អនុប្រធានគណបក្សភ្លើងទៀន នៅខណ្ឌពោធិ៍សែនជ័យ រាជធានីភ្នំពេញលោក នល់ ពង្សធិរិទ្ធ ប្តេជ្ញាចិត្តមុតមាំតស៊ូទៅមុខបន្តទៀតក្នុងបុព្វហេតុទាមទារស្តាប្រជាធិបតេយ្យ និងយុត្តិធម៌សង្គម បើទោះត្រូវរងវាយប្រហារផ្ទួនពីសំណាក់ជនមិនស្គាល់មុខយ៉ាងណាក៏ដោយ។ មិត្តរួមការងារសោកស្តាយចំពោះការប្រើហិង្សាលើរូបលោកជាបន្តបន្ទាប់ ពីព្រោះលោកមានសន្តានចិត្តល្អ និងទទួលបានការគោរពស្រឡាញ់ពីមនុស្សក្នុងសង្គម ព្រមទាំងហ៊ានលះបង់ប្រយោជន៍ផ្ទាល់ខ្លួនធ្វើការងារជាមួយគណបក្សប្រឆាំង ដើម្បីចូលរួមស្ដារប្រជាធិបតេយ្យនៅកម្ពុជា។ លោក នល់ ពង្សធិរិទ្ធ គឺជាសមាជិកគណបក្សប្រឆាំងម្នាក់ ក្នុងចំណោមច្រើននាក់ផ្សេងទៀត ដែលត្រូវជនមិនស្គាល់មុខព្រួតវាយ ឬលួចវាយទាំងកណ្តាលថ្ងៃ បណ្តាលឱ្យរងរបួសធ្ងន់ធ្ងរ ប៉ុន្តែរហូតមកដល់ពេលនេះអាជ្ញាធរមិនបានចាប់ខ្លួនជនដៃដល់យកមកផ្ដន្ទាទោសបាននៅឡើយទេ។
លោក នល់ ពង្សធិរិទ្ធ នៅតែចាត់ទុកករណីហិង្សា ដែលបណ្តាលឱ្យរបួសធ្ងន់ និងគំរាមសម្លាប់នោះ គឺជារឿងនយោបាយ ព្រោះលោកគ្មានគំនុំជាមួយបុគ្គលណាមួយក្នុងសង្គមនោះទេ។ លោកស្នើយ៉ាងទទូចដល់ស្ថាប័នមានសមត្ថកិច្ចវែកមុខជនដៃដល់យកមកផ្ដន្ទាទោសឆាប់រហ័ស ដើម្បីបញ្ចៀសការរិះគន់នានា។ ទោះយ៉ាងណាលោកប្ដេជ្ញាចិត្តបន្តធ្វើសកម្មនយោបាយជាមួយគណបក្សភ្លើងទៀនតទៅទៀត ទោះបីរងការធ្វើទុក្ខបុកម្នេញ និងគំរាមកំហែងដល់អាយុជីវិតយ៉ាងណាក្តី៖ «ខ្ញុំទទូចហើយទទូចទៀតសូមឱ្យរដ្ឋាភិបាលលោកវែកមុខជនដៃដល់យកមកផ្ដន្ទាទោសតាមច្បាប់ ចាប់ពីខ្ញុំទៅក៏ដូចសកម្មជនផ្សេងៗ អាជ្ញាធរមិនដែលរកអ្នកវាប្រហារលើសកម្មជនគណបក្សប្រឆាំងឃើញម្តងណាឡើយ»។
លោក នល់ ពង្សធិរិទ្ធ គឺលោកជាអនុប្រធានក្រុមការងារគណបក្សភ្លើងទៀន ខណ្ឌពោធិ៍សែនជ័យ រាជធានីភ្នំពេញ។ កាលពីឆ្នាំ២០១៩ លោកត្រូវបានជនមុនស្គាល់អត្តសញ្ញាណមានគ្នា ៤នាក់លបវាយប្រហារនៅម្តុំផ្ទះរបស់លោកស្ថិតសង្កាត់ចោមទៅទី៣ ខណ្ឌពោធិ៍សែនជ័យ បណ្តាលឱ្យរងរបួសធ្ងន់។ ករណីហិង្សាលើកទីមួយមិនទាន់ទទួលបានយុត្តិធម៌ផង លោកថែមទាំងត្រូវបានជនល្មើសលួចវាយប្រហារម្តងទៀតកាលពីថ្ងៃទី១៧ ខែកក្កដា ដោយជនមួយក្រុមនោះមានគ្នាជិត ១០នាក់ ជិះម៉ូតូប្រមាណ ៤គ្រឿង ពាក់មួកសុវត្ថិភាពប្រដាប់ដោយដែករលាស់ព្រួតគ្នាវាយលោកនៅភូមិព្រៃជីសាក់ សង្កាត់ចោមចៅទី៣ ខណ្ឌពោធិ៍សែនជ័យ។ អំពើហិង្សានេះ គឺកើតឡើងបន្ទាប់ពីលោកធ្វើដំណើរចូលរួមប្រជុំកិច្ចគណបក្សខណ្ឌ។
វិទ្យុអាស៊ីសេរីមិនអាចទាក់ទង អ្នកនាំពាក្យគណបក្សកាន់អំណាចលោក សុខ ឥសាន និងអ្នកនាំពាក្យអគ្គស្នងការដ្ឋាននគរបាលជាតិលោក ឆាយ គឹមខឿន ដើម្បីបញ្ជាក់ជុំវិញរឿងនេះបានទេនៅថ្ងៃទី១៩ ខែកក្កដា។
លោក នល់ ពង្សធិរិទ្ធ គឺជាអតីតសកម្មជនគណបក្សជាតិខ្មែរនៅឆ្នាំ១៩៩៦ និងជាមន្ត្រីសន្តិសុខគណបក្ស សម រង្ស៊ី និងគណបក្សសង្គ្រោះជាតិ។ នៅក្រោយពេលតុលាការកំពូលរំលាយបក្សប្រឆាំង នៅចុងឆ្នាំ២០១៧ លោកបានរត់ភៀសខ្លួននៅទីក្រុងបាងកក ប្រទេសថៃរយៈពេលជិត ២ឆ្នាំដើម្បីគេចពីការធ្វើទុក្ខបុកម្នេញផ្នែកនយោបាយ។ លោកបានសម្រេចវិលចូលស្រុកវិញ ក្រោយពេលលោក ហ៊ុន សែន អំពាវនាវដោះលែងសកម្មជនគណបក្សសង្គ្រោះជាតិឱ្យមានសេរីភាពវិញ បន្ទាប់ពីដំណើរមាតុភូមិនិវត្តន៍ចូលស្រុកមិនបានសម្រេចរបស់លោក សម រង្ស៊ី កាលពីចុងឆ្នាំ២០១៩។
សម្បុរសមាឌលោក នល់ ពង្សធិរិទ្ធ រៀបរាប់ប្រាប់អាស៊ីសេរីថា មូលហេតុដែលលោកបន្តជីវភាពនយោបាយជាមួយគណបក្សប្រឆាំងជាបន្តបន្ទាប់ ដើម្បីឱ្យមានយុត្តិធម៌សង្គម និងលទ្ធិប្រជាធិបតេយ្យពេញលេញនៅកម្ពុជា។ បច្ចុប្បន្នលោក នល់ ពង្សធិរិទ្ធ និងគ្រួសារពុំមានផ្ទះផ្ទាល់ខ្លួននោះទេ ដោយពួកគាត់ស្នាក់នៅជាមួយសាច់ញាតិខាងប្រពន្ធក្នុងសង្កាត់ចោមចៅទី៣ ខណ្ឌពោធិ៍សែនជ័យ។ គ្រួសារសកម្មជនបក្សប្រឆាំងរូបនេះមានជីវភាពក្រីក្រ ដោយសារលោកជាសកម្មជននយោបាយ ហើយភរិយាដើរធ្វើក្រចកតាមផ្ទះរកប្រាក់ចំណូលបានបន្តិចបន្តួចដោះស្រាយជីវភាពប្រចាំថ្ងៃ៖ « ខ្ញុំរស់នៅមិនចង់ឃើញប្រទេសយើងមិនមានច្បាប់ទំលាប់ត្រឹមត្រូវដូចជាសព្វថ្ងៃធ្វើបាបសកម្មជន ឬធ្វើបាបអ្វីផ្សេងៗ ដោយមិនមានមិនមានការគោរពច្បាប់ត្រឹមត្រូវ បានជាខ្ញុំចូលរួមក្នុងគណបក្សប្រឆាំងហ្នឹង»។
