អ្នកប្រើប្រាស់បណ្ដាញសង្គម និងសកម្មជនសង្គម ចាត់ទុកវិទ្យុអាស៊ីសេរីជាកញ្ចក់ឆ្លុះសង្គម ផ្ដល់នូវព័ត៌មានពិត អត់លម្អៀង និងប្រៀបដូចជាអាហារប្រចាំថ្ងៃដែលមិនអាចខ្វះបាន។
យើងខ្ញុំពិតជាសោកស្តាយរកទីបំផុតគ្មាន ប្រសិនបើគ្មានអាស៊ីសេរី សំឡេងយើងជាជនរងគ្រោះក៏មិនមានដែរ។
— សារលើហ្វេសប៊ុករបស់ប្រធានសមាគមនៃសេដ្ឋកិច្ចក្រៅប្រព័ន្ធ លោក វ៉ន់ ពៅ
ចំណែកលោក អាឡិច ស្ថាបនិកនៃចលនាមាតាធម្មជាតិ និងលោក គឹម សុខ អ្នកអត្ថាធិប្បាយនយោបាយ បានថ្លែងក្នុងវេទិកាអ្នកស្ដាប់វិទ្យុអាស៊ីសេរី នៅយប់ថ្ងៃអង្គារ ទី១៨ ខែមីនា ដែរថា ពួកលោកក៏សោកស្តាយជាខ្លំាងណាស់ដែរ បើវិទ្យុអាស៊ីសេរី មិនអាចបន្តសកម្មភាពរបស់ខ្លួនបាន។
ទោះបីយ៉ាងណាក៏ដោយ ពួកគាត់យល់ថា អាស៊ីសេរី នៅតែស្ថិតក្នុងបេះដូងប្រជាពលរដ្ឋខ្មែរគ្រប់រូប ជាពិសេសអ្នកស្រឡាញ់ការគោរពសិទ្ធិមនុស្ស យុត្តិធម៌សង្គម និងប្រជាធិបតេយ្យ។
រាល់ថ្ងៃកុំតែបានវិទ្យុRFAទេ ដែលជួយអោយប្រជាជនដឹងពត័មានជាច្រើន បើនៅស្រុកខ្មែរវិញ មិនមានអ្នកណាហ៊ានផ្សាយអំពីរឿងគ្រប់យ៉ាងនោះទេ ជាពិសេសរឿងជាតិនឹងម៉ង។
— សារម្ចាស់គណនីហ្វេសប៊ុកឈ្មោះ ជីង ជីង
វាជាដំណឹងដ៏សោកសៅមួយសម្រាប់ខ្ញុំ ក្នុងនាមជាអ្នកគាំទ្រវិទ្យុអាស៊ីសេរី អស់រយៈពេលជិត២០ឆ្នាំ តាំងពីមិនទាន់មាន Smart Phone ហើយស្ដាប់តាមវិទ្យុ។ ខ្ញុំស្ពាយវិទ្យុទៅស្រែដកស្ទូង។ អាស៊ីសេរីតែងតែកំដរខ្ញុំធ្វើកិច្ចការសាលារហូតដល់យប់ជ្រៅរៀងរាល់ពេលខ្ញុំនៅវិទ្យាល័យ រហូតដល់ឥឡូវ មានស្មាតហ្វូនក៏នៅតែស្ដាប់។ អាស៊ីសេរីបានផ្ដល់ចំណេះដឹង និងព័ត៌មានពិតជាច្រើនរាប់មិនអស់ ប្រសិនបើអាស៊ីសេរី លែងបានដំណើរការទៀត ស្មើនឹងយើងបានបាត់អ្នករូតវាំងននសង្គម ហើយយើងនឹងបាត់បង់អ្នកដែលបានផ្ដល់ឲ្យយើងនូវពត៌មានពិតមិនលម្អៀងដ៏សំខាន់មួយអញ្ចឹងដែរ។ អរគុណចំពោះរយៈពេលកន្លងមកនេះ តែយ៉ាងណាក៏សង្ឃឹមថានឹងមានការកែប្រែណាមួយនៅថ្ងៃអនាគតដែលអាចឲ្យវិទ្យុនេះអាចដំណើរការធម្មតាវិញ។
— សារម្ចាស់គណនីហ្វេសប៊ុកឈ្មោះ ជេន ជេន (Jen Jen )
