លោក ហ៊ុន សែន បានប្រាប់អគ្គមេបញ្ជាការនៃកងស្វ័យការពារជើងគោកជប៉ុន នាយឧត្តមសេនីយ៍ ម៉ូរីស៊ីកា យ៉ាស៊ូណូរី (Morishita Yasunori) ថា កម្ពុជាចង់ឱ្យប្រទេសជប៉ុនជំរុញទៅប្រទេសថៃ ឱ្យចូលរួមដោះស្រាយជម្លោះព្រំដែនជាមួយកម្ពុជាដោយសន្តិវិធី និងគោរពទៅតាមច្បាប់អន្តរជាតិ ក្នុងនោះរួមមានតុលាការយុត្តិធម៌អន្តរជាតិ (ICJ) ដែលជាជំហរនិងការចង់បានរបស់ប្រទេសកម្ពុជា។ ការលើកឡើងនេះ ធ្វើឡើងក្នុងពេល លោក ម៉ូរីស៊ីកា យ៉ាស៊ូណូរី ជួបលោក ហ៊ុន សែន នៅថ្ងៃទី២៥ ខែមិថុនា។
ទំព័រហ្វេសប៊ុកលោក ហ៊ុន សែន បានចុះផ្សាយថា មេទ័ពជើងគោកជប៉ុនរូបនេះ ក៏បានចូលរួមរំលែកទុក្ខចំពោះការស្លាប់ទាហានកម្ពុជាលោក សួន រ៉ោន ដែលត្រូវបានទាហានថៃបាញ់សម្លាប់កាលពីថ្ងៃទី២៨ ខែឧសភា ហើយលោកបានបន្ថែមថា ជប៉ុនចង់ឱ្យភាគីកម្ពុជានិងថៃដោះស្រាយជម្លោះព្រំដែនដោយសន្តិវិធី។
នៅក្នុងជំនួបនេះ លោក ហ៊ុន សែន ក៏បានប្រាប់ទៅភាគីជប៉ុនថា ថៃបានរំលោភមកកម្ពុជាជាបន្តបន្ទាប់ ចាប់តាំងពីទាហានថៃឆ្លងដែនមកបាញ់សម្លាប់ទាហានកម្ពុជា ការបិទព្រំដែនដោយឯកតោភាគី និងសកម្មភាពជាច្រើនទៀតរបស់ភាគីថៃ ដែលទាមទារឱ្យកម្ពុជាត្រូវមានវិធានការឆ្លើយតបវិញ។
ជុំវិញបញ្ហានេះ អ្នកនាំពាក្យក្រុមប្រឹក្សាជាតិតស៊ូលោក គឹម សុខ បានលើកឡើងថា ជារឿងវិជ្ជមានមួយដែលកម្ពុជាស្នើឱ្យភាគីជប៉ុនជួយដោះស្រាយបញ្ហាជម្លោះព្រំដែននៅពេលនេះ ពីព្រោះជប៉ុនបានដើរតួនាទីយ៉ាងសំខាន់ដើម្បីដឹកនាំការអនុវត្តកិច្ចព្រមព្រៀងសន្ដិភាពទីក្រុងប៉ារីស ដែលក្នុងនោះក៏មានប្រទេសថៃជាម្ចាស់ហត្ថលេខីដែរ។
យ៉ាងណា ដើម្បីបន្ថែមតួនាទីជប៉ុន ឱ្យកាន់តែមានឥទ្ធិពល រដ្ឋាភិបាលរបស់លោក ហ៊ុន ម៉ាណែត គួរតែសរសេរលិខិតជាផ្លូវការទៅកាន់សហប្រធាននៃកិច្ចព្រមព្រៀងសន្ដិភាពទីក្រុងប៉ារីស អំពីការស្នើឱ្យជប៉ុនចូលរួមសម្របសម្រួលជម្លោះកម្ពុជានិងថៃ។ ពីព្រោះកុំឱ្យជប៉ុនដើរតួនាទីជាប្រទេសជប៉ុនតែមួយ ឱ្យជប៉ុនដើរតួនាទីជាតំណាងសហប្រធាននៃកិច្ចព្រមព្រៀងសន្ដិភាពទីក្រុងប៉ារីស ឬក៏ជាតំណាងនៃសហគមន៍អន្តរជាតិតែម្ដង។
— លោក គឹម សុខ
ក្រៅពីជួបលោក ហ៊ុន សែន លោក ម៉ូរីស៊ីកា យ៉ាស៊ូណូរី ក៏បានជួបជាមួយមេទ័ពជើងគោកកម្ពុជាលោក ម៉ៅ សុផាន់ កាលពីថ្ងៃទី២៤ ខែមិថុនា។ហ្វេសប៊ុកកងទ័ពជើងគោកកម្ពុជាបានចុះផ្សាយថា មេទ័ពជប៉ុនរូបនេះ បានបញ្ជាក់ថា ដំណើរទស្សនកិច្ចរបស់លោកមកកម្ពុជា ដើម្បីពង្រឹងកិច្ចសហប្រតិបត្តិការលើការបណ្តុះបណ្តាលធនធានមនុស្សដល់កងទ័ពជើងគោកកម្ពុជា។
