ព័ត៌មាន​សំខាន់ៗ​ចំនួន ៩ ដែល​លោក​អ្នកនាង​គួរអាន​នៅ​ថ្ងៃ​អង្គារនេះ

ដោយ អាស៊ីសេរី
2022.12.12
ព័ត៌មាន​សំខាន់ៗ​ចំនួន ៩ ដែល​លោក​អ្នកនាង​គួរអាន​នៅ​ថ្ងៃ​អង្គារនេះ លោក ហ៊ុន សែន ពេលទៅដល់ទីក្រុង​ព្រុចសែល (Brussels) ប្រទេស​បែលហ្សិក(Belgium)​​នៅរសៀលថ្ងៃទី១២ ខែធ្នូ ឆ្នាំ២០២២ ដើម្បីចូលរួមកិច្ចប្រជុំកំពូលអាស៊ាន-អឺរ៉ុប។
រូប៖ SPM

. លោក ហ៊ុន សែន ទៅ​ចូលរួម​កិច្ចប្រជុំ​អាស៊ាន-សហភាព​អឺរ៉ុប ខណៈ​បក្ស​ប្រឆាំង​ត្រៀម​ធ្វើ​បាតុកម្ម​ស្វាគមន៍

លោក​នាយក​រដ្ឋ​មន្រ្តី ហ៊ុន សែន បាន​ដឹកនាំ​គណៈប្រតិភូ​ទៅ​ដល់​ទី​ក្រុងព្រុចសែល (Brussels) ប្រទេស​បែលហ្សិក (Belgium) ហើយ ដើម្បី​ចូលរួម​កិច្ច​ប្រជុំកំពូល​អាស៊ាន-សហភាព​អឺរ៉ុប។ ប៉ុន្តែពលរដ្ឋ​ខ្មែរ និង​មេបក្ស​ប្រឆាំង​នៅ​ទី​នោះ ប្រកាស​ធ្វើ​បាតុកម្ម​ទទួល​ស្វាគមន៍ ដើម្បី​ជំរុញ​ដល់​សហភាពអឺរ៉ុប​ដាក់​សម្ពាធ​លើ​រដ្ឋាភិបាល​លោក ហ៊ុន សែន ឱ្យ​ងាក​មក​ស្តារ​ប្រជា​ធិប​តេយ្យ និង​គោរព​សិទ្ធិ​ពលរដ្ឋ ដោយ​ដោះលែង​សកម្មជន​ដែល​កំពុង​ជាប់​ឃុំ​ឱ្យមាន​សេរីភាព​វិញ។ ប៉ុន្តែ​មន្រ្តី​រដ្ឋាភិបាល​លើកឡើងថា ​អ្នក​ដែល​ចេញ​បាតុកម្ម​ប្រឆាំង​រដ្ឋា​ភិបាល​ដោយ​សារ​ពួកគេ​មិន​យល់មិន​យល់​អំពី​ស្ថានភាព​ពិត​នៅ​​កម្ពុជា។ អានព័ត៌មានពិស្តារ...

. អ្នកជំនាញ​ថា កម្ពុជា​គួរទាញ​យក​​ប្រយោជន៍​​ពី​​កិច្ចប្រជុំ​កំពូល​​អាស៊ាន-អឺរ៉ុប​​ដោយ​ផ្តោត​លើ​​ការ​ស្តា​​ប្រជាធិបតេយ្យ និង​សិទ្ធិមនុស្ស

