តើ​ការប្រើប្រាស់​បារី​អេឡិចត្រូនិច​ប៉ះពាល់​អ្វីខ្លះ​ដល់​សុខភាព?

ក្រសួងសុខាភិបាល និង​ក្រសួង​អប់រំ កាល​ពី​ពេល​ថ្មីៗ​នេះ អំពាវនាវ​ដល់​យុវជន​និង​ពលរដ្ឋ ឲ្យ​បញ្ឈប់​ការប្រើប្រាស់​បារី​អេឡិចត្រូនិច (E-cigarette) ពីព្រោះ​វា​បណ្តាល​ឲ្យ​ប៉ះពាល់​ធ្ងន់ធ្ងរ​ដល់​សុខភាព និង​អាច​ឈាន​ដល់​ការ​បាត់​បង់ជីវិត។ ​តើ​បារី​អេឡិចត្រូនិច មាន​ប្រើ​ប្រាស់​សារធាតុ​អ្វីខ្លះ ដែល​នាំ​ឲ្យ​ប៉ះពាល់​ធ្ងន់ធ្ងរ​ដល់​សុខភាព?

បារី​អេឡិចត្រូនិច (E-cigarette) មាន​ដាក់​សារធាតុ​គីមី និង​ជាតិ​នីកូទីន (Nicotine) នៅពេល​អ្នកប្រើប្រាស់ បឺត​ស្រូប​ជាតិ​ផ្សែង​ចូល​ទៅ​ក្នុង​រាងកាយ គឺ​វា​ចូល​ទៅ​ក្នុង​ខួរក្បាល​របស់​អ្នក​ជក់។ បញ្ហា​នេះ​វា​បង្ក​ឲ្យ​កើត​ជំងឺ​សួត​រ៉ាំរ៉ៃ ជំងឺ​ដាច់​សរសៃឈាម​ក្នុង​ខួរក្បាល (Strokes) និង​ជំងឺ​គាំងបេះដូង (Heart attacks) ជាដើម។

ម្ចាស់​គ្លីនីក​មេត្តា​នៅ​រាជធានី​ភ្នំពេញ លោក​វេជ្ជបណ្ឌិត ហ៊ាង រតនា មាន​ប្រសាសន៍​ប្រាប់​វិទ្យុ​អាស៊ីសេរី​ថា អ្នកប្រើប្រាស់​បារី​អេឡិចត្រូនិច មាន​ផលវិបាក​ធ្ងន់ធ្ងរ​ដល់​សុខភាព ដូចជា​អ្នក​ជក់បារី​ផង​ដែរ​។ លោក​បន្ត​ថា សារធាតុ​ដែល​ប្រើ​ក្នុង​បារី​អេឡិចត្រូនិច បណ្តាល​ឲ្យ​អ្នកប្រើប្រាស់​ញៀន និង​ប៉ះពាល់​ដល់​សរីរាង្គ​សំខាន់ៗ​មួយ​ចំនួន​ទៀត​៖ «នៅ​ពេល​ដែល​យើង​បឺត​ផ្សែង​បារី ការ​ផ្លាស់ប្តូរ​អ៊ុកស៊ីហ្សែន​នៅក្នុង​គ្រាប់​ឈាម​អត់​បាន​ល្អ ទី​១​។ ម្យ៉ាងទៀត សារធាតុ​កាបោន​មូណូអ៊ុកស៊ីដ (Carbon monoxide) នៅក្នុង​សារធាតុ​ផ្សែង​បារី គឺ​វា​រំខាន​ដល់​ការ​ចាប់​យក​គ្រាប់​ឈាម​ក្នុង​អ៊ុកស៊ីហ្សែន​។ អ៊ីចឹង​ខួរក្បាល​យើង​ត្រូវការ​អ៊ុកស៊ីហ្សែន​គឺ​អត់​ទទួល​បាន​គ្រប់គ្រាន់​ទេ មិន​ថា​ចិញ្ចឹម​ខួរក្បាល បេះដូង និង​សរីរាង្គ​ផ្សេងៗ អត់​គ្រប់គ្រាន់​ទេ​។ ដូចនេះ វា​ប៉ះពាល់​ដល់​ការ​ចង់ចាំ ប៉ះពាល់​ដល់​ការ​លូត​លាត់ បញ្ញា​ស្មារតី ដល់​អារម្មណ៍​និង​ធ្វើ​ឲ្យ​កើត​ជំងឺ​ថប់​អារម្មណ៍​...»។

