ប្រធានអង្គភាពអ្នកនាំពាក្យរដ្ឋាភិបាលលោក ប៉ែន បូណា បានថ្លែងនៅក្នុងសន្និសីទសារព័ត៌មាននៅថ្ងៃទី២៤ ខែមិថុនា ថាប្រទេសថៃទើបត្រូវបានរកឃើញថ្មីៗនេះថា ជាជម្រករបស់ក្រុមឧក្រិដ្ឋជនឆ្លងដែន និងជាមជ្ឈមណ្ឌលចែកចាយក្រុមឆបោកតាមអនឡាញ ប៉ុន្តែនាយករដ្ឋមន្ត្រីថៃនិងក្រុមយោធាថៃ បានបន្លំភាពអាម៉ាស់នេះទម្លាក់លើកម្ពុជា ដែលលោកចាត់ទុកថា ផ្ទះខ្លួនឯងសុទ្ធតែសំរាម តែចង្អុលផ្ទះគេឱ្យបោសសំរាម។
ភាពពិសពុល ចរិតខូចរបស់រដ្ឋាភិបាល ហើយនិងកងទ័ពថៃ គឺបានស្ដែងឡើងយ៉ាងច្បាស់មែនទែន។ មុនដំបូង រុញរឿងព្រំដែន ឱ្យតែមានជម្លោះផ្ទៃក្នុងរបស់ខ្លួន ក្នុងការដណ្ដើមអំណាចរវាងរដ្ឋាភិបាលនិងយោធា ថៃតែងតែរុញមកព្រំដែនកម្ពុជា យកកម្ពុជាចំណាប់ខ្មាំង ដើម្បីដោះស្រាយផ្ទៃក្នុងរបស់ខ្លួន ដើម្បីមានលេសចោទថា រដ្ឋាភិបាល (ថៃ) គ្រប់គ្រង់បូរណភាពទឹកដីមិនបានអ៊ីចឹងទៅ យោធាត្រូវតែធ្វើរដ្ឋប្រហារដណ្ដើមអំណាចអ៊ីចឹងទៅ នេះជាទម្លាប់យូរហើយ។
— លោក ប៉ែន បូណា
ប្រតិកម្មពីមន្ត្រីជាន់ខ្ពស់កម្ពុជានេះ បានធ្វើឡើងបន្ទាប់ពីនាយករដ្ឋមន្ត្រីថៃអ្នកស្រី ផេថងថាន ស៊ីណាវ៉ាត់ (Paetongtarn Shinawatra ) បានលើកឡើងថា កម្ពុជាដែលជាមជ្ឈមណ្ឌលឧក្រិដ្ឋកម្មឆ្លងដែនជាសកលមួយតាមការរកឃើញពីអង្គការសហប្រជាជាតិ កំពុងគំរាមកំហែងដល់សន្ដិសុខជាតិរបស់ប្រទេសថៃ។ ជាមួយគ្នានេះ ក្រុមយោធាថៃបានបញ្ជាក់ដែរថា ការសម្រេចបិទព្រំដែនទាំងស្រុងជាមួយកម្ពុជា លើកលែងតែករណីមនុស្សធម៌ ដោយសារព្រួយបារម្ភពីភាពតានតឹងតាមព្រំដែន និងបញ្ហាឆបោកតាមអនឡាញនៅតំបន់ព្រំដែន។
ទោះជាយ៉ាងណា មន្ត្រីរដ្ឋាភិបាលកម្ពុជា លោក ប៉ែន បូណា បានលើកឡើងថា កម្ពុជានិងថៃ សុទ្ធតែជាប្រទេសរងគ្រោះដូចគ្នាពីករណីឆបោកតាមអនឡាញ ដែលទាមទារឱ្យរដ្ឋាភិបាលប្រទេសទាំងពីរសហការគ្នាដើម្បីបង្ក្រាប។
សារព័ត៌មានថៃ The Nation បានចុះផ្សាយកាលពីថ្ងៃទី២៣ ខែមិថុនា ថា អ្នករាយការណ៍ពិសេសអង្គការសហប្រជាជាតិស្ដីពីទម្រង់ទាសភាពសម័យទំនើបនិងការជួញដូរមនុស្សផ្ដោតលើស្ដ្រីនិងក្មេងស្រី បានផ្ញើលិខិតមួយទៅរដ្ឋាភិបាលថៃ ឱ្យពង្រឹងវិធានការប្រយុទ្ធប្រឆាំងការជួញដូរមនុស្សឆ្លងកាត់ព្រំដែន ដែលជាប់ពាក់ព័ន្ធនឹងការឆបោកតាមអនឡាញ។
នៅក្នុងលិខិតនោះបានបញ្ជាក់ថា ប្រទេសថៃបានដើរតួនាទីយ៉ាងសំខាន់និងជាមជ្ឈមណ្ឌលផ្ទេរជនរងគ្រោះ ឱ្យទៅបម្រើការទាំងបង្ខំនៅតាមមជ្ឈមណ្ឌលឆបោកតាមអនឡាញ នៅប្រទេសជិតខាង ជាពិសេសនៅក្នុងរដ្ឋ ការ៉េន (Karen) ប្រទេសភូមា។
កម្ពុជាបានសម្រេចឈប់នាំចូលបន្លែ និងផ្លែឈើ ឈប់ទិញអគ្គិសនី អ៊ីនធឺណិត និងឈប់នាំចូលប្រេងនិងឧស្ម័នពីថៃ រួមទាំងគ្រោងឈប់នាំចូលទំនិញជាគ្រឿងភេសជ្ជៈ និងគ្រឿងអាហារផ្សេងទៀត ដើម្បីឆ្លើយតបទៅនឹងក្រុមយោធាថៃ ដែលបានសម្រេចបិទព្រំដែនដោយឯកតោភាគី។
នៅថ្ងៃទី២៤ ខែមិថុនា ប្រធានព្រឹទ្ធសភាលោក ហ៊ុន សែន បានសរសេរនៅខ្ទង់ខាំមិន (Comment) ហ្វេសប៊ុករបស់លោកថា មេដឹកនាំថៃកំពុងផ្ទេរពីជម្លោះផ្ទៃក្នុង មកជាជម្លោះជាមួយកម្ពុជា។ លោកបានព្យាករណ៍ថា ជម្លោះដណ្ដើមអំណាចគ្នានៅក្នុងប្រទេស មិនអាចរលត់បានឡើយ ហើយប្រទេសថៃនឹងមាននាយករដ្ឋមន្ត្រីថ្មីក្នុងរង្វង់៣ខែខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។