ລາວຄຣິສຕຽນສລອງວັນ ຄຣິສມາສ ນ້ອຍລົງ

ອຸ່ນເກ້ວ ສຸກສະຫວັນ
2020-12-24
Share
ລາວຄຣິສຕຽນສລອງວັນ ຄຣິສມາສ ນ້ອຍລົງ ໂບດຂອງ ຊາວລາວຄຣິສຕຽນ ຢູ່ ສປປ ລາວ
File photo: RFA

ຊາວລາວຄຣິສຕຽນ ຢູ່ຫຼາຍແຂວງ ບໍ່ສາມາດສລອງບຸນຄຣິມາສ ໃຫຍ່ ຄືປີທີ່ຜ່ານມາ, ຍ້ອນທາງການໄດ້ອອກມາຕການຫ້າມຈັດ ງານຕ່າງໆ ທີ່ມີຄົນຈຳນວນຫຼາຍມາໂຮມຊຸມນຸມກັນ ເພື່ອປ້ອງການການຣະບາດຂອງໂຄວິດ19. ຊາວລາວຄຣິຕຽນ ຢູ່ແຂວງ ສາລະວັນ ກ່າວຕໍ່ເອເຊັຽເສຣີ ໃນວັນທີ 23 ທັນວາ ວ່າ:

"ກະມື້ວັນທີ 20 ນີ້ ຈັດຜ່ານໄປແລ້ວ ກະມີການຂີດຈຳກັດຄືກັນຫັ້ນແຫຼະ, ແຕ່ວ່າ ບ່ອນມັນຈຳເປັນຫັ້ນນະ ຄົນບໍ່ໄດ້ຫຼາຍປານໃດ ປີກາຍມ່ວນ ແຕ່ປີນີ້ ບໍ່ໄດ້ປານໃດ ຂໍ້ຈຳກັດກະບໍ່ໃຫ້ ເຊີນຕ່າງແຂວງ ຕ່າງເມືອງ ໃຫ້ເຮັດແຕ່ຊຸມຊົນ."

ສ່ວນວ່າ ຊາວຄຣິສຕຽນ ຢູ່ແຂວງຫລວງພຣະບາງ ກໍໄດ້ພາກັນຈັດພິທີສູດມົນ ແລະ ພິທີອື່ນໆ ໃນວັນທີ 13 ທັນວາ ທີ່ຜ່ານມາ.

"ເຮັດແລ້ວ, ເຮັດວັນທີ 13 ຈັດແບບເປັນງານນ້ອຍຫັ້ນນະ, ບໍ່ໄດ້ຈັດໃຫຍ່, ໃຫ້ຈັດແບບໂປດໃຜໂບດລາວ, ໃຊ້ເວລາໜ້ອຍກວ່າ ແຕ່ລະປີເພາະວ່າ ເຮົາຈະບໍ່ມີຫຼາຍຣາຍການເນາະ, ເນື່ອງຈາກວ່າ ວິກິດໂຄວິດ ແບບນີ້ແດ່, ເຮົາກະເລີຍແບບຈັດໄວໆເອົາ ແລະ ຈະບໍ່ມີຕອນກາງຄືນ."

ທ່ານກ່າວຕື່ມວ່າໃນປີນີ້, ຢູ່ເຂດຂອງທ່ານບໍ່ໄດ້ເຊີນຊາວຄຣິສຕຽນຈາກເມືອງ ແລະແຂວງອື່ນໆ, ຮວມທັງບໍ່ໄດ້ເຊີນເຈົ້າໜ້າທີ່ຂັ້ນເທິງ ມາຮ່ວມງານຄືກັບປີທີ່ຜ່ານມາ ເພື່ອບໍ່ໃຫ້ມີຄົນ ຫຼາຍເກີນໄປ, ແຕ່ກ່ອນຈະຈັດງານບຸນຄຣິສມາສ ກໍໄດ້ມີການຂໍອະນຸຍາດຈາກເຈົ້າ ໜ້າທີ່ຂັ້ນບ້ານ ຕາມປົກກະຕິ ເພື່ອໃຫ້ເຈົ້າໜ້າທີ່ຂັ້ນບ້ານ ມາຮັກສາຄວາມເປັນຣະບຽບ ຮຽບຮ້ອຍ ໃນງານ.