ក្រសួង​សុខាភិបាល និង​ក្រសួង​អប់រំ កាលពី​ថ្ងៃទី​២៤ ខែ​មិថុនា អំពាវនាវ​ដល់​យុវជន​និង​ពលរដ្ឋ ឲ្យ​បញ្ឈប់​ការ​ប្រើប្រាស់​បារី​អេឡិចត្រូនិច (E-cigarette) ជា​បន្ទាន់។ ការ​ប្រកាស​នេះ ធ្វើឡើង​បន្ទាប់ពី​មាន​ការ​កើនឡើង​នៃ​អ្នក​ប្រើប្រាស់ ជាពិសេស យុវជន​ក្មេងៗ និង​សិស្ស​នៅ​តាម​សាលារៀន​រដ្ឋ​និង​ឯកជន។

ក្រសួង​សុខាភិបាល​សង្កត់​ធ្ងន់​ថា ការ​ប្រើប្រាស់​បារី​អេឡិចត្រូនិច ក្នុង​ចំណោម​កុមារ និង​មនុស្ស​វ័យ​ជំទង់ មាន​ផល​ប៉ះពាល់​ធ្ងន់ធ្ងរ​ដល់​ការ​អភិវឌ្ឍន៍​ខួរក្បាល មាន​អារម្មណ៍​ឆាប់​មួរ​ម៉ៅ ឆាប់​ខឹង បាត់បង់​ការ​ចងចាំ និង​មាន​ជំងឺ​ថប់​អារម្មណ៍ ជាដើម​។ បន្ថែម​ពី​នេះ ពួកគេ​នឹង​បន្ត​ញៀន​​ជក់បារី និង​ប្រើប្រាស់​គ្រឿងញៀន នៅ​ពេល​ពួកគេ​ធំ​ដឹងក្តី​ឡើង។

កាល​ពី​ឆ្នាំ​២០១៤ ក្រសួង​សុខាភិបាល បាន​ប្រកាស​ហាមឃាត់​ពី​ការប្រើប្រាស់ និង​ការ​ធ្វើ​អាជីវកម្ម​លក់​ចែកចាយ​បារី​អេឡិចត្រូនិច​នេះ និង​ចេញ​សេចក្តី​ប្រកាស​ណែនាំ​បន្ថែម កាលពី​ឆ្នាំ​២០២១ ជុំវិញ​គ្រោះថ្នាក់​នៃ​ការប្រើប្រាស់​បារី​អេឡិចត្រូនិច (E-cigarette) ក៏ប៉ុន្តែ​រហូត​មក​ដល់​ពេល​នេះ នៅតែ​មាន​ជន​ឆ្លៀត​ឱកាស​មួយ​ចំនួន បន្ត​ផ្សព្វផ្សាយ​លក់​ផលិតផល អេច ធី ភី (HTPs) ឬ (e-cigarette) នៅ​លើ​បណ្ដាញ​សង្គម ដែល​ក្រសួង​សុខាភិបាល​ចាត់ទុក​ការ​ផ្សព្វផ្សាយ​នេះ ថា ជា​ទង្វើ​ល្មើស​ច្បាប់។

