ក្នុងការផ្សាយលើកមុននាទីកសិកម្មវិទ្យុអាស៊ីសេរី បានលើកយកសំណួររបស់លោកគ្រូ អួន ស៊ីឡឹប នៃវិទ្យាល័យហ៊ុនសែន-បល្ល័ង្ក ខេត្តកំពង់ធំ ស្តីពីដំណាំដំឡូងមី ព្រមទាំងចម្លើយទៅនឹងសំណួរទាំងនោះដោយលោក ឈឿន មុនី ទីប្រឹក្សាច្បាប់របស់ក្រុមហ៊ុន អេស.ប៊ី.អឹម.-ស៊ី.ជី. ដែលជារោងចក្រផលិតម្សៅមីនៅភូមិអូរល្វា ឃុំជ្រៃសីមា ស្រុកសំពៅលូន ខេត្តបាត់ដំបង មកជម្រាប ។
លោកគ្រូ អួន ស៊ីឡឹប មានប្រសាសន៍ថា នៅកំពង់ធំកសិករជាច្រើនកំពុងងាកមកដាំដំឡូងមី ហើយលោកចង់ដឹងពីជំងឺដែលអាចរំខានដំណាំនេះ ៖ «ដំឡូងប្រភេទហ្នឹងតើជំងឺប្រឈមមុខយ៉ាងម៉េច ? ព្រោះកសិករនៅកំពង់ធំភាគច្រើន អ្នកដែលដាំស្វាយចន្ទី ឥឡូវគេកាប់ស្វាយចន្ទីអស់ហើយ» ។
ចំពោះសំណួរស្តីពីជំងឺឬសត្វល្អិត លោក ឈឿន មុនី ជម្រាបថាដំណាំនេះពុំសូវមានជំងឺតម្កាត់សត្វល្អិតអ្វីទេ ៖ «ដូចជាមិនមានសត្វល្អិតអីទេ ព្រោះអីដំឡូងវាមានជាតិពុលខ្លះហើយ សត្វអីមិនអាចទៅបេះបោចវាបានទេ ដោយសារថា វាមានជាតិពុលហើយមិនដឹងទេ ព្រោះអីហូបមិនបានផងឆៅ» ។
ស្តីពីការដាក់ជី លោក ឈឿន មុនី កត់សម្គាល់ថាដីនៅតំបន់ជាយដែននៅមានជីជាតិល្អមិនបាច់ដាក់ជីទេ ៖ «ខាងកំពង់ធំបានសួរមកថា តើដីហ្នឹងអាចប្រើជីឬអត់ ? ដីវាខុសខេត្តគ្នា ប៉ុន្តែដោយឡែកតំបន់ខ្ញុំ គឺអត់ដែលប្រើជីទេៗ ហើយមិនដឹងថា ខាងកំពង់ធំ ដីសឹករិលយ៉ាងម៉េចទេ ខ្ញុំមិនដឹងដែរ ពីព្រោះអីខាងបាត់ដំបង ជួរព្រំដែនកម្ពុជា-ថៃយើង គឺថាមិនដែលប្រើជីទេ គឺយើងដាំដោយធម្មជាតិ ។ ប៉ុន្តែវិធីការពារ ដើម្បីដំឡូងលូតលាស់នោះ គឺពីដើមយើងត្រូវការកម្មករច្រើនណាស់ សម្រាប់ទៅបោចស្មៅទៅអីៗហ្នឹង ប៉ុន្តែឥឡូវហ្នឹងអត់ទេ គឺពិធីការពារហ្នឹងប្រើថ្នាំ ។ ដី១០ហិកតាអាចប្រើតែមនុស្សពីរនាក់បានហើយ សម្រាប់តែបាញ់ថ្នាំសម្លាប់ស្មៅ បើសិនជាយើងមិនសម្លាប់ស្មៅទេ ស្មៅហ្នឹងវាដុះ វារិតដំឡូងមិនអាចឡើងបានទេ គឺថាត្រូវថយចុះគុណភាព ការថែទាំហ្នឹងគឺថាមើលស្មៅហ្នឹងតែម្ដង ។ បើសិនជាចង់ឲ្យអស់លុយតិចមានតែ ឧបមាថាយើងដាំហើយបានប្រហែលជា ១០ថ្ងៃ ឬក៏អីអ៊ីចឹងទៅ យើងចាប់ផ្ដើមបាញ់ស្មៅ ។ កាលណាបាញ់ទៅស្មៅវាអត់ដុះទាន់ទេ ដំឡូងកាលណាវាដុះប្រហែលជា ២-៣តឹកជាដើមហើយ គឺថាលឿនណាស់» ។
