លោក សម រង្ស៊ី ថា លោក ហ៊ុន សែន បរាជ័យ​ក្នុង​ការ​បំបាត់​សំឡេង​ប្រឆាំង​ក្នុង​ព្រឹទ្ធសភា

ដោយ ខាន់ លក្ខិណា
2024.02.27
លោក សម រង្ស៊ី ថា លោក ហ៊ុន សែន បរាជ័យ​ក្នុង​ការ​បំបាត់​សំឡេង​ប្រឆាំង​ក្នុង​ព្រឹទ្ធសភា សមាជិក​នៃសម្ពន្ធភាពឆ្ពោះទៅមុខ ចូលរួមពិធីបិទ​ឃោសនាបោះឆ្នោតព្រឹទ្ធសភា កាលពីថ្ងៃទី២៣ កុម្ភៈ ២០២៤។
រូប៖ ហ្វេសប៊ុកគណបក្សភ្លើងទៀន

ប្រធាន​ស្តីទី​គណបក្ស​សង្គ្រោះជាតិ​លោក សម រង្ស៊ី ថា លោក ហ៊ុន សែន បរាជ័យ​ក្នុង​ការ​បំបាត់​សំឡេង​ប្រឆាំង​នៅ​ក្នុង​ព្រឹទ្ធសភា បន្ទាប់ពី​គណបក្ស​ឆន្ទៈ​ខ្មែរ ដែល​តំណាង​ឱ្យ​សម្ព័ន្ធភាព​ឆ្ពោះ​ទៅ​អនាគត​ឈ្នះ​បាន ៣​កៅអី នៅ​ក្នុង​ការបោះឆ្នោត​ជ្រើសតាំង​សមាជិក​ព្រឹទ្ធសភា​នៅ​ថ្ងៃទី​២៥ កុម្ភៈ។

មន្ត្រី​បក្ស​ឆន្ទៈ​ខ្មែរ​ថា បើ​កម្លាំង​អ្នក​ប្រជាធិបតេយ្យ​រួបរួម​គ្នា នោះ​បក្ស​ប្រឆាំង​ប្រហែល​ទទួល​បាន​កៅអី​នៅ​ព្រឹទ្ធសភា​ច្រើន​ជាងនេះ​ទៅ​ទៀត។

ប្រធាន​ស្ដីទី​គណបក្ស​សង្គ្រោះជាតិ លោក សម រង្ស៊ី បាន​សរសេរ​នៅ​លើ​ទំព័រ​ហ្វេសប៊ុក​ផ្លូវការ​របស់​លោក​ថា របប​ផ្ដាច់ការ​ទីក្រុង​ភ្នំពេញ និង ត្រកូល ហ៊ុន នឹក​ស្មាន​ថា ពួកគេ​អាច​កម្ចាត់​កម្លាំង​ប្រជាធិបតេយ្យ​ខ្មែរ មិន​ឱ្យ​មាន​សេសសល់​អ្វី​ទេ និង​ជាពិសេស​ក្នុង​ការ​រៀបចំ​ឱ្យ​លោក ហ៊ុន សែន ឡើង​ទៅ​កាន់​តំណែង​ជា​ប្រធាន​ព្រឹទ្ធសភា។

លោក សម រង្ស៊ី ចាត់ទុក​ការ​ទទួល​បាន​អាសនៈ​ព្រឹទ្ធសភា​ចំនួន ៣ របស់​គណបក្ស​ឆន្ទៈ គឺជា​ជោគជ័យ​មួយ​សម្រាប់​កម្លាំង​ប្រជាធិបតេយ្យ​ខ្មែរ ក្នុង​ស្ថានភាព​នយោបាយ​ដ៏​លំបាក​បំផុត​នៅ​ពេល​នេះ និង​ក្នុង​បរិយាកាស​គំរាមកំហែង និង​ទិញដូរ​សន្លឹកឆ្នោត​ដ៏​អាប់អួរ។

