ຂະໂມຍ ລັກພຣະພຸທຮູບ

ອະວາຣີ
2021-02-08
Share
ຂະໂມຍ ລັກພຣະພຸທຮູບ ພຣະພຸທຮູບ ຢູ່ວັດດອນຊຽງ ໜອງບຶກໃຕ້ ເມືອງສີໂຄດຕະບອງ ນະຄອນຫຼວງວຽງຈັນ ທີ່ ຖືກຂະໂມຍລັກຕັດເອົາສຽນ ໄປເພື່ອຫວັງລວຍ ທາງລັດ
ພາບປະກອບ: ນັກຂ່າວພົລເມືອງ

ຄົນຮ້າຍ ທຳຣາຍ ພຣະພຸທຮູບ ຄືໄດ້ລັກຕັດເອົາສີສະ ຫລື ຫົວ ຂອງພຣະພຸທຮູບອົງນຶ່ງ ຢູ່ວັດດອນຊຽງ-ໜອງບຶກໃຕ້ ເມືອງ ສີໂຄດຕະບອງ ໃນເຂດນະຄອນຫລວງວຽງຈັນ. ພຣະພຸທຮູບ ທີ່ ຖືກທຳຣາຍ ເປັນອົງໃຫຍ່ສົມຄວນ ແລະ ກໍເປັນພຣະພົມສີ່ໜ້າ. ປັດຈຸບັນ ເຈົ້າໜ້າທີ່ກຳລັງຕິດຕາມ ຫາຄົນຮ້າຍຢູ່, ອີງຕາມຄຳໃຫ້ການຂອງຊາວບ້ານ ທີ່ຢູ່ໃກ້ວັດ.

ມີຊາວບ້ານຄົນນຶ່ງ ທີ່ຢູ່ໃກ້ວັດ ທີ່ບໍ່ປະສົງບອກຊື່ ຢູ່ບ້ານໜອງບຶກໃຕ້ ເລົ່າສູ່ວິທຍຸເອເຊັຍເສຣີ ຟັງໃນວັນທີ 2 ເດືອນ ກຸມພາ 2021 ນີ້ວ່າການລັກ ພຣະ ບໍ່ແທ້ໆ ກໍບໍ່ຄ່ອຍເກີດຂື້ນປານໃດຢູ່ເຂດນີ້:

“ໜອງບຶກ ວັດບ້ານໜອງບຶກ ເມືອງສີໂຄດນີ້ແຫລະ. ເຫດການນີ້ ກໍບໍ່ຄ່ອຍມີໜ໋າ ຫາກໍມີນີ້ແຫຼະ ຕັດຄໍພຣະນີ່ແຫຼະ ພວກບາບເດີ ບໍ່ຮູ້ຈັກ ພວກບາບ ພວກບໍ່ແມ່ນສາສນາພຸດພວກບໍ່ ນັບຖືສາສນາພຸດ ຄົນດີຄົນສາສນາພຸດເຂົາ ບໍ່ກ້າເຮັດດອກ.”

ຊາວບ້ານໜອງບຶກ ອີກຄົນ ກໍກ່າວວ່າເຫດການ ທຳຣາຍ ພຣະພຸທຮູບນີ້ ເກີດຂຶ້ນຫລາຍມື້ແລ້ວ ແລະປັດຈຸບັນ ພຣະສົງສັມມະເນນ ແລະຊາວບ້ານ ກໍໄດ້ຮ່ວມກັນສ້ອມແປງຄືນແລ້ວ; ພຣະອົງນີ້ຕັ້ງຢູ່ແຈນຶ່ງຂອງວັດ ບໍ່ໄດ້ຢູ່ໃນໂບດ:

"ເພິ່ນສ້ອມຄືນໃໝ່ແລ້ວ ເພິ່ນສ້ອມແລ້ວ ເພິ່ນຢູ່ມຸມລຸ່ມພຸ້ນ ບໍ່ແມ່ນຂອງອົງໃຫຍ່ ເພິ່ນສິສ້າງໄວ້ຢູ່ມຸນນີ້ຫັ່ນໜ໋າ.”

ສ່ວນຊາວບ້ານອີກຄົນນຶ່ງ ອະທິບາຍສາເຫດ ເປັນຫຍັງຄົນຮ້າຍຈຶ່ງມັກ ຕັດເອົາສຽນພຣະວ່າ ເວລາຫລໍ່ພຣະ ຜູ້ຫລໍ່ມັກຍັດຄຳໃສ່ໃນ ສຽນ ຂອງພຣະພຸທຮູບໄວ້, ຄົນຮ້າຍຈຶ່ງຊອກລັກ ຕັດເອົາສຽນພຣະໄປທຸບຄົ້ນເອົາຄຳ:

“ພຣະກໍພຣະແບບ ບໍ່ໄດ້ເຮັດຈາກວັດມີຄ່າອັນໜ໋າ ຄົນສ່ວນຫຼາຍຍັງຄິດວ່າ ເວລາທີ່ຫລໍ່ພຣະຫຼໍ່ຫຍັງ ເຂົາມັກເອົາທອງຄຳໃສ່ຫົວພຣະ ອັນນະບາງທີ່ກໍເອົາໄປກໍໄປທຸບເບິ່ງທາງໃນ ມັນກໍເຄີຍມີຢູ່ ລັກພຣະລັກຫຍັງ ດົນໆຈັງເຫັນເທື່ອນຶ່ງ.”