អ្នកជំនាញ និង​ក្រុមអ្នកវិភាគ​នយោបាយលើកឡើងថា កម្ពុជា​គួរទាញយក​ប្រយោជន៍​ពី​ការធ្វើជា​សហប្រធាន​កិច្ចប្រជុំកំពូល​អាស៊ាន-អឺរ៉ុប នៅទីក្រុងព្រុចសែល (Brussels) ប្រទេសប៊ែលហ្សិក (Belgium) ដោយផ្តោតលើ​ការស្តា​ប្រជាធិបតេយ្យ និង​សិទ្ធិមនុស្ស ដើម្បី​ទទួលបាន​មកវិញ​នូវ​ការអនុគ្រោះពន្ធ EBA ២០% ពីសហភាព​អឺរ៉ុប។ ទោះយ៉ាងណា ពួកគេ​មិនរំពឹងថា​អាចនឹងមាន​ដំណោះស្រាយ​អំពីបញ្ហា EBA នេះ សម្រាប់​កម្ពុជាឡើយ ពីព្រោះតែ​រដ្ឋាភិបាល​លោក ហ៊ុន សែន បន្តធ្វើផ្គើន និង​បង្កើន​យុទ្ធនាការ​បង្ក្រាបមកលើ​សំឡេងប្រឆាំង សហជីព និង​សង្គមស៊ីវិល ផ្ទុយពី​ការចង់ឃើញ​របស់​សហភាពអឺរុប។ អានព័ត៌មានពិស្តារ...

. លោក សម រង្ស៊ី អំពាវនាវ​ឱ្យ​ខ្មែរ​នៅ​អឺរ៉ុប​ចូលរួម​បាតុកម្ម​ប្រឆាំង​លោក ហ៊ុន សែន ឱ្យបាន​មុន​ពេល​លោក​ចេញ​ពី​អំណាច

ប្រធាន​ស្ដីទី​គណបក្ស​សង្រ្គោះជាតិ លោក សម រង្ស៊ី អំពាវនាវ​ឱ្យ​ខ្មែរ​ដែល​កំពុង​រស់នៅ​ទ្វីប​អឺរ៉ុប​ចូលរួម​បាតុកម្មប្រឆាំង លោក ហ៊ុន សែន ឱ្យបាន​ច្រើន​កុះករ នៅទីក្រុង​ព្រុចស៊ែល ប្រទេស​ប៊េលហ្សិក ​នៅថ្ងៃ១៤ ធ្នូ ខាងមុខ។ លោក សម រង្ស៊ី បានសរសេរ​នៅ​លើ​ហ្វេសប៊ុក កាលពីយប់​ថ្ងៃទី១០ ខែធ្នូថា ទស្សនកិច្ច ហ៊ុន សែន នៅទ្វីបអឺរ៉ុប ឆ្នាំ ២០២២ នេះ គឺជាលើកចុងក្រោយ​ហើយ ​ពីព្រោះ​ចាប់ពីឆ្នាំ២០២៣ ទៅគាត់នឹង​ចុះចេញ​ពី​តំណែង​គាត់​បច្ចុប្បន្ន។ អានព័ត៌មានពិស្តារ...

. អាជ្ញាធរ​ខេត្តព្រះសីហនុ​រកឃើញ​ឃ្លាំង​ផ្ទុកគ្រឿងញៀន​របស់​ឧក្រិដ្ឋជន​ជិត ១ តោន

អាជ្ញាធរ​ខេត្តព្រះសីហនុ​រកឃើញ​ឃ្លាំង​ផ្ទុកគ្រឿងញៀន​ប្រភេទ​កេតាមីន (Ketamine) ជិត១តោន។ មន្ត្រីសង្គមស៊ីវិល​លើកឡើង​ថា យុវជន​ខ្មែរជំនាន់​ក្រោយ​នឹង​មាន​អត្រា​គ្រោះថ្នាក់ខ្ពស់​ដោយសារ​តែ​ការប្រើប្រាស់​គ្រឿងញៀន ដ្បិត​គ្រឿងញៀន​នៅ​កម្ពុជា​បច្ចុប្បន្ន​កំពុង​រីកសាយភាយ​តាំង​ពីទីក្រុង​រហូត​ដល់​ទីជនបទ។ អានព័ត៌មានពិស្តារ...

