលើកកម្ពស់សមត្ថភាពប្រយុទ្ធជាក់ស្ដែងរវាងកងទ័ពប្រទេសទាំងពីរ ក្នុងការប្រយុទ្ធប្រឆាំងអំពើភេរវកម្ម។
សមយុទ្ធនេះ នឹងធ្វើឡើងពីរទីតាំងផ្សេងគ្នា ទី១ ការធ្វើសមយុទ្ធលើគោក និងលើអាកាស នៅមជ្ឈមណ្ឌលហ្វឹកហ្វឺនកងរាជអាវុធហត្ថ ឬហៅថា ភ្នំជុំសែនរីករាយ នៅខេត្តកំពង់ឆ្នាំង និងទី២ សមយុទ្ធលើសមុទ្រ និងលើអាកាស ក្នុងខេត្តព្រះសីហនុ។
កាលពីខែមករា មន្ត្រីយោធាជាន់ខ្ពស់កម្ពុជាបានស្នើភាគីចិន បន្តជួយគាំទ្រដើម្បីពង្រីកការធ្វើសមយុទ្ធយោធារួមគ្នាឱ្យកាន់តែធំ ដោយត្រូវប្រើប្រាស់ចំនួនយោធិន និងសព្វាវុធឱ្យកាន់តែច្រើន និងកាន់តែទំនើប ដើម្បីឱ្យស្របតាមទំហំកិច្ចសហប្រតិបត្តិការនៃប្រទេសទាំងពីរ។
សារព័ត៌មានគាំទ្ររដ្ឋាភិបាល ហ្វ្រែសញូវ (Freshnews) បានចុះផ្សាយដោយដកស្រង់សម្ដីមន្ត្រីយោធាជាន់ខ្ពស់កម្ពុជាថា សព្វាវុធត្រៀមយកទៅធ្វើសមយុទ្ធក្នុងឆ្នាំ២០២៥នេះ ត្រូវបានបំពាក់បច្ចេកវិទ្យាកាន់តែខ្ពស់និងទំនើប រហូតឈានដល់ការប្រើប្រាស់បញ្ញាសិប្បនិម្មិត ឬអេអាយ (AI)។
កងទ័ពចិននឹងនាំសព្វាវុធកាន់តែទំនើបមកធ្វើសមយុទ្ធជាមួយកងទ័ពកម្ពុជា ដូចមនុស្សយន្ត ឆ្កែយន្ត នាវាចម្បាំង នាវាបុកឡើងគោក ដ្រូនស៊ើបការណ៍ ឧទ្ធម្ភាគចក្រ រថពាសដែក រួមទាំងកាំភ្លើងធំ និងកាំភ្លើងត្បាល់ជាដើម ខណៈកងទ័ពកម្ពុជា ក៏មានឧទ្ធម្ភាគចក្រ នាវា រថពាសដែក និងរថយន្តសង្គ្រោះ ចូលរួមក្នុងសមយុទ្ធដែរ។
កម្ពុជានិងចិនបានធ្វើសមយុទ្ធនាគមាសប្រចាំឆ្នាំ បានចំនួន៧លើករួចមកហើយ គិតត្រឹមឆ្នាំ២០២៤ ស្របពេលការទំនាក់ទំនងយោធាកាន់តែស្អិតល្មួតរវាងប្រទេសទាំងពីរ កំពុងស្ថិតក្រោមការឃ្លាំមើលពីបណ្ដាប្រទេសក្នុងតំបន់មួយចំនួន ជាពិសេសពីសហរដ្ឋអាមេរិក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។