ប្រធានអង្គការសង់ត្រាល់លោក មឿន តុលា ប្រាប់អាស៊ីសេរីថា ករណីស្លាប់របស់យុវជនបម្រើការក្នុងទីតាំងអនឡាញ នៅមានចំណុចសង្ស័យច្រើន ដែលតម្រូវឱ្យសមត្ថកិច្ចគួរបើកការស៊ើបអង្កេតឱ្យបានគ្រប់ជ្រុងជ្រោយ និងតម្លាភាព។
អាជ្ញាធរគួរបើកការសង្កេតឱ្យបានច្បាស់លាស់ ហើយប្រកបដោយតម្លាភាព ប្រសិនបើល្អទៅទៀត មានភាគីឯករាជ្យណាមួយ ក្នុងដំណើរការស៊ើបអង្កេតហ្នឹងទៀត ក៏កាន់តែល្អ។
— លោក មឿន តុលា
ការលើកឡើងនេះ ធ្វើឡើងបន្ទាប់ពីយុវជនខ្មែរម្នាក់អាយុ១៩ឆ្នាំ ឈ្មោះ អ៊ន់ សំណាងដេវិត ត្រូវបានគេប្រទះឃើញស្លាប់នៅជិតអាគារបើកល្បែងអនឡាញរបស់ជនជាតិចិនមួយកន្លែង ស្ថិតនៅក្នុងភូមិ១ សង្កាត់លេខ៣ ក្រុងព្រះសីហនុ កាលពីថ្ងៃទី២៤ឧសភា បន្ទាប់ពីចូលធ្វើការបានមួយថ្ងៃ។ សាច់ញាតិបានដឹកសពយកទៅធ្វើបុណ្យ នៅឯស្រុកកំណើតក្នុងភូមិជ្រាវ សង្កាត់ជ្រាវ ក្រុងសៀមរាប ខេត្តសៀមរាប។
សារសំឡេងក្នុងប្រព័ន្ធតេឡេក្រាម ដែលត្រូវបានផ្សព្វផ្សាយដោយសារព័ត៌មានក្នុងស្រុក គឺស្ដ្រីអ្នកបកប្រែឱ្យជនជាតិចិនលើកឡើងថា ជនរងគ្រោះ និងគ្នីគ្នា២នាក់ទៀត បានលួចទូរសព្ទ និងព្យាយាមរត់គេចខ្លួនពីជាន់ទី១១មកជាន់ទី១០ ក៏ធ្លាក់ស្លាប់ពីអាគារកាលពីយប់ថ្ងៃទី២៣ ខែឧសភា។ ប៉ុន្តែសាច់ញាតិ និងបុគ្គលិកបម្រើការក្នុងអាគារអនឡាញជាមួយជនរងគ្រោះ មិនជឿការលើកឡើងនេះទេ ពីព្រោះបើជនរងគ្រោះធ្លាក់ពីអាគារខ្ពស់មែន គួរតែមានការប៉ះទង្គិចខ្លាំង មិនមែនមុខមាត់នៅស្អាតគ្មានហូរឈាមនោះទេ។
ខាងគ្រួសារសង្ស័យថា ជនរងគ្រោះអាចស្លាប់ ដោយសារការធ្វើទារុណកម្ម និងឆក់ ពីព្រោះពិនិត្យឃើញនៅលើដើមទ្រូងសាកសពមានស្នាមមុខរបួស និងរាងកាយមានសភាពស្លេកស្លាំងដូចអស់ឈាមពីខ្លួន។ ម្យ៉ាងវិញទៀត ខាងគ្រួសារនិងមិត្តភក្ដិក៏ទាមទារឱ្យបញ្ចេញវីដេអូថតជាប់ពីកាមេរ៉ាសុវត្ថិភាព។
បើវា (ជនរងគ្រោះ) ធ្លាក់ ពីជាន់ទី១១មក បងឯងគិតមើលថា សពធ្លាក់ពីជាន់ទី១១ អត់មានសាច់នៅល្អនៅស្អាតប៉ុណ្ណឹងទេ គឺវាត្រូវតែបែកក្បាលអីហើយ ប៉ុន្តែវាអត់មាន (ហូរ) ឈាមទាំងអស់។ ប្អូនខ្ញុំឡើងស្លេក ដូចឆក់គ្នា វៃគ្នា យកមកប្លុងគ្នាចោល។