គ្រូពេទ្យ​ជំនាញ​ឯកទេស​ទូទៅ លោក​វេជ្ជបណ្ឌិត ហ៊ាង រតនា បន្ត​ថា ការប្រើប្រាស់​បារី​អេឡិចត្រូនិច ពី​ដើម​ដំបូង គឺ​គេ​ប្រើ​សំរាប់​ជួយ​ផ្តាច់​ការ​ជក់​បារី​។ ក៏ប៉ុន្តែ​ក្រោយៗ​មក ក្រុមហ៊ុន​អាជីវកម្ម​ផលិត​បារី​អេឡិចត្រូនិក បាន​ប្រើ​សារធាតុ​គីមី និង​ជាតិ​នីកូទីន ដោយ​បង្កើត​គ្រប់​ពណ៌​និង​ទំរង់​រូបភាព ដើម្បី​ទាក់ទាញ​អ្នក​ប្រើប្រាស់​៖ «មួយរយៈ​ចុងក្រោយ​នេះ មានការ​ពេញនិយម​មែន​ទែន ឃើញ​ថា ក្មេងៗ​នាំគ្នា​ប្រើ​ច្រើន​នៅ​តាម​សាលារៀន​។ តាមពិត​បារី​អេឡិចត្រូនិក ហ្នឹង​ពី​ដើម​ឡើង​គេ​ធ្វើ​សំរាប់​ជួយ​ផ្តាច់​អ្នក​ជក់បារី ហើយ ក្រោយមក គឺ​នាំ​ឲ្យ​ប៉ះពាល់​សុខភាព​។ ធម្មតា គេ​ជក់​វា គេ​ដាក់​ទឹក​ថ្នាំ យើង​ឃើញថា សារធាតុ​ហ្នឹង គឺ​មាន​ជាតិ​ញៀន នីកូទីន សារធាតុ​ថ្នាំ​ពណ៌ សារធាតុ​រក្សាទុក​ហ្នឹង ក៏​វា​ប៉ះពាល់​ដល់​សុខភាព​។ ម្យ៉ាងវិញទៀត បារី​ហ្នឹង​គឺ​ផ្សែង​ច្រើន អញ្ចឹង​ធ្វើ​ឲ្យ​ផ្សែង​ហ្នឹង​ចូល​ពុល​ពេញ​សួត​តែម្តង ធ្វើ​ឲ្យ​បបូរមាត់​ស្ងួត មាន​ដំបៅ គឺ​មាន​ផល​ប៉ះពាល់​ច្រើន ដូច​បារី​ធម្មតា​ដែរ​...»។

លោក​វេជ្ជបណ្ឌិត ក៏បាន​ណែនាំ​ដល់​មាតាបិតា ឬ​អាណាព្យាបាល ត្រូវ​តាមដាន​សកម្មភាព​កូនៗ និង​ការប្រែប្រួល​អាកប្បកិរិយា​របស់​ពួកគេ​។ លោក​មាន​ប្រសាសន៍​ថា ប្រសិនបើ​ក្មេង ឬ​យុវជន ប្រើប្រាស់​បារី​អេឡិចត្រូនិក ពួកគេ​នឹង​អាច​ឈាន​ដល់​ការប្រើប្រាស់​គ្រឿងញៀន​ផ្សេងទៀត ដូចជា​កញ្ឆា ឬ​អាភៀន ជាដើម៖ «យើង​ឃើញថា ក្មេងៗ​មិនទាន់​គ្រប់​អាយុ ប្រើ​វេព (Vaping) ឬ​ប្រើប្រាស់​បារី​អេឡិចត្រូនិក អ៊ីចឹង​ក្នុងនាម​ជា​អាណាព្យាបាល ត្រូវ​តាមដាន​មើល​កូន​ផង​។ ជាពិសេស បើ​ក្មេង​ចេះ​ប្រើប្រាស់​បារី​អេឡិចត្រូនិក គាត់​ជា​ក្មេង​អត់​ល្អ​ទេ ប្រាកដជា​គេច​សាលា​ហើយ ហើយ​វា​អាច​ត្រូវ​ប្រើប្រាស់​គ្រឿងញៀន ផ្សេងទៀត​។ បើ​ឃើញ​កូន​ប្រើ​វេព ត្រូវ​តាមដាន និង​ទូន្មាន​ណែនាំ​ពី​ការ​សេពគប់​មិត្ត​ភ័ក្ត្រ​របស់​កូនៗ​ឲ្យ​បាន​ល្អ និង​យកចិត្តទុកដាក់​កូនៗ​...»។

