ទីប្រឹក្សាគណបក្សកម្លាំងជាតិ លោក រ៉ុង ឈុន បានប្រាប់វិទ្យុអាស៊ីសេរីនៅថ្ងៃទី២៥ ខែមិថុនាថា ប៉ូលិសខេត្តសៀមរាបបានចាប់ខ្លួនសមាជិកគណៈកម្មការប្រតិបត្តិគណបក្សកម្លាំងជាតិស្រុកប្រាសាទបាគង លោក សុខ សុន ក្នុងពេលដែលមន្ត្រីនគរបាលបានហៅលោកទៅជួបនៅអធិការដ្ឋាននគរបាលស្រុកប្រាសាទបាគង កាលពីថ្ងៃទី២២ខែមិថុនា។
លោកបញ្ជាក់ថា សមត្ថកិច្ចមិនបានបង្ហាញដីកាឬប្រាប់ពីទោសកំហុសនៃការចាប់ខ្លួននេះទេ។ លោក រ៉ុង ឈុន ចាត់ទុកការចាប់ខ្លួននេះថា ជាការធ្វើទុក្ខបុកម្នេញផ្នែកនយោបាយ និងទាមទារឱ្យអាជ្ញាធរដោះលែង លោក សុខ សុន ដោយឥតលក្ខខណ្ឌ។
ហើយយើងមិនចង់ឃើញរូបភាពបែបហ្នឹងបន្តនៅក្នុងសង្គមកម្ពុជាយើងនោះទេ។ អាជ្ញាធរកម្ពុជាត្រូវមានការបើកលំហសេរីភាពនយោបាយឱ្យបានពេញលេញ ក្នុងការចូលរួមរៀបចំក៏ដូចជាសកម្មភាពនៅតាមបណ្ដាខេត្តនីមួយៗក្នុងការត្រូវចូលរួមប្រកួតប្រជែងការបោះឆ្នោតនៅឆ្នាំ២០២៧និងឆ្នាំ២០២៨ខាងមុខនេះ។
— លោក រ៉ុង ឈុន
វិទ្យុអាស៊ីសេរីមិនអាចទាក់ទងស្នងការនគរបាលខេត្តសៀមរាប លោក ហួត សុធី ដើម្បីសាកសួរជុំវិញការចាប់ខ្លួននេះបានទេនៅថ្ងៃទី២៥ខែមិថុនា។
អ្នកនាំពាក្យសមាគមការពារសិទ្ធិមនុស្សអាដហុក(Adhoc)លោក យិន ម៉េងលី បានមានប្រសាសន៍ថា សមត្ថកិច្ចបានបញ្ជូន លោក សុខ សុន ទៅឃុំខ្លួននៅពន្ធនាគារខេត្តសៀមរាបក្រោយពេលសាកសួរនៅអធិការដ្ឋាននគរបាលស្រុកប្រាសាទបាគង។
លោកបន្ថែមថា ក្នុងពេលសាកសួរនោះមានមន្ត្រីតុលាការម្នាក់នៅទីនោះដែរ បានចោទលោកពាក់ព័ន្ធនឹងការបង្ហោះសារបញ្ចេញមតិតាមហ្វេសប៊ុក។ លោក ចាត់ទុកវិធានការរបស់សមត្ថកិច្ចនេះថា ជាការរឹតត្បិតសិទ្ធិសេរីភាពសម្ដែងមតិរបស់ពលរដ្ឋ។
អាហ្នឹងហើយដែលយើងចង់បានការរួបរួមគ្នា កាលណាមានការរួមគ្នាមានការផ្សះផ្សាជាតិបញ្ហាទាំងអស់នេះវា នឹងលែងកើតមានហើយ។ បើសិនជាយើងមិនមានការផ្សះផ្សាជាតិទេ បញ្ហានេះនឹងកើតមានរហូត។ យើងបានឃើញហើយហេតុអីបានយើងអះអាងអ៊ីចឹង យើងមើលឃើញការរំលាយគណបក្សដ៏ធំមួយកាលពីចុងឆ្នាំ២០១៧ បញ្ហាបទល្មើសហ្នឹងជាបទល្មើសដដែលៗកើតឡើងវាអត់មានឃើញបទល្មើសផ្សេងទេ។ នេះហើយដែលយើងមើលឃើញបញ្ហានេះវាបង្កដោយសារបញ្ហាជម្លោះនយោបាយទើបកើតមានបញ្ហាយកច្បាប់នឹងមកអនុវត្តនេះ។
— លោក យិន ម៉េងលី
ក្នុងរយៈពេលប្រមាណ២ខែមកនេះ យ៉ាងហោចណាស់មានថ្នាក់ដឹកនាំមូលដ្ឋានគណបក្សកម្លាំងជាតិចំនួន៣នាក់ហើយត្រូវបានអាជ្ញាធរបានចាប់ខ្លួន។ ពួកគាត់ភាគច្រើនត្រូវបានតុលាការចោទប្រកាន់ពីបទញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម ដោយសារតែការបង្ហោះសាររិះគន់រដ្ឋាភិបាលតាមបណ្ដាញសង្គមហ្វេសប៊ុក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។