ចំពោះការព្រួយបារម្ភស្តីពីទីផ្សារលក់ដំឡូងនិងសំណួរអំពីចំនួនរោងចក្រកិនម្សៅមី លោកទីប្រឹក្សារោងចក្រម្សៅមី សំពៅលូន អធិប្បាយដូច្នេះ ៖ «ជាទូទៅហើយ សំបូរណាស់ទីផ្សារ មិនពិបាកអី បារម្ភដូចពីមុនទេ ពីមុនយើងដាំបានឲ្យជ្រូក ក៏ជ្រូកមិនស៊ីដែរ ប៉ុន្តែបច្ចុប្បន្នមិនមែនដូចអ៊ីចឹងទេ គឺទីផ្សារហ្នឹងវាជាទីផ្សារសកល ។ សំណួរមួយទៀតសួរថា រោងចក្រនីមួយៗតម្រូវការប៉ុន្មាន ? រោងចក្រនៅស្រុកខ្មែរយើងឥឡូវហ្នឹង នៅខាងកំពង់ចាមខ្ញុំមិនដឹងថាប៉ុន្មានទេ ព្រោះឯកឧត្ដម លោកឧកញ៉ា ណា ម៉ារាឌីហ្នឹង ដូចជាមាន ២-៣មិនដឹងទេ មិនច្បាស់ទេ ប៉ុន្តែខាងបាត់ដំបង គឺមានតែរោងចក្រខ្ញុំមួយទេ ។ ប៉ុន្តែតម្រូវការរោងចក្រយើងមិនបាច់គិតថាប៉ុន្មានតោនអីទេ ព្រោះកិនបានតែ ៤ខែអស់ដំឡូងទៅហើយ ហើយបើសិនជាកសិករយើងលោកប្រឹងប្រែង លោកគិតថា បានតម្លៃច្រើនលោកដាំ បើកិនបានតែ ៨ខែហ្នឹង មិនដឹងយកលុយទៅធ្វើអីអស់ទេ ។ អ៊ីចឹងទាំងអ្នកដាំ ទាំងអ្នកកិន អាហ្នឹងខ្ញុំសូមជម្រាបទៅចុះ ឥឡូវហ្នឹងនៅខាងបាត់ដំបង អ្នកដែលដាំដំឡូងគាត់មាន Luxes ជិះគ្របគ្នាអស់ហើយ ។ គាត់មានជាងអ្នករោងចក្រទៀត ព្រោះអីវាឡើងថ្លៃ» ។
បាទក្រៅពីសំណួររបស់លោកគ្រូនៅកំពង់ធំហើយក៏នៅមានលោក ឆម លីប៊ុនថេង ប្រធានសហគមន៍អភិវឌ្ឍន៍កសិកម្មភ្នំក្រវាញ មានទីតាំងនៅភូមិកណ្តាល ឃុំឫស្សី លើស្រុកថ្មបាំង ខេត្តកោះកុង ប្រាថ្នាចង់ឲ្យសហគមន៍មានសមាជិកជាង១០០គ្រួសាររបស់លោកងាកមកដាំដំឡូងមី ។
លោក ឆម លីប៊ុនថេង បានមានប្រសាសន៍ថា ៖ «សមាជិកសហគមន៍របស់ខ្ញុំគាត់ក្រោយពីបានស្ដាប់ប្រសាសន៍លោកប្រធាន ក្រុមហ៊ុនសំពៅលូនហ្នឹង ហើយគាត់មានការចាប់អារម្មណ៍ ចង់ដាំដំឡូងដែរ ហើយអាស៊ីសេរីថា ទីផ្សារដំឡូងកំពុងតែត្រូវប៉ាន់ ហើយសហគមន៍ខ្ញុំមានដីប្រមាណជា ៣០០ហិកតា» ។