​ចំណែក​ក្រសួង​អប់រំ​វិញ ក៏​បាន​ចេញ​សេចក្តី​ណែនាំ​ពី​ការទប់ស្កាត់​ការប្រើប្រាស់​បារី​អេឡិចត្រូនិក និង​ផលិតផល នៅ​តាម​គ្រឹះស្ថានសិក្សា សាធារណៈ​និង​ឯកជន​ផង​ដែរ។ ក្រសួង​អប់រំ​ណែនាំ​ដល់​អង្គភាព​ចំណុះ​ក្រសួង មន្ទីរអប់រំ​រាជធានី​-​ខេត្ត និង​គ្រឹះស្ថានសិក្សា​រដ្ឋ​និង​ឯកជន​ទាំងអស់ ត្រូវ​ផ្សព្វផ្សាយ​ពី​ផល​ប៉ះពាល់​ធ្ងន់ធ្ងរ​នៃ​ការប្រើប្រាស់​បារី​អេឡិចត្រូនិច ដល់​បុគ្គលិក​អប់រំ និង​អ្នក​សិក្សា ព្រមទាំង​ហាម​ដាច់ខាត​ការប្រើប្រាស់ ការចែក​ចាយ ការ​ជួញដូរ និង​ការ​ផ្សព្វផ្សាយ​ពាណិជ្ជកម្ម​គ្រប់​រូបភាព ទាំង​ក្នុង​និង​ជុំវិញ​បរិវេណ​គ្រឹះស្ថានសិក្សា​។ ក្រសួង​ក៏បាន​អំពាវនាវ ដល់​មាតាបិតា អាណាព្យាបាល បុគ្គលិក​អប់រំ និង​អ្នក​សិក្សា ត្រូវ​រាយការណ៍​ជូន​សមត្ថកិច្ច​ដើម្បី​ចាត់​វិធានការ​ជា​បន្ទាន់ ប្រសិនបើ​រក​ឃើញ​មុខ​សញ្ញា ទីតាំង​ចែកចាយ ការ​ជួញដូរ និង​ការប្រើប្រាស់​បារី​អេឡិចត្រូនិច។

ច្បាប់​ស្ដីពី​ការ​ត្រួតពិនិត្យ​ផលិតផល​ថ្នាំជក់ អ្នក​ជក់បារី គឺ​ត្រូវ​មាន​អាយុ​លើស​ពី​១៨​ឆ្នាំ​។ អង្គការ​សុខភាព​ពិភពលោក (WHO) ឲ្យ​ដឹង​ថា ការ​ជក់​បារី និង​ប្រើ​ថ្នាំជក់ បណ្តាល​ឲ្យ​មនុស្ស​ស្លាប់ និង​ប៉ះពាល់​ធ្ងន់ធ្ងរ​ដល់​សេដ្ឋកិច្ចជាតិ ដែល​នាំ​ឲ្យ​ខាតបង់​ចំណូល​សេដ្ឋកិច្ច​ប្រចាំឆ្នាំ ប្រមាណ​ជាង ៦​រយ​លាន​ដុល្លារ (US$ 663 million) នៅ​ប្រទេស​កម្ពុជា ។ ការ​ស្រាវជ្រាវ​រក​ឃើញ​ថា នៅ​កម្ពុជា ក្នុង​មួយឆ្នាំៗ មាន​អ្នក​ស្លាប់​ចំនួន ១​ម៉ឺន ៥​ពាន់​នាក់ (១៥.០០០) ក្នុង​ចំណោម​អ្នក​ប្រើប្រាស់ សរុប​ជាង​២​លាន​នាក់​។ បន្ថែម​ពី​នេះ កម្ពុជា ចំណាយ​ថវិកា​ជាង ១៦០​លាន​ដុល្លារ (160 millions) សំរាប់​សេវា​ព្យាបាល​ជំងឺ​រ៉ាំរ៉ៃ​ទូទៅ ដែល​ជាប់​ពាក់ព័ន្ធ​នឹង​ការ​ជក់​បារី៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។