អ្នកជំនាញកសិកម្មចង់ឃើញរដ្ឋាភិបាលមានជំហររឹងមាំទប់ស្កាត់ទំនិញនាំចូលពីប្រទេសជិតខាង
2021.02.19
រដ្ឋមន្ត្រីកសិកម្ម រុក្ខាប្រមាញ់ និងនេសាទ លោក វ៉េង សាខុន។
រូបពីហ្វេសប៊ុក
កសិករ និងអ្នកជំនាញកសិកម្ម ចង់ឃើញរដ្ឋាភិបាល មានជំហររឹងមាំក្នុងការទប់ស្កាត់ ទំនិញនាំចូលពីប្រទេសជិតខាង ជាពិសេសមុខទំនិញ ដែលជាផលិតផលកសិកម្ម មានដូចជាត្រី សាច់ បន្លែជាដើម ដើម្បីទុកឱកាសទីផ្សារដល់កសិករក្នុងស្រុកពង្រឹងសមត្ថភាព និងអាជីវកម្មរបស់ខ្លួន។
ពួកគាត់ថា ភាពមិនច្បាស់លាស់របស់រដ្ឋាភិបាល ជាមួយប្រទេសជិតខាង ជាពិសេសជាមួយប្រទេសវៀតណាមនោះនឹងធ្វើឱ្យកសិករ ម្ចាស់អាជីវកម្មក្នុងស្រុក នឹងខាតបង់ដើមទុនច្រើន និងមិនអាចដោះបំណុលធនាគារបានទេ ដោយសារមិនអាចប្រជែងទីផ្សារជាមួយផលិតផលនាំចូល។
សមាគមកសិករ និងអ្នកជំនាញខាងកសិកម្ម មើលឃើញថា៖ កសិករខ្មែរសព្វថ្ងៃនៅតែជួបវិបត្តិ ខ្វះទីផ្សារលក់ផលិតផល និងបច្ចេកទេសនៃការផលិត ដើម្បីប្រកួតប្រជែងនៅលើទីផ្សារជាមួយនឹងប្រទេសជិតខាង។
បញ្ហានេះបានរុញច្រានកម្ពុជា ក្លាយជាទីផ្សារលក់ផលិតផលរបស់ប្រទេសជិតខាង ដោយក្នុងមួយថ្ងៃៗទំនិញរាប់សែនតោនត្រូវហូរចូលមកលក់ក្នុងប្រទេសនេះ ទាំងស្របច្បាប់ និងមិនស្របច្បាប់។
អ្នកឯកទេសកសិកម្ម លោកបណ្ឌិត យ៉ង់ សាំងកុមារ ឱ្យដឹងថា តាមការកត់ត្រាមិនផ្លូវការកន្លងមកពីក្រុមអ្នកធ្វើការងារសង្គមផ្នែកខាងកសិកម្ម បានបង្ហាញថា ផលិតផលចំណីអាហារ កសិកម្ម ដែលនាំមកពីវៀតណាម មានបន្លែ ផ្លែឈើ ត្រី សាច់ ស៊ុត ជាដើម បានស្រូបទាញចំណែកទីផ្សារក្នុងស្រុក គិតជាទឹកប្រាក់ អាចមានចំនួនជាងមួយពាន់លានដុល្លារក្នុងមួយឆ្នាំ។
លោកបណ្ឌិត យ៉ង់ សាំងកុមារ មន្ត្រីជាន់ខ្ពស់នៃគណបក្សប្រជាធិបតេយ្យមូលដ្ឋានបន្តថា បញ្ហានេះ គឺជាសំពាធមួយធ្ងន់ធ្ងន់សម្រាប់កសិករខ្មែរ ដែលត្រូវប្រកួតប្រជែងជាមួយកសិកររបស់ប្រទេសជិតខាងដែលគេមានរចនាសម្ព័ន្ធរឹងមាំខាងវិស័យកសិកម្មជាច្រើនឆ្នាំមកហើយនោះ៖ «ការខ្វះព័ត៌មាន ខ្វះខាត់ការគ្រប់គ្រងនៃការនាំចូល និងការនាំចូលជំនួសឱ្យការផលិតក្នុងស្រុកនេះ ជាបញ្ហាប្រឈមនៅកម្ពុជា»។