. ប្រទេស​កម្ពុជា​ជា​កន្លែង​ផលិត​ថ្នាំ​ប្រភេទ​កេតាមីន​ធំមួយ​ក្នុង​តំបន់អាស៊ីអាគ្នេយ៍​នៅ​ឆ្នាំ២០២២

អង្គការ​សហប្រជាជាតិ​ទទួល​បន្ទុក​គ្រឿងញៀន និង​ឧក្រិដ្ឋកម្ម (#UNODC) នៅ​ទីក្រុង​វីយែន ប្រទេស​អូទ្រីស ចេញ​ផ្សាយ​របាយការណ៍មួយ កាលពី​ខែសីហា ឆ្នាំ២០២២ ថា ការ​រឹបអូស​ថ្នាំ កេតាមីន (Ketamine) ​បានកើន​ឡើង​យ៉ាងខ្លាំង​នៅក្នុង​ប្រទេស​កម្ពុជា គឺពី​១១២​គីឡូក្រាម កន្លះ (១១២.៥គ.ក្រ) ​ក្នុង​ឆ្នាំ២០២០ ឡើងដល់​ជិត ៣តោន (២.៨តោន) ក្នុង​ឆ្នាំ២០២១។ ចំនួននេះ គឺ​ស្មើ​នឹង​ជាង ៥០ភាគរយនៃថ្នាំ កេតាមីន គេរឹបអូស​បាន​សរុប ក្នុងតំបន់​អាស៊ីអាគ្នេយ៍ទាំងអស់ ដែល​មាន​ចំនួន​ជាង ៥តោន (៥.៤តោន) ក្នុងឆ្នាំនោះ។ ការកើន​ឡើង​នេះ គឺទាក់ទង​គ្នា​នឹង​ការ​កើន ឡើង​ភស្តុតាង​ជាច្រើន ដែលបញ្ជាក់​អំពី​ការ​ផលិត​ថ្នាំ កេតាមីន ខុសច្បាប់​នៅក្នុង​ប្រទេស​កម្ពុជា ដូច ដែល​ការ​ស្រាវជ្រាវ​ថ្មីៗ រកឃើញ​កន្លែង​លួច​ផលិត​ថ្នាំ កេតាមីន ជាច្រើន​កន្លែង បាន​បញ្ជាក់​ស្រាប់។ អានព័ត៌មានពិស្តារ...

. មន្ត្រី​អង្គការ​សង្គម​ស៊ីវិលនិង​អ្នកតាមដាន​ការ​អភិវឌ្ឍ​សង្គម​រិះគន់​រដ្ឋាភិបាល​ថា ផែនការ​ជួយ​ដល់​ពលរដ្ឋ​ក្រីក្រ​គ្មាន​ប្រសិទ្ធភាព

មន្ត្រីអង្គការ​សង្គមស៊ីវិល និង​អ្នកតាម​ការ​អភិវឌ្ឍ​សង្គម រិះគន់​រដ្ឋាភិបាល​ថា មិនបាន​ដោះ​ស្រាយ​បញ្ហា​ជីវភាព​ប្រជាពលរដ្ឋ​ក្រីក្រ​ប្រកប​ដោយ​ប្រសិទ្ធភាព​ឡើយ​ ហើយ​ការ​ផ្ដល់​សាច់​ប្រាក់​ពិសេស​ក្នុង​ពេល​ថ្មីៗ​នេះ គឺ​ដើម្បី​កេង​ចំណេញ​នយោបាយ​ពី​ប្រជាពលរដ្ឋ​នៅមុន​ការ​បោះឆ្នោត​តែ​ប៉ុណ្ណោះ។ ប្រតិកម្ម​នេះ​ធ្វើឡើង​បន្ទាប់​ពី​បេក្ខជន​នាយករដ្ឋមន្ត្រី​គណបក្ស​ប្រជាជន​កម្ពុជា លោក ហ៊ុន ម៉ាណែត បាន​លើក​ឡើង​ថា រដ្ឋាភិបាល​មិន​ដែល​បោះបង់​អ្នក​ដែល​មាន​ជីវភាព​ក្រីក្រ​ឡើយ។ អានព័ត៌មានពិស្តារ...

