ក្រសួងកសិកម្មកម្ពុជានិងក្រុមហ៊ុនចិនចុះកិច្ចព្រមព្រៀងអភិវឌ្ឍកសិឧស្សាហកម្ម
2016.10.25
ផ្សារណាត់សហគមន៍កសិផលធម្មជាតិជាលើកដំបូងនៅក្នុងទីរួមខេត្តកំពង់ស្ពឺ ត្រូវបានអង្គការសេដាក (CEDAC) និងកសិករសម្ពោធជាផ្លូវការកាលថ្ងៃទី២១ ខែកុម្ភៈ ឆ្នាំ២០១៦។ RFA/Um Raingsey
RFA/Um Raingsey
ក្រសួងកសិកម្ម និងក្រុមហ៊ុនចិន ឈ្មោះ ធាន រូយ (Tian Rui Agriculture Coorperation) បានចុះអនុស្សរណៈនៃការយោគយល់គ្នាស្ដីពី «កិច្ចសហប្រតិបត្តិការលើវិស័យកសិកម្ម»។ ស្ថាប័នទាំងពីរនេះអះអាងថា ការចុះអនុស្សរណៈនៃការយោគយល់គ្នានេះ ដើម្បីពង្រឹង និងពង្រីកកិច្ចសហប្រតិបត្តិការលើវិស័យកសិកម្ម ព្រមទាំងរួមគ្នាអភិវឌ្ឍកសិឧស្សាហកម្មកម្ពុជា។
ក្រសួងកសិកម្ម និងក្រុមហ៊ុន ធាន រូយ (Tian Rui Agriculture Coorperaation) អះអាងថា កិច្ចព្រមព្រៀងស្ដីពី «កិច្ចសហប្រតិបត្តិការលើវិស័យកសិកម្ម» គឺដើម្បីបង្ហាញការអនុវត្តគោលនយោបាយក្នុងការនាំចេញ បង្កើនគុណភាពផលិតផលកសិកម្មតាមរយៈកសិឧស្សាហកម្ម សំដៅបង្កើនទំនុកចិត្តដល់អ្នកបរិភោគ ព្រមទាំងទាក់ទាញតម្រូវការទីផ្សារក្នុងស្រុក និងក្រៅស្រុក។
កិច្ចព្រមព្រៀង ឬអនុស្សរណៈនៃការយោគយល់គ្នានេះ (MOU) ដែលត្រូវបានចុះហត្ថលេខានៅថ្ងៃទី១៩ ខែតុលា នោះរួមមាន ៦ចំណុចសំខាន់ៗ៖
- ចូលរួមបង្កើតមជ្ឈមណ្ឌលស្រាវជ្រាវ និងអភិវឌ្ឍន៍កសិកម្ម
- បង្កើតឃ្លាំងស្តុកផលិតផលកសិកម្ម
- បង្កើនម៉ាស៊ីនវេចខ្ចប់ផលិតផលកសិកម្មសម្រាប់នាំចេញ
- បង្កើតបណ្ដាញពិសេសសម្រាប់នាំចេញទៅកាន់ទីផ្សារអន្តរជាតិ
- គាំទ្រ និងផ្តល់កិច្ចសហប្រតិបត្តិការក្នុងការបង្កើតមជ្ឈមណ្ឌលត្រួតពិនិត្យអនាម័យ និងភូតគាមអនាម័យ ឬដែលមានសុវត្ថិភាពដល់អ្នកបរិភោគ
- និងរៀបចំផ្សារណាត់ ការតាំងពិព័រណ៍ ការងារជួយសង្គម សិក្ខាសាលា សន្និសីទ និងវេទិកានានា។
ខ្លឹមសារនៃកិច្ចព្រមព្រៀងនេះ ត្រូវបានក្រសួងកសិកម្ម រុក្ខាប្រមាញ់ និងនេសាទ បានប្រកាសឲ្យដឹងតាមបណ្ដាញសង្គមហ្វេសប៊ុក (Facebook) នៅថ្ងៃទី២០ ខែតុលា។
រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន មានប្រសាសន៍ឲ្យដឹងតាមសេចក្តីប្រកាសនេះថា នេះគឺជាកិច្ចព្រមព្រៀងមានសារសំខាន់ ជួយជំរុញឲ្យមានការវិនិយោគលើការផលិត ការកែច្នៃ ការវេចខ្ចប់ ការទុកដាក់ និងបង្កើតមជ្ឈមណ្ឌលស្រាវជ្រាវ និងមជ្ឈមណ្ឌលត្រួតពិនិត្យនៅកម្ពុជា ដែលមានគុណភាពខ្ពស់។
លោករំពឹងថា កិច្ចព្រមព្រៀងនេះនឹងជួយជំរុញការអភិវឌ្ឍសេដ្ឋកិច្ច ពិសេសជួយកាត់បន្ថយភាពក្រីក្រ និងលើកទឹកចិត្តដល់កសិករ។