— សំឡេងបងស្រីយុវជន អ៊ន់ សំណាងដេវិត
ជុំវិញបញ្ហានេះ ប្រធានសមាគមការពារសិទ្ធិអាដហុកលោក នី សុខា យល់ឃើញថា ប្រសិនបើករណីស្លាប់នេះ សមត្ថកិច្ចមិនបានស៊ើបអង្កេតរកហេតុផល ដែលអាចធ្វើឱ្យសាច់ញាតិជឿនិងទទួលយកបាន វានឹងធ្វើឱ្យពលរដ្ឋកាន់តែអស់ជំនឿលើសមត្ថកិច្ច។
ហើយបើក្នុងករណី វាមិនមែនជាការស្លាប់ដោយសារការធ្វើអត្តឃាតវិញនោះ អានេះជារឿងមួយដែលយើងមានការសោកស្ដាយ ហើយអ្នកស្លាប់ហ្នឹងទទួលរងនូវភាពអយុត្តិធម៌ ដែលជាសមត្ថកិច្ចមិនបានស៊ើបអង្កេតឱ្យបានត្រឹមត្រូវ ហើយទុកឱ្យជនប្រព្រឹត្តិបទល្មើស អាចរួចខ្លួនពីសំណាញ់ច្បាប់ទៅទៀតផង។
— លោក នី សុខា
កន្លងមក មានជនបរទេសចម្រុះជាតិសាសន៍ នាំគ្នារត់សម្រុកចេញពីកាស៊ីណូ និងទីតាំងអាគារមួយចំនួន ដែលជាប់សង្ស័យថា ជាកន្លែងធ្វើទារុណកម្មនិងបង្ខាំងបុគ្គលិក និងជាទីតាំងរបស់ឧក្រិដ្ឋជនចិនចាប់ជំរិត ក្នុងនោះមានដូចជា កាស៊ីណូរបស់ឧកញ៉ា លី យ៉ុងផាត់ នៅច្រកទ្វារអន្តរជាតិអូរស្មាច់ ក្នុងខេត្តឧត្តរមានជ័យ នៅកាស៊ីណូឋានសួគ៌បូកគោ របស់លោកឧកញ៉ា សុខ គង់ នៅខេត្តកំពត រួមទាំងទីតាំងបើកល្បែងអនឡាញនៅភ្នំពេញ នៅទីក្រុងបាវិត ខេត្តស្វាយរៀង និងនៅខេត្តព្រះសីហនុជាដើម។ មានជនបរទេសខ្លះ ត្រូវគេអះអាងថា បានលោតពីលើអាគារសម្លាប់ខ្លួន ដោយសារប្រឈមការបង្ខាំងទុកឱ្យបម្រើការអនឡាញ។
កាលពីថ្ងៃទី២១ ខែឧសភា ការិយាល័យឧត្តមស្នងការអង្គការសហប្រជាជាតិសម្រាប់សិទ្ធិមនុស្ស (OHCHR) បានចេញផ្សាយសេចក្ដីប្រកាសថាក្រុមអ្នកជំនាញកំពុងព្រួយបារម្ភ ជុំវិញស្ថានភាពជួញដូរមនុស្ស មានទ្រុងទ្រាយកាន់តែធំនៅទូទាំងតំបន់អាស៊ីអាគ្នេយ៍ ជាពិសេសនៅក្នុងប្រទេសភូមា ឡាវ និងកម្ពុជា ដែលមានមនុស្សចម្រុះជាតិសាសន៍រាប់សែននាក់ កំពុងជាប់គាំង និងបង្ខំឱ្យបម្រើការឆបោកតាមអនឡាញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។