លោកនាយករដ្ឋមន្ត្រី ហ៊ុន ម៉ាណែត បានអះអាងថា កម្ពុជាបានសម្រេចនាំចូលប្រេងបន្ថែមពីប្រទេសសិង្ហបុរី ដើម្បីបង្គ្រប់ការផ្គត់ផ្គង់តម្រូវការប្រេងក្នុងស្រុកបន្ទាប់ពីសម្រេចផ្អាកការនាំចូលប្រេងឥន្ធនៈ និងឧស្ម័នគ្រប់ប្រភេទពីប្រទេសថៃចាប់ពីម៉ោង១២យប់ថ្ងៃទី២៣ ខែមិថុនា ដើម្បីឆ្លើយតបទៅនឹងអ្នកនយោបាយថៃដែលព្រមានថា កម្ពុជានឹងគ្មានប្រេងប្រើប្រាស់ នៅពេលថៃឈប់នាំចូល។
នៅក្នុងកម្មវិធីបិទកិច្ចប្រជុំគណៈកម្មាធិការកណ្តាលសហភាពសហព័ន្ធយុវជនកម្ពុជានៅថ្ងៃទី២៣ ខែមិថុនា លោក ហ៊ុន ម៉ាណែត បានលើកឡើងទៀតថា ប្រទេសកម្ពុជាបន្តរងការប្រមាថនិងមាក់ងាយឥតឈប់ឈរពីក្រុមជ្រុលនិយមនិងមេទ័ពថៃ ដែលតែងតែជំរុញឱ្យប្រទេសរបស់ខ្លួនដាក់គំនាបខាងសេដ្ឋកិច្ច និងព្រមានប្រើកម្លាំងយោធា ដើម្បីធ្វើសង្គ្រាមជាមួយកម្ពុជា។
លោកបានបញ្ជាក់ថា រដ្ឋាភិបាលកម្ពុជាបានត្រៀមខ្លួនគ្រប់គ្រាន់ដើម្បីកំដរលេងល្បែងនេះជាមួយថៃគ្រប់មធ្យោបាយ ក្នុងនោះរួមទាំងការត្រៀមគ្រាប់កាំជ្រួចសម្រាប់បាញ់ទម្លាក់យន្តហោះ និងគ្រាប់កាំភ្លើងសម្រាប់បាញ់កម្ទេចរថក្រោះជាដើម។
ហើយកំពុងតែអង្គុយគិត អារថក្រោះមួយៗដាក់មកហ្នឹង ប្រសិនបើយើងបាញ់ឆេះ យើងគួរលើកទឹកចិត្តឱ្យបងប្អូន (កងទ័ព) ប៉ុន្មាន? អាហោះ (យន្តហោះចម្បាំង និងដ្រូន) ប្រសិនបើបងប្អូនណាបាញ់ឆេះ យើងលើកទឹកចិត្តប៉ុន្មាន យើងកំពុងពិចារណា។
— លោក ហ៊ុន ម៉ាណែត
ការលើកឡើងពីលោក ហ៊ុន ម៉ាណែត នេះ បានធ្វើឡើងបន្ទាប់ពីកម្ពុជាសម្រេចបិទច្រកទ្វារព្រំដែនចំនួន៣ ជាអចិន្ត្រៃយ៍ គឺច្រកទ្វារតំបន់ជប់គគីរ ច្រកទ្វារអន្តរជាតិជាំ ស្ថិតក្នុងខេត្តឧត្តរមានជ័យ និងច្រកទ្វារតំបន់អានសេះក្នុងខេត្តព្រះវិហារ បន្ទាប់ពីយោធាភូមិភាគ២របស់ថៃ បានប្រកាសបន្ថយម៉ោងបើកបិទច្រកទ្វារតំបន់អានសេះ និងបិទច្រកទ្វារតំបន់ជប់គគីរមិនឱ្យដឹកទំនិញឆ្លងកាត់ជាឯកតោភាគី។
កម្ពុជាបានប្រកាសបិទការនាំចូលបន្លែនិងផ្លែឈើទាំងអស់ពីប្រទេសថៃតាំងពីថ្ងៃទី១៨ខែមិថុនា និងឈប់ទិញអគ្គិសនីនិងអ៊ីនធឺណិតពីប្រទេសថៃចាប់ពីថ្ងៃទី១២ខែមិថុនា។ ប្រធានព្រឹទ្ធសភាលោក ហ៊ុន សែន បានសរសេរបង្ហោះលើហ្វេសប៊ុកនៅថ្ងៃទី២០ ខែមិថុនា ដោយបានជំរុញឱ្យរដ្ឋាភិបាលកម្ពុជា គួរពិចារណាផ្អាកការនាំចូលគ្រឿងកំប៉ុងគ្រប់ប្រភេទពីប្រទេសថៃ ចាប់តាំងពីគ្រឿងស្រវឹង ភេសជ្ជៈប៉ូវកម្លាំង និងត្រីខកំប៉ុងជាដើម។