ដំណើរទស្សនកិច្ចរបស់មន្ត្រីយោធាជាន់ខ្ពស់ជប៉ុនមកកម្ពុជានៅពេលនេះ ស្របពេលជម្លោះតាមព្រំដែនកម្ពុជា-ថៃ បានរាលទៅដល់ជម្លោះសេដ្ឋកិច្ច និងការទូតនៃប្រទេសទាំងពីរបន្ទាប់ពីយោធាថៃ បានសម្រេចបិទបើកច្រកព្រំដែនដោយឯកតោភាគី និងព្រមានកាត់ផ្ដាច់ការផ្គត់ផ្គង់អគ្គិសនី អ៊ីនធឺណិត ប្រេងឥន្ធនៈ និងឧស្ម័ន ដល់កម្ពុជា ដែលធ្វើឱ្យរដ្ឋាភិបាលកម្ពុជាបានចាត់វិធានការឆ្លើយតបវិញបិទមិនឱ្យថៃនាំចូលបន្លែនិងផ្លែឈើឆ្លងកាត់ព្រំដែនកម្ពុជា។
ប៉ុន្មានថ្ងៃនេះ យោធានិងរដ្ឋាភិបាលថៃបានលើកឡើងខុសគ្នាពីការបិទនិងបើកបញ្ហាព្រំដែន។ កាលពីថ្ងៃទី២៣ ខែមិថុនា មេបញ្ជាការកងទ័ពថៃនៅភូមិភាគ១ ភូមិភាគ២ និងមេបញ្ជាកងយោធានៅព្រំដែនខេត្តច័ន្ទបុរី និងខេត្តត្រាត (Chanthaburi-Trat) បានចេញបញ្ជាឱ្យបិទព្រំដែនទាំងអស់ជាមួយកម្ពុជា លើកលែងតែអ្នកជំងឺនិងសិស្សសាលាអាចឆ្លងកាត់បាន។ ប៉ុន្តែមួយថ្ងៃក្រោយមក មជ្ឈមណ្ឌលសម្រាប់ដោះស្រាយបញ្ហាព្រំដែនរដ្ឋាភិបាលថៃ បានចេញមកបញ្ជាក់ថា ច្រកព្រំដែនទាំងអស់នៅតែបើកដំណើរការ សម្រាប់បម្រើដល់សកម្មភាពប្រចាំថ្ងៃរបស់ពលរដ្ឋទាំងពីរ។
ទោះជាយ៉ាងណា នៅថ្ងៃទី២៥ឧសភា យោធាថៃបានបន្តបិទព្រំដែនទាំងស្រុងជាមួយកម្ពុជា ប៉ុន្តែបានបើកច្រកទ្វារព្រំដែនអន្តរជាតិ ឆងចម ក្នុងខេត្តសុរិន្ទ ទល់មុខនឹងច្រកទ្វារព្រំដែនអន្តរជាតិអូរស្មាច់ក្នុងខេត្តឧត្តរមានជ័យ។ តែមន្ត្រីកម្ពុជាបានលើកឡើងថា យោធាថៃបានបើកព្រំដែនមែន ប៉ុន្តែមិនបានអនុញ្ញាតឱ្យអ្នកដំណើរឬរថយន្តដឹកទំនិញឆ្លងកាត់ឡើយ។ ចំណែកអាជ្ញាធរថៃខេត្តស្រះកែវ នៅជាប់នឹងច្រកទ្វារប៉ោយប៉ែតខេត្តបន្ទាយមានជ័យ ក្រុមយោធាថៃមិនឱ្យពលករខ្មែរអាចឆ្លងដែនមកកម្ពុជាឡើយ ទាល់តែមានការសម្របសម្រួលជាមួយអាជ្ញាធរកម្ពុជា ទើបនៅយប់ទី២៥ ខែមិថុនា បានយោធាថៃឱ្យពលករខ្មែរជាង១០០នាក់ឆ្លងដែនចូលកម្ពុជា។
ជុំវិញបញ្ហានេះ រដ្ឋមន្ត្រីក្រសួងមហាផ្ទៃកម្ពុជាលោក ស សុខា បានសរសេរលើហ្វេសប៊ុកដែរថា យោធាថៃបើកព្រំដែនតែមិនឱ្យអ្នកដំណើរឆ្លងកាត់ ជាចរិតឧបាយកលពិសពុលដើម្បីបោកបញ្ឆោតពលរដ្ឋថៃ និងសហគមន៍អន្តរជាតិឱ្យយល់ច្រឡំថា កម្ពុជាជាអ្នកបិទព្រំដែនជាមួយថៃ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។