លោក នល់ ពង្សធិរិទ្ធ ហៅ កំហែងជ័យ កើតនៅឆ្នាំ១៩៧៣ ក្នុងគ្រួសារមន្ត្រីរាជការនៅភូមិស្ពឺកើត ឃុំស្ពឺ ស្រុកចំការលើ ខេត្តកំពង់ចាម។ លោកបានបញ្ចប់ការសិក្សាថ្នាក់ទី១១។ លោកបានរៀបការជាមួយលោកស្រី អ៊ុយ សុផល្លា នៅឆ្នាំ២០១១ និងមានកូនស្រីម្នាក់ ដែលបច្ចុប្បន្នអាយុ ៨ឆ្នាំ។ លោក នល់ ពង្សធិរិទ្ធ គឺជាមនុស្សមានសន្ដានចិត្ត និងស្មោះស្មគ្រជាមួយគណបក្សប្រឆាំង ហើយតែងតែជួយគណបក្សនេះតាំងពីដើមមក។ ទោះយ៉ាងណាមន្ត្រីបក្សភ្លើងទៀនរូបនេះ ឱ្យដឹងថា ប្រពន្ធរបស់លោកតែងតែជំទាស់នឹងការចូលរួមសកម្មភាពនយោបាយរបស់លោកជាខ្លាំង ដោយសារគាត់បារម្ភពីសុវត្ថិភាព៖ «ភរិយាខ្ញុំគាត់មិនសប្បាយចិត្តទេ ប៉ុន្តែខ្ញុំធ្វើនេះ ខ្ញុំបានជម្រាបទៅគាត់វិញ ដើម្បីប្រទេសជាតិ និងកូនចៅយើងជំនាន់ក្រោយ។ បើសិនយើងនាំគ្នាភ័យខ្លាច តើយើងជួយឱ្យប្រទេសយើងមានប្រជាធិបតេយ្យសេរីពិតប្រាកដតាមរបៀបណា? បើមួយខ្លាច ពីរខ្លាចហើយនោះ»។
ប្រធានក្រុមការគណបក្សភ្លើងទៀន រាជធានីភ្នំពេញ លោក សរ ឡង់ដេត ឲ្យដឹងថា លោក នល់ ពង្សធិរិទ្ធ តែងតែចូលរួមសកម្មភាពស្ដារលទ្ធិប្រជាធិបតេយ្យ ជាពិសេសពង្រឹងស្មារតីក្រុមប្រឹក្សាសង្កាត់ជាប់ឆ្នោត និងសកម្មជននៅតាមមូលដ្ឋានរបស់គណបក្សភ្លើងទៀនដោយមិនខ្លាចនឿយហត់ ឬការគំរាមកំហែងនោះទេ។ លោកថា នល់ ពង្សធិរិទ្ធ គឺជាសហការីមានចិត្តគំនិតស្មោះត្រង់ សន្តានចិត្តល្អ និងមានការគោរពស្រឡាញ់ពីអ្នកដទៃ ហើយលោកទាមទារឲ្យអាជ្ញាធរត្រូវវែកមុខជនព្រឹត្តហិង្សាយកដាក់ទោសទណ្ឌឱ្យខានតែបាន៖ « ជាធ្វើការបាបមន្ត្រីបក្សប្រឆាំង ប៉ុន្តែពួកខ្ញុំនៅតែតស៊ូតាមផ្លូវច្បាប់ដដែល ព្រោះជាគោលការណ៍ដែលពួកខ្ញុំត្រូវអនុវត្ត ហើយយើងសោកស្តាយណាស់ ដោយយើងសង្ឃឹមថា អាជ្ញាធរមូលដ្ឋាន និងអាជ្ញាធរគ្រប់លំដាប់ថ្នាក់គួរតែវែកមុខជនដៃដល់ឱ្យបាន»។