លោក ឈឿន មុន្នី ឆ្លើយតបទៅនឹងសំណួរ លោក លី ប៊ុនថេង ដូច្នេះ ៖ «និយាយតាមវិទ្យុតាមអីហ្នឹង គ្រាន់តែជាដំណឹងទេ ប៉ុន្តែការពិស្ដារនោះ លោកគួរតែស្កាត់ជួបក្រុមហ៊ុនទៅ ព្រោះអីពីហ្នឹងមកដូចជាមិនឆ្ងាយទេ ។ ឥឡូវខាងពោធិ៍សាត់យើង មានផ្លូវពីកោះកុងហ្នឹងមកស្រុកវាលវែង ឥឡូវហ្នឹងរដ្ឋាភិបាលកំពុងតែធ្វើផ្លូវហើយល្អអស់ហើយ ដូចជាមិនមានអីឲ្យពិបាកសម្រាប់យើងទាក់ទងទេ ។ ហើយលោកសួរពីរឿងដីអី ដូចខ្ញុំជម្រាបមិញខាងកំពង់ធំដូចគ្នា ព្រោះខ្ញុំមិនបានឃើញផ្ទាល់ភ្នែកទេ ហើយខ្ញុំក៏មិនអាចជម្រាបបានដែរ ។ លោកប្រាកដជាដាំបានទាល់តែមានលក្ខខណ្ឌប៉ុន្មានយ៉ាងដូចខ្ញុំជម្រាបខាងកំពង់ធំអម្បាញ់មិញអ៊ីចឹង ថា ទីមួយយ៉ាងហោចណាស់ដីហ្នឹងត្រូវតែមានល្បាយខ្សាច់ ឬក៏អាចម៍ដីក្រហមដូចនៅខាងកំពង់ចាម ហើយដី គេហៅថាដីមមៀលក្រូច កាលណាដីមានដក់ទឹកដក់អីលោកមិនអាចដាំបានទេ ឬក៏ដីហ្នឹងមានជាតិថ្មច្រើនក៏លោកមិនអាចដាំបានដែរ ។ សហគមន៍ខេត្តណាក៏ដោយ ឲ្យតែមានបំណងចង់មករៀនសូត្រខាងសំពៅលូន ខ្ញុំនឹងឲ្យបុគ្គលិកខ្ញុំជូនអស់លោក ដោយស្ម័គ្រចិត្ត ដោយមិនគិតកម្រៃគិតអីទេ ហើយអាចជួយជាវិភាគទាន ដូចជាបាយទឹកនៅក្នុងរោងចក្រហ្នឹង អាចជួយដើម្បីឲ្យបានប្រយោជន៍ហ្នឹងពាំនាំទៅមូលដ្ឋានរបស់អស់លោកវិញ ។ លោកអាចអញ្ជើញមកថ្ងៃណាក៏បានដែរ យើងស្វាគមន៍ព្រោះអីឥឡូវហ្នឹងយើងកំពុងតែដាំ ។ ហើយឆ្នាំងនេះនៅខាងបាត់ដំបង ចាប់ពីម៉ាឡៃ មកសំពៅលូន ភ្នំព្រឹក្ស កំរៀង ហ្នឹងគឺដាំច្រើនមែនទែន ៩០% ហើយដាំដំណាំអីផ្សេងៗតែ ១០% ទេ ។ ហើយទីផ្សារខាងខ្មែរយើងដែលលោករស់នៅ កាណាដានោះក៏មកទាក់ទងជាមួយខ្ញុំដែរ មកដាក់ភាគហ៊ុនអីដើម្បីវិនិយោគលើវិស័យដំឡូងមីនេះ ។ ដូច្នេះខ្ញុំសង្ឃឹមថា កសិករយើងយកចិត្តទុកដាក់ទៅក្នុងការដាំ ។ ការដែលជឿគេពេកក៏មិនជាការល្អអីប៉ុន្មានដែរ ទាល់តែយើងបានឃើញខ្លួនយើងសិន មកមើលសិនទៅ មករោងចក្រខ្ញុំ» ៕