ກ່ຽວກັບການຊອກຫາຄົນຮ້າຍນັ້ນ ວິທຍຸເອເຊັຍເສຣີ ໄດ້ຕິດຕໍ່ໄປຫາເຈົ້າໜ້າທີ່ ປກສ ນະຄອນຫຼວງວຽງຈັນ ແຕ່ເຈົ້າໜ້າທີ່ບໍ່ສະດວກ ໃຫ້ຄວາມກະຈ່າງແຈ້ງກ່ຽວກັບບັນຫາດັ່ງກ່າວ.

ຜ່ານມາ ຄົນຮ້າຍລັກພຣະພຸທຮູບຫຼາຍເທື່ອ ຢູ່ປະເທດລາວຕົວຢ່າງປີ 2018 ກຸ່ມຄົນຮ້າຍ ລັກພຣະພຸທຮູບ ຢູ່ນະຄອນຫຼວງພຣະບາງ ເຖິງ 5 ຄັ້ງ. ຄັັ້ງທໍາອິດ ຢູ່ວັດອາພັຍ ເດືອນ ມົກກະຣາ ພຣະເສັຽຫາຍ 5 ອົງ, ຄັ້ງທີ່ສອງ ຢູ່ວັດທາດຫຼວງ ໃນເດືອນກຸມພາ ເສັຽ 3 ອົງ, ຄັ້ງທີ່ສາມ ຢູ່ວັດຈູມຄ້ອງ ໃນເດືອນກໍຣະກະດາ ເສັຽ 5 ອົງ, ຄັ້ງທີ່ສີ່ ຢູ່ວັດຊຽງທອງ ໃນເດືອນກັນຍາ ເສັຽ 6 ອົງ ແລະ ຄັ້ງທີ່ຫ້າ ຢູ່ວັດໂພນໄຊ ເສັຽ 2 ອົງ. ຈໍານວນພຣະພຸທຮູບ ທີ່ເສັຽໄປທັງໝົດ 21 ອົງ.

ປະຈຸບັນ, ວັດຫຼາຍແຫ່ງ ໃນນະຄອນຫຼວງພຣະບາງ ໄດ້ເພີິ້ມການເວນຍາມ ແລະ ເພີ້ມມາຕການ ໃນການຮັກສາຄວາມປອດພັຍ ເພື່ອປ້ອງກັນ ບໍ່ໃຫ້ພຣະພຸທຮູບເສັຍຫາຍອີກ.

ກ່ອນນັ້ນ ໃນບໍຣິເວນວັດເຫລົ່ານີ້ ບໍ່ໄດ້ຕິດຕັ້ງກ້ອງວົງຈອນປິດ ແລະ ເປັນວັດທີ່ຄົນທົ່ວໄປສາມາດເຂົ້າອອກໄດ້ງ່າຍ ໂດຍບໍ່ມີ ການເຝົ້າຍາມ ແຕ່ຫລັງຈາກເກີດເຫດ ເຈົ້າຫນ້າທີ່ບ້ານ ກໍພາກັນເວນຍາມ ເພື່ອຮັກສາພະພຸທຮູບ ທີ່ຍັງເຫລືອຢູ່ ເພາະຢ້ານກຸ່ມ ຄົນຮ້າຍ ກັບມາລັກອີກ.

ເຈົ້າໜ້າທີ່ນະຄອນຫຼວງພະບາງ ທ່ານນຶ່ງ ທີ່ບໍ່ປະສົງບໍ່ຊື່ແລະສຽງ ຊີ້ແຈງວ່າ ຄົນພາຍໃນວັດຮ່ວມມື ກັບກຸ່ມຄົນຮ້າຍ ຈຶ່ງສາມາດລັກ ພຣະພຸທຮູບ ອອກໄປໄດ້ຢ່າງວ່ອງໄວ ໂດຍບໍ່ໃຊ້ເວລາດົນ ຊຶ່ງກຸ່ມຄົນຮ້າຍ ອາດເປັນກຸ່ມດຽວກັນ ທີ່ຫາລັກພຣະພຸທຮູບຕາມວັດຕ່າງໆ ໃນລາວ ໂດຍສະເພາະ ພຣະພຸທຮູບອົງເກົ່າແກ່ ແລະສັກສິດ ເພື່ອເອົາໄປຂາຍ ໃຫ້ຄົນຕ່າງປະເທດ ທີ່ຄ້າຂາຍ ຫລື ສະສົມວັດຖຸ ບູຮານ ພຣະພຸທຮູບອົງເກົ່າແກ່.