ការលើកបែបនេះរបស់អ្នកជំនាញកសិកម្ម ក្រោយពីក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃទី៨ កុម្ភៈ បានលុបចោលនូវបម្រាប់របស់ខ្លួនភ្លាមៗ ដោយអនុញ្ញាតឱ្យនាំចូលផល ផលិតផលជលផល ជាពិសេសត្រីចំនួន ៤ប្រភេទ មាន ត្រីប្រា ត្រីពោ ត្រីអណ្ដែង និងត្រីឆ្ដោ តាមតម្រូវការជាក់ស្ដែងនៅក្នុងស្រុកឡើងវិញ ដោយផ្អែកតាមច្បាប់ និងលិខិតបទដ្ឋាន គតិយុត្តិជាធរមាន។
ក៏ប៉ុន្តែនៅមុននេះប្រហែលមួយខែ គឺកាលពីថ្ងៃទី៨ មករា ក្រសួងកសិកម្មបានសម្រេចផ្អាកជាបណ្ដោះអាសន្ននូវការនាំចូលផលិតផលជលផលចំនួន៤មុខនេះ ពីក្រៅប្រទេស ក្នុងគោលបំណងជុំវិញផលិតផលក្នុងស្រុក និងអភិវឌ្ឍវិស័យវារីវប្បកម្មក្នុងប្រទេស ស្របពេលដែលសេដ្ឋកិច្ចសង្គមនៅបន្តប៉ះពាល់ដោយសារវិបត្តិកូវីដ១៩។
ការសម្រេចនេះ ត្រូវបានលុបចោលទៅវិញ ក្រោយពីមានសំណើពីខាងភាគីវៀតណាមដែលសូមឱ្យកម្ពុជាពិចារណាឡើងចំពោះបម្រាមរបស់ខ្លួន ដោយលើកឡើងថា ការហាមនាំចូលត្រី ៤ប្រភេទរបស់ភាគីកម្ពុជា អាចប្រឆាំងនឹងស្មារតី សេរីភាវូបនីយកម្មពាណិជ្ជកម្ម របស់អង្គការពាណិជ្ជកម្មពិភពលោក (WTO) និងសហគមន៍សេដ្ឋកិច្ចអាស៊ាន ដែលប្រទេសទាំងពីរជាសមាជិក។
លោក បណ្ឌិត យ៉ង់ សាំងកុមារ មើលឃើញថា ការសម្រេចឱ្យផ្អាកនាំចូលបណ្ដោះអាសន្ន ហើយសម្រេចបើកឱ្យនាំចូលវិញដោយសារមានការតវ៉ាពីភាគីវៀតណាមនេះ បង្ហាញថា រដ្ឋាភិបាលកម្ពុជា ពុំមានគោលនយោបាយ និងពុំមានគោលជំហរច្បាស់លាស់ ក្នុងការលើកស្ទួយផលិតផលក្នុងស្រុក ហើយហាក់ពុំបានទុកឱកាសឱ្យកសិកររបស់ខ្លួនក្នុងការកសាងសមត្ថភាព ដើម្បីប្រកួតប្រជែងជាមួយប្រទេសជិតខាងឡើយ៖ «ចាប់ពីឥឡូវទៅ យើងមិនអាចធ្វើអ៊ីចឹងបានទេ ព្រោះយើងត្រូវចេះការពារផលិត និងអ្នកផលិតក្នុងស្រុក ឱ្យគាត់មានសមត្ថភាព ប្រកួតប្រជែងជាមួយការនាំចូល និងនាំចេញ ព្រោះក្នុងក្របខ័ណ្ឌពាណិជ្ជកម្មសេរី សមត្ថភាពប្រកួតប្រជែងគឺជារឿងសំខាន់ណាស់»។
ចំណែក ខាងសមាគមកសិករវិញ ក៏មើលឃើញស្រដៀងគ្នានេះដែរ។
ប្រធានសម្ព័ន្ធសមាគមកសិករកម្ពុជា(CCFC) លោក ថេង សាវឿន មានប្រសាសន៍ថា បញ្ហានេះ សបញ្ជាក់ឱ្យឃើញថា រដ្ឋាភិបាល មិនមានជំហរច្បាស់លាស់ ក្នុងការជួយដល់ប្រជាពលរដ្ឋខ្លួនឯង ដូចជាការរក្សាទុកទីផ្សារក្នុងស្រុកសម្រាប់ប្រជាកសិកររបស់ខ្លួនជាអាទិភាពនោះទេ។