លោក សម រង្ស៊ី បាន​កោតសរសើរ​ដល់​ទឹកចិត្ត​ដ៏​បរិសុទ្ធ នៃ​សមាជិក សមាជិកា​ក្រុមប្រឹក្សា​ឃុំ​-​សង្កាត់​ជាង ៧០​ភាគរយ (៧០%) ដែល​បាន​ជាប់ឆ្នោត​ក្រោម​ស្លាក​គណបក្ស​ភ្លើងទៀន ហើយ​ដែល​នៅតែ​ស្មោះត្រង់ ជានិច្ចកាល​ចំពោះ​ប្រទេសជាតិ និង​ប្រជារាស្ត្រ ដោយ​បាន​រក្សា​ឧត្តមគតិ​ដើម​របស់​ខ្លួន​យ៉ាង​ខ្ជាប់ខ្ជួន។

អ្នកនយោបាយ​ប្រឆាំង​ចាស់វស្សា​រូប​នេះ ក៏បាន​កត់សម្គាល់​អំពី​ការ​ចុះ​ចូល​របស់​សកម្មជន​ប្រឆាំង​មួយចំនួន​ជាមួយ​បក្ស​កាន់​អំណាច ដោយ​លោក​យល់ថា ពួកគេ​គ្មាន​ជំរើស ហើយ​ត្រូវ​បង្ខំចិត្ត​ចុះចូល​ជា​បណ្ដោះអាសន្ន​ជាមួយ​ពួក​ជន​ផ្ដាច់ការ ដែល​បាន​ប្រើប្រាស់​ការ​គំរាមកំហែង​ផង និង​ការប្រើ​លុយកាក់​ទិញ​ទឹកចិត្ត​ផង។

ទោះជា​យ៉ាងណា លោក​យល់​ថា អ្នក​ដែល​ទៅ ចុះចូល​ជាមួយ​មនុស្ស​អាក្រក់​នោះ គឺ​ទៅ​តែ​ខ្លួន​ទេ តែ​ចិត្ត​នៅ​ដដែល គឺ​នៅតែ​ឱ្យ តម្លៃ​ដល់​ឧត្តមគតិ​ដើម​ដ៏​ប្រពៃ​របស់​ខ្លួន។

គណៈកម្មាធិការ​ជាតិ​រៀបចំ​ការបោះឆ្នោត (..) កាលពី​យប់​ថ្ងៃទី​២៥ កុម្ភៈ បាន​ប្រកាស​លទ្ធផល​បឋម​នៃ​ការ​បោះឆ្នោត​ព្រឹទ្ធសភា​ថា គណបក្ស​ប្រជាជន​កម្ពុជា​ទទួល​បាន ៥៥​អាសនៈ និង​គណបក្ស​ឆន្ទៈ​ខ្មែរ​បាន ៣​អាសនៈ ក្នុង​ចំណោម​អាសនៈ​ប្រកួតប្រជែង​សរុប​ចំនួន​៥៨។

ឆ្លើយតប​ចំពោះ​ការ​លើកឡើង​របស់​លោក សម រង្ស៊ី នេះ អ្នកនាំពាក្យ​គណបក្ស​ប្រជាជន​កម្ពុជា លោក សុខ ឥសាន ប្រាប់​វិទ្យុ​អាស៊ីសេរី​នៅ​ថ្ងៃទី​២៦ កុម្ភៈ ថា នោះ​ជា​វប្បធម៌​របស់​លោក សម រង្ស៊ី ដែល​ដាក់​កំហុស​លើ​អ្នកដទៃ គេច​ពី​បរាជ័យ និង​ការទទួលខុសត្រូវ​របស់​ខ្លួន ក្នុង​គោលដៅ​ធ្វើ​ឱ្យ​មហាជន​មានការ​យល់​ច្រឡំ​តែប៉ុណ្ណោះ។

លោក សុខ ឥសាន៖ «យ៉ាងណាក៏ដោយ យើង​ឃើញថា លទ្ធផល​បោះឆ្នោត​បឋម​ត្រូវ​បាន​ប្រកាស​ផ្សាយ​ជា​សាធារណៈ​រួចហើយ ដោយ​គ..ប។ អ៊ីចឹង​នេះ ជា​ឆន្ទៈ​របស់​អង្គ​បោះឆ្នោត​យើង​ត្រេកអរ​ចំពោះ​ការសម្រេចចិត្ត​របស់​អង្គ​បោះឆ្នោត អត់​មាន​បញ្ហា​អី​ទេ ទោះបី​ទណ្ឌិត​មេ​ឧទ្ទាម​ក្រៅច្បាប់​និយាយ​ម៉េច​ក៏ដោយ ក៏​អត់​មាន​ប្រសិទ្ធភាព​អី​ទេ ពីព្រោះ​លទ្ធផល​បាន​ចេញ ឃើញ​ទាំងអស់គ្នា​ហើយ​ទូទាំង​ប្រទេស»