សង្គមស៊ីវិលចង់ឃើញអាជ្ញាធរគ្រប់លំដាប់ថ្នាក់ស្វែងរកយុត្តិធម៌ជូនលោក នល់ ពង្សធិរិទ្ធ រួមទាំងជនរងគ្រោះផ្សេងទៀតឱ្យមានប្រសិទ្ធភាព ពីព្រោះការបណ្តែតបណ្តោយបែបនេះនឹងធ្វើឱ្យពួកគេអស់ជំនឿលើការអនុវត្តច្បាប់ ហើយវប្បធម៌និទណ្ឌភាពនៅតែកើតឡើងបន្តទៀត។ អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា មានប្រសាសន៍ថា ពលរដ្ឋមានសិទ្ធិចូលរួមសកម្មក្នុងជីវភាពនយោបាយដែលធានាដោយរដ្ឋធម្មនុញ្ញ ប៉ុន្តែលោកសង្កេតឃើញថាកន្លងមកសកម្មជនបក្សប្រឆាំងមួយចំនួនត្រូវបង្ខំចិត្តបញ្ឈប់សកម្មភាព និងរត់ភៀសខ្លួន ដោយសារការយាយីផ្នែកនយោបាយដូចជាអំពើហិង្សា ការចោទប្រកាន់តាមប្រព័ន្ធតុលាការ និងជនរងគ្រោះខ្លះបានស្លាប់ជាដើម៖ « បើសិនជាច្បាប់មិនបានការពារនិងផ្តល់យុត្តិធម៌ទៅដល់ជនរងគ្រោះទេ អ៊ីចឹងសិទ្ធិទទួលបានយុត្តិធម៌មិនអាចធ្វើទៅបានទេ ហើយគាត់ក៏មិនទទួលបានដែរ ក្នុងហ្នឹងអំពើនិទ្ទណ្ឌភាពកើតមានឡើង ចំពោះសកម្មជនបក្សប្រឆាំងហ្នឹង កើតឡើងជាបន្តបន្ទាប់។ យើងមានការព្រួយបារម្ភថា បើសិនជាអំពើបែបហ្នឹងមិនចាត់វិធានការអាចបន្តករណីបែបហ្នឹងកើតឡើងជាបន្តបន្ទាប់ទៀត»។
ក្រុមអង្គការជាតិ និងអន្តរជាតិ រួមទាំងអង្គការសហប្រជាជាតិផង បានសម្ដែងក្តីព្រួយបារម្ភជាខ្លាំង ចំពោះអំពើហិង្សាលើសកម្មជនសង្គម និងសកម្មជននយោបាយជាញឹកញាប់នេះ។ ពួកគេចាត់ទុក ករណីទាំងនេះថា ជាការធ្វើទុក្ខបុកម្នេញលើអ្នកការពារសិទ្ធិមនុស្ស និងនយោបាយដែលត្រូវតែបញ្ឈប់ជាបន្ទាន់។
លោក នល់ ពង្សធិរិទ្ធ ប្រកាន់ជំហរបន្តចូលរួមធ្វើសកម្មភាពជាមួយគណបក្សភ្លើងទៀនដដែល បើទោះបីជាត្រូវគេវាយឱ្យរបួសចំនួន ២លើកមកហើយ ដោយលោកមើលឃើញថា បច្ចុប្បន្ន កម្ពុជាមិនទាន់មានលទ្ធិប្រជាធិបតេយ្យ និងយុត្តិធម៌សង្គមនៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។