លោកបន្តថា បើនៅតែបើកឱកាសឱ្យប្រទេសជិតខាងយកទំនិញរបស់គេមកលក់ច្រើនទៀតនោះ ជីវភាពរបស់កសិករក្នុងស្រុកកាន់តែជួបការលំបាក ដូចជាការខាតបង់ដើមទុនក្នុងអាជីវកម្ម និងជំពាក់បំណុលធនាគារគ្មានអ្វីសងកាន់ធ្ងន់ធ្ងរថែមទៀត៖ «ក្រសួងធ្វើចំណាត់ការមិនច្បាស់លាស់នេះ ធ្វើឱ្យពលរដ្ឋបាត់ទំនុកចិត្តលើរដ្ឋាភិបាល អ៊ីចឹងយើងចង់ឱ្យក្រសួងមានយន្តការច្បាស់លាស់ដើម្បីគាំទ្រការផលិតក្នុងស្រុក ការពារទីផ្សារជូនពួកគាត់»។
អាស៊ីសេរី មិនទាន់សុំការពន្យល់អំពីរឿងនេះពីមន្ត្រីពាក់ព័ន្ធមានក្រសួងកសិកម្ម និងក្រសួងពាណិជ្ជកម្មបាននៅឡើយទេ។
ក៏ប៉ុន្តែរដ្ឋមន្ត្រីក្រសួងកសិកម្ម លោក វេង សាខុន បានប្រាប់វិទ្យុក្នុងស្រុកកាលពីពេលថ្មីនេះថា៖ ការផ្អាកជាបណ្ដោះអាសន្ននូវការនាំចូលផលិតផលជលផលពីក្រៅស្រុក គឺដោយសារផលិតផលពីវិស័យវារីវប្បកម្មក្នុងស្រុកមានការកើនឡើង ហើយពលរដ្ឋកម្ពុជា កំពុងចាប់ផ្តើមប្រកបរបរវារីវប្បកម្មក៏មានចំនួនកើនឡើងដែរ។
លោកបន្តថា ភាគីវៀតណាមមិនគួរយកបញ្ហាការផ្អាកនាំចូលត្រីចំនួន៤ប្រភេទ ចូលមកប្រទេសកម្ពុជានេះ ជារឿងធំនោះឡើយ៖ «អ្វីដែលសំខាន់នោះ គឺយើងដោះស្រាយបញ្ហាចំពោះមុខដែលប្រជាជនយើងកំពុងប្រឈមព្រោះអ្នកចិញ្ចឹមទាំអស់បានខ្ចីលុយធនាគារអភិវឌ្ឍជនបទ និងកសិកម្ម ម្នាក់៥ម៉ឺន ១០ម៉ឺន ខ្លះ២០ម៉ឺនដុល្លារ យកមកធ្វើអាជីវកម្ម ហើយបើយើងមិនដោះស្រាយទេវានឹងខាតបង់ទៅវិញ ហើយធ្វើឱ្យខាតបង់ធនធាន ថវិកាជាតិ ដែលធនាគារអភិវឌ្ឍជនបទ និងកសិកម្ម បានចេញជួយគាត់ ទី២ នឹងធ្វើឱ្យពួកគាត់បាក់ទឹកចិត្តក្នុងការចិញ្ចឹម ដោយឡែកចំពោះបញ្ហាពាក់ព័ន្ធនឹងត្រី៤មុខនោះ វាមានបរិមាណតិចតួចណាស់ ដែលមិនគួរមិត្តភ័ក្ដិជិតខាងយើងយកមកជាត្រីមុខ ក្នុងការដោះស្រាយបញ្ហានឹងទេ»។
លោកបន្តថា ផលិតផលត្រីចិញ្ចឹមបានកើនឡើងច្រើនលើសការរំពឹងទុក ហើយអ្នកចិញ្ចឹមកើនឡើងជាង ២ ៦០០គ្រួសារក្នុងចុងឆ្នាំ២០២០។
របាយការណ៍ប្រចាំឆ្នាំ២០២០ របស់ក្រសួងកសិកម្មថា វិស័យវារីវប្បកម្មកម្ពុជាទទួលបានទិន្នផល៤០ម៉ឺនតោន កើនឡើងក្នុងអត្រា ៣០% លើសឆ្នាំ២០១៩ ដែលទទួលបាន៣០ម៉ឺនតោន។
ក្រុមអ្នកចិញ្ចឹមត្រី នៃសមាគមវារីវប្បករកម្ពុជា ខ្វាយខ្វល់រឿងមិនអាចបញ្ចេញត្រីលក់នៅតាមទីផ្សារក្នុងស្រុកបាន ក្រោយក្រសួងកសិកម្មអនុញ្ញាតឱ្យឈ្មួញអាចនាំត្រីពីក្រៅស្រុកបានឡើងវិញ ក្រោយពីផ្អាកបាន១ខែ។