បើ​ទោះជា​ទទួល​បាន ៣​កៅអី​នៅ​ព្រឹទ្ធសភា​ក្តី អគ្គលេខាធិការ​គណបក្ស​ឆន្ទៈ​ខ្មែរ លោក គង់ មុនីកា លើកឡើង​ថា ប្រសិនបើ អ្នក​ប្រជាធិបតេយ្យ​រួបរួម​គ្នា និង​គ្មាន​ការ​អូស​ទាញ​ពី​បក្ស​គូប្រជែង​ផង​នោះ បក្ស​ប្រឆាំង​អាច​ទទួល​បាន​សំឡេង​ក្នុង​ព្រឹទ្ធសភា​លើស​ពី ៣​កៅអី​ទៅ​ទៀត។

លោក គង់ មុនីកា រំពឹង​ថា ការ​របស់​គណបក្ស​ឆន្ទៈ​ខ្មែរ ទទួល​បាន​អាសនៈ​ព្រឹទ្ធសភា​អាណត្តិ​ទី ៥ យ៉ាងហោចណាស់​ក៏ ៦ កៅអី​ដែរ ប៉ុន្តែ​លោក​សោកស្ដាយ ដែល​គណបក្ស​នេះ ទទួល​បាន​តែ ៣​កៅអី។

លោក គង់ មុនីកា៖ «អង្គ​បោះឆ្នោត គឺជា​សមាជិក​ក្រុមប្រឹក្សា​ជាប់ឆ្នោត​នេះ គឺ​ត្រូវតែ​មាន​ភាព​ស្មោះត្រង់​ជាមួយ​ប្រជាពលរដ្ឋ​ម្ចាស់​ឆ្នោត​ហើយ ហើយ​នឹង​ភាព​ស្មោះត្រង់​ជាមួយ​គណបក្ស​នយោបាយ ដែល​ខ្លួន​បាន​ឈរឈ្មោះ​ជាប់ឆ្នោត​ហ្នឹង​។ ដូច្នេះ ហើយ​ខ្ញុំ​គិតថា មិនដឹង​អង្គ​បោះឆ្នោត​មួយ​ចំនួន មានការ​លំបាក​យ៉ាងម៉េច​នោះ​ទេ ប៉ុន្តែ​ចង់ឱ្យ​បន្ត​រក្សា​ជំហរ​ស្មោះត្រង់​ជាមួយ​គណបក្ស ជាពិសេស​ចំពោះ​ប្រជាពលរដ្ឋ​ដែល​បាន​គាំទ្រ​ខ្លួន​ឱ្យ​បាន​រឹងមាំ»

អ្នក​ប្រឹក្សា​យោបល់​ផ្នែក​អភិវឌ្ឍន៍​ផ្នត់គំនិត និង​ការស្រាវជ្រាវ លោក សេក សុជាតិ បញ្ចេញ​ទស្សនៈ​ថា ចេញ​ពី​លទ្ធផល​បោះឆ្នោត​ព្រឹទ្ធសភា​នេះ គួរតែ​ជា​មេរៀន​ចុងក្រោយ​សម្រាប់​ដាស់​ស្មារតី អ្នក​នយោបាយ​ដែល​មាន​និន្នាការ​ប្រជាធិបតេយ្យ​ទាំងឡាយ ឱ្យ​មាន​ភាព​ចាស់ទុំ​ជាង​មុន ហើយ​ចេះ​ផ្សះផ្សា​ចងសម្ព័ន្ធ​គ្នា​ឱ្យ​រឹងមាំ។

លោក​ថា អ្នក​ប្រជាធិបតេយ្យ​គួរ​បង្ហាញ​ភាព​ទន់ភ្លន់​ស្វែងរក​ការ​ជជែក​គ្នា ហើយ​ស្ដាប់​បំណងប្រាថ្នា​របស់​ប្រជាពលរដ្ឋ។