ទន្ទឹមគ្នានេះ ប្រធានក្រុមហ៊ុន ធាន រូយ (Tian Rui Agriculture Coorperaation) លោក ស៊ិន ជិន (Sain Chin) ឲ្យដឹងដែរថា អនុស្សរណៈថ្មីនេះមិនត្រឹមតែពង្រីកកិច្ចសហប្រតិបត្តិការលើវិស័យកសិកម្ម ព្រមទាំងរួមគ្នាអភិវឌ្ឍកសិឧស្សាហកម្មកម្ពុជា ប៉ុណ្ណោះទេ អនុស្សរណៈនេះក៏ជួយទាក់ទាញវិនិយោគិនក្នុងស្រុក និងនៅក្រៅស្រុក ឲ្យធ្វើការវិនិយោគឲ្យបានកាន់តែច្រើននៅកម្ពុជា ថែមទៀត។
បន្ថែមពីនេះទៀត អនុរដ្ឋមន្ត្រីក្រសួងកសិកម្មចិន លោក ឈឺ ទុងអឺ (Chhu Toung Eu) លើកឡើងទៀតថា ក្រសួងកសិកម្មចិន នឹងជួយក្រសួងកសិកម្មកម្ពុជា ដើម្បីរៀបចំផែនការស្ដីពីការធ្វើទំនើបកម្មនៃកសិឧស្សាហកម្ម នៅក្នុងគោលបំណងជំរុញការវិនិយោគលើផ្នែកនេះ សំដៅបង្កើតប្រាក់ចំណូលដល់ប្រជាកសិករក្នុងស្រុក និងផ្គត់ផ្គង់ផលិតផលកម្ពុជា សំខាន់ៗទៅកាន់ទីផ្សារអន្តរជាតិ។
សេចក្តីប្រកាសរបស់ក្រសួងកសិកម្ម រុក្ខាប្រមាញ់ និងនេសាទ ដែលផ្សព្វផ្សាយនៅថ្ងៃទី២០ ខែតុលា បានបញ្ជាក់ថា ដើម្បីឲ្យ «កិច្ចសហប្រតិបត្តិការលើវិស័យកសិកម្ម និងកសិឧស្សាហកម្ម មានប្រសិទ្ធភាព ស្ថាប័នទាំងពីរបានប្ដេជ្ញាក្នុងកិច្ចសហប្រតិបត្តិការយ៉ាងជិតស្និទ្ធ អនុវត្តឲ្យបានសម្រេចនូវការព្រមព្រៀងគ្នាជាឯកច្ឆន្ទ ឲ្យទទួលបានលទ្ធផលគួរឲ្យកត់សម្គាល់»។
សេចក្តីប្រកាសដដែលបញ្ជាក់ទៀតថា ភាគីទាំងពីរក៏បានឯកភាពគ្នាជំរុញឲ្យមានការវិនិយោគពីវិស័យឯកជនបន្ថែមទៀតលើហេដ្ឋារចនាសម្ព័ន្ធ និងបរិក្ខារកែច្នៃ ដូចជាឃ្លាំងស្តុក ប្រព័ន្ធដឹកជញ្ជូនល្អប្រសើរជាងមុន រោងចក្រកែច្នៃទំនើប និងវិញ្ញាបនបត្របញ្ជាក់ពីគុណភាព។
មិនតែប៉ុណ្ណោះ ភាគីទាំងពីរក៏កត់សម្គាល់ពីសារសំខាន់នៃគោលនយោបាយឧស្សាហកម្មកម្ពុជា ក្នុងការគាំទ្រវិស័យកសិកម្ម តាមរយៈការបង្កើនដល់ការផលិតផលកសិកម្ម សំដៅជំរុញឲ្យកើនឡើងនូវប្រាក់ចំណូលដល់ប្រជាកសិករ និងដល់ការអភិវឌ្ឍសេដ្ឋកិច្ចកម្ពុជា។
ទាក់ទិននឹងក្រសួងកសិកម្ម និងក្រុមហ៊ុនចិន ចុះកិច្ចព្រមព្រៀងរួមគ្នាអភិវឌ្ឍកសិឧស្សាហកម្មកម្ពុជា នៅពេលនេះដែរ ត្រូវបានអគ្គលេខាធិការសម្ព័ន្ធសហគមន៍កសិករកម្ពុជា លោក ថេង សាវឿន យល់ថា កិច្ចព្រមព្រៀងនេះធ្វើឡើងក្រោយកសិកររិះគន់រដ្ឋាភិបាល ថាគ្មានសមត្ថភាពដោះស្រាយវិបត្តិក្នុងវិស័យកសិកម្មប៉ុណ្ណោះ។ ប៉ុន្តែលោកក៏គាំទ្រចំពោះខ្លឹមសារនៅក្នុងកិច្ចព្រមព្រៀងនេះ ប្រសិនបើស្ថាប័នទាំងពីរពិតជាមានឆន្ទៈពិតប្រាកដ អភិវឌ្ឍវិស័យកសិកម្មកម្ពុជា ហើយមិនមែនចុះកិច្ចព្រមព្រៀងឲ្យគ្រាន់តែល្អមើល និងធ្វើឲ្យកសិករកាន់តែក្រីក្រដោយសារតែក្រុមហ៊ុនសម្បទានដីនោះទេ៖ «ក្រោយពេលចុះកិច្ចព្រមព្រៀងរួច ស្ថាប័នទាំងពីរត្រូវតែមានផែនការជាក់លាក់បន្ថែមទៀត គាំទ្រដល់កសិករខ្នាតតូច ឲ្យធ្វើយ៉ាងណាឲ្យកសិករខ្នាតតូចទទួលបានផលប្រយោជន៍ពីកិច្ចព្រមព្រៀងរវាងក្រសួងកសិកម្ម និងក្រុមហ៊ុនចិន នេះ»។