ពលរដ្ឋប្រកបរបរចិញ្ចឹមត្រីឆ្ដោ នៅឃុំក្អមសំណ ស្រុកលើកដែក ខេត្តកណ្ដាល លោក ហោង គ្រី ឱ្យដឹងថា រយៈពេល១ឆ្នាំមកនេះ លោកនិងអ្នកចិញ្ចឹមត្រីជាច្រើននាក់ទៀត មិនទាន់ឃើញអាជីវករណា ចុះទៅទិញត្រីគាត់ ដែលចិញ្ចឹមក្នុងស្រះ យកទៅលក់នៅឡើយ ដោយសារតែត្រីនាំចូលពីប្រទេសវៀតណាមមានតម្លៃថោកជាងត្រីក្រុងស្រុក ព្រោះគេនាំចូលគេចពន្ធនៅតាមព្រំដែន៖ «ធម្មតាការចិញ្ចឹមនៅប្រទេសរបស់គេ ការធ្វើពូជក៏ថោក ហើយចំណីត្រីរបស់គេ វាអាចវាយលុកនៅប្រទេសរបស់យើងបាន។ តែប្រសិនជាពន្ធទៅតាមកម្រិតវិញ គឺពិបាកប្រដំត្រសងគ្នា គឺប្រហាក់ប្រហែលគ្នាទេ»។
ចំណែកប្រធានសមាគមវារីវប្បករកម្ពុជា លោក សុខ រ៉ាដែន មានប្រសាសន៍ថា ពេលបើកឱ្យនាំត្រីចូលបែបនេះ ក្រសួងកសិកម្ម គួរដាក់ចេញចំណាត់ការថ្មីមួយដើម្បីរឹតត្បិតចំនួនត្រីដែលនាំចូលពីវៀតណាម និងត្រួតពិនិត្យមើលឱ្យបានត្រឹមត្រូវ អំពីគុណភាពប្រភេទត្រីនីមួយៗ ថាតើមានសារធាតុគីមីក្នុងសាច់ត្រី ដែលអាចប៉ះពាល់ដល់សុខភាពអ្នកបរិភោគដែរឬទេ។
ប្រធានសមាគមរូបនេះ ទទូចស្នើសុំក្រសួងកសិកម្ម ជួយណែនាំអាជីវករ ដែលនាំចូលត្រីពីវៀតណាមទាំងអស់ ឱ្យងាកមកប្រមូលទិញត្រី ពីវារីវប្បករក្នុងស្រុកឱ្យអស់សិន រួចចាំបន្តនាំចូលពីវៀតណាម ចំពោះប្រភេទត្រីណាដែលខ្វះនៅទីផ្សារ។
ពួកគាត់ថា បើកឱ្យនាំត្រីចូលលក់ក្នុងប្រទេសឡើងវិញនោះ រដ្ឋាភិបាលត្រូវតែមានវិធានការណ៍ច្បាស់លាស់ក្នុងការកំណត់ពន្ធតាមច្បាប់ និងពិនិត្យគុណភាពត្រីឱ្យបានត្រឹមត្រូវ មុនអនុញ្ញាតឱ្យនាំចូលតាមច្រកព្រំដែន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ជនជាតិឥណ្ឌា ៦៧នាក់ទៀត ត្រូវបានសង្គ្រោះចេញពីកន្លែងឆបោកតាមអនឡាញនៅកម្ពុជា
- ប្រធានព្រឹទ្ធសភា លោក ហ៊ុន សែន ចោទទីប្រឹក្សារបស់លោកថា បានយកឈ្មោះលោកទៅបោកប្រាស់អ្នកដទៃ
- តុលាការចោទប្រកាន់ពលករខ្មែរដែលបញ្ជូនពីម៉ាឡេស៊ី ពីបទញុះញង់ និងឃុំខ្លួននៅពន្ធនាគារ
- អង្គការអន្តរជាតិថា រដ្ឋាភិបាលបានបរាជ័យ ចំពោះការធានារបស់ខ្លួនលើកកម្ពស់សិទ្ធិមនុស្ស
- លោក ស៊ុន ចាន់ថុល អះអាងថា ក្រុមហ៊ុនអាមេរិកាំងច្រើនចាប់អារម្មណ៍ចង់មកវិនិយោគនៅកម្ពុជា