វិទ្យុដែលខ្ញុំធ្លាប់ស្ដាប់តាំងតែពីខ្ញុំនៅក្មេងជាមួយលោកតាខ្ញុំកាលគាត់នៅមានព្រះជន្ម រហូតដល់ជំនាន់ខ្ញុំ ឥឡូវមកបិទ ខ្ញុំពិតជាសោកស្ដាយខ្លាំងណាស់។ លោកតាខ្ញុំតែងតែប្រើអោយខ្ញុំប្ដូរថ្មវិទ្យុដើម្បីស្ដាប់វិទ្យុអាស៊ីសេរីរហូត កាលនោះមានតែវិទ្យុទេដែលផ្សាយ ឥឡូវមកបិទ? ថ្ងៃខ្លះអត់មានលុយទិញថ្មថ្មីត្រូវយកថ្មចាស់ទៅហាលថ្ងែ ដើម្បីបានប្រើម្ដងទៀតក៏មានដែរ។
— សារម្ចាស់គណនីហ្វេសប៊ុកឈ្មោះ ជីវិត ថ្មី
ក្នុងនាមខ្ញុំជាអ្នកដែលតែងតែគាំទ្រ ខ្ញុំពិតជាមានការសោកស្ដាយណាស់នៅពេលបានឃើញព័ត៌មានបែបនេះ ខ្ញុំមិនដឹងថាលោកប្រធានាធិបតី ដូណាល់ ត្រាំ គាត់គិតបែបណានោះទេ នៅពេលដែលបិទខ្ទប់វិទ្យុដែលនិយាយព័ត៌មានពិត ដូចយើងបើកដៃឱ្យរបបផ្ដាច់ការមួយចំនួន ធ្វើព្យុះ ធ្វើភ្លៀង ពេញពិភពលោក។
— សារម្ចាស់គណនីហ្វេសប៊ុកឈ្មោះ សុផល ត្រុន
ដោយឡែកម្ចាស់គណនីហ្វេសប៊ុកមួយផ្សេងទៀត ដែលមានឈ្មោះថា ថាវរី អ៊ុង (Thavary Ung) គាត់បានបញ្ចេញមតិ ចង់ឲ្យវិទ្យុអាស៊ីសេរី ផ្នែកភាសាខ្មែរផ្តល់ឱកាសឲ្យប្រិយមិត្តអាស៊ីសេរីទាំងអស់ ចូលរួមជួយគាំទ្រវិទ្យុមួយនេះ នៅតែអាចដំណើរការទៅមុខទៀតដូចធម្មតា។
តើយើងជាប្រជាពលរដ្ឋខ្មែរអាចជួយអ្វីបានខ្លះទេ? សូមអាស៊ីសេរីប្រាប់មកពួកយើងផង? ព្រោះយើងជាអ្នកប្រជាធិបតេយ្យ ត្រូវការព័ត៌មានពិត ត្រូវការវិទ្យុអាស៊ីសេរី ខ្លាំងណាស់។
— សារម្ចាស់គណនីហ្វេសប៊ុកឈ្មោះ ថាវរី អ៊ុង (Thavary Ung)
វិទ្យុអាស៊ីសេរី បានចាប់ផ្ដើមការផ្សាយដំបូងរបស់ខ្លួនជាភាសាចិនកុកងឺ (Mandarin) កាលពីឆ្នាំ១៩៩៦ ហើយបានពង្រីកការផ្សាយជាបន្តបន្ទាប់ទៀតរហូតដល់ ៩ភាសា រួមមាន៖ ភាសាចិនកាតាំង (Cantonese) អ៊ុយហ្គ័រ (Uyghur) ទីបេ (Tibetan) កូរ៉េ (Korea) ខ្មែរ (Khmer) វៀតណាម (Vietnamese), ភូមា (Burmese), និងឡាវ (Lao)។
រដ្ឋាភិបាលសហព័ន្ធអាមេរិក បានបញ្ចប់ការផ្តល់ជំនួយថវិកាដល់វិទ្យុអាស៊ីសេរី និងបណ្ដាញវិទ្យុដៃគូដទៃទៀត កាលពីព្រឹកថ្ងៃសៅរ៍ ទី១៥ ខែមីនា។ ឆ្លើយតបនឹងការសម្រេចនេះ នាយិកាវិទ្យុអាស៊ីសេរី អ្នកស្រី បេយ៍ ហ្វាង (Bay Fang) ថ្លែងថា ស្ថាប័នវិទ្យុអាស៊ីសេរី នឹងតវ៉ាជំទាស់នឹងសេចក្តីសម្រេចនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។