លោក សេក សុជាតិ៖ «អ្នក​ប្រជាធិបតេយ្យ​ទទួល​បាន​លទ្ធផល​លើក​នេះ ចាត់ទុកជា​មេរៀន​ចុងក្រោយ​ចុះ​។ ខ្ញុំ​សង្ឃឹម​ថា នឹង​មិន​មាន​មេរៀន​ណា​អាក្រក់​ជាង​មេរៀន​លើក​ហ្នឹង​ទេ ហើយ​អ្នក​ប្រជាធិបតេយ្យ​អាច​ងាក​មក​ចងសម្ព័ន្ធ​រៀបចំ​យុទ្ធសាស្ត្រ​រួមគ្នា​ឡើងវិញ សម្រាប់​ត្រៀម​ធ្វើការ​បោះឆ្នោត​នៅក្នុង​នីតិកាល​ក្រោយៗ​សម្រាប់​ការបោះឆ្នោត ឃុំ​សង្កាត់ ២០២៧ និង​ឆ្នាំ​២០២៨ ហើយ​ម៉ោង​នេះ គ្រាន់​តែ​ជា​មេរៀន​មួយ ដែល​ខ្ញុំ​គិតថា ល្មម​សាក​សម​ឱ្យ​អ្នក​ប្រជាធិបតេយ្យ​រៀនសូត្រ​ហើយ​កុំ​មានៈ»

ចំណែក​ទីប្រឹក្សា​គណបក្ស​កម្លាំងជាតិ លោក រ៉ុន ឈុន យល់​ស្រប​នឹង​ការ​លើកឡើង​របស់​អ្នកឃ្លាំមើល​ដោយ​លើកឡើង​ថា ទាល់តែ​មានការ​រួបរួម​កម្លាំង​ប្រជាធិបតេយ្យ ទើប​ក្រុមប្រឆាំង​អាច​ដណ្ដើម​បាន​ជ័យជម្នះ។

លោក រ៉ុង ឈុន៖ «គណបក្ស​កម្លាំង​ជាតិ បើកផ្លូវ បើក​ជំហរ​ទទួលរង​ការ​ស្វាគមន៍​ការ​ជជែក​គ្នា ដើម្បី​រក​ដំណោះស្រាយ​ដំណើរ​ទៅមុខ​តទៅ​ទៀត»

អ្នកឃ្លាំមើល​លើកឡើង​ថា ក្រៅពី​មាន​ព័ត៌មាន​ចោទប្រកាន់​ពី​ការទិញ​ទឹកចិត្ត​អង្គ​បោះឆ្នោត ក៏​មាន​មូលហេតុ នៃ​ការ​ប្រជែង​អង្គ​បោះឆ្នោត​គ្នា រវាង​គណបក្ស​កម្លាំង​ជាតិ និង​គណបក្ស​ឆន្ទៈ​ខ្មែរ ដែល​ធ្វើ​ឱ្យ​គណបក្ស​ឆន្ទៈ​ខ្មែរ ឈ្នះ​បានតែ ៣​កៅអី​នៅ​ក្នុង​ព្រឹទ្ធសភា។

ទោះជា​បែបនេះ​ក្តី ប្រធាន​ស្តីទី​គណបក្ស​សង្គ្រោះជាតិ លោក សម រង្ស៊ី បាន​សរសេរ​នៅ​លើ​ហ្វេសប៊ុក​ដោយ​បង្ហាញ​នូវ​ភាព​ជឿជាក់​ថា កាលៈទេសៈ​នយោបាយ នឹង​ប្រែប្រួល​នៅ​ថ្ងៃ​ណាមួយ ដែល​នឹង​បើកផ្លូវ​ឱ្យ​អ្នក​ប្រជាធិបតេយ្យ​ខ្មែរ​ទាំងអស់ ដែល​ស្រឡាញ់​សេរីភាព និង​យុត្តិធម៌ អាច​រួបរួម​គ្នា​ជា​ធ្លុង​មួយ​ឡើង​វិញ ដើម្បី​នាំមក​នូវ​ការ​ផ្លាស់ប្តូរ​ជា​វិជ្ជមាន ដែល​ប្រជារាស្ត្រ​ខ្មែរ​ភាគច្រើន រង់ចាំ​យូរណាស់​មក​ហើយ​នៅក្នុង​ជម្រៅ​ចិត្ត​របស់​ខ្លួន៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។