សារព័ត៌មានថៃ Khaosod English បានរាយការណ៍នៅថ្ងៃទី២២ខែមិថុនា យោធាថៃបានចេញបញ្ជាឱ្យបិទច្រកព្រំដែនទាំងអស់ជាមួយកម្ពុជា ដោយហាមឃាត់ការឆ្លងកាត់រាល់យានយន្តគ្រប់ប្រភេទ និងអ្នកដំណើរទូទៅ លើកលែងតែករណីផ្ទេរអ្នកជំងឺ និងការឆ្លងកាត់របស់សិស្ស។
ចំណែកនាយករដ្ឋមន្ត្រីថៃអ្នកស្រី ផេថងថាន ស៊ីណាវ៉ាត់ (Paetongtarn Shinawatra) បានប្រកាសដាក់ចេញវិធានការប្រឆាំងឧក្រិដ្ឋកម្មឆ្លងដែនតាមច្រកព្រំដែនចំនួន៧ជាមួយកម្ពុជា ខណៈអ្នកស្រីថា កម្ពុជាគឺជាមជ្ឈមណ្ឌលរបស់ក្រុមឧក្រិដ្ឋជន។
ប៉ុន្តែលោកនាយករដ្ឋមន្ត្រី ហ៊ុន ម៉ាណែត បានលើកឡើងថា ប្រទេសថៃបានសម្រេចបិទព្រំដែនជាមួយកម្ពុជាដោយឯកតោភាគី ដោយយកលេសប្រឆាំងឧក្រិដ្ឋកម្មឆ្លងដែនដើម្បីលាបពណ៌បង្ខូចកិត្តិយសកម្ពុជា។ លោកបញ្ជាក់ថា ទីក្រុងបាងកករបស់ប្រទេសថៃ ក៏ត្រូវបានបណ្ដាញសារព័ត៌មានអន្តរជាតិរាយការណ៍ថា ជាជម្រករបស់ក្រុមឧក្រិដ្ឋជនឆបោកតាមអនឡាញដែរ។
លោក ហ៊ុន ម៉ាណែត បានថ្លែងទៀតថា កម្ពុជានឹងមិនចរចាជាមួយភាគីថៃ ដើម្បីនិយាយរឿងបើកព្រំដែនឡើយ ប៉ុន្តែប្រសិនបើយោធាថៃ បើកព្រំដែនឱ្យដំណើរការពីម៉ោង៦ព្រឹកដល់ម៉ោង១០យប់វិញ នោះកម្ពុជានឹងបើកច្រកព្រំដែនរបស់ខ្លួនទាំងអស់ឱ្យដំណើរការធម្មតាវិញដែរ។
ជុំវិញរឿងជម្លោះព្រំដែននេះ ក្រសួងការបរទេសនិងសហប្រតិបត្តិការអន្តរជាតិកម្ពុជាក៏បានចេញសេចក្ដីប្រកាសព័ត៌មាននៅថ្ងៃទី២៣ ខែមិថុនា ថា រដ្ឋមន្ត្រីក្រសួងការបរទេសលោក ប្រាក់ សុខុន បានដឹកនាំកិច្ចប្រជុំលើកដំបូង នៃគណៈកម្មការរៀបចំឯកសារដើម្បីបញ្ជូនទៅតុលាការយុត្តិធម៌អន្តរជាតិ (ICJ) ក្នុងការពិភាក្សាលើយុទ្ធសាស្ដ្រនិងផែនការបន្តទៅមុខ ដើម្បីសម្រេចគោលដៅ បន្ទាប់ពីបានបញ្ជូនឯកសារឱ្យតុលាការអន្តរជាតិ ជួយដោះស្រាយវិវាទនៅប្រាសាទតាមាន់តូច ប្រាសាទតាមាន់ធំ ប្រាសាទតាក្របី និងតំបន់មុំបី។
កាលពីថ្ងៃទី២២ ខែមិថុនា ក្រសួងការបរទេសកម្ពុជា ក៏បានកោះហៅភារធារីស្តីទី នៃស្ថានទូតថៃប្រចាំកម្ពុជា ទៅទទួលកំណត់ទូតប្រឆាំងទៅនឹងមន្ត្រីរបស់នាយករដ្ឋមន្ត្រីថៃ ដែលបានដាក់ពាក្យប្ដឹងប្រធានព្រឹទ្ធសភាលោក ហ៊ុន សែន ពាក់ព័ន្ធនឹងការធ្វើឱ្យបែកធ្លាយកិច្ចសន្ទនាតាមទូរស័ព្ទជាមួយអ្នកស្រី ផេថងថាន ស៊ីណាវ៉ាត់។ ក្រសួងការបរទេសកម្ពុជាបានលើកឡើងថា ការប្រើនីតិវិធីផ្លូវច្បាប់ក្នុងស្រុកដើម្បីប្រឆាំងមន្ត្រីជាន់ខ្ពស់នៃរដ្ឋអធិបតេយ្យមួយ គឺផ្ទុយនឹងធម្មនុញ្ញអង្គការសហប្រជាជាតិ ខណៈការថតសំឡេងសន្ទនាតាមទូរស័ព្ទនោះ ដើម្បីធានាភាពត្រឹមត្រូវ និងសុច្ចរិតភាពនៃទំនាក់ទំនងប្រទេសទាំងពីរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។