ສ່ວນການສລອງບຸນຄຣິສມາສ ຫຼາຍບ່ອນ ຢູ່ແຂວງວຽງຈັນ ທີ່ໄດ້ຈັດໄປແລ້ວ ໃນວັນທີ 13 ທັນວາ ທີ່ຜ່ານມາ ກໍເປັນໄປດ້ວຍຄວາມ ຮຽບຮ້ອຍ, ເຖິງວ່າຈະບໍ່ຍິ່ງໃຫຍ່ ຄືປີທີ່ຜ່ານມາ ຍ້ອນວ່າ ແຈ້ງການບໍ່ໃຫ້ຈັດງານແບບມວນຊົນ, ຄຸນພໍ່ປະຈຳໂບດແຫ່ງນຶ່ງ ຢູ່ແຂວງວຽງຈັນ ກ່າວວ່າ:

"ແຈ້ງການທາງລູນລາວ ແລ້ວກໍທາງຣັຖບານ ຂະເຈົ້າປະກາດໃຫ້ເຮັດທັມມະດາ ບໍ່ໃຫ້ເຊີນແຂກຂັ້ນເທິງ ບໍ່ໃຫ້ເຊີນບ້ານນີ້ບ້ານຫັ້ນ ມາຮ່ວມ, ວັນທີ 25 ນີ້ເບາະ ກໍມີແຕ່ຊິໄປຮ່ວມນຳ ພີ່ນ້ອງ ໄປເທສນາ."

ໂບດ ຢູ່ເມືອງສີໂຄດຕະບອງ ນະຄອນຫລວງວຽງຈັນກໍມິດງຽບ, ແລະເຈົ້າໜ້າທີ່ໂບດ ກໍບໍ່ໄດ້ມາພົວພັນອຳນາດການປົກຄອງບ້ານ, ເຈົ້າໜ້າທີ່ເມືອງສີໂຄດຕະບອງ ທ່ານນຶ່ງກ່າວຕໍ່ ເອເຊັຽເສຣີ ວ່າ:

"ເພິ່ນຈະຈັດວັນທີ 25 ທຸກປີເນາະ, ລະປີນີ້ບໍ່ເຫັນເພິ່ນມາພົວພັນທາງບ້ານ, ຕາມທັມມະດາແລ້ວກ່ອນໜ້າປະມານ ວັນທີ 16-17 ເພິ່ນມາພົວພັນທາງບ້ານໄວ້ນະ, ປີນີ້ບໍ່ເຫັນເພິ່ນມາ ພົວພັນ ຄິດວ່າປີນີ້ ເພິ່ນອາດຈະບໍ່ຈັດ, ເພາະເພິ່ນບໍ່ໄດ້ມາພົວພັນນຳພວກເຮົາ."

ເຈົ້າໜ້າທີ່ກະຊວງພາຍໃນ ທ່ານນຶ່ງກ່າວວ່າ, ສຳລັບການຈັດງານຄຣິສມາສ ຂອງຊາວລາວຄຣິສຕຽນໃນປີນີ້, ທາງການຈະໃຫ້ຈັດ ວັນທີ 25 ທັນວາ ແບບງ່າຍໆ ໂດຍຫຼີກລ້ຽງບໍ່ໃຫ້ ຄົນຈຳນວນຫຼາຍມາເຕົ້າໂຮມ:

"ຕາມແຈ້ງການຫັ້ນໃຫ້ຈັດເປັນງານນ້ອຍຫັ້ນນະ, ບໍ່ໃຫ້ຈັດເຕົ້າໂຮມກັນຫຼາຍຢ່າງຫັ້ນນະ, ສົມມຸດວ່າຢູ່ບ້ານນຶ່ງເນາະ, ໃຫ້ຈັດເປັນຈຸນຶ່ງ, ບໍ່ໃຫ້ຈັດເປັນຫຼາຍໆ ບ້ານມາໂຮມກັນ ແມ່ນຫຍັງຫັ້ນນະ ແມ່ນຮັກສາປ້ອງກັນໂຄວິດ."

ໃນປີນີ້ຫຼາຍແຂວງຢູ່ລາວ, ໄດ້ຈັດງານປະຊຸມເຜີຍແຜ່ທັມມະນູນ ວ່າດ້ວຍການຈັດຕັ້ງ ແລະ ການເຄື່ອນໄຫວສາສນາ ຄຣິສຕຽນ ຂອງສູນລວມຄຣິສຕະຈັກຂ່າວປະເສີດ ແຫ່ງ ປະເທດລາວ, ເພື່ອຄຸ້ມຄອງການເຊື່ອຖື ແລະ ການເຄື່ອນໄຫວ ສາສນາຄຣິສຕຽນ ໃນລາວໃຫ້ດີຂຶ້ນ, ແລະ ທັງເປັນການປົກປ້ອງບໍ່ໃຫ້ເກີດເຫດການອັນບໍ່ພຶງປາຖນາ.

ຄໍາເຫັນ (0)

ເບິ່ງຄວາມເຫັນທັງໝົດ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