ເຈົ້າຫນ້າທີ່ທ່ານນີ້ ກ່າວຕື່ມວ່າ ກ່ອນຫນ້ານີ້ ກໍມີເຫດການລັກພຣະພຸທຮູບ ຫລາຍຄັ້ງ ຕາມວັດຕ່າງໆ ໃນນະຄອນຫຼວງພຣະບາງ ຊຶ່ງໃນບາງກໍຣະນີ ກໍສາມາດນຳຫາ ເອົາຄືນມາໄດ້ ແຕ່ໃນຫລາຍກໍຣະນີ ກໍຫາຍສາບສູນໄປເລີຍ. ທາງການຢາກໃຫ້ ປະຊາຊົນ ໃຫ້ຄວາມຮ່ວມມືເປັນຫູເປັນຕາ ຊ່ວຍແຈ້ງເຈົ້າຫນ້າທີ່ ທັນທີ່ເວລາພົບເຫັນເຫດການລັກພຣະ.

ເຫດການລັກພຣະພຸທຮູບອົງທີ່ສຳຄັນ ເກີດຂຶ້ນເມື່ອປີ 2015 ທີ່ວັດອົງຕື້ ຢູ່ນະຄອນຫລວງວຽງຈັນ. ໃນຕົ້ນປີນັ້ນຄົນຮ້າຍໄດ້ເຄື່ອນ ຍ້າຍພຣະພຸທຣູບອົງໃຫຍ່ ເກົ່າແກ່ຕັ້ງແຕ່ ສມັຍພຣະເຈົ້າໄຊຍະເສດຖາທິຣາດ ອອກຈາກວັດອົງຕື້ ມະຫາວິຫານ.

ໃນເວລາປະມານ 11 ໂມງເຊົ້າ ຂອງ ວັນສຸກ ຄົນຮ້າຍໃຊ້ຣົດ Toyota Land Cruiser ມາຂົນເອົາ ພຣະພຸທຮູບ ຂຶ້ນໃສ່ຣົດ. ຖ້າມກາງຄວາມຕົກຕະລຶງ ຂອງປະຊາຊົນອອກຕົນຍາດໂຍມ ພາຍໃນວັດອົງຕື້ ທີ່ມາເພນ ແລະ ໄດ້ເຫດການ ດັ່ງກ່າວ. ແຕ່ຍ້ອນເຫດຜົນ ຫລື ສາເຫດຫຍັງ ຄົນຮ້າຍ ຊ້ຳພັດນຳເອົາພຣະອົງນັ້ນກັບຄືນມາ ໃຫ້ແກ່ວັດອົງຕື້ ໃນເວລາປະມານ ສີ່ໂມງເຄິ່ງ ຕອນບ່າຍ ຂອງວັນດຽວກັນ.

ການຄ້າວັດຖຸບູຮານອັນເກົ່າແກ່ ເປັນການຄ້າທີ່ຜິດກົດໝາຍ ແຕ່ກໍເປັນການຄ້າທີ່ຜູ້ຄ້າໄດ້ເງິນຫລາຍ ໄວແລະກໍງ່າຍໆ ຍ້ອນດັ່ງນັ້ນ ຈຶ່ງເປັນການຄ້າ ທີ່ແຜ່ລາມໃນທົ່ວໂລກ ໂດຍສະເພາະ ໃນເຂດເອເຊັຍຕາວັນອອກສ່ຽງໃຕ້ ຕົວຢ່າງ ເມື່ອປີ 2019 ເຈົ້າໜ້າທີ່ໄທຍ ກໍກວດເຫັນພຣະພຸທຮູບ ຫລາຍອົງຊຸກເຊື່ອງໄວ້ ໃນກຳປັ່ນຂົນສົ່ງສິນຄ້າໄປຕ່າງປະເທດ ຍຶດ ແລະ ສົ່ງພຣະທັງໝົດຄືນ ໃຫ້ວັດຕ່າງໆໃນປະເທດໄທຍ.

ນັກວັດຖຸບູຮານຄະດີ ທ່ານນຶ່ງຢູ່ບາງກອກ ປະເທດໄທຍກ່າວວ່າ ຄົນຮ້າຍລັກພຣະພຸທຮູບ ກໍເພາະມີຕລາດຮັບຊື້ ຫລື ມີຄົນຕ້ອງການ. ຮ້ານຂາຍພຣະມີເຕັມນັບແຕ່ບາງກອກ ຈົນເຖິງສິງກະໂປ ຮອງກົງ ແລະ ມະຫານະຄອນນິວຢອກ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