ទំព័រហ្វេសប៊ុកស្នងការដ្ឋាននគរបាលខេត្តព្រះសីហនុបានបង្ហោះនៅថ្ងៃទី១២ ខែកញ្ញាថា សមត្ថកិច្ចជំនាញបង្ក្រាបបានក្រុមជនសង្ស័យដែលពាក់ព័ន្ធនឹងករណីបាញ់បោះគ្នាដោយសេរីកាលពីយប់អធ្រាត្រ នៅហាងបាយក្នុងតំបន់ឆ្នេរអូរឈើទាល បានចំនួន៤៧នាក់ ក្នុងនោះជនជាតិចិន៣៥នាក់ នេប៉ាល់៤នាក់ និងខ្មែរ៨នាក់ ហើយបានដកហូតអាវុធវែងខ្លី១៣ដើម រួមទាំងគ្រាប់កាំភ្លើង គ្រឿងញៀន និងរថយន្ត០៥គ្រឿង។
សមត្ថកិច្ចបានបញ្ជាក់ថា មូលហេតុនៃការបាញ់គ្នារវាងក្រុមជនជនជាតិចិនទាំងពីរក្រុមនេះ កំពុងស្ថិតក្នុងការស្រាវជ្រាវ ដើម្បីកសាងសំណុំរឿងបញ្ជូនទៅតុលាការ។ បណ្ដាញសារព័ត៌មានក្នុងស្រុកមួយចំនួនបានរាយការណ៍ថា ក្រុមជនជាតិចិនជាច្រើននាក់ដែលប្រើប្រាស់រថយន្តទំនើបៗ និងមានអង្គរក្សជាជនជាតិខ្មែរ បានកាន់អាវុធគ្រប់ដៃដេញបាញ់ប្រហារគ្នាជាច្រើនគ្រាប់ បន្ទាប់ពីកើតមានជម្លោះឈ្លោះប្រកែកគ្នា ប៉ុន្តែមិនមានការបញ្ជាក់ថា មានអ្នកស្លាប់ឬរបួសនោះទេ។
ករណីបាញ់បោះសេរីដោយជនជាតិចិនជាថ្មីនេះ កំពុងធ្វើឱ្យពលរដ្ឋរិះគន់ពេញបណ្ដាញសង្គម អំពីអសមត្ថភាពរបស់រដ្ឋាភិបាល ក្នុងការបង្ក្រាបលើក្រុមជនជាតិចិន ដែលមករស់នៅក្នុងប្រទេសកម្ពុជា ហើយនៅតែអាចបង្កឱ្យភាពវឹកវរប៉ះពាល់ដល់សង្គមតាមចិត្ត។ កាលពីខែកុម្ភៈ ក៏មានជនជាតិចិនពីរក្រុម ប្រើប្រាស់កាំភ្លើងវែងប្រភេទអាកា (AK) ចំនួន២ដើម និងកាំភ្លើងខ្លី បាញ់បោះគ្នាអស់ជាច្រើនគ្រាប់ នៅទល់មុខនឹងអាកាសយានដ្ឋានអន្តរជាតិភ្នំពេញ ដោយសារតែកើតមានជម្លោះអំឡុងពេលផឹកស៊ី។
សូមរង់ចាំអានព័ត៌មានពិស្ដារ!