. ក្រុម​យុវជន​ថា រដ្ឋាភិបាល​លាក់បាំង​ព័ត៌មាន​ករណី​កាត់ឆ្វៀល​តំបន់​អភិរក្ស​ជាង ១សែន ២ ម៉ឺនហិកតារ ក្នុងខេត្តកោះកុង

ក្រុម​យុវជន និង​ប្រជាហគមន៍​ជនជាតិដើមភាគតិច​ជង​អះអាង​ថា រដ្ឋាភិបាល​លាក់បាំង​ព័ត៌មាន និង​មិន​បាន​ផ្សព្វផ្សាយ​ឱ្យ​បាន​ទូលំទូលាយ​ទាក់ទិន​ករណី កាត់ឆ្វៀល តំបន់​អភិរក្ស​ទំហំជាង ១ សែន ២ ម៉ឺនហិកតារ ឋិតក្នុង​តំបន់​ព្រៃអភិរក្ស​ចំនួនក្នុង​ខេត្តកោះកុងពួកគាត់​សង្ស័យ​ថា រដ្ឋាភិបាល​មាន​ចេតនា បិទបាំង​ព័ត៌មាន​ជុំវិញ​រឿង​នេះ ធ្វើឱ្យ​ពលរដ្ឋ​ព្រួយបារម្ភ ពីការ​ថយចុះ​ទំហំ​ព្រៃឈើ​នៅ​តំបន់​អារ៉ែង ទាក់ទាញ​ភ្ញៀវ​ទេសចរអានព័ត៌មានពិស្តារ...

. មន្ត្រីអង្គការ​សង្គម​ស៊ីវិល​រិះគន់​ពន្ធនាគារខេត្តព្រះវិហារ​ថា ​បង្ក​នីតិវិធី​ស្មុគស្មាញ ដើម្បីបាន​ជួប​កញ្ញា សេង ធារី

មន្ត្រីអង្គការ​សង្គមស៊ីវិល​លើកឡើង​ថា មន្ត្រីពន្ធនាគារខេត្តព្រះវិហារបង្ក​នីតិវិធី​ស្មុគស្មាញ និង រឹត​បន្តឹង​ខុស​ពី​ធម្មតា ដើម្បី​បាន​ជួប​កញ្ញា សេង ធារី។ យុវជនខ្មែរថាវរៈ យល់ឃើញ​ថា មន្ត្រី​ពន្ធនាគារ​រំលោភ​សិទ្ធិ កញ្ញា សេង ធារី ខុស​ពី​អ្នក​ជាប់ឃុំ​ធម្មតា​បែប​នេះ គឺដើម្បី​បំបាក់​ស្មារតី​របស់​កញ្ញា និង​សកម្មជន​ដ៏ទៃទៀត កុំឱ្យ​ចូលរួម​លើក​កម្ពស់​សិទ្ធិមនុស្ស​នៅ​កម្ពុជា។ អានព័ត៌មានពិស្តារ...

. ព្រះសង្ឃ និងយុវជន ចោទ​អាជ្ញាធរខេត្តបាត់ដំបង ថា​រឹតត្បិត​សិទ្ធិសេរីភាព​ការ​ជួប​ប្រជុំ​របស់​ពលរដ្ឋ

ព្រះសង្ឃ និងយុវជនមួយ​ចំនួន​រស់​នៅ​ខេត្តបាត់ដំបង ចោទប្រកាន់​អាជ្ញាធរ មន្ត្រីសង្ឃ និងមន្ត្រី​ធម្មការ ក្នុងខេត្តនេះ ថារឹតត្បិត​សិទ្ធិសេរីភាព​ការ​ជួប​ប្រជុំ​របស់​ពលរដ្ឋ។  មន្ត្រីសង្គមស៊ីវិល យល់​ឃើញ​ថា រដ្ឋាភិបាល និង​ក្រសួង​ពាក់ព័ន្ធ​គួរបើក​លំហ​សេរីភាព និងលើក​ទឹកចិត្ត​ពលរដ្ឋ​ក្នុង​ការ​ចូលរួម​ការងារ​សង្គម ជាជាង​រារាំង​រឹតត្បិត​ពលរដ្ឋមិន​អោយ​យល់​ដឹង និង​អនុវត្តសិទ្ធិ​របស់​ពួកគេ។ អានព័ត៌មានពិស្តារ...

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។