ការចុះកិច្ចព្រមព្រៀងរបស់ក្រសួងកសិកម្ម និងក្រុមហ៊ុនចិន នៅពេលនេះ ធ្វើឡើងក្រោយដំណើរទស្សនកិច្ចរបស់ប្រធានាធិបតីចិន លោក ស៊ី ជីនពីង (Xi Jinping) មកកាន់កម្ពុជា កាលពីពេលថ្មីៗនេះ។ កាលណោះក្នុងជំនួបជាមួយលោកនាយករដ្ឋមន្ត្រី ហ៊ុន សែន នៅវិមានសន្តិភាព លោក ស៊ី ជីនពីង និងលោក ហ៊ុន សែន ក៏ចុះហត្ថលេខាលើកិច្ចព្រមព្រៀង និងពិធីសារចំនួន ៣១ ទាក់ទងការសាងសង់ផ្លូវ មន្ទីរពេទ្យ ប្រព័ន្ធធារាសាស្ត្រ កសិកម្ម វារីអគ្គិសនី និងទំនាក់ទំនងពាណិជ្ជកម្ម ជាដើម។
ក្នុងដំណើរទស្សនកិច្ចនោះទៀតសោត លោក ស៊ី ជីនពីង ក៏បានប្រាប់ទៅលោក ហ៊ុន សែន ថា ការអភិវឌ្ឍនៅកម្ពុជា មិនអាចកាត់ផ្តាច់ពីចិន បានទេ។ ហេតុនេះ ចិន នឹងជួយកម្ពុជា ឲ្យប្រទេសទាំងពីរមានទំហំពាណិជ្ជកម្មកើនដល់ ៥ពាន់លានដុល្លារនៅឆ្នាំ២០១៧។
ទោះជាយ៉ាងណា ក្រសួងកសិកម្ម រុក្ខាប្រមាញ់ និងនេសាទ និងក្រុមហ៊ុន ធាន រូយ (Tian Rui Agriculture Coorperaation) មិនបានបញ្ជាក់ច្បាស់ពីរយៈពេល និងទំហំទឹកប្រាក់ច្បាស់លាស់ ដើម្បីអនុវត្តដំណើរការនៃអនុស្សរណៈនៅឡើយ។
យ៉ាងណា កសិករ សង្គមស៊ីវិល និងអ្នកវិភាគសង្គម ធ្លាប់លើកឡើងថា មូលហេតុចម្បងដែលធ្វើឲ្យវិស័យកសិកម្ម និងកសិឧស្សាហកម្មកម្ពុជា នៅតែជួបបញ្ហា និងពិបាកប្រកួតប្រជែងទីផ្សារប្រទេសជិតខាងបាន មកពីកង្វះគោលនយោបាយលើកទឹកចិត្តកសិករ ខ្វះប្រព័ន្ធធារាសាស្ត្រ ថវិកាជាតិ ចំណាយមិនចំគោលដៅ និងមិនមានការបែងចែកអំណាចដល់ថ្នាក់មូលដ្ឋាន ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- អ្នកតាមដាននយោបាយថា អាមេរិកដាក់ទណ្ឌកម្ម លោក លី យ៉ុងផាត់ ជាការកាត់ផ្ដាច់សរសៃឈាមសេដ្ឋកិច្ចរបស់បក្សកាន់អំណាច
- កញ្ញា ឈឹម ស៊ីថរ រក្សាជំហរតស៊ូ ដើម្បីសេរីភាពសហជីព និងការពារផលប្រយោជន៍កម្មករក្រោយមានសេរីភាព
- ក្រសួងការបទេស និងគណបក្សប្រជាជនកម្ពុជាចាត់ទុកថា ជារឿងអយុត្តិធម៌ ដែលក្រសួងរតនាគារសហរដ្ឋអាមេរិកដាក់ទណ្ឌកម្មលើលោក លី យ៉ុងផាត់
- ហេតុអ្វីបានជាអាមេរិកដាក់ទណ្ឌកម្ម «ស្តេចកោះកុង»?
- ពលរដ្ឋរិះគន់អាជ្ញាធរអប្សរាបណ្តោយឱ្យអ្នកមានលុយមានអំណាចសង់ផ្នូរខ្មោចចិនមួយធំក្នុងតំបន់អង្គរ