លោក សម រង្ស៊ី លើកឡើងថា គ្មានគណបក្សណាអាចជំនួសគណបក្សសង្គ្រោះជាតិបានឡើយ។ លោកបញ្ជាក់ថា ដើម្បីឱ្យមានការផ្លាស់ប្ដូរសង្គមបានលុះត្រាតែប្រជាពលរដ្ឋទាំងអស់ជាអ្នកសម្រេចលើជោគវាសនាប្រទេសជាតិ ពិសេសលើការផ្លាស់ប្ដូរមេដឹកនាំ។
ការលើកឡើងរបស់លោក សម រង្ស៊ី នេះនៅស្របពេលគណៈកម្មាធិការជាតិរៀបចំការបោះឆ្នោត (គ.ជ.ប) បានរៀបចំចាប់ឆ្នោតជ្រើសលេខរៀងគណបក្ស ដើម្បីឈរតាមលំដាប់នៅក្នុងសន្លឹកឆ្នោត ក្នុងនោះ គឺគណបក្សប្រជាធិបតេយ្យមូលដ្ឋានបានឈរនៅលេខរៀងទី៧។
លោក សម រង្ស៊ី អតីតប្រធានគណបក្សប្រឆាំង និងជាប្រធានចលនាសង្គ្រោះជាតិ អះអាង ថា គណបក្សប្រជាធិបតេយ្យមូលដ្ឋានចាប់ឆ្នោតបានលេខរៀងលំដាប់ទី៧ ដែលធ្លាប់ជាលេខរៀងរបស់គណបក្សសង្គ្រោះជាតិ កាលពីការបោះឆ្នោតឆ្នាំ ២០១៣ គ្រាន់តែជារឿងចៃដន្យតែប៉ុណ្ណោះ។
លោក សម រង្ស៊ី នៅតែប្រកាន់ជំហរដដែល គឺអំពាវនាវឱ្យពលរដ្ឋទៅចូលរួមបោះឆ្នោតនៅថ្ងៃទី២៩ កក្កដាខាងមុខឱ្យសោះ ដើម្បីឱ្យការបោះឆ្នោតនៅពេលខាងមុខគ្មានការទទួលស្គាល់ពីសហគមន៍អន្តរជាតិ។ លោក សម រង្ស៊ី សង្កត់ធ្ងន់ថា ដើម្បីផ្លាស់ប្ដូរមេដឹកនាំផ្ដាច់ការរបស់លោក ហ៊ុន សែន បាន មានតែប្រជាពលរដ្ឋត្រូវងើបឈរឡើងទាំងអស់គ្នា ដើម្បីទប់ទល់ និងអំណាចផ្ដាច់ការ ដែលបំផ្លាញប្រជាធិបតេយ្យនៅកម្ពុជា។ «»
កាលពីថ្ងៃទី២៤ ឧសភា លោក សម រង្ស៊ី បានថ្វាយលិខិតទៅព្រះមហាក្សត្រ ព្រះករុណាព្រះបាទសម្ដេចព្រះបរមនាថ នរោត្តម សីហមុនី ស្នើសុំព្រះអង្គ កុំធ្វើតាមអ្វី ដែលរបបលោក ហ៊ុន សែន និងគណបក្សប្រជាជនកម្ពុជា កំពុងតែស្នើព្រះអង្គឱ្យធ្វើអន្តរាគមន៍ដើម្បីជំរុញប្រជាពលរដ្ឋ ឱ្យទៅបោះឆ្នោតថ្ងៃ២៩ កក្កដា ខាងមុខ។ មកទល់ពេលនេះ មិនទាន់ទទួលបានការឆ្លើយតបពីព្រះមហាក្សត្រនៅឡើយអំពីសំណើនេះ។ ទោះជាយ៉ាងនេះក្ដី លោក សម រង្ស៊ី សង្ឃឹមថា ព្រះមហាក្សត្រ នឹងទទួលសំណើរបស់លោក ដែលអំពាវនាវកុំឱ្យពលរដ្ឋទៅបោះឆ្នោត។ «»
ទាក់ទងបញ្ហានេះអ្នកនាំពាក្យគណបក្សប្រជាជនកម្ពុជា លោក សុខ ឥសាន្ត បានសរសេរនៅលើប្រព័ន្ធតេឡេក្រាម (Telegram) ហៅលោក សម រង្ស៊ី ថា បាន ធ្វើនយោបាយទ័លច្រក ចំពោះការដាក់លិខិតថ្វាយព្រះមហាក្សត្រសុំព្រះរាជអន្តរាគមន៍ សុំមិនឱ្យពលរដ្ឋទៅបោះឆ្នោតនោះ។ លើសពីនេះទៀត លោក សុខ ឥសាន្ត បានចោទលោក សម រង្ស៊ី ថា បានប្រមាថព្រះមហាក្សត្រចំពោះការដាក់លិខិតថ្វាយព្រះមហាក្សត្រ ដោយលោកហៅលិខិតរបស់លោក សម រង្ស៊ី ថ្វាយព្រះមហាក្សត្រនេះថា ជាការបញ្ជាព្រះមហាក្សត្រទៅវិញ។
លោក សម រង្ស៊ី បានឆ្លើយតបវិញថា មានតែគណបក្សប្រជាជនកម្ពុជាទៅវិញទេ ដែលធ្វើនយោបាយទ័លច្រកនោះ។ លោក សម រង្ស៊ី បញ្ជាក់ថា គណបក្សប្រជាជនកម្ពុជាចាប់ឆ្នោតបានលេខរៀងទី២០នៅលើសន្លឹកឆ្នោតនោះ គឺជាលេខរៀងដែលភ័យខ្លាចចាញ់ការបោះឆ្នោត ដោយលើកពីរបបលោក ហ៊ុន សែន បានរំលាយគណបក្សប្រឆាំងចោលជាឧទាហរណ៍ស្រាប់។ «»
ទោះបីជាយ៉ាងណាក៏ដោយនាយកអង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch) លើកឡើងថាការបោះឆ្នោតនៅពេលខាងមុខនេះ ជាការបោះឆ្នោតគ្មានយុត្តិធម៌ និងគ្មានការទទួលស្គាល់ពីសហគមន៍អន្តរជាតិ។
ពលរដ្ឋបានចុះឈ្មោះនៅក្នុងបញ្ជីបោះឆ្នោតជ្រើសតាំងតំណាងរាស្ត្រនីតិកាលទី៦ នេះ មានជាង ៨លាន ៣សែននាក់។ រីឯសន្លឹកឆ្នោតសម្រាប់ឱ្យពលរដ្ឋបោះឆ្នោតដែលគ.ជ.ប ត្រៀមបោះពុម្ព សរុបមានជាង ១០លានសន្លឹក ក្នុងនោះមានសន្លឹកឆ្នោតគំរូ និងសន្លឹកឆ្នោតបំរុង៕